جبروت الحنين ..

بارت ٣٧

جبروت الحنين
بارت ٣٧
نورا ناصر

اعرف ان هذه جزء من مشكلتي معك .. اخشى الابتعاد عنك اخشى الحياة من دونك .. حاولت الابتعاد لكنني لم اتمكن من ذلك .. نار قربك اخف وطأة من نار بعدك .. قلبي يستعر بعيدا عنك ويتلظى بجوارك !
اي حب موحل  هذا الذي علقت به ..!  اي علاقة عقيمة هذه ..؟!..

***********************************

جان بعده مقلص تك عين وعين لخ فاتحها ويباوعلي بتفحص  ....

اني عين عليه وعين على الرجال ابو المحل اله اجه يلملم الزجاج واني خجلانه وابدي اكتل يوسف على هالعملة هاي ومن جهة ثانية اتمنى ابوسه لان كسر البطل وكعد بشير ..

ابو المحل جاب مكنسة ومكرافة وظل يلم بي وينضف
سمعني ارزل بيوسف..
كال مصار شي بنيتي فدوة هو طفل ميفهم ..

كتله عمو احنا نخسره وطلعت فلوس وانطيته واخذت
بطل شوفته ليوسف كتله هذا حخلي بالعلاكة وبالبيت اطلعه الك تشربه وخزرته ..

بقيت مخنزرة ونظراتي تتسلل لبشير كعد ونزل رجليه من الكرسي الحديد الطويل الي جان نايم عليه ..

لازمه بيدي يوسف واعصر بيها وعيني على بشير  ..
كام ومشى خطواته باتجاه محمد وعبدالله كرفص وصار بمستواهم وصار يحجي ويا محمد وعينه عليه ..

كال ؛  صايرين دايحين غاب القط العب يا فار وين صكارككم ؟

فتحت عيوني مصدومة واباوع اله .. درت وجهي على ابو المحل كتله عمو شنو المحل مالتكم صاير مأوى مال متطفلين اقصد مشردين ..

ابو المحل رجال كبير فتح عيونه عليه كال ها شنوو بنتي شبي محلنا ؟

اجانه صوت بشير يصدح يوزع نظراته عليه وعلى الرجال كله ؛ اي صدك عموو لازم تشيل شكوو متطفل هنا...وجاي اشوف ابو بريص مستهتر لازم هذا اول واحد تتخلص منه ..اذا تريد اشيله واشمره بره احنه برسم الخدمه ..

لاويت شفايفي واني اباوع اله واحاجي بقلبي واكول اني ابو بريص لعد انتَ ابو اربعة واربعين ..

اخذت الجهال وطلعت واسمع ابو المحل يكول لبشير لازم معجبتك النومة هنا ..

طلعت ومسمعت رد بشير ، مشيت ورة ثواني بس
و اسمع صوت وراية يكول انتظري اوكفي ،

التفتت اشوفه بشير يمشي مثل بيب بيب وياشرلي اوكف..

مدري ليش خفت منه وظليت اسحل بيوسف وهو بيدي واصيح على عبدالله اكوله امشي بسرعة ..

ولو يصح بيدي انزع حفايتي واخليها جوة اباطي واركض بنص الشارع واعوف حتى الجهال ..

التفتت ع الشارع زحمة السيارات رايحة وجاية ويايه الاطفال يعني اذا اوكف واستعد للغبور اكيد راح يلحك عليه ، قررت استمر امشي ...