جبروت الحنين ..

بارت ٣٥

جبروت_الحنين
بارت ٣٥
نورا ناصر

سد حلكي قوي ولزم ايديه قيدهم بايدي ونزل بيه للارض ، صك اسنانه حييل ، وظل يحجي
كال ؛ خلي بس اراويج شي واوليييي ..

صارت دموعي تنزل على ايده واني ابجي
ظل يباوعلي بنظرات متتفسر كرهت نفسي لان بيوم اني حبيته وبعت نفسي اله ..

ترك ايدي وبعده مخلي ايده على حلكي وضاغط عليه مد ايده طلع تليفونه وظل يكلب بي ..

واني عين عليه وعين على تليفونه الي بايده واتطلع بالشاشة اريد اشوف شديسوي ..

طلع صوور وباوعلي بنظرات خباثة ومكر ..

كال ؛ راح اوخر ايديه اذا تحركتي او سويتي صوت تفوتج متعة المشاهدة وختم جملته بابتسامة وهو يتأمل عيوني ..

اشرتله راسي بقبول ، وخر ايدي مني وجريت نفس بعنف ،

خلى شاشة التليفون بوجهي وظل يكلب بالصور
كال ركزي شوفي هذا منو ؟؟ دتشوفي صح ؟

ركزت ع الصور هذا طالب مصورينه من بعيد هو طالب طوله شكله تسريحة شعره ملابسه الي كل يوم اني اهتم بيهم اكويهم اعطرهم وكل شي ، مجان وحده واكفه يمه بنية لابسه صدرية بيضا ماعرفتها دكتورة او ممرضة بس مبين من الصدرية كله بناطير جينز لابسة وشعرها طالع من الشال مرتبة وناعمة كلش وواكفين بحديقة ومرة كاعدين على مصطبة او كراسي ..

جان يكولي شوفي ركزي بالملابس شون دتتغير ، طالب ديخونج ويا هايه يومية يوصلون وكت قبل الموضفين كلهم حتى يسولفون وياخذون راحتهم يوومية دتفهمين يووومية هيج ..

خليت ايدي على حلكي اكتم شهكاتي ، حسيت انهاريت كلش ، ليش يسوي بيه هيج ليييش ..

وخرت ايدي وحجيت من بين دموعي وشهكاتي
كلامي متقطع كتله وانت ماعندك شغل وعمل دتصور بيهم شعليك انت ممسوين شي غلط هما واكفين بمكان عام وعادي ..

غماني ووكف على حيله كال امداج ضلي حمارة وياهو الجان ياكل بعقلج حلاوة ..

صرخت عليه وهسه شتريدد اطلع برة حقيير مكافي الي اخذته مني جاي تدمر حياتي اكثر بكذبك وتمثيلياتك شمدريني يمكن الصور مفبركة ..

خله التليفون بجيبه وكال دروحي مو مال واحد يسوي وياج زين خو ماجاي انبهج ..

وكفت صرت كباله كتله؛ الزين المنك ما اريده ..

راح يبوس بحنين ، دنكت عليه جريته من ملابسه كتله لا تدنى يمها دير بالك ..

دفعني ليغاد وبعنادي شالها من الارض وظل يبوس بخدها ويكول الها وعينه عليه
عن قريب راح ننجمع اني وانتي والماما ..

جريتها منا بسرعة ورجعتها لمكانها .. واني اطرد بي واكولة اطلع برة الغرفة ، جر المفتاح وفتح الباب وطلع صار بوجهنا بشير كبال الباب ،شهكت وخليت ايدي على حلكي ..