جبروت الحنين ..

بارت ١٥

جبروت_الحنين
بارت 15
نورا ناصر ....

شمرت الغطه ووكفت على حيلي وظلت دموعي تجري وكلبي وجسمي كله يرجف ..

صرخت بوجه عاليه بعدم تصديق ..
لاعفية لاتكوليها عالية مقلب مووو؟؟ كذب هااا يريد احجي ويا هسه اروح اخابره واحجي ويا وطز بامه وبدراستي وبالدنيا كلها ..

ركضت على التليفون وداافتحه واحس دموعي يوكعن على ايديه والموبايل وانحجبت عني الرؤية ..

اجتني عالية لزمتني من ساعد ايدي .. وظلت تهز بيه ..
_ ولج هيه هاي سالفة حتى واحد يشاقه بيها داكولج بشير فاقد الوعي وناقلينه للمستشفى ..

شمرت التليفون على السرير وكعدت على الارض واباوعلها ودموعي مثل المطر ..

رفعت راسي احاجيها والطم على رجليه ..
بس كليلي شبي عفية ليش فقد وعيه هااا شبي ؟؟

كعدت يمي لزمت ايديه وظلت تحجي وعيونها حمرة ..
_ محمد يكول محاولة انتحار ضارب الوريد مالته بحقنة بيها نفط ابيض وبسرعة فقد وعيه ..

بلا وعي ظليت الطم على خدودي ....
واصيح كلها مني اني السبب والله اني سويت هيج بي .. عفية عالية وديني اله هسه والله بس يشوفني يكعد ..

ظلت تفر بيدها ولج شيشوف منج داكولج فاقد الوعي لايحس ولايسمع ابد شبيج انت مادارسة مامتعلمة؟؟

ظليت امسح بدموعي واهز براسي : اي اي ميخالف ودوني اله هو يحبني ميتركني ويروح والله هسه بس يسمع صوتي لو يشم ريحتي يكعد ..

ولج محمد راح يجي مناك ومن دربه يروحلهم للمستشفى اني شيوديني والجهال وين اخليهم ؟

_ومحمد ليش يروح من دربه الهم هلكد حالته خطرة بشير ؟

_ اي الدكتور كايل الهم حتى لو يكعد مايكعد صاحي لو يعمى لو ينشل او يصير بي شي ..

استهترت اكثر  احتاريت شسوي بروحي .. اروح وارجع واعيد خطواتي وايدي على راسي واضرب نفسي ..

كتلها اني مابقى هنا اروح لبيت خالة نجية هسه فورا توديني لو اروح وحدي ..

_ اي خوش والله حتى بس تشوفج تملخج ملخ وتطلع حركة كلبها كلها بيج اكعدي وسكتي وهيه الاخبار تجينه لهنا ..

ركضت للكنتور طلعت عباية ولفيت الشال خليتهم على راسي ومشيت وعالية تصيح وراية ..

لج يامخبلة وين مولية بهالمغربية ارجعي لايصير بيج شي ..

ماجني اسمعها طلعت من باب الشارع وامشي واسحل بنفسي مثل المخبلة لابسة عباية راس وشالي ماملفوف عدل  ونعال ابو الاصبع واحس رجليه انترست تراب ..

ماتوقعته بهالضعف هذا عميت علي وعلى نفسي
  حبه خلاني اتكبر وانغر واترقب شراح يسوي على مودي وهاي تاليتها .. ينتحر من وراي والله ماستاهله ..