جبروت الحنين ..

بارت ٣٨

#جبروت_الحنين
بارت ٣٨
نورا ناصر

كال ؛ شنو متفيدك قابل اني شريد منها الجهال يحتاجوها وانتِ وراج دوام وعبود كرع راسي يريدها ومقهور وهو مريض مو وكتها يوكع عليه هسه ..
بس انتِ ليش تكولين هذا الكلام اكو شي يقين ؟؟

ارتبكت كلش كتله لالا بس جيهان متعلقة بصبا هواي واخاف ترفض ومتقبل تاخذ مكان اختها ..

كال ؛ لا منو كال هالحجي متاخذ مكان اختها كل ما بالموضوع راح ترجع لمكانه السابق يم الجهال وبس وخليها تنام يمكم مرايد منها شي اني بس خلي يقبل خالها ترجع لهنانه ماكو وحدة تحن ع الجهال غيرها وامج تعبانة ما اريد اكلفها ..

_ لا امي متكول شي والله كتلها ووافقت ..

_ اني ما اريد اكلفها ممجبورة هيه ، يقين حاجي جيهان وكوليلي شتكولج ماشي ؟

هزيت راسي بقبول كتله ماشي وهو راح فات جوة ..
باوعت لعبدالله يباوعلي مخنزر ومعصب ..

كمت من القنفة عين عليه وعين ع الارض والملم بالملاعيب والاغراض الي مطشرينها الجهال ..
كتله خير شبيك اشو تباوعلي معاجبك ؟

كتف ايديه وظل يمشي ويباوعلي من فوك لجوة وصل للباب مال الهول ويتلفتلي  لحد ما راح لغرفته ..

للعصر اني بالمطبخ جنت ومخبوصة المواعين ماليه السنك واريد اغسلهن توني مبلشة بيهن سمعت صوت الاء تبجي رحت ركضت الها ، طلعتها من سريرها ابوس  بيها واضحكها ورحت للمطبخ سويت الها ممه شفت عبود واكف مقابيل باب المطبخ صحت عليه
عبود تعال خلي الوة بحضنك وشربها الممه خلي اغسل المواعين ؟ 

ظل يرفعلي اكتافه برفض ومخنزر .. جريت حسرة وكتله شصار لو ساعدتني وانت شبيك اليوم معفووس وجهك ؟ دار وجهه وراح عني ..

كعدت بالكاع وخليت الوه بحضني واشربها الممه ..
ورة شويه اجه عبدالله ..
كال اريد اخابر جيهان احجي وياها ..
كتله روح شوف تليفوني وين وجيبه الي خلي اتصل  عليها ..
راح وبعد مارجع ظليت افكر يمكن مالكى تليفوني ..

خلصت الاء الممه كمت خليتها بالكرسي  مالتها وصحت عبود عبود تعال هز الاء خلي اغسل مواعين ..
انتظرت منه جواب ماكو مجاوبني خفت بس لا وكع اخذت الطفلة ورحت وراه طليت بالغرفة شفته مخلي تليفوني على اذنه ويحجي ..

بس شافني كال بنبرة عصبية شبيج دااحجي ويا جيهان ..

هزيت راسي بقبول ورجعت احجي ويا نفسي متسائلة  واكول هذا شون فتح رمز موبايلي شون منتبه عليه شون طلع رقم خالته جيل هالوكت مفتحين بالتيزاب  يلله قابل شعندي بالفون اني ..

طبيت للمطبخ خليتها بالكرسي مالته ويوسف قريب عليه كتله تعال هزهه شويه حتى ترجع تنام اجه يهز بيها واني درت ع سنك اجلف المواعين واسمع صوت الكرسي ، التفتت شفته يهزها حييل صحت عليه ورحت يمه وخرت ايديه و لزمت الكرسي من جوانبه  كتله لاتهزها حييل حبيبي هستوة شاربة ممه تظل تتقيء سوا مثل ما كتله وظل يهزها ببطيء  ..