ثغرات الماضي

الفصل السابع والعشرون

#ثغرات_الماضي
#طيبة_الربيعي
*الفصل السابع والعشرون*

حبايب اني اقرة كل تعليقاتكم، بس ماگدر ارد عالكل
احب اوضح انو الأحداث بالتسلسل
وكل شخصية راح تاخذ حقهة واستحقاقهة
كل الشخصيات مهمة لكن كلمن الة وقتة ودورة
اصبرو علية انشاءالله مراح اخيب ضنكم
مثل ما عودتكم... تفاصيل بتفاصيل لان بدون هل تفاصيل القصة تفقد لذتهة
اعتبروهة مسلسل
قرائة ممتعة💗
___________ ღ___________

كالذي يسكب ماءاً في وعاءاً مكسور
كمن يستودع امانةً عند مُحتاجٍ دنيئ
هكذا اودعت مشاعري في قلباً لا يعرف للحُب ملامح💔

عماد: عليمن تبچين قابل راح اضربچ؟؟؟
صابرين: ماريدك اطلع من الغرفة
عماد: ادري بعدچ ممتعودة علية بس تتعودين بمرور الوقت، راح اعوفچ اليوم لحد ما تاخذين علية وعالبيت
صابرين: ماحبك اني افتهم ماحبك، ماعرف شلون راح اعيش وياك تحت سقف واحد'طيبة_الربيعي'

صافن علية

صابرين: قابل اني چذبت عليك من البداية گتلك انتة اذيتني بصغري بسببك عشت طفولة صعبة ثقتي بنفسي انعدمت وهسه تريد نصير اني وياك واحد؟؟؟ ماثق بيك لو بعد الف سنة
عماد: ولچ طيحتي حظي بهاي الحچاية، شي صار ولة وراح شكو مچلبة بنفس الموضوع من يوم البدينة نحچي، يصير تحاسبين طفل علة افعااالة؟؟؟
صابرين: مچنت طفل اني الي چنت طفلة
عماد: لا چنت طفل ولو ادري اني هيچ جارح مشاعرچ لو جاية گايلتلي من زمان چان اجيت اعتذرت منچ وماسويتهة بعد

سكتت

عماد: شتردين اسوي اوگع علة رجلچ ابوسهة؟ هو هذا التردينة؟؟؟
صابرين: ماريد منك شي بس تعوفني
عماد: اني عريس هيچ يصير بية؟؟ من خرب لشتك شاهين انعل اليوم العرفتك بي

وگام يفتر بالغرفة مثل الخبل

واني واگفة مسحت دموعي لان شفت كلامي اثر بي ومراح يسويلي شي

وگف وگال

عماد: هسه انتي مقتنعة بالجاي تسوينة؟ قفلتي ماترضين اتقرب مو؟

هزيت براسي لا

عماد: لا حول ولا قوة الا بالله

طلع واني گعدت عالچرباية، شلت البرگع نزعتة وذبيتة بالگاع، اريد انزع البدلة بس انتظر يروح واطمن ميرجع يلة

رجع: باعي راح اصبر عليچ يوم يومين، فكري عدل وخلي عقلچ براسچ ادري هسه عبالچ خايف منچ وماسويت شي بس اني رجال اخاف الله بالحرمة، واذا ماقتنعتي انتي التخسرين مو اني
صابرين: عقلي براسي، ويلة اطلع خليني اخذ راحتي
عماد: راح اطلع، والصار هذا يضل بيني وبينچ اذا درت امي لتلوميني بالراح اسوي، لا امي ولا امچ ولا رند ولا مخلوووق يدري بالصار مفهوووم؟؟
صابرين: ماااگول لأحد

جر نفس قوي وزفرة، طلع وطبگ الباب وراه

ذبيت النفس براحة، يا الله الحمدلله كابوس وانتزع من دماغي

نزعت شلت الماشات، غسلت وجهي المكياج گوة راح، لبست دشداشة وشلت شعري كباية

هسه شسوي؟ ابقة عايشة برعب لا يغير رأية ويرجع علية؟

فتحت الجرارة خليت الماشات

طب نازع السترة مال قاط

باوع علية من فوگ الي جوة

صابرين: شكو
عماد: سيدي الضابط ممكن افوت لغرفتي ابدل لو ممنوع؟

دنگت اباوع بالجرارة

صابرين: فوت راح اطلع اني

دخل راح للكنتور واني تمشيت للباب، جاية لبيتهم مرة وحدة وماندل لا الحمام لا شي

صابرين: وين الحمام

عماد: تعاي ادليچ

طلع گدامي مشيت وراه

الحمام قريب على الغرفة چان يگدر يوصفلي بدل ما يجي وياية

عماد: هذا
صابرين: ماشي

بقة واگف

صابرين: شنو روح بدل شكو واگف
عماد: يعني قفلتي بعد؟
صابرين: قفلت
عماد: زين بوسة حضنة

فكيت عيوني: عماااد
عماد: الله اكبر شگد ظااالمة

دخلت للحمام وسديت الباب، هسه شكو راحن قابل البيت صغير، هو طابقين يعني چانن يگدرن يضلن جوة، علساس هو مستحي منچن وعفتن البيت فارغ

بقيت بالحمام ماريد اطلع، باوعت لروحي بالمراية
فديت جمالي، تحلم تلمسني، مردتني من چنت بشعة هسه سلچت علية من صرت بهذا الجمال
اذاً يهمك الشكل الخارجي مو جوهر الروح

دگ الباب

عماد: شنو عصيتي

فتحت الباب

صابرين: راح تبقة تلاحقني وين مااروح
عماد: لچ بابا اني رجلچ، يعني انتي هسه مني واني منچ شنو تلاحقني جاي اصچم وحدة بالشارع اني
صابرين: شتريد مني
عماد: اريد منچ؟ هههههه'طيبة_الربيعي'
صابرين: اي مو گتلي راح اعوفچ براحتچ، شنو هل تصرفات بعد
عماد: دتعاي عالأقل نگعد نسولف، خوما تردين اطلع من البيت واني عريس، العالم من تشوفني شتگول
باچر اهلي يصبحون علينة خلي ابالچ ولازم تعرفين شتحچين وشلون تتصرفين
صابرين: شسوي مثلاً

عماد: تعاي وياية

ودار انطاني ظهرة ومشة

صابرين: وييين

اندار علية

عماد: اخطفچ اوديچ للمريخ، وين يعني، تعاي للغرفة
صابرين: ماريد، خل نگعد بالصالة
عماد: بالصالة بالصالة، تفضلي سيدي

