Dear Diary,
Hindi sya umuwi noong alumni homecoming namin kaya akala ko hindi na sya uuwi. Nagulat na lang ako nang tawagan ako ni Derrick. Labas daw kaming apat. Tinanong ko kung sinong apat. Tapos sabi nya, "Ikaw, ako, si Lottie, saka si Robbie."
Syempre hindi ako sumama.
Pumunta sila sa bahay namin, pero silang dalawa lang. Hindi kasabi si Robbie. Tapos inaya nila akong gumala. Buti na lang maraming labahin sa bahay. Sabi ko maglalaba ako kaya hindi ako pwede. Kaso, diary, hindi ako nakalusot. Tinulungan nila akong maglaba. -___-
Kaya wala akong choice kundi sumama sa kanilang gumala kasi halos ipagtulakan na rin ako ni nanay palabas ng bahay. Lumabas daw ako para hindi ako nagmumukmok.
Feeling ko alam ng mga tao sa paligid ko 'yong nararamdaman ko kahit anong pilit kong itago. Kaya ayaw ko ring makita si Robbie. Kasi baka ganoon ako ka-transparent. Nang mag-text si Robbie kay Derrick, nagtatanong kung tuloy pa, pinag-decide nila ako kung ano ang gusto kong gawin. Sabi ko hihiramin ko muna si Lotlot. Tapos si Derrick na lang ang makipagkita kay Robbie.
Ayun.
Bandang May daw naman aalis na sya uli. Konting tiis na lang.
Ylona