جبروت الحنين ..

بارت ٦

جبروت_الحنين
بارت٦
نورا ناصر

درت اله باوعتله بخوف واحس قلبي يريد يطلع من بين ضلوعي .
كتله بحدية ومتصنعة القوية : شتريييد؟

اقترب مني كزز على اسنانه عيونه حمرة وحواجبه مخنزرة .
كال امشي وياي للبيت ..

بلعت ريك وبتلعثم : كتله ماروح وياك اني كاعدة ابيت اختي هسه ولبيتكم ماارجع -..

اقترب اكثر ، يزفر بعصبية
لزمني من كف ايدي بقوة حسيت كفي راح يتهشم بين اصابعه ايده عركانه وحارة كلش حسيته يجويني بيها .

بعده معصب كلش وحتى عروكة باينة
زفر نفس بكل قوته
كال : اي ليش لا امشي نروح لبيت اختج
وسحبني يعت بيه بالشارع .

والشمس فوكانه قوية وتجوي ، والشارع شبه فارغ الا منه احنا اثنينه .

حاجيته بتوسل وبنبرة باكية : فدوة بشير اترك ايدي راح تكسرني شيسموها هاي بلله ؟

اجاني صوته يرعد : امشي لاادفنج هنا

بديت ابجي كتله : ترة والله دتكرهني بيك اكثر هدني جاي اكلك .

وكف عن المشي باوعلي بنظرة غضب
وهد ايدي
ونتر بيه : امشي كدامي يلله .

مشى كدامي بخطوات سريعة
صرت اتبعه بخطى مثقلة مااريد اوصل للبيت
كارهته وكارهه الدنيا كلها

حسيت الحرارة تطلع من كل مخارج جسمي
الشمس فوكانه تسمط سمط الباجة ماانسمطت بكدنه !

وصلنا لبيت عالية دخل واني دخلت وراه
التاف عليه شكله يخوف اشبه بالوحوش .

بس التاف بسرعة كال وبنتر : بلله مااستحيتي واكفة بنص الشارع تلغين ويا هذا ؟

جريت نفس بنفاذ صبر : هاي انتَ كلتها بنص الشارع يعني لا بالختلات ولابمكان مغلق ومجنت الغي هيه كلمتين كالها الي .

باوعتله يضغط على قبضة ايده للحظة حسيته خلص راح يطك مثل بطل الببسي المضغوط .

_ مستحيتي بلله شكو واكفة ويا طول بطول وتكركين .

_ هو وكفني وكلي

قاطعني بصياح: هو وكفج تعوفينه وتمشين متوكفين ويا بنص الشارع لو متعرفيها هايه تونستي من شفتي سيارته موو؟ عجبج هاااا ؟

حمقني حييل حسيت بغضب وكره ناحيته كلي رغبة باستفزازه واثارة غضبه بلكي يطك واخلص منه واكفلي عظمة بالبلعوم مطلع حب هذا !

كتله : طبعا اذا الولد يريد يخطبني بالحلال وانتَ سادهه بوجهه وحتى متعارك وياا حقه يوكفني ويريد يحجي ويايه .

حسيت كل جسمه تصلب فتح عيونه الحمرة والغاضبة باندهاش رموشة الكثيفة طخت بحواجبه هالكد مافتح عيونه .