مشيت وراه گعدنة بالصالة، گعد بصفي علة نفس القنفة

صابرين: هذيچ القنفة هم مُريحة ترة
عماد: لا اني هاي ارتاح عليهة
صابرين: اوووف شلون عطلات
عماد: ولچ شنو هاي المصطلحات، عواد لعب بأعداداتچ وهسه حول علة اختي يريد يلعب بأعداداتهة
صابرين: عواد شعليه اني هاي طبيعتي، ولو نسيت اني چنت معاجبتك من زمان بس كل همك تكسر خشمي
عماد: هم عادتهة، ولچ بابا قافلة من النساء متغريني وانتي بطبيعتچ الحلوة شيبتي راسي من الحب
صابرين: اي اي سفط حچي بعد
عماد: اسلوبچ عدلي، بيناتنة اوكي بس دير بالچ تحاچيني هيچ گدام اهلي

باوعتلة منزلة حاجب ورافعة حاجب

صابرين: ليش اني گلت شي بي غلط؟
عماد: لا حشاچ من الغلط، يخسة اليگلچ انتي غلط
صابرين: ههههه استغفرالله
عماد: غرگيني بعد غرگيني
صابرين: هسه دحچي شتريد مني، ترة نعسانة وراح انام علة نفسي
عماد: شنو رأيچ نصعد انام سوة؟
صابرين: هاا راح تبقة تضغط علية هيچ؟؟؟
عماد: عمي اشاقة مانشاقة بعد شلوووون

سكتت

عماد: باچر من يجون تلبسين گلبيتچ الجابتهة امي، البيضة، واذا سئلتچ امي عالبياض گليلهة عند عماد خوووش، غير هذا الحچي لتحچين

شگد خجلت

صابرين: ممم
عماد: واياچ ثم ايااچ...

باوعتلة صفح

صابرين: اي عيني؟ شنو نبرة التهديد هاية؟؟؟

ضحك ومشة ايدة علة لحيتة، يباوعلي بعيونة الهلگدوتهن دگم

عماد: وتالي وياچ، جاي انبهچ ماهدد، لتحچين اي شي يصير بيني وبينچ لرند ادري بيچن صديقات بس اليطلع من الغرفة الة عواقب، عواقب تأذيچ وتأذيني
صابرين: شلون يعني
عماد: هسه سمعي كلامي وعوفي الشلون، وامچ هم اذا سئلتچ گليلهة كلشي تمام لتزيدين ولا تنقصين حچي
صابرين: افتهمت، بعد اكو شي؟

مد ايدة اخذ خصلة من شعري، مديت ايدي وبعدت ايدة

صابرين: ايدك هاية مكانهة عندك، مو بشعري

گمت

گام وياية

عماد: وين
صابرين: اروح انام
عماد: يلة امشي انام اني هم تعبان'طيبة_الربيعي'

مشيت خطوة يمشي وراية

وگفت وانداريت: خوما مفكر تنام وياية بنفس الغرفة؟

رفع حواجبة بأستغراب

عماد: لعد وين اروح
صابرين: البيت مليان غرف
عماد: حبيبتي تنازلت هواي بس لو يگصون راسي ماتنازل علة هاي الشغلة، انام وياچ بنفس الغرفة ماسوي شي بس انام
صابرين: متنام يمي، افرش بالگاع
عماد: صابرين مو لهل درجة عاد گتلچ كلشي ماسوي، اذا سويت شي عود شتسوين سوي ماگلچ لا

غمضت عيوني: اللهم طولچ يا روح، شيعديهة هل فترة علة خير

صعدت للغرفة وهو لازگ بية، تمدد وخلة ايدة جوة راسة ورجل علة رجل

والله يا الله كلش واثق من نفسة، بقيت احوص

عماد: تعاي يلة
صابرين: انتة شنو مو تريد تنام، نام واني انام وراك
عماد: شنو هية حراسة ونتناوب عليهة
صابرين: اي حراسة
عماد: شلون سالفة تعبانة هاي، راح انام عمي راح انام

نام بصفحتة، تقربت من الچرباية بحذر وعيني عليه ليغدر بية

گعدت عالحافة، اني شلون راح انام بصف رجال غريب، زوجي عالورق، مدخل گلبي ونفسي مدتتقبلة

عماد: صابرين نامي ماجي يمچ
صابرين: دانام

سكت، واني تمددت نمت صفح ومديت ايدي جوة راسي، گلبي نبضاتة مناوية تهدأ، والوقت احسة صار يمشي ابطئ

شنو استفادو اهلي هسه من خلو بتهم تطلع من البيت الچانت تحس بالأمان بي حتة تصير بغرفة رجل خلاهة تفقد جزء كبير من مشاعرهة الطفولية، وهسه اني لحد الآن ثقتي بنفسي مو شي

لحد الآن اني احس كل حچاية مُسيئة تطلع من لسان اي شخص موجهة الية، انمي فكرة انو اني بنت جميلة قوية وناصحة، بس من احد يجيب طاري المظهر او الشخصية گبل ينمحي البنيتة بثقتي

صعدت رجلية عالچرباية وتمددت على صفحتي منطيتة ظهري، النوم مزار عيني وهذا بس يتحرك ويتذمر

عماد: عريس وربعة يزفونة، مايدرون العريس ماكل تبن، لا حضنة لا صخام الصخم عشيرتي، شدعي عليك شاهين

مادري ليش ضحكت'طيبة_الربيعي'

عماد: ضحككككي، ضحكي، نشوف منو اليضحك بالأخير

صابرين: اريد انام كافي
عماد: اسفين، اسفين

ميس... عصبت بشكل مو طبيعي على سرور لان تنكر

ميس: انتي مو گتيلي اذا تريدين اخرب عليهة اخرب وگتلچ لااا
گامت: انتي صدگ تحچين؟ معقولة تصدگين بيهم واچذبيني؟؟؟
صيحت: لعد منووو وصللل لاهلهة؟؟؟
سرور: والله مو اني، وصار فترة لا اروحلهم ولا يجونة شنو مصلحتي اروح اخرب عليهة والموضوع يخصچ ميخصني؟؟؟

صابني صداع وراسي گام يفتر

گعدت عالمسطبة اعصابي تعبت

ميس: بمنو اصدگ هسه اني
سرور: يعني ماعرف شگلچ، بس اني صوچي ادخل بالخير، لتسوي خير شر ميجيك، من رخصتچ وخلي شاهين الحقير يفيدچ

تركتني وراحت، ماعرف شسوي بهاي الحالة، خلص الدوام واني وسرور وحدة بعيدة عالثانية

خالد: شبيچن
ميس: ماكو شي
خالد: لعد ليش كل وحدة بمكان، صاير شي؟
عصبت: خالد رجاءاً مناقصتك، منا اني شايلة عليك فأتركني بحالي اترجاك

