ثغرات الماضي

الفصل الثاني والأربعون

#ثغرات_الماضي
#طيبة_الربيعي
*الفصل الثاني والأربعون*

گعدت فرد گعدة اليوم وكتبتة
مفاجئة😁
___________ღ____________

ازل... واني ادعي طخت ابالي رند، جان المفروض اخابرهة اطمنهة بس خفت اتصرف من كيفي وازيد الطين بلة، لحد الآن ممستوعبة انفصلو بسببي، على الرغم من انو اني ما فد يوم طلعت كَدامهة وبينت عكس نيتي لكن مع ذلك اختارت تنفصل عن عواد بسبب الشك الراودهة تجاهي، بقيت افكر وحايرة شلون اتخلص من تأنيب الضمير، رفعت ايدي ودعيت الله يصلح بينهم اذا جان هذا الزواج بي خير الهم ثنينهم، بعد الصار وياية كَمت اخاف اتصرف من كيفي، الله سبحانه اذا يشاء هسه يرجعون

واني صارت عندي قناعة بعد الصعوبات المريت بيهة، كلشي يصير لسبب، واني جنت مبتعدة عن طريق رب العالمين، وهاي المصيبة قربتي الة، جنت حيل مقصرة بديني، لا صلاة منتظمة ولا متبعة اصول الدين الي احنة انخلقنة علمود نطبقة، فعلاً الدنيا ممكن تاخذ الأنسان لطريق بعيد عن باب الله

انتظرت  الفرج من ترجعلي بنتي بعد اطلع من حياتهم نهائياً لان اني كسرت اكثر من ما جبرت، فكرت فقط بمنذر وبنفسي، جنت كلش انانية وفضلتة عالكل، هسه هو وين؟ طول هاي الفترة ولا فكر يكسر الشر ويجي يعتذر من بيت جدي لو يحاول يتواصل وياية علمود بتي، شكَد ناقص وكَلبك قاسي تبعد طفلة عن حضن امهة، وين تروح من الله

ازل: الهي اني املي بيك فقط، عين عواد ووفقة يرجعلي بتي سالمة غانمة

نزلت جوة اساعد مرة عمو، هذا اقل شي ممكن اقدمة الهم شكراً على وكَفتهم وياية، نزلت فرحانة واشتغل بحيوية، وكَفت بصفهة وهية تكَلب بالتمن

ازل: اكَلج خالة

ام عواد: كَولي يمة

ازل: ادري صار فترة علة طلاكَ عواد ورند بس اني ما فد يوم ضميري ما انبني عليهم

باعتلي مستغربة: شذكرج بهل موضوع هسه

ازل: انتي تدرين بية من زمان اريد ارجع لبيت جدو احس هواي ثكَلت عليكم حتة لو انتو مرتاحين لوجودي بس اني ممرتاحة لأن تسببت بطلاكَهم

تنهدت: هاي صارت بعد، مابيدج شي انتي هم مالج ذنب حياتج انكَلب بيوم وليلة

ازل: صحيح، بس ليش منحاول نقنع عواد يرجعهة

ام عواد: هية لو تريد ترجع جان ضليت انكَ عليه لحد ما يرجعهة، بس كذا مرة حاولنة ردنة مافاد

ازل: لان اني هنا خالة، بس يمكن من اروح تعيد النظر بالموضوع وترجع'طيبة_الربيعي'