#ثغرات_الماضي
#طيبة_الربيعي
*الفصل التاسع والعشرون*
___________ღ___________
ميس... من رجعت للبيت وصلت كلام علي بحذافيرة لماما
ام ميس: يعني يريد يتقدم؟
ميس: ممم'طيبة_الربيعي'
ام ميس: خلي يجي، بس خل احاچي ابوچ بالأول اجيس نبضة وعود بعدين ترديلة جواب
ميس: ماشي
من طلعت امي بيداء گالت
بيداء: هيچ احسلچ ميس، خلي تركيزچ على الأشخاص الي يحبوچ ويتمنون يشوفون بعيونچ الرضى
ميس: وشاهين؟
بيداء: شبي صخمان
جريت حسرة، احبة مو بيدي
بيداء: شبي شاهين ميس، ممعبرچ
انطينهة نظرة غضب
بيداء: اي هاي الحقيقة، ليش تتهربين منهة وتبنين سوار الخيال حول نفسچ، ممعبرچ وشفتي عندة مريم مو محتاج حب وحدة طاهرة نقية مثلچ
صحيح كلامهة، اني الي رميت گلبي يم واحد بيدة سچين
مرن يومين وامي ردتلي جواب
ام ميس: خل يجي بس ليتأمل هواي ابوچ يگول
ميس: شلون يعني
ام ميس: يعني يجي نشوفة نحچي ويا نشوف حچية شلونة، نسئل عليهم، اصلة فصلة منين
ميس: اي تمام، يعني اگلة يجي؟
ام ميس: اي، اذا يريد عالجمعة، ابوچ گاعد
ميس: اوكي
ثاني يوم بالجامعة اجة وگعد ويانة كالمعتاد معرفت شلون اخبرة بالرد الي حصلتة من اهلي، كلهم گاعدين
دغتني سرور
سرور: ها شوكت تحاچي
ميس: غير يرحون، خوما احاچي گدام الكُل
سرور: هسه اني اشحتهم
ميس: لا لا، عيب
سرور: لعد اوگفي
طلعت موبايلهة
ميس: شراح تسوين
سرور: اوكفي، انطي صبر
باوعت للموبايل، كتبت لخالد
شوية وگام علي
علي: ميس ممكن ثواني، احاچيچ
باوعتلة وبلعت ريگي
ميس: ماشي
گمت ويا، رحنة گعدنة بعيد عنهم شوية
ايدية يرجفن
علي: شلونچ
ميس: الحمدلله، انتة شلونك
ابتسم: بخير دامچ بخير'طيبة_الربيعي'
سكتت، شوية وگال
علي: ها شنو رأي الوالد والوالدة، حچيتي وياهم؟
ميس: ممم، ماعدهم اشكال تجي يتعرفون عليك
ابتسم: ها
ميس: اذا تگدر تعال عالجمعة، بابا گاعد ماعندة شغل
علي: اگدر ليش مااگدر، اجي وحدي لو اجيب امي وياية؟
ميس: ماادري، بكيفك
علي: لا اجي وحدي احسن، بعدين عود اجيب الوالدة
ميس: براحتك
دنگيت العب بأظفري
علي: حلو الجو اليوم
رفعت راسي: اي
وباوعت للسماء، انرسم وجه شاهين عليهة، كافي ميس، امحي هل قصة الخيالية من دماغچ
گمت: يلة نرجع، مبقة شي وتبدي محاضرتي
گام: ماشي، يلة
رجعت للطاولة واني غصة ابلعومي، ماعرف السويتة صح لو داظلم الولد وياية
بنفس اللحظة لمحت مريم، بقيت اباوع احاول اتأكد هاي هية لو لا؟
مو هية، خبلوني گمت اتخايل بيهم
وصلت الخبر لأمي وكُل البيت درة ميس جايين عليهة خطابة، مع انو اني اكدت عليهم انو ميتأملون شي هسه، الولد مجرد جاي يتعرف على اهلي، بس الكُل شاعهة انو خطابة
تفاجئت من جدو گال عواد خابرني ويريد نحضر خطوبتة كلنة، والفرحة الكبرى انو اجوي عمو ومرة عمو وتصالحو وية بيت جدو، بيومهة الفرحة مواسعتني، اللمة الحلوة راح ترجع وانشاءالله تتصافة الگلوب
اما بالنسبة لعلي فدزيت عنوان بيتنة لخالد واجوي هو ويا، همزين خالد ويا حتة ليصير احراج بأول لقاء
ابوية وعمي ابو ازل گاعدين وياهم بالديوان، منتظرة اعرف رأي بابا بفارغ الصبر
من راحو ابوية صاحني، ارتبكت'طيبة_الربيعي'
ميس: اويلي الة يحچي وياية يعني، انتي فوتي ماما
ام ميس: اول وتالي راح يحچي وياچ، خليچ طبيعية ماما كل بنية تمر بهل لحظة
ميس: اوووف شنو هل احراج
فتت وامي اجتي وراية
گعدت: ها بابا
ابو ميس: مبين خوش ولد، لو شتگول ابو ازل
ابو ازل: حباب، ومبين مثقف
ابو ميس: انتي تعرفي لو شنو
ميس: لا بابا اخو زميلي
ابو ميس: هذا الاجة ويا؟
ميس: اي، خالد
ابو ميس: المهم نسئل عليهم، ونشوف
ميس: تمام
ابو ميس: ودير بالچ تحچين ويا خوووش
ميس: لا ابد
خفت، يمة لو يدري شلون لحگني وشلون بعرس اختة حچة وياية هسه يدفني
مرت الأيام واجة يوم خطبة عواد، كلنة فرحنالة، بس يا تُرى بهل سرعة گدر ينسة ازل، لو حالة من حالي يحاول يتناسة؟
ازل مالهة حس، تخابرني يوم وتختفي عشرة، عمتي سهام كلش تمرضت خطية ورجليهة يوم عن يوم ديسگطن، اخذوهة لكذا دكتور وكلهم يشخصون حالتهة نفس التشخيص، عدهة دوالي وفد نوب مأذياتهة، متگدر تمشي گوة
ردت ابقة وياهة بس مقبلت اصرت علية انو اروح اتونس، مرة عمي ام ازل بقت
اجوي شيوخ عشيرتنة وراحو بسيارة گدامنة، تفاجئت من اجة شاهين علينة، ومثل الريح من تطرق الباب وتفزز النايم، هيچ فز گلبي من شفتة
تحكمت بمشاعري واجاهلت وجودة، مباوعت لناحيتة وطول اليوم اني اتهرب حتة مالتقي بي
مرن الأيام بصعوبة علية، اضغط علة نفسي حتة مابچي من اشوفة لو من يجي طاري
سمعت من سرور مريم رجعت للدوام، شايفتهة، مجرد اسمع اسمهة اتخايلهة وية شاهين وگلبي ينعصر عصر
بهل ايام ابوية راح سئل على علي بمنطقتهم وطلعو خوش ناس سمعتهم طيبة، مع ذلك بابا مچان كلش مقتنع ماعرف ليش، كلسع يگلي لتتأملين زايد بس معرفت شنو قصدة، حتة امي استغربت
ام ميس: مو سئل عليهم بعد المن هل حچي
بيداء: خاف سامع شي محلو؟
ام ميس: لا چان گلي، يجوز ميريد يستعجل، ابوچن يحبچن بتي
بيداء: چا نضل يمة طول العمر، ندري يحبنة
ام ميس: سكتي انتي مفلفلة عالزواج، سكتي
بيداء: والله اني عريسي حاضر، غير يخلص السادس وافتك
ثاني يوم بالرجعة من الجامعة تفاجئت من شاهين فك حلگة بكلمة وياية، وهو طول هاي الفترة ذابهة عالصامت
شاهين: ليش ماگتيلي علي طالب ايدچ؟
تفاجئت
ميس: شنو
شاهين: يعني مسمعتي سؤالي، انطرشتي
ميس: سمعتك، بس شدراك
شاهين: ليش متريدني اعرف؟
ميس: لا مو هيچ
شاهين: لعد
ميس: هيچ بس تعجبت منين دريت
شاهين: ابوچ يسئلني عليه، علساس اعرفة اني
ميس: ممم
شاهين: وانتي اكيد موافقتي؟
ميس: وليش لحتى ماوافق
التفت علية
شاهين: يعني موافقة؟
ميس: اي موافقة
گلتهة من حرگة گلبي، شنو يعني مستغرب انو بعد ماركض وراه
شاهين: ومنين تعرفي انتي يابة؟
صابرين... صرت بموقف متوقعت بيوم انحط بي، اكيد راح يطلع نفسة بريء ويذب كلشي براسي
عماد: شبيهة صابرين
عواد: اني جبتك لهنا حتة اسمع الصاير شنو من الطرفين، لا اريد اظلمك ولا اظلمهة
عماد: بخصوص شنو
عواد: يعني والله وبالله موضوع مينحچي بي، بس انتة مو غريب ومعزتك من معزة شاهين اخوية الصغير
عماد: الله يعزك حبيبي، فهموني شنو الموضوع
عواد: سمعنة انتة وصابرين بعدكم ماصايرين زوج وزوجة، صحيح هذا الحچي؟
