جبروت الحنين ..

بارت ١٢

جبروت_ الحنين
بارت ١٢
نورا ناصر

يقين : رحت ادور على تليفوني وين مخليته حتى نسيت .. رجعت للصالة وسمعت باب الشارع انطبكت حيل .. عرفته بشير طلع معصب ..
بالطكاك عساك لاهديت شنو امتلكتني وسجلت بية طابو !!!

اخذت تليفوني من الشحن ورحت دكيت على ماجد .. واني انتظره يرد مسحت دموعي وجريت نفس اكثر من مرة احاول اوخر بقايا بكائي والشهكة الي لازمتني ..

خابرته وحاجيته كال يوم  الجمعة ماعندي دوام اجي عليج الصبح .. سديته منه وتمنيت  هسه يجي عليه شيصبرني للجمعة ٠٠٠.

رجعت للغرفة شفت امي وايات يحجن ..

امي تكول الها : يلله بنيتي لاتأذيني وشلعين كلبي اكثر امشي خلي يعقد عليج عند الشيخ وعيشوا حياتكم طبيعية ..

ايات جاوبتها : اي اي حتى خوش يتحكم بيه وخاف نوب يعتدي عليه مثل اخوو اذبحه والله ارتكب بي جريمة هو ونايم ..

_ ولج انت منين لاكيتها ماتكليلي دمشي خل يعقد عليج لا والله اخابر اخوج يوديج لعمامج وهناك خلي يسوون عليج وليه واني مالي شغل بيج بعد ..

_ اووو صدك تحجين انتِ استغفر الله بس ها يمه كليله مايلزمني كلش خووش ؟؟

_ كومي بدلي يابنية وبعدين انتِ ويا سولفوا بهدوء شون ترديني اكله هيج اني مو عيب انتِ راح صيرين مرته وكليله وطالب خوش طالب حباب بس لازم يصير عصبي كل واحد واله حد لطاقة تحمله ..

بعد دقايق ٠٠٠٠٠
كامت ايات طلعت عباية راس وخلت شال فوك راسها وكالت يله اروح وياكم وبعدين احجي ويا ..

امي : يقين بنيتي ديري بالج على الطفلة خاف تكعد سويلهه ممه ..

بقيت صافنة على ايات شلون تغيرت حتى مابدلت دشداشة البيت .. وين جانت قبل متطلع من البيت اله لابخة وجهه فول ميكب ولبس على اخر حباية من الاناقة .. سبحان مغير الاحوال ٠٠٠

طلعوا وخلوا الطفلة عندي ٠٠٠ بقيت حابسة نفسي بالغرفة لحد مابجت الطفلة .. اخذتها اريد اسكتها ماتسكت انطيتها ممه خليتها بحلكها تدور وجهه ماتريد .. فتحت كماطها زادت بجي .. رجعت كمطتها شون مجان لان هيه متعودة على الكماط خالة نجية معودتها ..وهم ماسكتت ..

اخذتها وطلعت بيها من الغرفة  ... بالممر صادفت خالي طالع من غرفته .. هو هالايام صاير زين وصحته تمام بس شوية ينسى ..

باوعلي وباوع لحنين بيدي : هاي شنو باباتي انتي كبرتي بعدج تلعبين باللعابات ..

من بين صراخ الطفلة جاوبته : خالو يالعابة هاي بنت ايات وامجد اقصد بنت ايات وطالب ..

مدري منين طلعتلي نجية وخرعتني
نترت : اي اي بعد طلعي بالشارع وصيحي وكولي هاي بنت امجد حتى شلون ننفضح .. وانت حجي طكة ونص روح اطلع شم هوا روح لجماعتك لا ظل مكابلني وكاعد ..