ثغرات الماضي

الفصل التاسع

#ثغرات_الماضي
#طيبة_الربيعي
*الفصل التاسع*

~~~~~~~~~~~~~~~~~~~~~~

عماد: وانتة تروح تضربة؟ شبيك تخبلت بلة سواهة رطينة عليك ودخل الاهل، شنو راح يكون موقفك بوكتهة
شاهين: باوعلي عماد صارلك شگد تعرفني؟ فد يوم عايل بأحد؟
عماد: لا
شاهين: بس اليعيل بية ماقصر وياه، شيسوي خل يسوي اني زلمة وهو زلمة نشوف شيطلع بيدة، عار ابن عار

دخل عواد، گال بحدة: طبي جوة شعندچ واگفة هنا'طيبة_الربيعي'
خفت: اي اي

شافني شاهين لان سمع عواد.. دخلت عالسريع.. بقة كلامة يرن براسي منو يقصد معقولة اني لو شنو؟؟ واذا مو اني اكيد وحدة من البنات.. بس شصاير ليش رافض الولد ومنو هو اصلاً؟؟

انضربت ابيداء منتبهت

بيداء: شبيچن جايات مخلوسات، هيچ الطلعة وية عواد تخلس ههههههههه
ميس: انچبي، تعاي فوگ
بيداء: يا ساتر استر، هاي النبرة اني اعرفهة، وراهة مصيبة

سلمت وصعدت.. دخلت ابدل وبيداء يمي

بيداء: شكو ليش مبوزمات انتي وذيچ
ميس: يمعودة عواد من يريد يكحلهة يعميهة
بيداء: شسوةةة'طيبة_الربيعي'

حچيتلهة

بيداء: اي لعد غير عرضة واتصچم، ازل هواي تتحسس من عواد رغم تعرف بي حباً بيهة من يتصرف هيچ
ميس: هية هاي هم متبطرة على نعمة ربهة، خليهة عبالهة منذر ينفعهة
بيداء: ليش منذر شلة دخل؟؟؟
ميس: غير واگعة بغرامة الأخت ومدتحس على نفسهة
بيداء: زقنبوت بگلبهة انشاءالله، منذر وين وعواد وييين، خبلة عاقلة هاية
ميس: مو اگُللهة بس متقنع، عواد رغم عصبيتة وتحكمة نعرفة منو وشنو، منذر شوكت تعرفنة عليه؟ مصارلة كم شهر يمنة منعرف زيناتة من شيناتة
بيداء: بعد القلب وما يهوى، وعواد هو الديطفشهة من عندة، تصرفاتة مرات تخلي الواحد يكرهة'طيبة_الربيعي'
ميس: بس عواد طيب ورجال معدل، سبحانه المابي عيوب
بيداء: صحيح
ميس: هسه سمعي، اريدچ اجريلي لسان شاهين
بيداء بأستغراب: بشنو؟
ميس: قبل شوية سمعتة...

وحچيتلهة

بيداء: يعني اكيد مو صابرين لأن گال يحاچي عمة، بس منو ابوية لو عمو ابو ازل؟؟
ميس: معقولة علية؟
صفنت علية: معقولة ليش مو معقولة
ميس: هو ليش اريدچ تستفسريلي
بيداء: شلون استفسر خاف اسألة ويفشلني، هسه يكلي منين سمعتي وشعليچ
ميس: انتي مو گبل اطبين بصلب الموضوع، جيسي نبضة بالأول
بيداء: ولو صعبة بس احاول
ميس: عفية، ضروري
بيداء: لچ لو تدرين شصار

خلصت تبديل وباوعتلهة بأستفسار

ميس: هم شكو
بيداء: اول شي صابرين من شافت عماد گلبت الخلقة، اعتقد هاي البنية تحبة بس متريد تعترف'طيبة_الربيعي'
ميس: شتحبة ولچ وهية مطيقة، چان وافقت بي من خطبهة
بيداء: مادري، بس كل متشوفة تصفن، احس بالهة ياخذهة لغير عالم
ميس: اني اجر لسانهة واشوف، هو اكو شي يخفة علينة بهذا البيت، بس هاي؟
بيداء: لااا، تحضري للقنبلة
ميس: يا ساتر
بيداء: عمتي ساجدة طلبت نغم لمقداد
فكيت عيني بقوة: مقدااااد؟؟؟
بيداء: وعيييونچ
ميس: مقداد مقداد
بيداء: وچچ اييي مقدادنة، عساس رايدهة هو
ميس: بس مقداد مطلگ وعندة ولد شلون، ماعتقد نغم توافق
بيداء: بس ميتعيب، حتة لو مطلگ وطليقتة كلهة تدري وحدة مو خوش وابنة عندة مو عدهة
ميس: حتة لو، يبقة عندة ولد قابل نغم تروح تربي وهية بعدهة كلشي مشايفة من حياتهة
بيداء: وشكو بيهة، هو علاوي فقير ومالة حس ونغم تموت عليه وكلنة نحبة
ميس: وهية شنو رأيهة تدري؟
بيداء: لاا اني سمعت من ماما تحچي وية بيبي
ميس: بس هذا الحچي شوكت
بيداء: اوت ما رجعنة
ميس: الله يقدم البي خير، ولو ماتوقع نغم ترضة بهيج زواج