جبروت الحنين ..

بارت ٣٠

جبروت_الحنين
بارت ٣٠ نهاية القسم الاول من الرواية
نورا ناصر ..

نجية مخلية الطفل الي تركته امه وتخلت عنه نتيجة وهن واستسلام .. مخليته بحضنها وتلوليله ..

دللووول يالولد يبني دللول عدووك عليل وساكن الجووول ..

الطفل مو قابل ينام وكلساع يباوع الها ومبرطم شفايفه
وعيونه مليانه دمووع ..

يمد ايده لمكان صدرها عباله امه وتكدر ترضعه .. بس لما يركز بوجهه يحس بالغربة ويكمل باقي احساسه بالبجي ..

عيونه تدور امه بأرجاء الغرفة يشم ريحتها ومايلكاها ..

ظلت تباوعله ولازمته من زنوده .. يله يا صطيفان نام ولك تعبتني وهديت حيلي ..

يلله نام حتى تكبر واضمك للعصابة مالتي ..

ولك بيبيتك تعبت حتى تكوم تشيل الكرك عني وتعييني وتكابح وياي ..

وهيَ على هذا الحال دخلت عليها أسماء ..
وتكلمت بنبرة كلها بكاء ونشيج : ماما انتِ شون تسوين بيه هيج ؟؟

جاوبتها بنتر : خيرج ولج شسويتلج ؟؟

_ خابرتني مرة عمي كالت اشو نتصل على امج ماكو
كتلها يمكن فوك تنوم مصطفى .والتليفون مو يمها . كالت لعد احنه العصر جايين نتفق ونشوف شنو طلباتج
كتلها بخصوص شنو .. كالت عمود خطبتج لاياد ..

_ اي وانتِ شكتيلهه خو ماصخمتي وجهي وكتيلها رافضة ..

_ يوم اكرها اكرها حسي بيه انتِ ليش تسوين بيه هيج وبعدين اني متأكدة عنده غاية لان تعارك وياي وكتله انت مو رجال واكيد هسه يريد ينتقم مني ويشوفني الحجيم بعيني ..

_ من حبك لاشاك يالمصخمة لج هذا تعارك وياج عبن يحبج بس انتِ ثولة ..

_ يمه فدوة اروحلج ماريده فدوة صرفيهم عفية ..

_ بعد سوايتج السودة المصخمة جايبته الي بنص البيت وبليلة سودة سود الله وجهج وجماله هسه متقبلين تكوليله يجي يخطبج هاا ..

_انطيني دليل واحد عليه ومستعدة اعترف واقبل اتزوج اياد ..

يمه دخليج لتعاقبيني بذنب مو ذنبي ..

وائل تزوج من اشهر وكرامتي مستحيل تسمحلي اتواصل ويا بعد ابد..

وبنفس الوقت ماكدر اخرب بيته عليه هو متزوج هسه وصديقاتي كالن زوجته حامل ..

يوم الزواج مو طموحي فدوة اروحلج ماريد اتزوج دخيلج بعده جرحي ماطاب حرام عليج ..

بهالحظة دخل بشير للغرفة
.. تكلم باستفهام : خيركم شكو شبيكم يومية هوسة ؟؟

أسماء كامت على حيلها وتقربت منه ونطقت احرفها الاول ويا بعد اشهر من الخصام .. محاجته من يوم الي مد ايده عليها وضربها ..