جبروت الحنين ..

بارت ٣٦

جبروت_الحنين
بارت ٣٥
نورا ناصر ..

طلع الدكتور كال البقية بحياتكم ..

لطمت وجهي وانهاريت ، ما اعرف شنو اسوي ، ماجد ماكو يمي راح يجيب جيهان!!

مديت ايدي الترجف للتليفون اريد اخابر ماكدر ، اريد اتمالك نفسي ماكدر ، دموعي بللت التليفون وشهكاتي صار صوتها مسموع على طول الردهة ، الممرضات بجانبي ويحجون وياي ويهدأوني بس اني مجاي افهم من كلامهم شي ..

دكيت الرقم كوة اجاني صوته لماجد .
كال ؛ ها يقين احنا بالطريق دقايق ونوصل ..

خليت ايدي ع حلكي اكتم شهكاتي ، خفت لا اكوله ويسوي حادث ..

كتله يلله استعجلوو

كال شكو شبيها صبا ..

كتله تعبانة ..

كال يلا يلا جايين ..

كعدت يم باب الغرفة بالكاع وابجي منهارة والاطباء والممرضات طابين طالعين من الغرفة ..

لهناك ووصل ماجد وجيهان بس اجت عينهم عليه واني كاعدة بالكاع ومنهارة ، ركضوا اثنينهم للغرفة ثواني واشتعلت المستشفى بالصريخ والنحيب ..

ابجي واباوع لماجد خطية وحيد واحنا بغربة ومحد يمنا ..

اجو اخذوا جثتها للثلاجة ، جيهان وماجد كلش انهاروا كعد ماجد ع الكاع ويبجي ويمه جيهان مخلية راسها على كتفه وتهذي وتبجي وواحد يصبر بالثاني ..

حسيت نفسي بينهم غريبة واحتاريت شنو اتصرف ..
لحد ماتقربت منهم وصرت اصبر عليهم وابجي ..

رفعت راسها جيهان تباوعلي منهارة ودموعها تجري
تكولي يقين راحت اختي ماتت صبا هيه امي وهيه ابويه فتحت عيني عليها مشفت لا ام ولا اب بس شفتها وحتى من تزوجت ماتركتني اخذتني وياها ليش هسه تتركني واني بامس الحاجة الها ..

خليت ايدي على حلكي وظليت اشهك وابجي قهرني كلامها ، الانسان لو شكد مايعيش تاليته يندفن جوة التراب ومايترك بس العمل الطيب والكلمة الحلوة .. ..

ماتت ليلة الجمعة ونفساء يمكن الله يحبها واختار الها هاي الموتة حتى يغفر الها ذنوبها .. 

تمالك نفسه ماجد وكام اتصل بعمامي وبخال صبا وباصدقائه اجه واحد منهم رجعنا للبيت ..

وقع الخبر كان مؤلم وخصوصا على عبدالله مريض القلب تخربط بلحظتها ودخل مستشفى ، بقوا  يمه مرة خال صبا و اولاد شباب لان ماجد كان مشغول بجنازة المرحومة ..

توفت صبا المغرب يوم ثاني الصبح بلشوا اقاربنا الي بمحافظتنا يجون ..

جيهان كانت منهارة وكاعدة بالاستقبال والنسوان يجون يعزوها ..

اني استلمت المطبخ وظليت احضر بالجايات والمي ..

انهمكت بالشغل من الصبح ومحد وياي وحدي جاي اريد ادير الهيل على الجاي وجان اسمع صوت امي وراي ..

التفتت وحضنتها قوي وظلينا نبجي اثنينه  ..

تبجي وتحجي خطية الله يرحمها راحت شهيدة توها جايبة ونفسة الله يغفر الها ..

بجيت كتلها يمه وماجد شيصبره ؟ وبنته بعدها بالخدج وعبدالله بالمستشفى وتحت المراقبة مصيبة وصابتنه يمه ..

جاي احجي ويا امي وجان اشوف عالية وراها طبت للمطبخ ، شكد مشتاقتلها يا الله بكد الدنيا كلها ..

رحت استقبلتها ، حضنتها حييل وظلينا نبجي على فراكنا عن بعض لو مصيبة اخونا ..

وخرت من حضن عالية وانحضن بسرعة من وحدة واجاني صوت اختي اشتياق وهيه تحجي باذني
كالت يقين وكملتها بجي ..

بقيت متصنمة مامديت ايديه ولا طوقتها بحضن مو بيدي بعده كلبي شايل عليها ..

وخرت مني خجلانة ونصت راسها ..
عالية كالت ؛ يقين كافي زعل احنا خواتج وهسه احنا بعزا الدنيا ماتسوة بعد ..