هو گال هيچ واني غمضت عيوني من الفشلة والخجل، شدعي عليك شاهين وانتة اخوية
ساكت
شاهين: احچي صحيح هذا الحچي؟
عماد: هذا شي خاص بية وبيهة
فكيت عيوني بعد ما چنت مغمضتهن، عجيب
شاهين: اني ادري بيهة شالعة گلبك، ليش ماگتلي
عماد: ماشالعة گلبي ولا شي، كل ما في الأمر اتفقنة من تتعود وترتاح بيناتنة عود الزواج يتم، وليش وجههة هيچ؟
شاهين: ضربتهة، واكسر راسهة هم فشلتني گدامك
عماد: صدگ چذب، اني جاي شاكي حتة تضربهة؟
شاهين: يعني عادي من تعاندك ومطلعة روحك؟
سكت'طيبة_الربيعي'
عواد: صابرين غلطت، وانتة هم غلطت من مانطيتنة علم حتة نعرف نتصرف
عماد: يا جماعة اني ماحچيت لان هذا الشي بيني وبينهة، من اجي اشكيلكم واگللكم سوت كيت وكيت عود لذاك الوقت انتو حرين بالتصرف، بس اني ماشكيت
ام عواد: ابن اصول وليدي، الله يحفظك
عواد: هسه شنو، اذا القاضي راضي احنة المن جاي ندخل
شاهين: القاضي ماراضي، عماد اذا علمودي ترة ماراح يأثر علة صداقتنة، انتة تعرف هل شي كلش زين
عماد: لا والله وبالله مو علمود شي، واصلاً گتلك اني احبهة واريدهة وحتة اذا صار خلاف بيناتنة لتتوقع فد يوم اجي اكشر بوجهك لو اگلك اختك هيچ وهيچ، شي بيني وبينهة فضت راحت
عواد: هاي هية اذا انتة راضي احنة مالنة شغل، صابرين رفعي راسچ
رفعت راسي بحذر، الدموع مغرغرة بعيني ماريدة يشوفني ضعيفة
عيوني على عواد
عواد: رجلچ تحترمي وتلبين طلباتة، وتنطي حقوقة كاملة مكملة، مثل ما احنة مانرضالة يقصر وياچ انتي هم مانرضة تقصيرن ويا
هزيت براسي اي، بس اريد اخلص
صارت عيني بأتجاه شاهين، يباوع علية وعيونة تريد تاكلني، دنگت راسي گبل
عواد: يلة گومي بدلي وروحي وية رجلچ، بسرعة
گمت واحس راسي راح يطگ من الألم، عيوني شلون بية، سگطني
صعدت امي وراية، لبست عباتي واني ابچي
ام عواد: احسلچ هيچ؟ ولچ مگليتني تگلي منين ماجيچ نفس الراس اليابس
صابرين: تحاسبيني بس متحاسبين ابنچ العمة عيني الة شوية، باعي باعي، باعي وجهي! يا بنية تطلع مكتولة من بيت اهلهة يا بنيييية
ام عواد: صمي لهذا صمي
وتأشر علة حلگهة
ام عواد: لو ما لسانچ وعنادچ چان هسه انتي ملكة ابيت رجلچ، شفتي شلون مانطة بيچ؟؟ وانتي بس ترديلچ حجة حتة اطلعي مو خوش
عفتهة تحچي
صابرين: هاي هية بعد ماجيكم زعلانة، راح اعتبر ماعندي اهل
ام عواد: اهلچ چيف يردون مصلحتچ صارو مو اهلچ مو
صابرين: طبعاً لان مو حالي حال كل وحدة تجي زعلانة، وهذا شاهين بعد خل ينسة عندة اخت، هو السبب بكل الي صار
ام عواد: الله يهديچ، ماتتعضين، يضل لسانچ عام عليچ
صابرين: ماشي يوم
جيت لهنا ارتاح شبعت قهر، حتة لو اني غلطانة المفروض اهلي يوگفون وياية، يفتهمون وضعي
نزلت ماهمة طالعين بالباب، من طلعت امي رادت تبوسني، ابتعدت
صابرين: موگفتو وياية، اذيتوني، بعد ماريدكم
عفتهة ومشيت
عواد: مثل ماوصيتچ، خوووش
صابرين: اي'طيبة_الربيعي'
باسني براسي
عواد: يلة صعدي
عماد: فيمالا، فيمالا عمة عود تعالولنة
ام عواد: انشاءالله عيوني
عواد&شاهين: الله وياكم
صعدت بالصدر، شغل السيارة وطلع
هو ساكت واني ساكتة لحد ما وصلنة للبيت، طبيت بس عمتي ورند گاعدات الولد ماهمة
سلمت وهو وراية طب
رند شافتني هيچ ركضت علية
رند: عزة هاي شبي وجهچ
امة تباوع علية متفاجئة
صابرين: مابية شي
عماد: عوفيهة هسه رند
ام عماد: شكو يمة، شبيهة مرتك
عماد: ماكو شي، صعدي فوگ صابرين
حچيت بصوت ناصي وية رند
صابرين: بعدين اگلچ، مالي خلگ هسه
رند: ماشي
لاحظت الحزن بعيونهة من شافتني هيچ
عفتهم وصعدت
نزعت العباية ولبست بجامة، باوعت لوجهي للمراية وتفحصتة بيدي
نزلن دموعي
طب وسد الباب
ابتعدت من الميز ومشيت للچرباية
وگف بوجهي، رفعت وجهي بوجهة
مد ايدة يتلمس وجهي
وخرت رجعت ليورة
عماد: بس خل اشوف
تقرب ورجع يتلمس وجهي
عماد: صدگ چذب، والله لو ما صاحبي و أعزة...
عفتة ومشيت تغطيت جوة الفراش وابچي
عماد: شلون درو
مجاوبت
عماد: والله ماحاچي شي اني، فهميني شلون درو
صابرين: درو، سمعتني امي احچي وياك، ارتاحيت هسه؟ صار الچنت تتمنى
عماد: يعني اني اتمنة أذيتچ؟ انتي ليش هيچ ضنچ كلة سوء تجاهي
صابرين: عوفني عماد، خليني ارتاح
سمعت الباب انفتح وانسد، وخر الغطة شفتة ماهوة'طيبة_الربيعي'
ضليت ابچي لحد ما دخلت رند
شافتني هيچ لحت علية تريد تعرف شكو، ترددت اگوللهة لو خاف هية هم تاخذ غير نظرة عني وبعد تسحب روحهة من عندي
رند: لچ صبو راح انجن، بس گليلي شصاير، منو هيچ مسوي بيچ
صابرين: اذا احچيلچ دير بالچ احد يعرف، ولا عمتي ولا احد
رند: ماحچي بس گولي
صابرين: احلفي متحچين لأحد
رند: والله عيب عليچ، وترابة لبابا ماحچي وداعتچ
صابرين: اني واخوچ مصار شي بيناتنة
رند: شلون يعني
صابرين: يعني بليلة العرس كلشي مصار، لحد الآن
فكت عيونهة على وسعهن
رند: صدوگ؟؟؟
هزيت براسي اي
رند: ليييش
معرفت اگول الصراحة لو اگول چنت خايفة
صابرين: مادري
رند: مستحيل، منو السبب يعني انتي لو عماد؟
صابرين: اني، چنت خايفة
رند: مممم، ولحد الآن خايفة
صابرين: مو بس خايفة، يعني ماعرف شلون اشرحلچ، بس اني مخذت اخوچ برضاتي، شاهين جبرني لان صديقة ويعزة ويحبة
اني احچي وهية صافنة علية
صابرين: واخوچ يدري اني ماريدة بس مع ذلك اصر ياخذني
رند: يعني متحبي؟
صابرين: مو مسألة حب او كره، مو شي مربوط بشي
وحچيتلهة السبب وشنو چان يسوي بية من چنت صغيرة
رند: بس مدام اعتذرلچ ووضح انو تصرفة نابع عن شقة وچان ميفتهم ليش لحد الآن متريدي
صابرين: اذاني هواية، خلاني افقد الثقة بنفسي
رند: زين وهسه شلون، وجهچ ليش هيچ
صابرين: شاهين من درة ضربني، وعواد دز علة عماد حتة يفتهم منة
خلت ايدهة على حلگهة
رند: يبوووو، شمسوي بيچ هذا من كل عقلة، وعماد شسوة
صابرين: شيسوي، صاحبة يعني يروح يكتلة مثلاً
رند: لا بس قصدي شگللهم، شنو چان موقفة
صابرين: گال بيني وبينهة
سكتت
صابرين: عيوني تأذيني
رند: سودة علية
صابرين: لا اسم الله عليچ
شگد حنينة، ماعرف صدگ هيچ فقيرة لو بس وياية هيچ
رند: صبو اني ماگدر اجبرچ تحبي لعماد، بس شفتي شلون دافع عليچ ومنطة بيچ، والله يحبچ لازم تراعين مشاعرة وتقدري، گتلچ اني مادخل بيناتكم اي شي يصير اني مانحاز لطرف، بس لان احبچ راح انصحچ
دنگت راسي العب بالفراش
رند: انتي غلطتي...
