ثغرات الماضي

الفصل العاشر

#ثغرات_الماضي
#طيبة_الربيعي
*الفصل العاشر*

~~~~~~~~~~~~~~~~

شأرد عليه بلة حسيت لساني انبلع، شجاني وطلعت من حلگي هل حچاية

شاهين: عندچ اعتراض لو شنو'طيبة_الربيعي'
ميس: دهد ايدي، شعلية اني حياتك وحر بيهة، كلمن حر بحياتة شاهين افندي

وحچيتهة بثقة.. واعتقد رسالتي وصلتة

شاهين: لا بربچ خاف متقبلين، شنو قصدچ بهاي الحچاية
ميس: يعني اخذ راحتك منا وجاي، وختلاتك بليل وية هاي وذيچ ممكن اوصلهة لعمي بس مراح اسويهة تعرف ليش؟ لان مو من مستواية

بس ردتة يعرف انو اني اعرف سوالفة المكسرة مو غشيمة

رفع حواجبة وابتسم: حلوة هاي مو من مستواية، بدينة نحچي بالمستوى ميوسة؟ هاي الغيرة المفاجئة منين'طيبة_الربيعي'

جريت ايدي: لا غيرة ولا شي، بس الرجال مو بكثرة النسوان خليهة ابالك هاي
شكلة عصب: يعني اني مو رجال
ميس: لازم نسوانك كثار
شاهين: دمشي روحي من گدامي، گمتي اچفصين
ميس: اي مو الصراحة مرات تأذي وتجرح

تركتة يصفن ورجعت يم البنات.. بس صدگ غثني شنو هل برود هذا حتة من يعصب بارد

دغتني ازل: شبيچ
ميس: بعدين

بيداء: بنات گومن خل نروح هناك شنية ممليتن
بنت عمتي الصغيرة حچت: يلة امشونة اني هم مليت

ازل... مادري شبيهة ميس اجتي گالبة الخلقة.. بعدين استفسر منهة هسه صايرة هوسة ماكو مجال.. رحنة للمطبخ نصنة واگفين لان ماكو مكان للگعدة.. اخذت خولة من بنت عمتي علمود انيمهة امي گالت تغفي..

طلعت داريد ارجع للغرفة شفت شاهين'طيبة_الربيعي'

شاهين: ازل
ازل: ها شاهين
شاهين: من نرجع للبيت اريد احاچيچ لتنامين عود
استغربت: اي اوكي، بس على شنو
شاهين: بعدين مو وكتهة هسه
ازل: ماشي

ورجع دخل للاستقبال.. رحت للغرفة وخليت خولة بحضني انومهة.. يا ترى شنو الموضوع؟

نومتهة ورجعت يمهم.. حسيت هذا اليوم حيل ممل لان بالعادة كلش نتونس عند بيت عمتي لمة وسوالف وضحك يعني فعلاً اطلع من جو الكئابة اذا اجينة الهم.. بس هل مرة على نفس الموال صارلي اسبوعين تقريباً على هاي الحالة ونفسيتي مادري شبيهة..'طيبة_الربيعي'

يمكن لان منذر بعدة زعلان علية.. ماعرف شلون اصالحة وهو حقة يضوج.. لو ما عواد چان مصار كل هذا.. رجعنة للبيت بليل بالطبة صارت عيني بعين منذر.. ابتسمتلة بس هو مردلي الابتسامة باوعلي ابرود بس رغم هذا شعرت اكو حچي بعيونة..