جبروت الحنين ..

بارت ٢١

جبروت_ الحنين

بارت ٢١ ...
نورا ناصر

ايات:بقينه صافنين اني وطالب وباوعنه لبعض ..

صاحت خالتي لتصحينه من شرودنه .. اي شبيكم صفنتوا بدل هاي عركتكم جيبوا وانطو لشيماء وبعدين شومة مو غريبة اختك ....

رد عليها طالب : اختي على عيني وراسي بس احنه ماعدنه العشرة حتى نوزع بيهم وخاصة انطي لشيماء حتى يصير الكلب حسام ابوو اصلا اني متحلف اله بس خلي يمر على عرس بشير فترة واعرف شون اتصرف ويا ..

نجية : لا تتحلف اله ولا شي اني انطيت شيماء نصائح وهيه راح تاخذ حق بشير لاتسوولنه مشاكل احسن .....

ترة ماتجيبها غير نسوانها وانتوا عن العيارة وحمدوا ربكم وشكروا راح يجيكم طفل غيركم يتحسر على هاي النعمة ..

ايات : بعد ماخلصت خالة كلامها طلعت   .. باوعت لطالب بحقد اخذت  شال وخليته على راسي واخذت حنين من فراشها وهيه نايمة بس شلتها كعدت منعسة وظلت تبجي ..  توجهت للباب اريد اطلع برة ..

اجه يمي وقطع عليه طريقي .. كال اوكفي خل نحجي
نترت بي وخررر ماريد احجي وياك  .. طلعت برة بسرعة ..

                          *******

يقين : كاعدين بالهول اني وبشير على الكرويتة محوط كتفي بيديه وكلساع يسحبني اله.. اوخر ايديه
لان استحي كدام الكل ميقبل ويخزرني ..

طلعت ايات من غرفتها معصبة ومخنزرة وتنفخ ..
كعدت على الكرويتة كبالنا .. وحنين بس تبجي وهيه تحاول تسكت بيها بعصبية ..

اشر الها بشير وكال الها جيبيها يمنه .. كامت من مكانها وانطتها اله .. ظل يضحكها ويلعبها واخيرا ابتسمت اله ..
ضربني على ظهري بالشقة بس ايده ثكيلة خلتني انحني ..

كلي يلله شدي حيلج سويلنه مثلهه ..

كتله والله انتَ ممقصر .. ظل يضحك ..

انتبه على ايات معصبة .. كال الها ها اكيد متعاركين كالعادة .. بس تدرين شنو الحلو يا ام حنونة .. انت ويقين من تزعلن متروحن بعيد حدكم غرفة عمتي ..

جاوبته خالة نجية : اي بيت اهلهن بس عبرة هول ويوصلن اله ..

بشير : اي والله يمه واني لو اعرف انتِ شجاي تسوين بهاي الكونية الي بيدج جان ارتاحيت ..

جاوبته وهي تغرس الابرة بالكونية .. نذرتلك نذر بس تطلع من السجن اللبس كونية بالسبعة مالتك ..

اني طكيتها ضحكة هزت الهول كله خلت امي تكرصني وبشير يخزرني .. خليت ايدي على حلكي وكتمت ضحكي ..

بنفس اللحظة انتفض بشير وناولني حنونة .. وكام على حيله ..
بنبرة انفعال : صدك جذب يمة قحط ملابس تلبسين كونية ..