تفاجئ

خالد: ليش شمسوي ميس
ميس: شمسوي؟ تعرف بية كلش زين اني بنية ماسوي علاقات لان هذا الشي حرام بس مع ذلك خليت اخوك يحاول يتقربلي ومهدتلة الطريق همينة
خالد: ليش تاخذين الأمور بغير قصد، اني معلية الولد انعجب بيچ وكذا مرة سئلني مرتبطة لو لا وگتلة هاي لتتقرب منهة ترة مو من هذا النوع، بس هو اصر ويريد يزوج يگول مشفت وحدة جذبتني بثگلهة وحشمتهة بگد ما ميس جذبتني، يعني كلامچ مالة صحة
ميس: حتة لو چان المفروض تمنعة، اني ويني وين الحبچيات والخرابيط هاية
خالد: اسف مادري لهل درجة انتي معقدتهة، مابيهة شي اذا واحد يريد يتقدملچ يتعرف عليچ بالبداية، بس اذا اخوية معجبچ هاي هية اني اعتذر وراح احچي ويا يبتعد
ميس: يكون افضل

باوع علية متفاجئ، دنگت راسي عالكتاب
راح واني ضليت مشتعلة بداخلي، حسيت انو خربت علاقتي بناس يستاهلون علمود ناس ميستاهلون
لعد اذا سرور مو الفاعلة منو وصللهم، وشاهين ليش يتهمني هل اتهام؟؟

مطايقة اشوفة ولا اركب ويا بس مجبورة، طلعت انتظرة يم السيارة بالگراج

شوية واجة وجهة ميگصة السيف
واگفة يم الباب منتظرتة يفتحة، مباوعت عليه ولا حچيت ويا

صعدت وهو شغل وطلع، دگ موبايلة

شالة: ها، اي امر عود من يصيرلي مجال، ابوچ درة؟ اي امچ لاتحچي شكو توصلة، عليمن توصلة لخاطر الله يعني ماتخاف عليچ، خوش افتهمت، افتهمت'طيبة_الربيعي'

يحچي وياهة مبين، هلگد تهمة ومحروگ دمة عليهة؟؟
براكين من المشاعر چانت بداخلي تجاهك بس كلهة انخمدت بالبرود الحاوط گلبي من افعالك

من سدة گلي

شاهين: حرام السويتي وانتي بنية وهم الچ سمعة واهل ميرضون تسوين الغلط
ميس: شنوو
شاهين: تدرين اذا ابوهة درة اني الراح اكلهة؟
عصبت: شاهين كافي
شاهين: شنو كافي شنو كااافي، طيحتي حظي بهاي تصرفاااتچ وانوب اتنكرييين

دمعت، حسيت الدنيا كلهة اسودت بعيوني، ضل يحچي علية ويتهمني طول الطريق واني ساكتة ودموعي يجرن، امسح بيهن واحاول التقط انفاسي ومابين انو جرحني

وصلني گدام الباب

شاهين: الغلط مني چان المفروض مالح واخليچ تبدين وياية

باوعتلة عيوني بيهن الف حچاية وحچاية، بس قررت ماحچي بعد ولا انطي اهتمام، الاهتمام الي چنت محتاجتة من عندة وقدمتلهيا بعد راح ينسحب الى الأبد

ميس: راح يجي يوم وتتأكد اني بريئة برائة الذيب من دم يوسف، بس راح تتندم صدگني، لان بوقتهة اني الي مراح اسمح لنفسي تنهان وتسامحك

فتحت الباب ونزلت، خلصت اليوم ابچي وبيداء حست علية وضلت يمي بالغرفة لحد ما عرفت شصاير

بيداء: طيح الله حظة، اذا بعد گلتي شاهين اني هل مرة صدگ اوگف بوجهچ

بس دموع تجري مابية احچي

بيداء: حيوان، خل تفيدة هاي الغريبة المنطيتة روحهة، هية التنطي روحهة بالحرام شتترجين منهة، وهو هم صوچة عايف بت عمة المثل الورد ورايح علة وحدة خايسة
ميس: صوچي اني، اني الفرطت بمشاعري لواحد صمٌ بكمٌ عميٌ
بيداء: لا صم ولا بكم، يدري ويعرف بس يغلس، شلچ بي تضلين طول عمرچ تنتظرين الحچاية منة؟ هواي حاولتي تظهريلة حبچ وبتينيلة انو هو يهمچ بس ميفيد ميريدچ ميس خل نكون واقعيين

مسحت دموعي وباوعتلهة'طيبة_الربيعي'

ميس: يراد واحد يوعيني

دخلت امي شافتني هيچ تخبلت، وشبيچ وشكو وشصاير والة تحچين

ميس: ماكو شي يوم
ام ميس: هسه تحچيلي، وضعچ معاجبني صار فترة تقفلين علة روحچ وتبچين احچي بتي

باوعت لبيداء، تباوعلي وساكتة، امي كلش لحت علية واني جرحي طري دموعي مينشفن

ام ميس: ميس اني امچ واحس بيچ، اسمع منچ لو تنتظرين لحد ما اسمع من غيرچ وبعدين يصير الحچي مو خوش

بيداء: يمة دعوفيهة
ام ميس: سكتي انتي، من تدرين بأختچ زعلانة وحزنانة المفروض تحاولين تساعدينهة مو تكنسين بجروحهة جوة البساط مثل الغبرة، الغبرة هاي اذا ماتنكنس من اولهة تخنگ اصحاب البيت
ميس: يوم اذا حچيت متعصبين؟
ام ميس: لا ماعصب
ميس: متضربيني؟؟

من گتلهة هيچ عگدت حاجبهة وحسيتهة عصبت بس خفت هل شي

ام ميس: ماعصب ولا اضربچ، يا يوم ضاربتچن اني؟
ميس: باعي اني راح احچي كلشي بصراحة وبيداء تشهد علة انو مچذبت بولا حرف
ام ميس: ماشي گولي بنيني
ميس: اني يعني، يعني احب شاهين...

وگمت افرك بيدية

ام ميس: اي ادري

فكيت عيوني مصدومة

ميس: تدرين؟؟؟
بيداء: يمة گمت اخاف، شني عندچ علم الغيب
ام ميس: استغفري ربچ لا يعلم الغيب الا الله، بس اني امچن مو غشيمة، وهاي الشيبات البراسي مو تشوفنهة وعبالچن مافتهم بهذا الجيل، ادري تحبي وادري اول حب ومن انتي صغيرة گلبچ معلگ وية شاهين بس...