دنكت راسي وهزيته بقبول ، ايد نمدت لخدي ورفعته باوعت شفتها اشتياق  احتضنت خدي بيديها وتباوعلي وعيونها مدمعة ..

باوعت لبطنها شفتها كبيرة ، استخطيتها وابتسمت بوجهه وكلام عالية يرن بأذني (الدنيا ماتسوة) ..

كالت ؛ اني بشهري هسه ومن عرفت بصبا متت من الخوف واجيتي على بالي انتي خايفة اموت وماتسامحيني ..

كتلها ؛ لا اسم الله عليج صبا خطية الله يرحمها عليها ٨ اشهر وبسبب خطورة وضعها سوولها عملية ..

كالت ؛ والطفلة شلونها هسه ؟

كتلها ؛ والله زينة بس لازم تبقى بعد بالخدج ..

_ ومنو يمها هسه ..
_ خطية وحدة جيرانه خوش مرة تبرعت وبقت يمها ..

عالية ؛ ولج يقين ليش حاظرتنه كلنا احنا اخواتج شون نطاج كلبج تكاطعينه ؟

دنكت راسي وحجيت بنبرة حزن ؛ كتلها ما ردت اعكر صفو حياتكم خصوصا الي صار وياج بسببي ، باوعت لاشتياق ونصيت ..

بقينه نسولف ووراها دخلت ايات وبناتها حبيباتي كبرانيين وايات تعبانة كلش
كتلها منو جابج ؟
كالت ؛ طالب جابنا وهنا خالة نجية و البنات شيماء واسماء ..
كتلها ؛  ها وبعد منو اجه وياكم ؟ مصطفى وياهم ؟

كالت ؛ اي جابته خالة ويانه وهم بشير وخالو سعد اجوي..

رف قلبي كتلها ها رايحة اسلم عليهم ..
رحت للاستقبال جيهان اموته روحه تضرب على خدها ومكابلة بنات خالاتها وتدك وتطلم وتبجي وحجيها عن اختها يكسر الكلب  ..

باوعت ادور خالة نجية وبناتها من بين النسوان صارن مقابيلي رحت عليهن اخذت مصطفى بسرعة من حضنها ضميته لقلبي حييل ..

كامت على حيلها كالت ولج سلمي بالاول وحضنتها وبوستها وكالت البقاء بحياتكم ..
واني بيدي مصطفى سلمت على شيماء واسماء ماعندي وياهن شي وباوعت هم زين ماجاية بيداء ما اشتهيها ولو هيه مو صاحبة واجب بس ارتاحيت من مشفتها ..

اخذت مصطفى اريد اروح يم جيهان اجت يمي خالة نجية وخمشته مني كالت جيبي لايخترع من صوت الصريخ ..

انطيته الها ورحت يم جيهان وخرت البنات من يمها ووصيت وحدة تجيب مي الها ..

لزمتها من ايديها واشوف وجهه احمر من الدك ..
كتلها كافي ارحمي نفسج هيج راح تأذينها بقبرها ..

صااحت بصوت مألوم وموجوع ولج يقين اختيييي ..
صوتها وهيه تكول اختي موتني كطعت قلبي من القهر خليت راسها على صدري وامسح عليه واقرا عليها ايات قرأنية بلكي تهدأ ..

دقايق وشربتها مي وفسلت وجهه والجو حار كلش والبيت زحمة ناس طابة وناس طالعة صار وجهه بلون الطماطة ..

للعصر رادو يروحون بيت خالة نجية توسلت بيها تبقى عمود اشبع من مصطفى كوة قبلت تبقى ..

وخواتي همين بقوا ، ثالث يوم الفاتحة الكل راح وصار البيت فارغ وعبالك هسه صبا ماتت من صفحة جيهان ومناك ماجد والبيت والجهال من صفحة ثانية والطفلة
طلعوها من الخدج وصارت كلها مسؤؤليتي ..

جيهان مو بحال احد منزوية ويا حزنها واذا فاتو من يمها  الجهال تحضنهم وتشهك بجي ..

الطفلة اسميناهه الاء لان صبا مسميتها وهي ببطنها من عرفت بيها بنت فرحت كلش لان جتي على ٣ اولاد ذكور ..

وصارت الطفلة مسؤؤليتي وصعبة كلش لان وضعها حرج وصغيرة كلش وانولدت قبل اوانها ، ومااعرف الها واخاف اذيها ، ظليت اصيح لجيرانه تجي تعاوني بيها ..

