جبروت الحنين ..

بارت ١٨

جبروت_الحنين
بارت١٨
نورا ناصر

رفعت السجينة والتفتت ، لزم ايدي بقوة واني رافعتها
باوعت لوجهه شفته طالب ..

الكهرباء طافية بس عالكة شمعة كبيرة وعكس الضوة الاصفر على وجهه ويا الظل ..

لزمني قوي وطبك اسنانه ويحجي .. شبيج ولج تخبلتي منو عبالج هاا عبالج هو مووو ؟؟

مد ايده لشعري وسحبني اله حييل ويهمس يم وجهي ضاغط على بشرتي  بززتني لحيته وشواربه ..

وبعده مستمر يحجي واني ساكتة ..
احجي ولج تعرضلج حاجيتي لولا ؟؟

استمريت بالصمت ، حركت ايدي ووجهت السجينة لركبتي وضغطت  بطرفها على بشرتي ..  حسيت انجرحت والجرح ظل يحركني ..

لزم كف ايدي كال شبيج تخبلتي ..
ووخر السجينة مني سحبها وشمرها بالكاع ..

نزلت بالكاع كرفصت وخليت ايديه على وجهي وظليت ابجي ..

حسيته كعد يمي وخر ايديني من على وجهي مد ايده لحنكي ورفعه ليفوك يتفحص الجرح الي سويته بركبتي ..

طول ماهو لازمني حسيت ايده ترجف من طخت بيه لسه ..

ظل ينفخ بعصبية وكام يدور بالكاونتر وبعدين طلع من المطبخ واني كاعدة بمكاني واحس الجرح يوجعني ..

رجع مره ثانية كرفص كبالي ..رفع راسي وخله لزكة جروح على جرحي .. باوعتله ودموعي غركت خدي ..

كتله : طالب كافي تشك بيه اذا ماتتحمل طلكني
وعد مارجع لامجد لو مهما صار اني اريد اعيش ماريد شي ع اقل اتزوج واحد مايعرف بماضيي مايعاملني مثلك .

سكت لثواني ورجع كال هسه كومي خلصي شغلج وتعاليلي للغرفة ..

رفعت راسي ومسحت دموعي حاجيته وبعدهه الشهكة بيه
_ ليش شتريد مني ؟

_ كافي ارجعي للغرفة وخلينا نكمل حياتنا طبيعي ..

ظليت ساكتة واباوع اله كام على حيله ويتحسر
كال يلله خلصي  انتظرج وطلع ...

بقيت كاعدة دقايق .. الجرح الي بركبتي يوجعني كلش .. ظليت افكر لازم اعيش حياتي ومدام هو ميريد يطلكني بلكي يتغير ويعاملني زين ...

كمت على حيلي سحبت الشال الي مخليته على اكتافي .. الكهرباء اجت قبل شوية خلصت المواعين بسرعة ورحت للحمام شطفت نفسي ..

تصنتت لباب غرفة امي مبينة حنين مبينه نايمة ماكو صوت الها   .. طبيت للغرفة بهدوء .. شفت يقين كاعدة ..

كالت هاا وين جنتي ؟

جاوبتها : جنت اغسل مواعين ورايحة اسبح وانتِ شعجب مو يم بشير ..

جاوبتني : خلي يولي ميكعد راحة يسوي سوالف مو حلوة ..

ضحكت وجاوبتها بنبرة حزينة  : غير يحبج !!