جبروت الحنين ..

بارت ١١

جبروت الحنين

نورا ناصر
بارت ١١

اجت السستر واخذت ايات ودخلت لصالة العلميات وايات جانت منهارة وتبجي ومتمسكة بالحياة ورافضة
الموت .. باوعتلي نظرة اخيرة ودخلت ..

كعدت على الكرسي واني منهارة  تملكني الخوف
على اختي وظليت ادعي انو تكوم بالسلامة عشت بفترة رعب وقلق نفسي وخصوصاً هي دخلت منهارة وتبجي حسيت للحظه راح افقد شخص من عائلتي قطعة من روحي صح غلطت بس تبقى اختي والنفس امارة بالسوء ٠٠٠

اباوع لطالب جان واكف بكل برود وهدوء .. لشوية دخلت خالة نجية وياها بشير ..

باوعتله وعيوني كلها دموع .. قابل نظرتي بنظرة حزن .وبسرعة سرع من خطواته و. اجه يمي .. وكعد بصفي ..
كال : هاي شكوو فاتحة الحنفية يمعودة هيه ولادة هسه تولد وتطلع لتعبين عيونج بالبجي عيني ..

ظليت اباوعله باندهاش حسيته للحظة خجل من كلامه هالايام كلش رايح زايد .. ظل يباوعلي مبتسم بخجل ..

كعدت بصفة خالة نجية
كالت : لا تخافين عار والعار مايموت ..

رديت عليها بانفعال : خالة شسالفة شدتحسين من تكولين هيج ؟؟ هاي بشر وان غلطت لتنسين  ابنج اله النصيب الاكبر من الغلط ..

_ لج ابني هم عار ولو الزمه اله اكله بسنوني اكل بس هذا مثل من عهد جدي وابو جدي نكوله العار مايمووت ..

بشير : هسه راح تتعاركن هناا سكتن فضحتنا
الناس ظلت تباوع علينه .. شون شغلة هاي !!!

درت وجهي عنهم ورجعت باوعت الها
خالة وين امي اشو ماجت وياكم ..
_ لج امج رجليها ماشالتها خليت يمها اسماء دير بالها عليها واني جيت مكانها ..

حركت شفايفي يسار ويمين وتمتمت
_ اي امي تاخذ كلامج وبقت هناك ومااجت لبنتها ..

دك تليفوني
شفتهه عالية ..
رديت عليها بسرعة
جاوبتني : ها شلونها ايات هسه امي كالت بالعمليات ..

_ اي دخلوها عمليات والله خوش كلفتي نفسج وخابرتي لو غيرج اختها بالمستشفى جان هسه هيه اول وحدة يمها ..

_ ولج هالكوم اللحم وين اخلي وبيت حماي مموجودين ومحمد هم ماكو جان خليتهم بالسيارة يم محمد وصعدت الكم بالمستشفى .. طمنيني شلون حالتها هسه ؟

_ بعدهه بالعمليات ..
سديته منها بعد دقايق خابرتني اشتياق ..هم نزلت عليها نزلة غضب ..
_ انتن شون خوات ولجن على الاقل روحن يم امي تعبانة بالبيت وضغطها صاعد شبيجن مدحوسات برجولتجن ..

حجى  بشير : الله يمته اتزوج ومرتي تلزك بيه ..

باوعتله وركزت نظري عليه ورافعه تك حاجبي ..
وماادري اشتياق شنو جاي تحجي ..

ردت عليه خالة نجية : اي يمه هسه ازوجك نرجوسة وتلزك بيك مثل العلج وشرط اول شهر زواج ماخليكم اطلعون من الغرفة ..