حمدت الله مو وقت دوام وعطلة شهر ٨ جان هسه تركت حتى الكلية على هالوضع هذا الي بالبيت ..

ومرت اربعين يوم على وفاتها ، جيهان وماجد واقارب صبا راحوا يزوروها بقبرها واني بقيت يم الاطفال ..

بعد مارجعوا رجع وياهم خال صبا وجيهان ..
رجعوا العصر وناموا تعبانين واني بقيت اسويلهم العشا .. ورة العشا صبيت جاي واخذته للاستقبال قدمته الهم وكعدت يمهم ، هواي انفتحت مواضيع ومن بينها ..

خال صبا ؛ بنيتي جيهان حضري اغراضج حتى تروحين وياي باجر اخذج لبيتنه ..

سكتت جيهان ودنكت ، ماجد ظل يوزع نظراته المصدومة بين جيهان وخالها ..
بعد ثواني صمت كال ؛ ليش ابو علي هذا بيتها ليش تاخذها وياك ..

ابو علي ؛لا ميصير ابو عبدالله ميصير تبقى ببيت غريب ..

ماجد ؛ اني مو غريب اني مثل اخوها وهيه حسبة اختي ومثل يقين بالضبط ..

_ انت تكول هيج الناس ماتكول هيج تاكل وجهي وتطلع حجي اذا تريد ولو مو وكته هالحجي بس اعقد عليها خالة جهالك احسلك من الغريبة ..

انتفض ماجد وكال ؛ لا ابو علي مامقبولة منك بعده قبر مرتي مانشف وانت تحجي هالحجي وبعدين جيهان مثل بنتي اول ايام زواجنا جانت طفلة واحنا تاخرنا وماصار عدنه اطفال اول ٣ سنوات جانت من تتمرض تنام بيننا اني والمرحومة ، وجنت بيدي اشربها دواها
واسويلها كمادات هسه جاي تكولي اعقد عليها لا مامقبولة منك ..

الكلام ماكان ينفع ويا خال جيهان ، يوم ثاني حضرت ملابسها بجنطة  واجتني للمطبخ ..

تبجي بنحيب حضنتني كالت يقين فدوة الجهال امانتج ماجد تعبان وخسارته مو شوية ، عبدالله مريض وقلبه فدوة بعينج خلي وانطي علاجه بالموعد والوة هاي حبيبة امها قبل لتصير جانت فرحانه بيها جانت تكول هاي وكافي بعد ما اخلف و ادللها ما شافتها ولج يقين ماشافتها حتى ..

وانهارت بالبجي صاح عليها خالها وطلعت يا جاهل لتشوفه تحضنه وتبجي تمنيت خالها يرف قلبه ويكولها ابقي بس ماصار هالشي ..

طلعت وصار كل شي مسؤؤليتي من ايام جانت تساعدني هسه وحدي  .. وتعودت عليها جانت الي اخت وصديقه ..

بعد اسبوعين من اربعين صبا ، كعدت ماجد لحتى يروح للشغل ، كعد عيونه حمرة ومورمة  ..

طلعت من الغرفة وحضرت الريوك اجاني للمطبخ كال حضريلي جنطة ملابسي اريد اروح للنجف ازور قبر صبا ..

كتله ان شاءالله ..

كمل كلامه كال حلمت بيها كوليلي يقين خو ما قصرت وياها اني خو ما اذيتها ريحيني الله يخليج ..

لزمته من كتفه كتله لا والله مقصرت دللتها  والله وصحيح مكذبت عليه ، ماجد حقاني مدللها ومحتوي اختها ومن تتمرض يشيلها على كفوف الراحة بس من جانت تسمعني حجي جان ميقبل ويصدها ومرة سمعته يكول الها ما اريدج تصيرين مكروها حبي الكل حتى الكل يحبج .. 

كام على حيله وهيئته مبين عليها التعب كال ديري بالج على الجهال

كتله بعيوني خوية ..

كال والله متعبيج احنا كلش ..ومبقى شي للدوام من هسه اني افكر والله ..

كتله عيوني الك اذا تريد ااجل الدوام ميخالف ..

كال لا لا اله منلكي حل ونقنع ابو علي ترجع جيهان
يقين حبابة المغرب اني يمكم .. سبح وبدل وراح ..

رحت للمطبخ فتحت الثلاجة ودورتها
ناقصنه هواي حاجات خطية تعبان ماجد ونسى يتسوك ..
واني هسه ضروري اروح للسوبر ماركت !!!

باوعت للجهال وراي شفتهم
كل واحد يريد حاجة
هذا الي يكول اريد جبس ذاك عصير ميزو وذاك ببسي .
خوش ولكم اني رايحة ابدل انتوا البسوا نعلكم وانتظروني يم الباب هسه اجي ..