بقيت صافنة عليهة ماعرف شحچي

ام ميس: بس اريد افتهم شنو الصاير وجاي تبچين علمودة
ميس: ماما ميحبني

وحچيتلهة كلشي صار بالتفصيل، تهز براسهة عبالك تعرف بكلشي دااحچي

ام ميس: اذاً شنو موقفچ انتي من الصار هذا كُلة؟
ميس: ماادري، مرات احس بي يحبني من يغار ويحاسب بس مرات اشوف غير تصرفات اگول هاي كلة لان بت عمة والباقي كلة من تخيلاتي
ام ميس: هسه خلصتي وطلعتي البگلبچ؟

هزيت براسي اي'طيبة_الربيعي'

ام ميس: شوفي حبيبتي، اني لا من النوع اليضرب ويحاسب بالعنف ولا من النوع اليضغط علة جهالة، انتي چبيرة واعية وفاهمة ماخاف عليچ بس بعدچ صغيرة والعمر طويل گدامچ، راح تقابلين اصناف من البشر، هذا اليعجبج طبعة وهذا الي مراح تتوافقين ويا وذاكة التنعجبين بي ومينعجب بيچ وووووو الى ما لا نهاية، المهم من كل هذا تاخذين عبرة ودرس من كلشي تمرين بي بحياتچ من الطفولة لحد الشيب

انصتلهة بكل جوارحي

ام ميس: هسه انتي شفتي صارلچ عمر ورة شاهين وماحصلتي غير الحيرة، هو بنفسة ميعرف شيريد وجاي تگولين عندة وحدة الله يستر عليهة شابع بيهة، يعني مامحتاج زوجة، واذا يريدچ زوجة چان حچة وية ابوچ ويعرف ابوچ مايردة، مو مثل ابو ازل ابوچ يختلف انسان مسالم ويحب اخوتة ويحبچن همينة
ميس: اي ماما وشسوي هسه؟ مو بيدي يعني شگد حاولت ابتعد شگد ردت انتزع هذا الحب من گلبي بس كلشي سويت مفاد
ام ميس: طبعاً ميفيد، هسه انتي بمرحلة كلش صعبة وعقلچ بعدة متشتت وگلبچ هم ميعرف يتحكم بمشاعرچ، اني راح اگلچ حچاية وحطيهة ترچية بأذنچ، اليريدچ يدگ بابچ ويخليچ بأسمة، الميريدچ والمامكتوبلچ لو تعبرين سبع بحور متاخذينة وتاخذين نصيبچ لو بجوف البحر...

ضلت تحچي وحسيت كلامهة زينة العقل، الكلام الچنت اتمنة اسمعة حتى اوعى ومافكر بگلبي بعد

ام ميس: وبالنهاية هو ابن عمچ وماقصر وياچ خاصة من يقنع بأبوچ علمود تتونسين حالچ حال البنات، مو لان ميبادر وميريدچ كزوجة معناتهة تعادي وتشنين الحرب عليه، هذا اكبر غلط ممكن تسوي
ميس: ماتحمل اشوفة وياهة
ضحكت: واني الأريدة منچ تبتعدين عنة وعنهة، واذا يريدچ هو يضل يركض وراچ، ركزي هسه علة جامعتچ شاهين مراح يفيدچ من ترسبين، الله ليگولهة
ميس: ماشي، اني ابتعدت اصلاً بس اتهمني وخلاني ارجع لأول نقطة
ام ميس: الحق ميضيع بتي، اذا هو ماعندة كامرة فكامرة الله دومهة مشتغلة، الله يعرف منو الوصل ويعرف منو الجاي يخيط ويخربط وراچ، انتي لو علة حق تمشين بدربچ حتة لو جواچ جمر، الجمر ربچ يطفي بحكمتة وخلي ابالچ اذا تتصرفين بتهور تضيعين حقچ بيدچ

بقيت افكر بكلامهة وثاني يوم رحت علة سرور اعتذرت منهة

سرور: عاذرتچ ميس بس مرة ثانية تعاي سئليني استفسري مني مو تتهجمين علية، بعدين خالد شعليه خطية گبيتي عليه
ميس: خالد مذنب من خلة اخو يحاول يتقربلي مشفتي بالعرس شلون حرجني
سرور: بس الولد رايدچ ويحبچ
ميس: شوكت حبني؟ هسه هذا الموضوع مو مهم خليهة للأيام، اني هسه اريد اركز علة دراستي بعد لا اريد اسمع اسم شاهين ولا غير شاهين

تفاجئت بيوم حنة صابرين من دگ علية علي، منين جاب رقمي وشنو هل جرئة، اگلة ماريد علاقة يگلي بس افتهميني اني رايدچ بالحلال ومابيهة شي اذا حچينة حتة ضمانات اذا تردين هم اسويلچ ضمانات، كلش ارتبكت انوب صارت گدام البنات

ضل بالي مشتت طول العرس من وراه، ومنا شاهين حتة ميباوع بوجهي عبالك مسوية جريمة، مع الأسف

بمرور الأيام بزعت من ملحة علي، صار يومية يجي ويدزلي رسائل خفت لا احد يعرف لو يحس ويضن اكو شي بيني وبينة

لحد ما بيوم اجاني واني گاعدة عالفراش بالحديقة بظهر الجامعة واراجع للأمتحان مال باچر'طيبة_الربيعي'

سرور وخالد حسيت بيناتهم شي وكلسع يختفون، محبيت الزگ روحي بيهم

اراجع بصوت عالي وماحس الة واحد گعد گدامي يضحك

علي: اني من يمي حفظت الكليشة

وجهي صار حار

ميس: شتسوي هنا
علي: قبل لترزليني وتصيحين علية خل اگلچ شي
ميس: گوم منا راح تشوه سمعتي بحركاتك هاية
علي: شحدة اليحچي عليچ غير اكسر راسة
ميس: اذاً روح منا شتريد مني
علي: ماريد شي بس تسمعيني

دنگت الملزمة بيدي

ميس: ماريد اسمع، راح تعيد نفسي الحچي وجوابي هو هو ميتغير
علي: اريد اجي اتقدملچ اذا توافقين

هو گال هيچ واني گبل رفعت عيني عليه

ميس: شنو
علي: اريد اجي اتقدملچ، اطلب ايدچ من الوالد بس اريد منچ الموافقة، ياريت متستعجلين بالرد فكري زين، منطيتيني فرصة احچيلچ عن نفسي بس راح اختصرلچ حتة لتگولين جاي يسفط حچي براسي

ساكتة منتظرتة يكمل

علي: اني هسه راح اطب بالتلاثين وگدرت اكون نفسي واشتغل وافتح بيت، امكانيتي زينة ووضعي المادي هم زين، شخصيتي بعد انتي بمرور الأيام تتعرفين عليهة اكثر بما انو العلاقة والتواصل مو من ثوبچ بالخطوبة نتعرف اكثر