رفعت راسي
رند: اي هاي الصراحة، والله لو عندي واحد يحبني هيچ اصيرلة ام و اب، احير شلون ارضي، مو لان اخوية احچي هيچ والله، بس اعرفة شگد يحبچ خبصنة بيچ، وصارلة شگد يگول لأمي من تگلة اريد ازوجك، يگللهة المرة موجودة بس كون الله يهديهة وتوافق
اسمعلهة واني مدنگة راسي، عيوني تأذيني واحس راسي راح يطگ، منا كلام اهلي ومنا كلام رند
اخر شي گالت
رند: بس رغم الصار شاهين مالة حق يمد ايدة عليچ، وعواد شگال
صابرين: وصاني احترم عماد وماقصر بحقة، ومرضة عالسواه شاهين بية
رند: يعني مچان موجود من كتلچ؟
هزيت براسي لا
بقت يمي تفرك راسي خطية، لحد ما غفيت جوة ايدهة
من صحيت بس صوت المبردة بأذاني، البيت سنطة
طلعت من الغرفة رحت على غرفة رند نايمة
نزلت جوة بس كرار گاعد'طيبة_الربيعي'
صابرين: ها كرار، شنو اهلك وينهم نايمين؟
كرار: امي تصلي ورجلچ طالع، البقية نايمين
صابرين: تمام
رحت للمطبخ، طلعت تفاحة، انتچيت عالسنك اكل وافكر، اذا چان بضنة راح يگدر يسيطر علية وعلى مشاعري من ياخذ اليريدة فخل يبقة يحلم
محد واگف بصفي، محد نصفني، وهسه بعد السواه شاهين بية تأكدت انو مالي مفر من عماد غير انو اصير زوجتة، لكن مستحيل يربح گلبي، مانطيك مرادك لو تطلع براسك نخلة، مثل ما گلبت اخوية علية وخليتة يضربني راح اشن الحرب عليك
وهية وحدة من الثنين، لو اني انتصر لو انتة، بالحالتين مراح ارمي سيفي وانسحب
بين ما داصعد الدرج سمعت طگة الباب مال هول، انداريت شفتة طب
شافني
حچة وية كرار
عماد: ليش لهسه مانايم
كرار: جاي العب
عماد: من الصبح انتة علة هذا التبن...
صعدت، دخلت للحمام، غسلت وجهي وطلعت
فتت للغرفة لگيتة يبدل
گعدت عالسرير منتظرتة يخلص
يبدل وعينة علية
من خلص تقرب لناحيتي، گمت من مكاني
صرنة واحد بوجه الثاني
عماد: تعاركت وية شاهين، ماقبلة يمد ايدة عليچ حتة لو اخوچ
صابرين: مدهة وراح، ليش تعاركت ويا مو هية هاي غايتك؟
عماد: راح تعيدين نفس الحچي مو؟
صابرين: لا ماعيد ولا شي، بس مثل ما ردت، ادبني شاهين وهسه التريدة راح يصير
عماد: شنو التريدة راح يصير
صابرين: تفضل هاي اني گدامك، مستعدة اصير مرتك، بس گلبي يبقة يمي لتتوقع بيوم تحصل عليه
صفن، شوية وقرب وجهة لوجهي
غمضت عيوني، حسيت بأنفاسة الحارة تلحف بوجهي
فتحت عيني لگيتة فاك عيونة بعيوني
ابتعد
عماد: واني اريد اكسب گلبچ، غايتي مو مثل ما چنتي متصورة
راح للچرباية جر الغطة وتمدد
بقيت واگفة واحس نفسي تفشلت
صابرين: شنو يعني تريد تذلني حضرتك؟
عماد: نامي صابرين'طيبة_الربيعي'
انطاني ظهرة
شلت المخدة وجريت چرچف من فوگ الكنتور
شمرتهن بالگاع وتمددت وتغطيت
عماد: گومي نامي هنا
صابرين: عوفني انام وين مااني اريد
عماد: گومي داگلچ
صابرين: واذا مگمت شتسوي؟ هم تضربني مثل شاهين؟
سكت
تغطيت ودموعي نزلن عالمخدة، يريد يذلني، يريد يمشيني بمزاجة
عماد: اذا حچت وياچ امچ گليلهة الزواج تم، لتزيدين ولا تنقصين
مجاوبتة، عود هو خير وميريد يغصبني علة شي، مو عبالك من البداية يدري اني ماطيقة ورغم هذا مرتاح الة ازوجني
رند... بعد العركة الصارت بين عماد وصابرين اني وأمي تأكدنة اكو شي بيناتهم، امي اصرت انو ادگ على ام عواد وتلمحلهة انو صابرين ممرضية عماد
رند: يوم بيناتهم احنة شلنة دخل
ام عماد: شلنة دخل شلون؟ داشوفهة مو خوش وية اخوچ، ممريحتة، خل اخابر امهة يجوز تدري بشي
رند: والله عيب هسه شيگولون علينة
ام عماد: لعد احسن من يضلون هيچ؟ اني صوچي چان المفروض من البداية اتصرف من شفت الوضع ميطمن بينهم
دگت عليهة گلتلهة العرسان لهسه ممتعودين علة بعض وعلاقتهم مو شي بلكت تحاچين صابرين واني احاچي عماد حتة نفتهم منهم اذا اكو شي ندخل، ندخل هسه ولا بعدين من يوگع الفاس بالراس
من سدتة گتلهة
رند: شگالت
ام عماد: مگالت المرة خطية علة نياتهة، مادري بعد افتهمت مخزى كلامي لو لا
عماد ضل اليوم كلة برة، والصبح يلة حسينة عليه موجود الظاهر جاي متأخر
امي سئلتة شكو
عماد: يوم لخاطر الله لتلحين علية، من يصير شي عود اجي اگلچ لتخافين
ام عماد: شلون ماكو شي وانتم واحد يريد ياكل الثاني، اريد افتهم زواجيش هذا
عماد: كل مرة ورجال تصير بيناتهم مشاكل، حالنة حال كل ثنين مزوجين جديد
ام عماد: هاي المشاكل مو طبيعي تبدي من اولهة، اكو خلل بالعلاقة اذا هيچ'طيبة_الربيعي'
گام: راح اطلع، محتاجين شي؟
ام عماد: وين مو دنسولف
عماد: منسولف، موضوع ميتسولف بي، گتلچ اذا صار شي لا سامح الله انتي اول شخص راح يدري
عافنة وطلع، ثاني يوم تفاجئت من شفتهة بهذا الوضع ولحيت الة اعرف شصاير
انصدمت من عرفت العلاقة بينهة وبين عماد عالهاوية، ابد متوقعت عماد يجبر بنية عليه، مو من شيم اخوية، مستحيل
لكن تأكدت انو فعلاً عاشقهة، وهل عشق عامي بحيث ميشوف الحقيقة گدامة، هل شي ازعجني لكن عذرتهة، محد يگدر يجبر شخص يحبة، كل انسان ومشاعرة الخاصة بي، لا اريد الولد البالنذورة ولا الرجال البالسحورة
امي سئلتني بس مگتلهة شي، ماريد ازيد الطين بلة لان اذا امي درت اكيد راح تصير مشاكل بينهة وبين صابرين، واني ماريد اتسبب بهل شي
بقيت اراقبهم وحسيت عماد مو ذاك الوجه اليضحك من يوم يومة، وصابرين كلة بالغرفة يادوب اروحلهة ندرس شوية
حتة عالغدة متگعد ويانة، وعماد لگمتين ويگوم
مر اسبوع واني متكئبة لا البيت ينطاق من ورة هدوئهم ثنيناتهم ولا الدوام يساعد على الاسترخاء والسعادة لان امتحان فوگ امتحان وتحضير ورة تحضير، راسي صاير بگد البطيخة من الدراسة
الخميس من رجعنة من الدوام تفاجئت من شفت ام عواد يمنة، وعرفت انو جاية علمودي
اتفقت وية امي يجون يطلبون ايدي رسمي بعد ما اخذو الموافقة مني، چنت متلهفة انو اصير من نصيب عواد، هل رجال الة تأثير كلش قوي علة مشاعري، ماعرف ليش وشمعنى هو، بس كُل الي اعرفة انو اني محظوظة بهذا النصيب
عماد گلي
عماد: شوكت عدكم مجال من الدراسة
رند: يقبط هذا الشهر نخلص امتحانات يلة، ليش؟
عماد: حتة يجون العالم يخطبوچ رسمي
بطني وجعتني، من الفرحة هذا التوتر
باوعت لصابرين، ابتسمت
عماد: ماعندچ اشكال غير؟
هزيت براسي لا
حسيت الوقت يمشي بسرعة بسرعة، برمشة عين اجة اليوم الموعود، قبلهة بيوم امي اخذتني للسوگ اشتريت فستان بسيط وحلو وكم غرض ارتب حالي بيهن من يجون علية
واگفين بالمطبخ من عماد طب وگال
عماد: حضرن الچاي الجماعة وصلو
صابرين: اوكي
من طلع صابرين باعتلي
صابرين: صوت نبضات گلبچ وصلن لهنا، علة كيفچ لا يطلع گلبچ ليبرة
اخذت القوري وترستة مي'طيبة_الربيعي'
رند: اوف صابرين لتوتريني بالزايد
صابرين: اويلي، هسه يطب بطولة الحلو، ويحط ايدة علة شاربة ويگول بالطلاگ ماطلع منا الة لمن بتكم تصير مريتي
باوعت عليهة
رند: صابرين!