رحت غسلت وجهي فرشت اسناني
ورحت للغرفة مكيجت مكياج خفيف
طلعت تنورة بينصل ميديم سودة وقميص اسود  ..
رداناته خرط من يم المعصم .. لبست شال
طلعت حفايتي  ..

اخذت جنطتي وفلوس وطلعت ..
شفت الجهال واكفين يم الباب ..
باوعت للصغار يوسف ومحمد
شكلهم عبالك جايين من افغانستان ولابسين كل واحد تك نعل ..

عبدالله الكبير باوعلي من فوك الجوة وخنزرع عيونه ويحجي بخشونة عود هو رجال
_ احنا شنو رايحين حفلة وهيج لابسة هو هنا محل ابو محمد ..
اشرت اله واني رافعة تك حاجبي : ولك انت طركاعة سودة معابلك طفل عمره ١٠..

اخذت الصغار ورحت غسلت الهم وبدلت الهم .. والوة مبدلة ونايمة وديتها عند الجيران بس اتسوك ارجع اخذها ..

وطلعنه ..
مشينه شوية وصلنه لمحل ابو محمد شفنه معزل مافاتح
عبدالله .يأشر ع المحل ومعصب عود
:- .. اووو وهذا معزل ابو محمد منين راح نروح نشتري ..

فكرت شلون هذول يخبصوني اذا مااشتريلهم وشياكلون شيشربون لابيض لا جبن بالبيت ..
انداريت الهم رفعت اصبعي السبابة وبنبرة تهديد
:- اسمعوا امشوا نروح للسوبر ماركت الي على الشارع تمشون عدل ولاتخبلوني سمعتوا
هزولي براسهم اي وتشع البراءة من عيونهم..
اخذتهم سحل
اني لازمة حمود  وعبدالله  لازم الاخ ..
مشينه وصلنه للسوبر ماركت .
دخلت اخذت سلة وظليت اخذ الحاجات الي محتاجتها ..
والتهيت ..
انداريت شفت الجهال ماكو ..

يربيي شون نسيتهم واني ممتعودة اطلع جهال وياية
باوعت اكو مثل المصطبة وطويلة ونايم عليها واحد اعرفه نفس الراس والشعر والجسم ..

ياانتبهت هذا بشير !!! بقيت صافنة ثواني عليه اتامله ويعصف بيه الحنين ..
واتسائل شعنده نايم هنانه .

تذكرت الاطفال .
خلي اروح ادورهم مدري وينهم لايضيعون شيفكني ..
دورتهم كل واحد بصفحة خبلوني اجيبهم منا اوديهم منا ..

خلصت كلشي ورحت احاسب الكاشير
حاسبته واخذت كل شي ودااطلع
باوعت لبشير والله ضوجة كون هسه اكعده شوية اريد اشوف ردة فعله ..

اخذت علاكة بيها اغراض وشمرتها قريب منه تصنعت انو وكعت مني وسوت صوت ..

اباوعله وهو ماكو ولاحس عبالك ميت ..
شلتها من الكاع اشرت للجهال يلله ولكم امشوا
طلعت قبلهم ..

امشي وبيدي العلاليك ..
وهذول يروحون منا ويرجعون منا
باوعتلهم ووكفت حسيت ناقصهم واحد قطبت حواجبي ..

_ انتم مو ثلاثة لو اني غلطانة اشو عددكم بس اثنين ..

عبدالله  مصدوم .. يا يا عمة نسينه حمادة بالماركت ..
بعصبية :_ وعمة الي تعمك لك غير دير بالك على اخوتك ..

بصياح :_متشوفيني لازم يوسف وانت الي عليج تلزمين حمادة .

بنبرة هادئة متفهمة :_ اي هم صحيح اني الصوج مني الزم اخوك زين راجعين ييله .

رجعت للماركت وادور على حمادة
والقيت نظرة على بشير نايم وبعاشر نومة ..
لو بس اعرف شعنده هنا اكيد جاي يراقبني ..

باوعت واشوف حمادة لازم عصير القنينة مالته من زجاج وشوية كبيرة وياشرلي بيها ويكول اريدها ..

حسيتها حتوكع منه وبالفعل وكعت على الارض وسوت صوت كلش قوي خاصة انو الماركت فارغ ومابي هواية عالم ..

وعلى أثرها الوكعة شفت بشير اتحرك وكام يتمطى ويتثأب .. فتح تك عين وبعده منعس وصار يباوعلي ..

يتبع ..