بقيت صافنة، ماعرف اصدگ اكو واحد گاعد گدامي وديطلب ايدي لو متوهمة

علي: اني ساكن وية اهلي حالياً بس عندي غرفتي وعندي مساحتي الخاصة، ومفكر انشاءالله فترة واطلع وحدي بس اريد ازوج ومالگيت بنت الحلال، وهسه من شفتچ الله شاهد علة كل كلمة طالعة من حلگي لا يهمني الشكل ولا يهمني المظهر بگد ما يهمني انو انتي بت عائلة وخوش ناس، راح تستغربين شلون عرفت بس اني سئلت عليكم بالمنطقة وماسمعت الة الزين، وهنا هم عرفت من الطلاب انتي بحالچ وثگيلة وعينچ مترفعيهة، وتعجبني شخصيتچ حيل قوية
ميس: بس انتة سمعت من الآخرين، متعرفني شخصياً
علي: صح ماعرفچ شخصياً بس متأكد راح اطلعين نفس ما اني مفكر، وشكو بيهة نتعرف ونشوف شنو النقاط النتفق عليهة وشنو الاختلاف البيناتنة، بالنهاية انتي چبيرة واني چبير مو جهال وراح نعرف نتخذ القرار الصحيح

معرفت شجاوبة، منا امتحانات ومنا عقلي الميبطل تفكير بشاهين، فكرة انو يصير لغيري لو اصير لغيرة مدتخش دماغي وتعصر بگلبي عصر

علي: راح انتظر منچ جواب عسى ما بعد سنة، ومثل ما گتلچ فكري عدل واحترم اي قرار تتخذينة، بس اني رايدچ ومعتز بيچ

ساكتة لان ماعرف شنطي جواب، گام وگلي

علي: يلة ماعطلچ عن دراستچ، ادرسي زين واذا احتاجيتي واسطة اني موجود'طيبة_الربيعي'

دنگت راسي وابتسمت، يا واسطة هاي واني حفظت الملزمة عالغيب

علي: بالتوفيق
ميس: شكراً
علي: مع السلامة
ميس: مع السلامة

ضحك وراح، بس يضحك مادري شنو اليضحك، بالرجعة للبيت شاهين ساكت بس حسيتة مو على بعضة اليوم، ردت اسئلة بس افعالة البشعة تجاهي منعتني

مرت فترة حاولت اصلح الكسرتة بيني وبين سرور وخالد، اعتذرت من خالد گتلة چنت ضايجة من شغلة وصارت بوجهك، تقبل اعتذاري ورجعنة مثل قبل واحسن

حاولت اتناسة موضوع شاهين والتهي بالدراسة وبالنشاطات النسويهة بگروبنة، حسيت هل شي شوية خفف عني لكن بقة موضوع علي شاغل تفكيري، حبيت اخذ رأي ماما حتة اعرف شلون اتصرف

گتلهة اكو واحد هيچ وهيچ، وهسه يريد يتقدملي شلون اردلة جواب بدون ماجرحة لان الولد مُحترم واخو طالب وياية وزميلي ماريد يصير اشكال بيناتنة

سئلتني عليه على مواصفاتة وشيشتغل ومن هل امور

ميس: يوم اني ماريدة، شراح يفرق اذا جاوبت على الأسئلة هاية
ام ميس: وليش متريدي بتي؟ اذا قسمة زينة والولد مثقف ويريحچ شنو الدافع الي يخليچ ترفضي؟

بقيت صافنة عليهة، تدري اني حالتي شنو

ميس: ماما بس انتي تدرين بوضعي...
ام ميس: لتگولين شاهين، يعني انتي مقتنعة تنتظرين واحد عندة وحدة شابع وعايف؟ وفوگ كل هذا لا محسسچ بأهتمام ولا جاي طالب ايدچ

سكتت

ام ميس: وبعدين شبيچ انتي عايبة مثلاً وتضلين ترفضين علمود شاهين منتظرة الفرج يجي ويا؟؟ بنية حليوة ومتدينة وشاطرة، حلم كل شاب
ميس: بس صعبة يوم كلش صعبة
ام ميس: اني مراح اضغط عليچ، بس شاهين ديعيش حياتة واختار الطريق اليريد يمشي بي، وهذا الطريق انتي ماموجودة بي، وانتي بنت عمة مو صعبة يجي يطلب ايدچ
ميس: اي
ام ميس: وانتي اذا تضلين وراه حتة لو يريدچ يبطل، الرجال الحقيقي ميحب التركض وراه، يحب التركضة اخذيهة من امچ ميوسة، وهذا مدام اجاچ بدون لف ودوران اكبر حرام تستعجلين وترفضي

بقيت افكر بكلامهة، واقارن علي بشاهين، دخت بهل موضوع وتركتهة للأيام

مشت الأسابيع خلصت امتحانات وماما سئلتني شنو الي صار بخصوص علي

ميس: مصار شي مرادتلة جواب بعدني'طيبة_الربيعي'
ام ميس: رديلة جواب، رديلة، شكو بيهة تتعرفين عليه يجي لهنا نشوفة ابوچ يشوفة، احنة هم نتعرف عليه اذا نشوفة مناسب الچ وانتي هم تقنتعين بي شكو بيهة تتزوجين وتستقرين

استصعبت اتقبل هاي الفكرة، بس من ارجع اتذكر افعال شاهين وشلون العلاقة واضحة بينة وبين مريم يجي ابالي اوافق على علي، وسرور چان رأيهة مشابه لرأي امي، ثنيناتهن يگليلي جربي مراح تخسرين شي

وفعلاً اتخذت قرار صعب على گلبي بس اهون من انو انتظر وانتظر وانتظر وبعدين اخسر المشيتين، لكن انتظرت من علي هو يجي يحاچيني لان مستحيل اگدر احاچي ولد غريب واگلة تعال اخطبني

ورة ما خفت الدراسة شوية ورجعنة عالمحاضرات والتحضيرات السهلة تفاجئت من شفت علي ينتظر اباب القاعة

طلع خالد ويانة، سلمو على بعض وباوع علية

علي: ميس عندچ مجال نحچي شوية

سرور وخالد باعولي، سرور تبتسم وتغمزلي

باوعتلة: ماشي
خالد: يلة سراوي نروح نتغدة، انتو لحگونة بعدين
علي: ماشي

من راحو ارتبكت، وخايفة ومستحية من نظرات الآخرين احسهة موجهة الية

ميس: ها علي گول
علي: خل نگعد بمكان، نروح للكافتريا؟
جاوبتة بفزع: لا لا، خلينة بمكان مو مكشوف لان عندي معارف هنا ماريد يوصلون حچي لأهلي وتصيرلي مشكلة
ابتسمت: لعد نروح للمسطبات البظهر الجامعة، شتگولين
ميس: اوكي

