جبروت الحنين ..

بارت ١٧

جبروت_الحنين
بارت17
نورا ناصر

وصلت للطرمة شفتها هستوها تريد تطب للبيت وكانها مستعجلة ..

وكفت يم الباب صارت مقابيلي كلش من شافتني ابتسمت ..
كالت :ولج افرحي يقينة ..

جاوبتها بعد مابلعت ريك وشفافي ترجف  .
_ شكوو خالة ..

تريد تحجي اندكت الباب .. صاحت منووو ...

من ورة الباب اجانه صوت مرية  جيرانه
كالت اني ..

ردت عليها ادخلي الباب مفتوح رجليه ماتحملني من الفرحة اجي افتحه ..

دخلت المرية جيرانه كالت  : شكو خية صوت هلاهل
عدكم انخطبوا يقين وبشير  واخيرا وافقت ..

درت وجهي على خالة نجية وملامحي كلها تعجب ..

جاوبتها خالة نجية : اي بلي عيوني ان شاءالله الاسبوع الجاي ..

المرية كلتلها : شايفين الف خير ان شاءالله منه المال ومنها العيال .. وطلعت ..

درت على خالة نجية .. كتلها هو شكو وشدعوة حتى الجوارين يعرفون بسالفتنا اني وبشير ..

رفعت ايدها وظلت تطك اصبع وتحجي والسعادة مبينة على ملامحها ..
_ ولج افرحي يقينه بشير كعد صحى من الغيبوبة ناوشوني البرنووو ..

بفرح وسعادة جاوبتها : صدك خالة الله عليج .. وشمرت نفسي وحضنتها واكركر من الضحك
وهاي اول مرة اسويها بحيث ورة ماابتعدت عن حضنها ظلينا وحدة تباوع للثانية ..

على حسنا اجت امي وايات وامجد طلع من الغرفة  البراني ..

رفعت ايدها وعود تمثل انها بندقية
وتسوي ططرططوططرططوو .. ولكم اريد ارمي من الفرحة بس ماكو برنو ...

لزمت ايدهه ونزلتها .. كتلها خالة شلونه هسه ؟

جاوبتني بأسى : سودة عليه شلونه بعد تعبان والاطباء مخلينه تحت المراقبة منا لباجر اذا تحسنت حالته ينقلونه لغير ردهة ..

رفعت ايديه للسماء وحمدت الله ودموعي تجي
يربي الف حمد وشكر الك .. خالة فدوة اذا رحتيله اروح وياج ..

جاوبتني بحدية : لج مانعين عنه الزيارة شبيج انتي سودة عليه ماعارفهم ولسانه ثكيل كلش مايكدر يحجي ...

خليت كف ايدي على حلكي اكتم شهكتي ودموعي
بللت وجناتي .. وهمست بقلبي .. سودة عليه عساها بيه ولابيك ليش هيج سويت بنفسك ..

امي لخالة نجية : امشي خية نصلي وندعيله الله يشفي ويعدي هالازمة هاي على خير ..

دخلنا جوة اذن اذان الظهر .. صلينه واحنه ندعيله ومية نذر نذرنه اله  .. واني الفرحة ماسايعتني ..

ورة الغدة رحت لخالة نجية وكعدت يمها ..
كتلها خالة شوكت ترحين لبشير ؟

باوعتلي مخنزرة : ليش ان شاءالله تردين ترحين وياي ؟