ضحكت: وجهچ صار طمامة، علة شنو هو راح تقرون الفاتحة فضت راحت
رند: ليش هية سهلة؟؟؟ حضرتچ مو حرگتي اخوية بالچاي من طلبو ايدچ؟
عبست
رند: هااا
صابرين: اني وحد
رند: وحد لو چنتي متحلفتلة
گلتهة واني اضحك
دخلت امي
ام عماد: خفي ايدچ، جيبي الچاي وتعاي يلة
رند بتوتر: بعدة خل يفور المي
ام عماد: تعاي صابرين وياهة عود
صابرين: اي عمة طبعاً، منو جاي؟
ام عماد: كلهم حتة جدچ
صابرين: هااا
ام عماد: والله
باوعت لصابرين فرحت من سمعت جدهة جاي
من طلعت امي گالت
صابرين: ياروحي يا جدو
رند: ليش هلگد فرحتي
صابرين: ميتة عليه، صارلي شگد مشايفتة
رند: تصالحو اهلچ وياهم؟
صابرين: كون متصالحين، ماادري
خلص الچاي واحس قرب موعد اعدامي ههههه
اصب وينطش منا ومنا
اخذت القوري من ايدي
صابرين: وخري خل اني اصب وانتي فوتي، هيچ منا لباچر منخلص
صبت ومدتلي الصينية
صابرين: يلة، اني وراچ
اخذتهة ومشيت للهول، اخذت نفس وفتت
رند: السلام عليكم
الكل رد السلام، اباوع للگاع ماگدر اباوع عليهم اتوتر بالزايد
قدمت للكُل ومن وصلت يمة قدمت بسرعة وركضت گعدت بصف امي
رفعت عيني عليه ميباوع، لابس ساعة وعطرة تارس الهول، شلون ساعة حلوة، هية محلية ايدة مدري ايدة محلية الساعة، الشوارب اخ يمة، اخذن عقلي
انتبهت علة صابرين اجت گعدت بصفي
ابو حچة
ابو عواد: ها عماد شتگول نلفهة وناخذهة؟
ضحك: اخذوهة
ابو عواد: ههههه، ها عمو شنو رأيچ انتي موافقة؟
باوعتلة ابلاهة
رند: ها عمو'طيبة_الربيعي'
ابو عواد: ناخذچ ويانة هسه؟ بعد شلچ بأهلچ
رند: لا عمو شلون
كلهم ضحكو
صابرين شاورتني: شبيچ انخطف لونچ، بس لا صدگتي
والله صدگت، شكلة چان جاد
الجد حچة: خوفت البنية ابني
ابو عواد: چا هية بنيتنة بعد، اشاقيچ عمو حبيبتي، المهم احنة جيتنة هاي نريد المحروسة رند لعواد، اذا موافقين هسه نتفق علة كلشي وبعدين الولد والبنية بيناتهم يتفقون عالباقي
عمي گال: جيتكم عالعين وعالراس، واحنة صرنة اهل بعد مبيناتنة رسميات انشاءالله
ابو عواد: حبيبي سالم راسك
عمي: ومادام البنية واخوهة موافقين نقرة الفاتحة وانشاءالله الله يتممهة علة خير
احس سمعي تشوش وگمت ما اميز بين الكلام الينگال طالع من منو، كُل الي انتبهت عليه انو كلهم مدو ايديهم وبدو يقرون
قريت الفاتحة وباوعت علة عماد، غمزلي
دنگت راسي مبتسمة
صار نقاش علمود الحاضر والغايب، والخطوبة شوكت وشلون، اتفقو عالجمعة الجاية، كلش قريب الموعد، باوعت عليه معقولة انعجب بية وهلگد مستعجل؟
انتبه علية، معرفت شلون انزل راسي من الفشلة، هسه شيگول علية مشايفة لو اول مرة يخطبوهة
تنفست براحة من گامو يريدون يروحون بعد ما اتفقو على كلشي
بالباب وگفن امي وامهة يسولفن
امة باعتلي مبتسمة
ام عواد: حبيبتي شطالعة اليوم ماشاءالله عيني باردة عليچ
رند: تسلمين خالة
يايابة شگد خجلت
انتبهت صابرين واگفة علة صفحة وباين الحزن بوجههة
طلعو عماد وامي وياهم لباب الطرمة
باوعت لصابرين
رند: شبيچ
صابرين: لا مابية، تعاي گعدي
گعدت بصفهة
صابرين: هسه شنو عجبچ الحچي
رند: اي، مدام عماد راضي واشوفة مرتاح للموضوع اني هم راضية
صابرين: زين لعد، حتة نحضرچ للخطوبة، اني اجهزچ مو تجيبين هالة مدري منوووو
ضحكت: لا عمي انتي جهزيني
طبو امي وعماد
عماد يباوع لصابرين، باوعتلهة مدنگة، الله يصلح بيناتكم، بس اني خوما ابقة اباوع لازم اتصرف
گعدو'طيبة_الربيعي'
ام عماد: ها ماما شنو رأيچ بالولد، ولو اختة گاعدة بس صبو مو غريبة
صابرين: لا عمة عادي، رند هم اختي
ام عماد: حبيبتي
رند: اذا عماد راضي اني راضية
عماد: اهم شي انتي، مو اني الراح اعيش ويا
گام يهز برجلة
رند: مدام انتو راضين ومرتاحين من هل ناحية اني هم راضية، لان اعرف الكم نظرة للمستقبل
عماد: هاي هية، انطاني الولد فلوس الحاضر حتة ترحين وية امي للسوگ تشترين احتياجاتچ
رند: انشاءالله، بس اريد صابرين وياية هم، اخذ رأيهة بالاشياء الراح اشتريهن
عماد: المن صابرين؟ انتي وامي روحن
ام عماد: هسه الله كريم نشوف شلون تصير
رند: مو بنية مثلي وتفتهمني يوم، شكو بيهة عماد
عماد: اني شگلت؟
رند: ماشي ماشي
محبيت الح، مبين الوضع مكهرب بيناتهم
صابرين... فرحت بجية جدو وتمنيت لو يبات يمنة بس متصير، ملحگت اشبع شوف منة وحسيت بنظرات اشتياقة الية
الحمدلله مبين تصالحو، انتظر بفارغ الصبر حتة اروح عليهم اشوفهم
التهيت بعماد وتصرفاتة التافهة
من گال لرند انتي الراح تعيشين ويا انطيتة نظرة، نظرة تسوة عمرة، مگلت هيچ لعد من خطبتني وشفتني رافضة
يهز برجلة معاجبة الوضع، ضجت من رفض اروح وياهم، ثاني يوم ورة الداوم عمتي گالت لرند حضري نفسچ حتة نزرگ للسوگ
عماد ذبنة وراح للشغل، اريد اروح وياهم ضايجة ومتشوقة احضر عروسة اخوية
دگيت عليه
جاوب: الو
صابرين: الو
عماد: ها صابرين
صابرين: اريد اروح وياهم للسوگ
عماد: لا
صابرين: شنو لا؟ من شوكت متخليني اطلع
عماد: من اليوم
صابرين: ليش عود
عماد: هيچ بكيفي
صابرين: شنو بكيفك، العروسة عروسة اخوية وقبل كلشي صديقتي اريد اشاركهة فرحتهة
عماد: ماكو داعي تخورين بالسواگة حتة تشاركيهة فرحتهة، يلة عندي شغل؟ رايدة شي بعد؟
صابرين: خليني اروووح
عماد: گلت لا، اجيت وياچ بالعيني واغاتي مفاد، راح اتصرف حالي حال باقي الزلم اشوف حظي يگعد وياچ لو يضل اعوج
وسدة، يسدة بووووجهي، رجعت دگيت عليه مجاوب، بسييييطة
نزلت جوة'طيبة_الربيعي'
صابرين: عمة
دتلبس جواريبهة
ام عماد: ها عمة
صابرين: اريد اروح وياچن، وعماد ميخليني
ام عماد: ليش
صابرين: ميقبل ماعرف
ام عماد: ميخالف مدام رجلچ ميقبل لترحين، غير مرة اخذچ
صابرين: الله عليچ قنعي
دخلت رند
رند: يوم حبابة اريدهة وياية، خابري انتي يسمع كلامچ
ام عماد: شلون بيچن
صابرين: بس هل مرة فدوة
ام عماد: دگيلي عليه بلة
صابرين: فديييييت
ورحت بستهة
ام عماد: اي بس من تردين شي هاي البوسة مو
ضحكت
صابرين: لا والله
دگت عليه رند وانطتة الهة
ام عماد: ها يمة الله يساعدك، راح اروح للسوگ، اي اجهزهة انشاءالله، هم يالة، اگلك عيوني راح اخذ صابرين هم ويانة خوما تضل وحدهة بالبيت، اخوك طلع وضلو اخوتك الصغار، ميخالف لخاطري، ممم، خوش يمة براحتك، اي خوش، الله وياك
وانطت الموبايل لرند
ام عماد: ميقبل، ضلي هل مرة غير مرة اخذچ
حقير، باوعت لرند الة شوية ابچي
رند: شبي هذا
ام عماد: روحي خلصي لتعطليني
صابرين: معليچ بية مرة لخ اجي وياچ، قابل راح تشترين كلشي اليوم اصلاً متلحگين وراچ تحجزين صالون وتشترين ذهب
رند: ممم
ضليت وحدي، الولد طلعو يلعبون برة واني نضفت الغرفة وطبيت سبحت، طفت الكهرباء واني بالحمام
طلعت اريد اجيب الموبايل اضوي بي واتزحلگت، وگعت ليگدام وصارت الوگعة علة ايدي طلعت روحي من الوجع
منا اني انرعب من الظلمة ومنا وجع ايدي، خلصت سبح واني ابچي
اجتي الكهرباء يلة راح الخوف مني، مشطت شعري بالگوة
طب عماد
فزيت من مكاني'طيبة_الربيعي'
عماد: شبيچ شفتي جني
صابرين: بسم الله
خالة ايدي على گلبي
عماد: شبيچ تبچين
صابرين: مابية شي
خلصت تمشيط وهو واگف يباوعلي
عماد: شكو
صابرين: داگلك ماكو شي
عماد: انتي مو صوچچ، صوچي اني اجر عدل وياچ
طلع ورگع الباب، شحچيت اني هذا مخبل
من اجني من السوگ ركضت اشوف الغراض عمتي رزلتنة
ام عماد: سون العشة الولد ماتو من الجوع، بعدين شوفن الغراض شجاچن
اني ورند وحدة تباوع للثانية ونضحك
نزيت من مكاني من سمعت صيحة عماد
عماد: متسمعن!