تمشينة وثنينة ساكتين لحد ما وصلنة للمسطبات، مو هواي طلاب

گعدنة

علي: شلونهة الامتحانات
ميس: زينة الحمدلله
علي: ها يعني مسيطرة
ميس: نگدر نگول هيچ
علي: اني هسه محظوظ لان احسچ هادئة مو مثل ذنيچ المرات
ميس: ليش
علي: يعني احس هسه الحچي سهل وياچ، اني هم صراحة چنت خايف ومتردد احچي وياچ بس يگلچ اليريد الحلو يصبر علة مرة

استحيت

ميس: ممم'طيبة_الربيعي'
علي: فكرتي بكلامي، لشنو اتوصلتي، شنو قرارچ اذا توصلتي لقرار

ماعرف احچي، موقف لا يُحسد عليه لان داحس هاي خطوة جداً چبيرة، بس بعد كلام ماما حسيت انو هذا اصوب قرار

ميس: اني راح احچيلك بصراحة
علي: اهم شي الصراحة
ميس: اني رافضة فكرة الزواج هسه، يعني اذا وافقت اتمنة تحترم قراري انو ماكو زواج الة لمن احس نفسي مستعدة
علي: انتي بس وافقي والتريدي يجرالچ، ماكو استعجال ماكو استعجال مو مشكلة
ميس: يعني عادي عندك تنتظر؟
علي: انتظر بس يعني خوما سنين، شنو اقصى حد؟
ميس: مادري، اشهر، سنة، سنتين

سكت

ميس: هاي اذا اهلي وافقو، اني عن نفسي اشوفك شاب مناقصك شي وممكن انطيك فرصة تتعرف علية واني اتعرف عليك، بس ماريد هل شي يلهيني عن دراستي لان فعلاً حابة اخذ شهادة واشتغل واتعب على نفسي مو بس زواج بيت وجهال

صفن علية، ولا رمش

ميس: واذا انتة مستعجل وتريد تتزوج فهذا الشي من حقك لكن اني هذا شرطي الوحيد
علي: شگد يعجبني تفكيرچ

ابتسمت

علي: ميس انتي جوهرة، والظاهر اني جداً محظوظ لان التقيت بوحدة مثلچ بزمن قل بي الحياء وكثر بي التصنع والجهل
ميس: اشكرك
علي: قابل بهذا الشرط، واني هم اريد اجي اتعرف عالوالد والوالدة وانشاءالله العوائل هم تلتقي بعد ما يصير اتفاق بيني وبينچ
ميس: انشاءالله
علي: تدرين صارلي شگد انتظر الامتحانات تخلص حتة اجي اسمع جوابچ؟ وچنت حيل متردد اسئلچ لان خايف اسمع الجواب الميرضيني
ميس: ممم
علي: بس الحمدلله دعواتي مراحن هباء، وهسه مدام اخذت الجواب وارتاحيت عندچ اي استفسار بخصوص هل موضوع؟
ميس: لا، حالياً ماكو شي معين ابالي
علي: لعد نروح نتغدة؟ وبمرور الأيام نتفق علة باقي الأمور
ميس: تمام، انشاءالله

دگ على خالد يسئلة وين گلة بالكافتيريا، رحنة لهناك وچان المكان متروس، گعدنة وية خالد وسرور وباقي المجموعة نص موجود ونص بغير مكان'طيبة_الربيعي'

تغدينة وسولفنة وضحكنة، بس اني بالي مو يمهم، احس اريد ابچي وتندمت انطيت الموافقة لعلي، صرت بين نارين، نار عقلي ونار شاهين

رند... فرحانة ومتلهفة انو نرجع لبيتنة واشوف صابرين بي، احس صارت عندي اختي اگدر اشاركهة فرحي وحزني وافكاري وغراضي وكللللشي ممكن الأخوات يشتركن بي سوية

ضليت انتظر الصبح يطلع حتة نجيب الريوگ ونروح نصبح على العرسان

اول ما وصلنة للبيت امي گامت تهلهل واطش چكليت على صابرين، حسيتهة تفاجئت

ركضت حضنتهة

رند: الف مبروك يا احلى عرسان بالدنيا
صابرين: الله يبارك بيچ
ام عماد: شلون گاعدة الگلبية فيت عليچ، ماشاءالله يحرسچ الله من العين حبيبتي
صابرين: شكراً عمة

عماد بوس امي وگعد عالقنفة ساكت، صابرين حسيتهة مو على بعضهة، يمكن لان عروس وجديدة عالبيت، خطية اكيد خايفة هسه وتحس نفسهة غريبة

شغلت التلفزيون ورحت على قناة الحنين، اغاني ترگص وامي مدت الصينية ترستهة انواع واشكال، اجبان گيمر عسل ووووو

اني حرت شسوي، اسوي الچاي لو ارگص واهوسلهم لو اگعد اتريگ جوعانة ههههه

الولد يرگصون ويهوسون واني جبت الچاي وگعدت وياهم عالسفرة

عماد وصابرين گاعدين واحد بصف الثاني، اباوع على اخوية مدري شيشاورهة وهية وجههة ينگلب طماطة، ميگعد راحة العريس ههههه
فرحانلتة چان ينتظر العرس بفارغ الصبر، كلش فرحانة بشوفتهم گاعدين سوية

ام عماد: اكلي بنيتي لا تستحين، احنة اهلچ بعد وانتي بنيتنة
صابرين: عاشت ايدچ
ام عماد: الف عافية
عماد: يمة عمي ومرة عمي ليش ماجو وياكم
ام عماد: گال اجيكم غير يوم هسه خل العرسان ياخذون راحتهم

ورة ما تريگنة وخلصنة گعدنة بالأستقبال نسولف

رند: ممكن بلا زحمة اخذ العروس اشوفهة غرفتي
عماد: اخذيهة بس لا اطولن، ورانة شغل

عزززززة، خربت من الضحك وحسيت صابرين تريد تگمز عليه تخرمشة بظافيرهة، امي تضحك والولد مطفين مو يم المواضيع هاية

رند: ادلل عيني منطول
صابرين: امشي امشي، شلون حچي

ضحكت، اخذتهة لغرفتي وچان الضوة مطفي'طيبة_الربيعي'

شغلتهة وگعدنة عالچرباية

رند: ايييييي واخيراً صرتي يمنة
صابرين: ههههه اي
رند: شو العروس ضايجة خوما بيهة شي
صابرين: لا بس استحي، بعدني مماخذة عالبيت
رند: حقچ، بهاي حقچ والله، بس بمرور الأيام راح تتعودين وتگومين تفترين بالبيت مثل الحمامة
ضحكت: انشاءالله

سولفنة عالعرس وعالمعازيم منو اجة ومنو محضر، سئلتهة علة بيت عمهة گالت صارت مشكلة وانشاءالله تنحل

