جبروت الحنين ..

بارت ١٣

جبروت_الحنين
بارت ١٢
نورا ناصر ..

فتحت المسج واحس ايدي ترجف حتى وهو بعيد اخاف منه والله اني بوضع كلش مايسمح احصلي رزالة هسه ..

تجرأت وفتحتها .. كاتبلي ردي يلمونا ليزا ردي الاميرة ديانا الملكة اليزابيث مو تردين احد يوديج لبغداد تصخمين بالكلية ردي ..

طكيتها ضحكة شكبرهاااا واباوع لجهال عالية ظلوا يضحكون وياي وهذا ابنها الصغير استوة يمشي فاتح رجلينه ويخطي اجه يمي يضحك وبينت اسنانه شكد حلوة ضحكته ..

بعده بيدي الفون وجان يرررن برقم بشير  ... خرعني
بس فتحت خط وخليته على اذني ..

جاوبني بألووووووو طويله كلش ..
ووراها كال : متردين عيني انجلينا جولي سمعت بيج تردين احد يوديج لبغداد ..

جاوبته : اي صحيح وخابرت طالب وكال ميخالف ..

جاوبني : لا طالب ملتزم وعنده شغل هالايام توة بدا  يشتغل العصر بمختبر طبي وخاف يبطلوا اذا من اولها اجايز اني اوديج..

كتله بنبرة تهكم  : صدك شعجب منك من الشيطان ..

_ لعد شعبالج لج اني ابو الوكفات اذا مااوكفلج المنو اوكف ؟

_ اروح فدوة لرموشك اني ..

ضحك كال : فديتج برموشي شعرة شعرة ..

_اي  بس بصراحة اني اخاف ارووح وياك !

_ لتخافين ماتحبلين وحتى اذا حبلتي ماتخلى عنج انتِ وابني ..

_ عزا بعينك شكد صاير منحرف .هاي عود تريد تطمني اطلع وياك . لعد ناخذ ويانا ماما او خالة نجية ..

_ حاجيتها لعمتي وكالت مابيه رجليه يوجعني ومن هالحجي ..

وامي تدرين بيها اذا اخذناها ويانا تودينه لبغداد  ترجعنه ميتين ويمكن منلحك نوصل اله ننجلط بالطريق ونموت ..

_ بصراحة اقنعتني .......... زين انتَ طردتني وكلت بعد متجين للبيت اذا رحتي داومتي كلامك هذا وين صار ..

_ لتاخذين مني كلام بساعة عصبية اكيد مجنت اقصد معقولة اسويها  لج اني برة وانتِ جوة ..

بيوم الي وعدني يجي عليه ، كعدت من الصبح
ومن الفرحة الي غمرتني حتى ريوك ماتريكت
رحت حضرت مستمسكاتي وبدلت لبست بدي زيتوني وتنورة سودة .. وشال اسود وكب زيتوني وخليت مكياج خفيف ..

سمعت الباب تندك عرفته اجه حضرت كل اغراضي
وطلعت من الغرفة .. سمعت صوت بالاستقبال
تقربت من الباب اريد افوت ..

سمعت صوت محمد يكول لبشير
_ انتَ صدك تحجي ؟؟ مخبل عاقل انتَ رايح بيدك تسجلها ختولي شنوو بكيفها ؟؟؟

احس روحي انسحنت سحن اريد اسمع رد بشير انسحبت من ملابسي باوعت شفتها عالية ..

جرتني من ايدي لحد المطبخ ..
حجيت واني اقاوم البكاء : شوفي محمد ديحجي عليه بس لايقنع بشير وميخلي يوديني ..