باوعتلة، هذا شبي
عماد: عينچ لا افگسهة
والله لو ما گاعدين البقية اعرف شحچي ويا، عفت البيدي ورحت للمطبخ
احچي وية نفسي
صابرين: يصيح علية گدامهم، خدامة عندك اني
اجتي رند، سوينة العشة واحنة نسولف
صابرين: شفتي شلون صاير وياية
رند: اندري شجاه، خاف لان يشوف العنب وميگدر ينولة
وغمزتلي
صابرين: دسكتي يا عنب، غير وگعت وتكسرت اليوم، الله ستر
شهگت: عززة وين وگعتي
بين ما داحچيلهة الصار اجة للمطبخ
عماد: كافي لغوة، وين صار العشة
رند: يمعود مرتك واگعة اليوم وانتة مو داري
عضيت شفتي واني اباوعلهة حتة تسكت، حچتلة كل الصار، هاي مثل اخوهة غدارة، بسيطة
عماد: الخوافة، وينة لسانچ وريشچ النافشتة علية، تخافين من الظلمة
صابرين: طبعاً اخاف اذا وحدي بالبيت، مو صوچي صوچك
عماد: هاا التفت التفت رجعت علة عماد المگرود
صابرين: لو خالني اروح وياهن چان مصار الي صار
عماد: گعدي وسكتي بالبيت، طلعات ماكو بعد
صابرين: لا والله'طيبة_الربيعي'
خزرني، طبت عمتي، طلع من المطبخ واحنة خلصنة العشة
گعدنة نتعشة وكل ما عيني تجي عليه ينزل عينة ميباوعلي، مو صاحي
بليل دزينة كرار يجيب عصائر وحب وچبس حتة نباوع فلم
اجتي عمتي تحچي علينة وراچن دوام والمن هل سهر، توسلنة بيهة تعتقنة لوجه الله
رند: يوم سادس وممصدگين هل اسبوع شوية هدوء، خلينة نباوع فدوة اروحلچ
كرار: يمة روحي نامي لخاطر الله مو بدة الفلم
ام عماد: طرگاعة سودة هذا الجيل ولا ينگدرلكم
باوعت لعماد بيدة الموبايل وعينة بالشاشة
تمددت عالقنفة وخليت رجل علة رجل، راسي على رجل رند
مديت ايدي عالميز اريد اخذ حفنة حب
اجت عيني علة عماد، يأشرلي بعيونة، مفتهمت، هزيت براسي يعني شكو
عماد: وين موبايلچ؟
صابرين: هياتة، ليش
عماد: شوفي عود
شبي هذا، اجتني رسالة منة
"رجليچ غطيهن متستحين حموينچ گاعدين!"
"ترة جهال"
"واذا جهال، غطيهن"
باوعتلة صفح
دزلي مسج
"وعينچ لتباعيلي هيچ مو بگدچ اني"
"مو بالعمر هية بالعقل، والحليم تكفيه الأشارة"
عيوني صارت عليه، عيونة صارن بگصتة
ضحكت، ميگدر يسويلي شي گاعدين
دزلي مسج
"يعني اني بلا عقل؟"
"تخليني اباوع لو شلون"
"جاوبيني"
"مگلت شي اني، شتفتهمهة افتهمهة"
"راح اگوملچ"
"اهووو خل اباوع، مقصدي شي هيچ لغيت وحدي"
"خوش"
انتبهت عليه گام صعد فوگ، دعوفني اتونس مخرب الونسة ومفرق الجماعات
خلص الفلم باوعت للولد كلهم نايمين، رند طفت صعدت تنام وعافو الهوسة علية
لميتهن ومسحت الميز وصعدت
عماد گاعد وبيدة الموبايل
شافني تركة وخلاه بصفة، هل ايام كلهة اني انام بالگاع
جريت فراش فرشتة وتمددت'طيبة_الربيعي'
عماد: گومي عالچرباية اني انام بالگاع
صابرين: ماحاجة، اني مرتاحة هنا
عماد: لچ بابا اتمنة فد يوم اگلچ شي وتگليلي اي بدون ماتعاندين
سمعت خطواتة بأتجاهي
دفعت الغطة وانداريت شفتة فوگ راسي
عماد: گومي
اعتدلت بگعدتي
صابرين: يعني شنو گوة خوما گوة
عماد: اي گوة، يلة
گمت: اووووف
من وگفت اخذ ايدي لزمهة
عماد: بعدهة ايدچ توجعچ
صابرين: اي توجعني وكلة من وراك
عماد: اوديچ للطبيب عود
صابرين: ماريد
جريت ايدي وصعدت عالچرباية
عماد: ام خشم اليابس، تعاند علة كلشي تعاند، انتي حتة نفسچ مسالمة منچ
باوعتلة صفح
صابرين: اي ماشي، هذا الموجود
عماد: هذا الموجود
ثاني يوم هم راحن للسوگ وهم مخلاني اروح، واستمر هل وضع الأسبوع كلة يومية يرحن للسوگ واني اضل بالبيت اگابل الحيطان واگعد
خطية رند كذا مرة جابلتي اشياء وياهة، دشداشة وعطر ومكياج
صابرين: ولچ المن، كومة عندي
رند: ميخالف زيادة الخير خيرين
صابرين: انتي العروس، لازم تشترين احتياجاتچ
رند: كومة اشتريت
محظوظ بيهة عواد، كون يعرف شلون يعاملهة، جوهرة رند ويرادلهة راعي أمين يعرف قيمتهة شنو
امي تخابرني هل ايام ماجاوب عليهة، حچيت وية بيداء وميس عرفت متصالحين وية اهلي
ميتة على بيت جدي وبنفسي ازورهم
بليل گاعدة ادرس جوة وبس عماد والولد گاعدين، عمتي بالغرفة تصلي ورند راحت نامت من وكت
گتلة: متوديني لبيت جدو، مشتاقتلهم
باوعلي
صابرين: شبيك
عماد: عگب باچر الخطوبة وشوفيهم
صابرين: يعني متوديني باچر؟ حتة لو ساعة بس نگعد شوية ونرجع
عماد: صابرين هيچ روحات متعجبني
استغربت: ليش متعجبك'طيبة_الربيعي'
عماد: هيچ متعجبني، بيت اهلچ عادي، غير بيت ممنوع
صابرين: بس ذولة بيت جدي، مو غربة
عماد: اني گلت غربة؟
صابرين: يعني كل هذا دتسوي اني اعرف سببة شنو، ترة مو بهل طريقة تكسب حُب واحد
خنزر علية ويأشر بعيونة عالولد
سديت كتبي وصعدت فوگ
اجة وراية
عماد: لتحاچيني هيچ گدام اخواني بعد
صابرين: ليش اني شگلت
عماد: صابرين
صابرين: شنو قصتك هل ايام، دتعاقبني مثلاً لو شنو
عماد: ماعاقبچ، عليمن اعاقبچ
راح تمدد، خليت كتبي بالجنطة
عماد: اوديچ ورة الخطوبة عود
صابرين: وديني باچر وين المشكلة
عماد: اني اوديچ بمزاجي
رفعت حواجبي بأستغراب
عماد: انتن النسوان متفيد وياچن العاطفة، تاكلن الرجال اكل، تمشن عالصراط بالأسلوب الأعوج
صابرين: هذا الأسلوب ميستخدم وية كل مرة، اني مو مثل باقي النسوان
عماد: حالچ حالهن
صابرين: كافي عماد، كافي طلبت منك شي ورفضتة واني سكتت بعد، لتطولهة وهية گصيرة
عماد: يجي يوم وتتندمين علة تعاملچ الزفت هذا وياية، ماضل صابر عليچ طول العمر، كل انسان والة طاقة تحمل
ضليت ساكتة، طلع الصبح واني منايمة، داومت نعسانة
بالرجعة صارت بوجهي نور
صابرين: تفضلي عيني انسة نور
باعتلي صفح وصعدت
صابرين: شبيچ بايگة خبزتچ؟
نور: انتي شبيچ
صابرين: لتباعيلي هيچ، واعرفي ويامن دتتعاملين
نور: ليش داتعامل وية بت الوزير
صابرين: تاج راسچ...