رند: خطية، الله يصلح بيناتكم انشاءالله
صابرين: امين، انتي شوكت عمليتچ
رند: اسويهة هذا الأسبوع بس خل عماد يفرغ حتة يوديني
صابرين: مممم، وشصار على موضوع عواد

ارتبكت

رند: شبي
ابتسمت: يعني شنو افكارچ، شنو رأي اهلچ
رند: والله ماادري يا صابرين، خاف اگلچ وتفهميني غلط
صابرين: لا گولي احترم رأيچ والله
رند: اخوچ يعجبني صراحةً شخصية وهيبة وثگل ورزانة
ضحكت: شبقيتي
رند: اي يعني قصدي الف من تتمنى واني صراحةً اذا گتلچ مو عاجبني معناتهة كذبت
صابرين: اي بس شو احس تريدين تگولين شي، گولي لتستحين
رند: سامعة عليه عصبي، صحيح هل شي؟
صابرين: عصبي اي، بس عالحق، نگدر نگول طبعة شوية صعب يراد وحدة باردة على گولتچ، مثلچ يعني
رند: ههههه
صابرين: انتي تشوفي ويشوفچ اذا توالمتو بيهة الخير واذا لا فالله سبحانه يبعثلكم النصيب اليرضيكم
رند: انشاءالله

حسيتهة مالهة واهس تحچي فگتلهة

رند: خل اشوفچ شنو جبتلچ هدية، بس هااا على گد امكانيتي يعني شي بسيط
ابتسمت: صدوگ؟ شوفيني وينهة
رند: ثواني

گمت فتحت الكنتور وطلعت العلبة مال سوار، قدمتة الهة وگعدت

فتحتة وحسيتهة تفاجئت وفرحت'طيبة_الربيعي'

صابرين: هذا فضة اصلي؟
رند: نعم، واختاريتلچيا بتأني
صابرين: شو بلة خل البسة

لبستهة وباعتلي مبتسمة

صابرين: شكراً حبيبتي والله احلى هدية

تشابگنة وبعدها رجعنة للأستقبال

عماد: اني طالع بشغلة فد شوية اجي
ام عماد: وين يمة بعدك عريس صدگ چذب
عماد: ماطول حجية رايح امر علة شاهين يريد سيارتي سيارتة بالتصليح
ام عماد: لا تتأخر وليدي
عماد: انشاءالله

خلصنة اليوم سوية اني وصابرين لان عماد تأخر

رند: حروح اشوف امي اذا تحتاج شي واجيچ
صابرين: خل اني هم اجي اساعدكم
رند: لا گعدي عروس بعدچ، ماطول ثواني
صابرين: ماشي

رحت لأمي واگفة بالمطبخ تنضف الميز

رند: اگلچ يوم هذا وين طالع وعايف البنية وهية عروس؟؟
ام عماد: اندري، خابري خل يجي، چان خابصني بيهة، وين اكو عريس يطلع ثاني يوم من عرسة
رند: هسه اخابرة

دگيت عليه رفعة

عماد: ها رند شكو
رند: وينك ياخوية، مو عيب عايف عروستك وحدهة
عماد: يم شاهين اخلص شغلي واجي
رند: يعني شاهين العروس لو اختة؟ اريد افتهم
عماد: غبية جيتلهم للمحل يحتاجون مساعدة، ماطول شوية واجي
رند: راح يصير المغرب وانتة ماكو، تغدينة وشربنة چاي واخذنة غفة وانتة ماكو
عماد: تغديت وياهم، ادري عريس اضل مگابلچن وگاعد، شوية واجي گتلچ ماطول
رند: يلة براحتك، لطوووول
عماد: اي براحتك ولطول، شلون رهمتيهة
ضحكت: يلة باي
عماد: الله وياچ

سديتة'طيبة_الربيعي'

ام عماد: ها وينة
رند: يم شاهين يساعدهم بالأسواق
ام عماد: بلة هذا صدگ يحچي، روحي انتي يم البنية من يجي اعرف شغلي ويا، خبصني اريدهة واريدهة وهسه من صارت يمة صارت الطلعات هاي عزيزة
رند: خاف اكو شي لو مزاعلين؟
ام عماد: هاا
رند: يجوز، احتمال صاير شي لان ثنيناتهم مو على بعضهم
ام عماد: لا قابل شيصير، چان گلي
رند: مادري بعد
ام عماد: دروحي يمهة عيب كلنة عايفينهة
رند: اي رايحة

رجعت يمهة، نسولف عالدوام

رند: شنو رأيچ ادز كرار يشتري حب وهل سوالف ونشوف مسلسل لو فلم عالتلفزيون؟
صابرين: يلة تمام
رند: ماااشي تعاي

رحنة للأستقبال دزيت بيد كرار حلويات ومن هل سوالف نحلي ونكرز ونباوع، احلى اجواء كلش متحمسة، عايشة ابين الولد محاسة بطعم الأخت بالبيت

وية طبة كرار طب عماد

رند: شنو جيت بطيارة، هستوك يم شاهين
عماد: السلام عليكم اول شي

ردينة السلام

انتيهت عماد ضايج، راح لغرفتة مگعد ويانة

اجتي امي

ام عماد: ها اخوچ اجة
رند: اي صعد فوگ

صابرين گاعدة بصفي وشابكة ايد بأيد، تباوع عالتلفزيون لا گامت ورة عماد ولا صار حچي بيناتهم

امي باعتلي يعني مبين اكو شي، طلعت من الاستقبال يمكن راحت تحاچي

بدة فلم على قناة ام بي سي تو، انتبهت عليهة ممدت ايدهة عالغراض الجبناهن

رند: اكلي ولچ لتستحين
صابرين: ماشتهي
رند: هو انتي شكلتي، حتة غداچ مو شي، اكلي اكلي المستحة خلي علة صفحة هسه

مديت ايدي اخذت نستلة وباكيت عصير

رند: هاچ

حطيتهن بحضنهة

صابرين: شكراً'طيبة_الربيعي'

بعد ما خلصنة الفحوصات وكلشي اجة يوم العملية، كلش چنت خايفة بس امي تهون علية
الدكتور چانت ايدة خفيفة ومحسيت بشي الة من البنج بدة يخلص مفعولة

الدكتور: من افضل المراجعين الي اجوني، رند
ام عماد: الله يخليك دكتور
الدكتور: هادئة ومتعبتيني، الله يحفظهة يارب
رند: تسلم دكتور، عاشت ايدك

الدكتور شاب وبيدة حلقة، حسيت عليه كلش يباوعلي بنظرات غريبة، يعني الگا صافن علية وامي حست على هل شي

ام عماد: انعجب بيچ الدكتور
رند: ممم
ام عماد: لو مامزوج چان صار من نصيبچ
رند: يوم كلمن ونصيبة

