جبروت الحنين ..

بارت ١

السلام عليكم ورمضان كريم احبتي
المفروض انشر يوم ١١ بس تفاعلكم يشجع ⚘
قبل قراءة البارت اقروا المشهد ..

#جبروت_الحنين
نورا ناصر
بارت ١ ..

الحنين وتـر
مرتبط بالقلب لا يعـزفـه إلا من أرهـقـه
الشوق .

.. الصبح ساعة ..٨.. د نضف الطرمة منهمكة واجر بالماسحة منا ومنا
اسحب بالمي و اوجهه صوب الحديقة ليوكع على الارض وتفح منه ريحة التراب المبلل
واستنشقها كلش احبها ..

وادندن بيني وبين نفسي ..
سمعت صوت الباب تندك
صحت منوووو .. صوتي طالع مثل صوت ابو الخضرة الي يجي بالبيكب مالته .. يعني باختصار مابي اي انوثة ..

جاوبني واحد من ورة الباب
_انييي ..

نزلت ملابسي جنت مشكلتهن عن لا المي يلوحهن .

رحت اشوف فتحت الباب شفت ولد اسمراني مرتب ومبين كاريزما وشخصية ..
شافني نزل النظرات وابتسم وظل يباوع وكانه مصدوم بصوتي الي سبقني قبل شوية والي ممتناسب ويا شكلي ..

_مرحبا ...
_مراحب
_بشير موجود ؟
_اي موجود منو نكوله
_اني صديقه وليد
_زين هسه اصيحله ..

طبيت للبيت توجهت لغرفة بشير دكيت محد
مكال دخلي..

فتحت الباب شفته نايم وبسابع نومة .. ومولابس ملابس بس شورت .. وظاهر صدره العاري والنفس يصعد وينزل ..

مناك على السرير الثاني امجد متمدد ومتغطي ع النص مخلي هيدفون بأذنه ويخابر ومبين من خلال حديثه ديحجي ويا صاحبته من الصبح مدري من البارحة ديحجون ولو تمطر طابوك يمه هم ميحس ..

صحتله بشير كووم ..
فتح عين ونص باوعلي من شافني عبالك شايف شيطان ..

كال اووو هم انت دخليني انام ماتجوزين من سوالفج ..
ودار ظهره الي وحط مخدة على راسه.

عباله مثل كل مرة بس اشوفه مسلهم بالنوم اكعده واضوجه ..
قربت نفسي منه وهمست بأذنه
_ ولك كوم اكو فد واحد صاك يريدك بالباب كوم شوفه شيريد خطية راح يموع من الشمس ..

كام بسرعة وانتفض
يباوعلي مخنزر
_ كلتي صاك موو ؟؟منو فتح اله الباب ؟

بحزم وايديه على خصري
_اني فتحته عندك مانع عندك اعتراض ..

_المانع بالصيدلية والاعتراض بالمحكمة وتعااي اليوم اموتج ..

سحبني من ايدي وكرص زندي حييييل.حسيت الشرايين والاوردة والشحوم بهاي المنطقة الي كرصها كلهه انجعصت جعص وانحمست حمس وويه حرارة ايده راح تستووي ..

نفضت ايدي منه: اخخخخ شبيك انجلبت ..

بصياح
_ ادبسز فتحتيله الباب وظليتي تباوعيله هاا وتكولين عنه صاك ماتستحين .. اني مو منبه عليجن انتن كلجن ماتفتحن الباب يعني متعرفين تكولين منو بدون ماتفتحي ؟