عماد: صابرين، صعدي
فتحت الباب وصعدت، منا اني واصلة لخشمي بس يحچي وياية حچاية انفجر بوجهة
نور: عماد اذا متردوني اصعد وياكم بعد عادي اشوفلي غير واحد
عماد: ليش شكو، احد حاچي لو شاكي؟
نور: لا محد حاچي بس خاف يعني ثگيلة عليكم
عماد: لا يابة شالقصة، عبالي اكو شي
رند: ليش حبي قابل غريبة انتي، صار كم سنة نروح ونجي سوية
سكتت، فوگ شينهة گواة عينهة، شگد صلفة، تريد تبرئ نفسهة
صدق من گال ضربني وبكى سبقني واشتكى، هية هاي اليقصدهة
من وصلنة للبيت طبيت للغرفة حليت ملابسي، طب عماد
عماد: شبيچ وية البنية
صابرين: يا بنية
عماد: نور
صابرين: وانتة شعليك'طيبة_الربيعي'
عماد: وتالي وية لسااانچ الطويل ااني
صابرين: اني وياهة، ماكو داعي تدخل
دنگت علة جنطتي اريد اطلع الكتب
جرني من ذراعي
صابرين: ايدييي شبيك
عماد: من احچي وياچ لتنطيني ظهرچ، تأدبي
جريت ايدي منة
صابرين: شتريد، علمود نور راح تسويهة قضية وتتعارك وياية؟ اذا هلگد هامتك مزوجتهة لعد
عماد: انتي مو صاحية
صابرين: ليش مو صاحية، لان احچي الحق، صاحب الحق مكروه
عماد: ولچ بابا البنية يتيمة ماعدهم امكانية، شوكت تفتهمين عاد
صابرين: هو اني شحچيت، محاچية وياهة هية تتحارش بية
عماد: تتحارش بيچ شسوتلچ
صابرين: عماد احنة بنات وهل اشياء بيناتنة، گتلك بطلهة مقبلت، تحمل الراح يجيك
صعدت عالچرباية
عماد: الله يهديچ
نمت حتة غدة متغديت، اجتي رند گتلهة تعبانة ماشتهي
رند: بس لا تعاركتو، عماد هم طلع بدون غدة
صابرين: طبعاً ليش هو يعوفني يوم مرتاحة اذا ميطلعلي سالفة
رند: لخاطري صابرين علة كيفكم وية بعض، والله راح انقهر وماتونس بخطوبتي
صابرين: ماكو شي رنود، شي تافه اصلاً، لتشغلين دماغچ الحلو بهل افكار، راح اخذلي غفة حتة انضف البيت
اخذلتي قيلولة وگعدت سويت حملة عالبيت، حجزنة كوشة الصبح يجون يشدوهة المندوبين
الأفندي مرجع الة بثنعش بليل، بعد احسن
كلمن نام بجهة، تفاجئت الصبح من اجتي نور ووياهة امهة ومرة اخوهة، صح گرايبهم بس ضجت من شفتهة، تعاملهة السيء وياية كرهني بيهة
اجوي المندوبين عماد طلعلهم، گعدنة بالمطبخ احنة النسوان
من شدوهة وخلصو صعدت حضرت فستان قصير وطلعت الشسوار خليتهن على صفحة، ماكو داعي للحذاء مراح اطلع اني
بالدعش تقريباً صعدتلي رند
رند: شو هنا
صابرين: تمددت شوية ارتاح
رند: دگومي بدلي عماد راح يجي ياخذنة للصالون
صابرين: ماشي، بس اني وياچ غير؟
رند: نور وهالة هم يجون
هم صخمانة
صابرين: تمام
بدلت ونزلت، اجة عماد وصلنة للصالون وگال لرند
عماد: رند دگي علية من تخلصن
رند: ماشي
محچة وياية، يعني يتصرف هيچ گدام البنات؟
باوعتلة ميباوعلي، سديت الباب حيل
باوعلي: الباااب
گلبت عيوني وفتت وية البنات، بقيت انتظر دوري، سويت شعري كيرلي بف، ومكيجت مكياج اووووفر، الله شگد حلو چان بنفسي امكيچ هيچ لان حضرة جنابهم اهلي ميقبلون من چنت عدهم
هسه منو يحااااچيني ههههه
من خلصنة رند گلتلي دگي عليه راح اخلص
مگدرت احچي شي گدام البنات
اتصلت عليه
عماد: ها خلصتن
صابرين: اي تعال
عماد: جاي
وسدة، باوعت لرند ماشاءالله انگلبت غير شكل، هية صح حلوة عالطبيعة بس بالمكياج والبدلة غيييييييير
اخذنة صور بموبايلي، عماد دگ وگطعة يعني وصل
لبست الصاية وخليت الشال على راسي شلون ماكان اخاف شعري يخرب'طيبة_الربيعي'
تشكرنة من الكوافيرة والسوتلنة المكياج، كلش عجبني شغلهم وراح اجي عالحنة هم لهنا
طلعن البنات گدامي واني انطيت الفلوس للكاشير
تمشيت صعدت بالصدر، التفتت على رند
صابرين: موبايلچ جبتي؟
رند: اي هياتة، عفية عماد شغل التبريد راح اموع
شغلة
عماد: شنو هذا الحجاب لخاطر الله، نزلي من گدام شعرچ كلة طالع
حچة بعصبية، استحيت گدام البنات
حچيت بصوت ناصي
صابرين: علة كيفك
عماد: استغفرالله استغفرالله
جاي هايج علية، وصلنة للبيت البنات ساعدو رند بالبدلة، واني امشي وراهن
عماد: اوكفي لطبين جوة
وصلنة للطرمة وهو وراية
انداريت عليه
صابرين: ها
عماد: هاي شمصخمة، شلون اطلعين شعرچ هيچ!
صابرين: ترة محد يشوف والصالون كلة نسوان
عماد: لتخبليني، هاي اخر مرة اطلعين شعرچ
صابرين: افتهمت
عماد: احچي عدل
صابرين: هسه اني شحچيت، شلون سالفة هاي
عماد: لتردين بوجهي، منا العالم ماريد اصيح
جريت نفس وزفرتة
عماد: طبي يلة، اشتعلو اهلچ
مادري شجاه علية من البارحة، شوية شوية بدو يجون جماعتهم، بيت عمهة وبيت اهل نور واهل هالة، وكم وحدة ماعرفهن بس هم گرايب
صعدت اني ابدل، لبست الفستان، ابيض سادة وبي تفاصيل مرتبة، يوصل لركبي، طبعاً ذوق رند هية جابتليا وية الغراض، تگول عجب امي عليچ
فعلاً طلع حلو بس حسيتة مو مستور، القصر مبالغ بي وحيل مخصر علية، همزين عالأقل نص ردان مو صلوخ
اني مو متعودة البس هيچ ومداحس براحة
نزلت ارجف لان استحي
باوعت للهول جماعتي لحد الآن ماكو، رجعت صعدت، الة يجون يلة اطب يمهم
دزيت رسالة لميس
"شوكت تجون"
"هسه جايين بالطريق"
خابرتني رند
صابرين: ها
رند: وينچ تعاي يمي
صابرين: لچ استحي
رند: دتعاي مو اني راح اوگع من الخجل، حيجون اهلچ بعد شوية، تعاااي
صابرين: يلة جاية
سديتة ونزلت، تمشيت للمطبخ لان گلبي قبضني، مردت افوت للأستقبال هيچ'طيبة_الربيعي'
بعدني دافوت واشوف نور واگفة تتمضحك وية عماد، اني ادري بيهة مو محجبة بس بهذا اللبس والمكياج والشعر وواگفة تتمضحك گدامة بهل طريقة؟؟؟؟؟؟؟
احس دمي گام يفور، وعيوني يريدن يطگن من الحرارة الصعدت بوجهي
عماد منتچي عالطباخ وبيدة گلاص مال مي
عيني علة نور وقابضة على ايدي اريد افوت افلش وجههة ابوكس، بس تراجعت من صارت عيني بعين عماد
عفتهم ورحت للأستقبال مثل البركان الهايج....
