* قبل ما أبدأ الحلقه حابه ارد علي تعليق كل شويه بيتكرر وهو (يااااه ايه الحب ده.. يوسف بيحبها أوي معقوله بعد الحب ده كله سابها.. هموت وأعرف سابها ليه.. مش متخيله أنه اتخلي عنها بعد ده كله!).. حبايبي.. الروايه اسمها اخر ايام الحب.. يعني مريم بتقول انها مبقتش مؤمنه ولا بتصدق أن في حد ممكن يحب بجد لسبب واحد أنها شافت مع يوسف كل ألوان وأنواع الحب كل الاحتواء كل الوعود كل التضحيات كل حاجه يوسف عملها لدرجه انها بقي عندها يقين أن يوسف ده مفيش حد ممكن يحب حبيبته ويوصل معاها للدرجه اللي يوسف وصلها مع مريم.. عشان كده صدمتها كانت أكبر.. وفجأه ومن غير معاد ولا سبب واحد اتخلي عنها.. بس ده من وجهه نظر مريم.. لكن هل يوسف فعلا كده؟ هل انتوا فهمتوا من شخصيته ودماغه أنه ممكن يسيب مريم بسهوله؟ هل هيقبل انها تكون لغيره هل فعلا هيكون خاين للوعود.. بصوا الروايه فيها احداث غير متوقعه شويه وعارفه أنها هتزعلكم لأنكم بتحبوا البطل المثالي لكن خلينا واقعيين شويه.. المهم عايزه اقولكم ياريت تستمتعوا بكل لحظات الحب اللي بين مريم ويوسف ف الماضي وتعيشوها علي انها البدايه ومش كل ما تشوفوا مشهد حلو تقولوا يا تري ليه سابها بعد الحب ده كله.. استمتعوا يا جماعه وسيبوا الروايه تاخد مجراها ومتكرهوش يوسف أو تفكروا في سبب جوازه من رقيه لأني بحبه جدا 😂
أسيبكم مع الحلقه....
أخر أيام الحب
الحلقه الثالثه عشر
بقلم/ ايمان حجازي
إيمووو
يوسف وقف عند باب البيت وأمها بصتله بأستغراب مش متخيله أنه يجي هنا دلوقتي أو حتي يجي بيتهم اصلا! هي مش ناسياه أبدا لأنها كانت بتحاول علي قد ما تقدر تنسي اللي وقف في وشها مره وهددها ودي حاجه عمرها ما حصلت معاها.. يا تري مدرس الفرنساوي بتاع بنتها جاي ليه النهارده..؟ بصت له بكره وهو فهم نظرتها دي وخد نفس طويل عشان يستعد لما هو قادم..
وفاء ربعت ايديها: أفندم... خير؟
يوسف: خير أن شاء الله.. هنتكلم علي الباب؟
وفاء: انت ملكش انك تدخل أصلا.. فقول انت عايز ايه؟
يوسف: لا ما انا محتاج اتكلم معاكي في حاجه محتاجه قاعده.. فأتفضل ولا انتي تتفضلي معايا تحت في أي كافيه؟
وفاء: وانت مفكر اني عندي وقت ليك؟
يوسف دخل وقعد علي الكرسي اللي قدامها من غير حتي ما يستأذنها: طالما معندكيش وقت يبقي نتكلم هنا.. اتفضلي عشان انا كمان عندي شغل..
وفاء بصتله بأستفزاز ومش فاهمه ايه اللكنه اللي بيتكلم بيها دي وايه الثقه دي؟ حست أن وراه حاجه وهي كمان كان عندها فضول جدا تعرف هو جاي ليه وعايز منها ايه والأهم من ده كله ايه الرسميه اللي هو فيها دي.. لابس بدله شيك جدا وشكله مقدرتش تنكر أنه جنتل..
مريم كانت واقفه وراهم في قمه توترها ومش متخيله أن ممكن والدتها ترفض..
وفاء: مدرس الفرنساوي بتاع بنتي عايز ايه يا تري؟
يوسف: اولا انا مش مدرس الفرنساوي.. انا اسمي يوسف منير الصياد..٢٨ سنه.. بشتغل محاسب في شركه AMR للعقارات.. وبكل بساطه بحب مريم وجاي اتقدم لها...
أنت تقرأ
أخر أيام الحب
ChickLit" خايف بكره تندمي إنك في يوم حبيتيني " جمله بترن في ودانها كل يوم من خمس سنين ، ولو حد سألها وقتها عن ردها كانت هتقول أن حبه الحاجه الوحيده اللي عمرها ما هتندم عليها .. لو كانت عارفه وقتها أن القدر ممكن يلعب معاها وييجي يوم وتبقي الجمله دي حقيقه وت...
