ثغرات الماضي

الفصل الثامن والثلاثون

#ثغرات_الماضي
#طيبة_الربيعي
*الفصل الثامن والثلاثون*

___________ღ___________

اياً كانت العلاقة، ان لم يكن فيها مكسباً للحُب والراحة فلا تستحق الوقت والعناء

رند... اجيت من الدوام ورة ما تغديت ورتبت اموري اخذتلي غفوة، لكن مطولت بيهة لان صوت عمتي عالي قلقني، طلعت النوم بعيني

اسمعهة تحجي بالموبايل'طيبة_الربيعي'

ام عواد: صدك چذب شلون صار الحريق، خاف تماس كهربائي، وينة ابوج هسه بس هو المتضرر؟ اوف يا يمة منين اجتكم خالة، خل تكعد رند ونجيكم، وازل خطية جابت؟ اي صلوات، الحمدلله والشكر، خوش حبيبتي مع السلامة

رحتلهة: خير خالة شكو
ام عواد: ولچ يمة محترگة أسواق حمويني والدنيا مگلوبة
انقهرت: يا يمة، خطية، خوما بيهم شي
ام عواد: ابو نغم متضررة ايدة بالحريق، روحي بدلي خل ناخذ تكسي ونروح عليهم
رند: لعد الولد وين
ام عواد: راحو علة عمامهم، وياهم بالمستشفى
رند: تمام، هسه البس عالسريع

ركضت للغرفة حضرت نفسي وطلعت چانت تلبس بالجواريب، قفلنة الباب واخذنة تكسي ورحنة علة بيت جدة لعواد

دخلنة هوسة يمهم ناس، سلمت عالبنات وتحمدت لأبوهم بالسلامة
ام نغم خطية حلگهة يابس حتة مي متقبل تشرب

ام ميس: ماگدر ماگدر وخرن عني، شوفلي ابوچن وين صار ليش لهسه ماااكو
ميس: يوم والله مابي شي بس ايدة وديعالجوهة، خوما يطلعو گبل
سهام: گولو يا الله، مابيهم شي انشاءالله

شوية واجوي عماتهم وياهم نغم، سمعت انو ازل علة اثر الهبطة صايرة عندهة طلوگة، خطية الأب عزيز، والعم بمعزة الأب مو سهلة تسمع بيهم محروگين

ضلينة ننتظر رجعتهم، هواي ناس تجي عليهم، الناس كلهة تحبهم لان فعلاً خوش ناس ماعدهم اذية علة واحد، يمكن اني فعلاً محظوظة بهيچ عيال

بس دخت من الهوسة، ممتعودة علية هيچ

شاورت بيداء: ممكن اروح للحمام
بيداء: البيت بيتچ عمري صدگ چذب، روحي
رند: شكراً حبيبتي

اخذت جنطتي وسحبت نفسي من الأستقبال، غسلت وجهي وتنهدت
ميخلة هل بيت من المشاكل خطية ميستاهلون، لكن الحمدلله على كل حال المؤمن مُبتلى، البيت المابي مشاكل اهلة الله مسكتهم بالأنعم حتة ميسمع صوتهم يدعون ويطلبون

رجعت يمهم وقمت بالواجب مخليت البنات يسون چاي ويقدمن للنسوان اليجون

لهناك وصارت هوسة بالباب، اجوي، لبست حجابي وگعدت