ازل... مادري اذا فعلاً يقصد كُل كلمة گالهة لو مو بوعية، حرت اخذ بحچية انو فعلاً راح يأذي عواد لو من حرگة گلبة
طلع الصبح والأفكار تودي بية من وادي لوادي، وكل وادي اظلم من القبلة
كلسع افتح موبايلي واريد ادز رسالة لأمي لو لبيداء واتراجع، لازم اعرف شنو وضع عواد، صحيح واصلة بيناتهم لهل درجة لو منذر انفعل
اذا لهل درجة لازم ابوية يدري، لازم واحد چبير يدري قبل لا واحد يوگع بدم الثاني
دزيت رسالة لبيداء، اكيد گاعدة هسه الدوام راح يبدي
شلون بية ودوامي؟
"بيداء ماروح اليوم، صارت شغلة ولازم احچيلچياهة"
شوية ودگت علية
رفعتة وحچيت بصوت ناصي
ازل: الو
بيداء: شكو خوفتيني
ازل: مو مال نحچي بالموبايل، بس عفية احچي وية ست نور خل تتوسطلي يم المدرسات، بس اليوم گليلهة ظرف طارئ
بيداء: ازل مو يومية عذرچ جوة ابطچ، هم شكو
جريت حسرة
ازل: بعدين افهمچ، بلكت يذبني عليكم، ولو وين يقبل من ورة عواد
بيداء: قلقتيني، اگول لأمچ تخابرة يجيبچ؟
ازل: لااا ابد، لتحسسيهة اكو شي
بيداء: شلون سالفة هاي، شجاه؟ يومية ينعاد السيناريو نفسة
ازل: بس احچيلي وية ست نور، وبعدين عود نسولف هسه ماگدر
بيداء: يلة ماشي
مابالي لا المدرسة ولا السادس، بس اريدة يگعد حتة احاچي
بقيت افتر بالبيت، اباوع على موبايلة، بس لو اعرف الرمز
شوية وحسيت يجي صوت طگطگة من الغرفة
صاح: ازل، وينچ
رجع الخوف تملكني، رجلية مثل النشلن مابية اگوم من القنفة
رجع صاح
منذر: اااازل
صوتي گوة يطلع
ازل: ها'طيبة_الربيعي'
منذر: مو داصيحچ، وينچ تعاي
گمت ومشيت بخطوات ثگيلة للغرفة، فتحت الباب كلة
باوعتلة مبين هستوة گاعد
ازل: ها
منذر: ساعة بيش
ازل: بالوحدة
گام يدور عالچرباية
منذر: موبايلي وين
ازل: مادري بي
منذر: شوفيليا وين، خاف بجيبي مال بنطرون
دخلت للغرفة شلت البنطرون ودورت بي، اعرف موبايلة وين بس ترددت اگلة، اخاف يگول لعبت بي
ازل: ماكو
گام: شلون شغلة هاي
بقيت واگفة اباوع عليه وهو يدور
التفت علية
منذر: شبيچ؟
هزيت براسي مابية شي وعيوني يتفحصن نظراتة وحركاتة
منذر: تعاي تقربي
ازل: ليش
منذر: وليش خايفة، اكو شي؟
ازل: لا شكو
فرك وجهة
منذر: راسي، هواي كثرت بالشرب البارحة خرب غيرتك علاء، حضريلي الحمام
ولا كانما دوامي لو حياتي مهمة، لا سئلني دوامچ ليش مرايحة ولا سئلني اذا مسويلي شي البارحة
منذر: مو وياچ؟ شبيچ صفنتي
ازل: معقولة متتذكر شسويت البارحة؟
استغرب
منذر: شسويت؟
ازل: منذر كافي تشرب، شوف حتة مو واعي على نفسك شسويت
منذر: هم راح ترجعين تعلميني عبالك طفل گدامچ، شتفقت وياچ بهذا الموضوع
ازل: واني ماگدر استمر وياك هيچ...
عقد حاجبة
منذر: شلون؟
ازل: گتلك الف مرة الشرب راح يخرب بيني وبينك، وصلت بيك تغتصبني منذر
ودمعن عيوني من اذكرت السواه بية البارحة
ضحك: مخبلة انتي، غير مرتي شنو تغتصبني
ازل: مرتك مو هيچ، البارحة ضربتني وعنفتني، شوف خنگتك مال بارحة شوف الأثر
رگبتي مطبوعة عليهة ايديه، واثر المسدس من زرف بي بطني صار ازرگ
ازل: تغيرت هواية منذر، مخليت مسبة ولا غلطة مذبيتهة بوجهي، حتة على بيت جدي غلطت، وكلة بسبب المشاكل البينك وبين عواد
راح للميز، يدور بالجرارة'طيبة_الربيعي'
منذر: وينة المسدس؟؟!
ازل: ضميتة بالكنتور، شسوي بي
منذر: بعد لتلعبين بغراضي، هذا اخر تحذير الچ
طلعة واخذة خلاه بالجرارة
منذر: جيبي خاولي وطلعيلي شورت وفانيلة
راح للحمام وخلاني واگفة مثل البهيمة
رحت وراه
ازل: انتة بالك يمي لو وين، مو داحچي وياك
دخل للحمام نزع وفتح الدوش
ازل: منذر داحچي وياك
منذر: شتردين، شرب مابطل گتلچ لتلحين
ازل: لتشرب بعد بالبيت ولا تجيني شارب، اذا تشرب بات برة من تصحة علة نفسك تعال للبيت
بقة يغني ويدندن
حچيت بصوت عالي: ليش تجاااهلني
التفت علية
منذر: تخليني اسبح لو شلووون
ازل: داحچي وياك جاوبني، لتخليني احچي مثل الخبلة وحدي
منذر: خل اسبح ونحچي
احچي ويا وماكو فايدة، كانما اكلم الحايط، رحت للصالة گاعدة عالقنفة واهز برجلي، لازم اشوفلي حل لهل موضوع مابقة هيچ، صبرت شهور انتظرتة ينعدل يفكر بية بس صاير اناني
ورة شوية صاحني، مجاوبت
منذر: يمعووودة وينچ
صحت: شترييييد
منذر: جيبي الخاولي
ازل: انتة اطلع جيب معلية اني
منذر: هااي شنووو
عفتة يحچي، مرديت
الحمام صاير قريب عالصالة، شفتة فتح الباب وطلع راسة
منذر بعصبية: صدگ تحچين
ازل: اي صدگ احچي
منذر: ازل گومي، ماعيد كلامي
شفتة جاد، وخفت ليعصب ويسويلي شي
گمت أئفئف، طلعت خاولي وناوشتة'طيبة_الربيعي'
منذر: عيب هذا الاسلوب، لتخليني اگلب عليچ
ازل: اطلع حتة نحچي يلة
عفتة ورحت گعدت
شوية وطلع
اجاني ينشف بشعرة وباين عليه ضايج
منذر: شنو موضوعچ، احچي بلة خل اسمع
ازل: موضوعي انتة، لو تبطل تشرب لو وديني لبيت اهلي
منذر: صدگ تحچين؟
ازل: اي صدگ احچي
گمت رفعت فانيليتي
ازل: هااك شوف، شوف حضرتك شتسوي من تكون شارب
تقرب يباوع للأثر
منذر: مادري اسف
راد يحضني
نزلت فانيلتي وابتعدت خطوة ليورة
ازل: هذا كلة بكون ومن تهدد وتسوي گدامي، شنو فرقك عن عواد وانتة حابسني بالبيت وتجي شارب وتأذيني؟
فك عيونة بغضب
منذر: مرة ثانية اذا جبتي اسمة علة لسانچ اگصة، افتهمتي لو لااا
فزيت
منذر: شنو هذا الحيوان وتقارنيني بي!!!
ازل بخوف: ماقارنك بي، داگلك انتة دتأذيني...
قاطعني: گتلچ اني انسة همومي بالشرب لو مگتلچ! ليش تخليني اتصرف غير تصرف وياچ وبعد حتة للبيت ماااجي بعد
سكتت
منذر: شتردين اگابلچ واگعد اتشكة! اني رجال ماحب اتشكة لواحد، اكتم هنا، تفتهمين لو لا
ويأشر علة گلبة
منذر: حبيتيني ووافقتي بية احطچ علة راسي، بس مال تحاسبيني واطلعيني خسيس ومو خوش لهنا واگلچ روحي لاهلچ، متفيديني
بقيت صافنة عليه، ومداصدگ الكلام اليطلع من حلگة
ازل: يعني تريدني اسكت وامشي وراك بعين مغمضة؟
منذر: هاي حياتي وهذا طبعي ازل، اني متربيت مدلل حتة ادورين دلال وياية
ازل: بس انتة مچنت هيچ
منذر: وهسه شفتي وضعي وطبعي، شنو يعني تردين كلمن يروح بحال سبيلة لان اشرب؟
ماعرف شجاوبة
منذر: شتردين فهميني
ازل: وديني لأهلي، ارتاح
منذر: ترتاحين من شنو، مني؟
درت وجهي اباوع بصفحة'طيبة_الربيعي'
منذر: بدلي خل اخذچ
وراح للغرفة، رحت وراه يبدل وميباوعلي، اروح ارتاح كم يوم ماعندي طاقة اتحمل بعد الصار البارحة
وصلني للبيت
گتلة: انشاءالله تفكر عدل وتشوف شگد اذيتني بذيچ الأيام
منذر: نزلي ازل، نزلي ترة واصلة لخشمي
نزلت، حتة منتظرني اطب گبل ساق وطلع من المنطقة
دخلت جوة تفاجئو من شافوني، ليش مو بالدوام ومنذر وينة ليش مطب وياچ، گتلهم مريضة تعبانة، لاحظت القلق بعيونهم
وطلبت محد يسئلني مجرد ارهاق الدوام والمسؤولية كالعادة
ضليت اليوم كلة انتظر فرصة احچي وية بيداء
لحد ما اجة الليل وبس صوت الحشرات ينسمع
طلعنة گعدنة بالحديقة
بيداء: دحچي عاد مو الفضول راح يكتلني
ازل: بيداء منذر كلش تغير، او اني مچنت اعرفة هيچ
بان القلق بعيونهة
بيداء: شلون يعني
حچيتلهة عالشرب
شهگت: عزة بعينة، صدگ تحچين؟
ازل: صوتچ، ماريد احد يعرف بيداء هذا الشي يبقة سر بيني وبينچ
بيداء: وانتي شلون ساكتة علة هل موضوع، تدرين شنو معناتهة رجلچ يشرب لو متدرين؟
ازل: ادرررري، بيداء اني منا دايخة، هسه مو هاي المشكلة
بيداء: لعد اذا هاي مو مشكلة شتسميهة؟ لچ بابا گولي لعمو خل يأدبة، احنة حتة الشرب منعرفة شنو شحال لو واحد بينة يشرب، اعوذ بالله
ازل: ماگدر اگول شي لأهلي هسه، يتعاركون بسببي
بيداء: لعد شلون
ازل: باعي، اني خايفة لا عواد يأذي منذر لو منذر يأذي عواد
بيداء: شلون يعني
ازل: سمعت صايرة عداوة كلش قوية بين عواد ومنذر، انتو مسامعين شي؟
بيداء: من يوم الزوجتي عواد سحب ايدة من منذر، اصلاً مشايفي لعواد بس بيوم الخطوبة، ملتهي بخطيبتة
ازل: متاكدة؟ خاف انتي متعرفين بشي
بيداء: اني حسب معرفتي ماكو شي، انتي منيلچ هذا الحچي، عداوتيش وانتي اختاريتي منذر، شنو مصلحتة عواد بعد
ازل: عواد مديعوف منذر بحالة، ديعرقل عليه الشغل ومنذر حاد سنونة عليه، سمعتة يحچي بالموبايل ويريد يعلم علة عواد
شهگت: يمة، متاكدة؟؟؟
ازل: اي ولچ، خااايفة، لازم احچي لأمي خوما ابقة مربطة وماسوي شي
بيداء: يعني تتوقعين منذر يأذي عواد من صدگ؟
ازل: مادري بيداء مادري، سمعتة بأذني گلة فلان ابن فلان ادز عليه جماعة يسوون هيچ وهيچ، هسه يا عواد شلك بهل شغلة، عوف الولد بحالة الة تهيجة'طيبة_الربيعي'
بيداء: ماتوقع عواد يسوي شي يضرچ ازل، يجوز منذر متوهم لو ضاملة ضميمة محد يدري بيهة
ازل: بلي عواد ديعرقل عليه نقل البضاعة، وهو عيشتة علة هل نقل
بيداء: وليش يعرقل عليه؟ بضاعتيش
ازل: غير ملابس وهل امور
بيداء: احچي وية امچ واني راح استفسر من ماما اذا تدري بشي
ثاني يوم حچيت وية امي، تخبلت من سمعت منذر يريد يأذي عواد
ام ازل: يعني متوصل لهل درجة، ابن خالة مستحيل يأذي
ازل: خل جدو لو عمامي يحاچون عواد، خل يعتقة لمنذر مو خبلة حتة علية
ام ازل: ماتوقع عواد يسوي هيچ، خوما بعدة يريدچ وانتي ازوجتي وهو ذاك اليوم خطب
ازل: ماادري، راح ينخرب بيتي من هل موضوع
ام ازل: معليچ اني اشوف شلون احاچي ابوچ
كم يوم اني ابيت جدو واحس هموم الدنيا جبال وانحطت علة چتافي، شتاقيتلة بس ماگدر اسامحة وامشي الوضع كانما مصاير شي
اريدة يبطل هذا الشرب ومارجع للبيت اذا مينعدل وياية، خابرني بليل
ازل: الو
منذر: معقولة هيچ اني رخيص عندچ؟
ازل: انتة الوصلتني لهل مرحلة
منذر: اني؟ من دون الناس كلهة دخلتچ لحياتي وخليتچ تعرفين علية امور امي متدري بيهة، وهسه اني الوصلتچ الهاي المرحلة مو؟؟
ازل: واني مطلبت منك غير انو ترجع منذر العرفتة بالأول وياية، تغيرت وصرت كلش قاسي علية
منذر: امداني اذا اقسة عليچ، ازل اني طبعي صعب ليش متتحمليني
ازل: واني متحملة كلشي يجي منك، بس مو مال تجي شارب وتأذيني وتغلط علية، هذا شي صعب اي بنية تتقبلة منذر، اني فضلتك عالكل لان شفت بيك حنية علية، وهسه قسيت ومداشوف منك اهتمام مثل الأول
منذر: ازل اني تعبان من الشغل، الف حسبة ابالي، ومنا هذا ال**** ديعرقل علية هواي امور، ليش متعذريني؟
ازل: عاذرتك، بس مارجع اذا مو بشرط
منذر: شنو الشرط
ازل: عمتي سهام تجي وياية، ماتحمل ابقة وحدي بالبيت بعد
منذر: وشسوي بعمتچ ويانة، متكيفين البيت النة وحدنة
ازل: اولاً انتة دتروح للشغل ومترجع الة بليل، وهاي اذا ترجع بوعيك ومو شارب، تسوي البيت جحيم علية
منذر: يعني هسه صرت اني اسوي البيت جحيم عليچ مو؟
ازل: افهم المقصد من كلامي، داگلك الشرب يخليك تغيب عن وعيك وتسوي اشياء تضرك متنفعك
منذر: وهسه شنو تخافين بالبيت وحدچ وياية؟ اني بعبع وتخافين مني؟
سكتت
منذر: راح اجي عليچ هسه ترجعين وياية
ازل: مارجع منذر، مارجع اذا مو عمتي ويانة
منذر: والى متى تضل عمتچ ويانة
ازل: تبقة يمنة شعدهة، اني اخدمهة والبي كل احتياجاتهة، داتكئب وحدي بالبيت، اريد نفس وياية بالبيت منذر طگت روحي
سكت
ازل: ها منذر شتگول، خليهة عالأقل كم يوم هنا وكم يوم يمنة
منذر: هاي هية، باچر اجي عليكم
ازل: ماشي'طيبة_الربيعي'
گوة قنعت عمتي تجي وياية، تگول اريد يم اهلي ماشبع منهم
ازل: عمة اني داضوج وحدي بالبيت، لخاطري والله نرجعچ متبقين كل الأيام بالأسبوع
بيبي: يمة روحي خطية ازولة تضوج وحدهة
ازل: حباابة
سهام: ماشي حبيبتي، بس كم يوم وارجع هااا
ازل: اي خلاص، ادللي
اجة علينة منذر وچان شكلة ضايج
امي وصتني ماحچي شي بخصوص عواد ومادخل احد بيني وبين منذر، حتة اذا يحچي ماگعد ادافع علة عواد حتة لا ازيد النار حطب وتگب بيني وبينة
طول اليوم ميحاچيني، هو بصفحة واني بصفحة
لحد ثاني يوم من اجة علية ورة الدوام حسيتة مو على بعضة
تغدينة وعمتي سهام راحت تنام
هو هم طب للغرفة، خلصت المواعين ورتبت المطبخ ورحت للغرفة
غيرت هدومي ورحت گعدت عالچرباية
متمدد ومغمض عيونة
تقربت منة وسحبت ايدة خليت راسي عليهة
ازل: شبيك حبيبي
منذر: حبيبي مو، هسه صرت حبيبچ
ازل: شعدني غيرك، تعرفني شگد احبك بس چان لازم اتصرف وانقذ علاقتنة
منذر: اليسمعچ يگول مدري شمسوي
ازل: هسه حنبقة نتناقش بهذا الموضوع؟
منذر: عفتيني اربع ايام، سويتيهة عادة تزعلين هلگد
ازل: انتة لتسوي شي يضوجني لو يأذني حتة ماازعل
بقينة نتناگر لحد ما شبگنة ايد بأيد ونمنة متصالحين
كم يوم وعمتي ضاجت تريد ترجع لبيت جدي، حقهة اني خلصتهة ادرس حتة الحگ عالمواد، منذر وداعة لبيت جدو واني خلصتهة اركض من ايد لأيد حتة الحگ الم المنهج قبل لندخل بفصل الأمتحانات الجاية
ماعرف شلون راح انجح واطلع معدل، ايست اكثر من رجع منذر لطبعة السيء
قنعني انو يشرب وينام بالصالة ميجي للغرفة، ميدري هذا الشي يتعبني اكثر يخليني احس ممزوجة انسان طبيعي، شكم مرة گتلة هذا يأثر علة زواجنة وعلى علاقتنة بس الحچي ميفيد
رغم هل شي حاولت انتبه للدراسة واركز على درجاتي الصارن ازفت من الزفت
امي بعد مفتحت وياية موضوع تهديد منذر لعواد والعكس، اني هم نسيت الموضوع وتركت كلشي على صفحة
بيوم هم تعاركت وية منذر لان يشرب بيوم الجمعة
ازل: عالأقل احترم هذا اليوم المبارك، الة تشرب بهذا اليوم'طيبة_الربيعي'
منذر: وهووووو، هم رجعنة هم رجعنةةة
ماگدر احچي ويا كلمة اذا مو يصيح ويكسر، تعاركت ويا وطبيت للغرفة مطلعت منهة بعد
صليت المغرب ونمت مادري بالدنيا شكو
شوية شوية بديت اصحصح من حسيت اكو انفاس حارة تمشي بقبلات على چتفي وزنودي
نايمة على ظهري وتلمست بجسم فوگاية
ازل: منذر خليني انام، مو گلت ماجي للغرفة واني شارب
ريحة الشرب لعبت نفسي
فكيت عيوني الغرفة ظلمة
ازل: منذر كافي، عوفني انام
ولا كانما احچي
مديت ايدية ثنينهن على اچتافة
ازل: مداتحمل ريحة الشرب، منذر
- واني مداتحمل ابتعد عنچ بعد
هذا مو صوت منذر، مادري منين اجتني القوة دفعتة حيل ووگعت من الچرباية
احچي مفزوعة: منوووو انتةةةة
يتبع...