واضح عليهة ممقتنعة بعواد، بس اني گلبي ارتاحلة وحسيت بي مثل بابا الله يرحمة، رزن وهيبتة طاقية،

بالسبعة مال صابرين حضرو اهلهة واجوي بيت عمي همينة، صارت اللمة حلوة وشغلنة اغاني وتونسنة
امهة وبنات عمهة تحمدولي بالسلامة

ام عواد: اي ام عماد نريد الامانة العندچ، شو لا حس ولا خبر
ضحكت: والله يا عيوني اني ماعندي اي اشكال بس غير بعد اخوهة والولد يتفقون، ونشوف شلون تصير
ام عواد: عواد وعماد متفقين بس بعد بقة الشور شور البنية

وباوعتلي، رفعت حواجبي متفاجئة ضليت ارجف

ام عواد: ها رنودة شتگولين
رند: ها خالة شنو

كلهن ضحكن، ارتبكت، باوعت لصابرين استنجد بيهة

صابرين: يوم البنية تستحي، شنو السالفة
ام عواد: يلة حقهة، بس اشوف الرضى بعيونهة، صح كلامي لو لا؟

تباوعلي وتبتسم، دنگت راسي مستحية، شجاوبهة

ام عماد: عيوني البنية تمشي برأي اخوهة واذا اخوهة وافق گبعو واخذو

صار نقاش بيناتهم، بلحظتهة تمنيت لو اختفي

صابرين دغتني

صابرين: يولي مراح يسوولچ شي، شبيچ ترجفين
رند: استحي
صابرين: لعد اني شگول، عادي المستحى من شيم البنية العندهة حياء، بس لتخلي يسيطر عليچ خلي الأمور طبيعية
رند: اي

قبل ليرحون ام عواد بوستني وگالت'طيبة_الربيعي'

ام عواد: طيبي بسرعة ترة العريس بالباب

امي ضحكت، ابتسمتلهة وياريت لو اركض اطب جوة بس عيب، سلمو وراحو

صابرين... يومين عماد يحوص وبليل مرات احس بي يدنة يمي واگوم عليه وهو يتراجع، كم مرة حاولت افهمة مو مستعدة ومداحس بمشاعر تجاهك بس ماكو فايدة، يروح ساعتين ويرجع الوضع نفسة

بليل گاعدة يم رند واجتي امة

ام عماد: رند ماما خلي البنية تروح يم رجلهة
رند: دندرس يوم
ام عماد: ميخالف صارلچن شگد ادرسن، هسه الساعة بالعشرة وعماد راح ينام، گومي بتي الله يرضى عليچ روحي يم رجلچ

توترت، باوعت لرند

رند: والله صحيح اني هم مدري شلوني، گومي لاحگين عالدراسة، باچر نكمل
صابرين: تمام

لميت كتبي ورحت للغرفة، لگيتة يصلي

ضميت الكتب بالجنطة وفتحت باب الكنتور اطلع بجامة، سمعت صوتة وراية

عماد: ترة مصختيهة صابرين

انداريت عليه

صابرين: شكو
عماد: لا كلساع وعصيتي يم رند، هيچ راح تخلين الأمة العربية كلهة تحس
صابرين: چنة ندرس، يعني شلون ماادرس بعد
عماد: درسي بس مو هيچ

طلعت البجامة وطلعت بدلت بالحمام ورجعت ركض ماريد واحد يشوفني

لگيتة گاعد عالچرباية وبيدة الموبايل، مشيت للچرباية على اطراف اصابعي، گلبي گام يدگ سريع من گال

عماد: هاي صار تلث ايام عايفچ علة راحتچ، شوكت تفض السالفة

بقيت واگفة بصفحتي مال الچرباية

صابرين: شنو يعني گتلك الف مرة ماريد

گام وباوعلي

عماد: انتي مخبلة؟
صابرين: اي مخبلة

راح عالباب قفلة، گلبي وگع بيدي

صابرين: شسوي
عماد: هسه اشوفچ شسوي، انتي مو مال عيني واغاتي

هو مشة لناحيتي وصار بعد خطوتين عني واني ركضت صعدت عالچرباية

صابرين: عماااد شسوي'طيبة_الربيعي'

ركض صعد وراية واني اطفرررر نزلت ركضت عالباب وماحس الة وجرني من ذراعي

صابرين: عوووفني
عماد: اصبررري، حسسسچ

يريد يتقرب واني ادفع بي لحد ما وگعت ليورة

عماد: ولچ انتي شنوووو بابااا
صابرين: مااااريد گتلك شنووو بالغصبببب
عماد: ايييي بالغصببب

جرني وگفني على حيلي ويصك علة اسنانة

عماد: صابرين كااافي

اسحب بروحي لحد ما صرت عالچرباية وهو يحاول واني اقاومة لحد ما گال

عماد: ماريد منچ شي بس اتأكد من البالي، لتقاومين لا اكسر ايدچ

هو گال هيچ واني عيوني دمعن والعصبية فولت عندي

صابرين: يعني تقصد اني مو شريفة مو؟؟

باوع بعيوني وعيونة كلهن شك تجاهي

صابرين: اخذ التريدة بس بعدهة راح اكرهك كره العمى، اكثر ما اني كارهتك هسه
عماد: ليش تقاوميني لعد اذا مخايفة من شي
صابرين: اني اشرف منك ومن عشرة من امثالك، انتة كل همك هل شغلة واني ارجع اگلك لو مدري شتسوي مراح احبك، وراح اكرهك اكثر واكثر علة فعلتك الشنيعة هاااية
عماد: انتي اجبرين هل افكار بدماااغي

گمت ابچي

صابرين: يلة اخذ التريدة وابتعد عني ياريت اموت واخلص منك ومن اهلي الجبروني عليييك

عماد: انعل ابو هيچ عيشة

ابتعد واني اعتدلت بگعدتي وافرك بيدية گامت تأذيني

عماد: ولچ تبچين لان تقربت شوية؟ هلگد كارهتني؟؟؟

مدنگة وابچي

عماد: اني لو تهمني النومة چان عرفت اتصرف من اول ليلة، بس اني اريد اكسب گلبچ، مشيت ورة گلبي اااااخ

باوعتلة قابض ايدة ويعض بيهة

صابرين: لعد اتركني خليني اتعود خليني اقتنع بيك

ضل يروح ويجي بالغرفة'طيبة_الربيعي'

صابرين: اريد انام وراية دوام

باوعلي بنظرة غضب

عماد: نامي

فتح الباب وطلع، اباوع ليدية ترجف، واحس الدنيا صارت ثلج مع انو صيف

صرت جوة الغطة صابني صداع وبرد فضيع

لهناك وغفيت محسيت بالدنيا بعد، صحيت على صوت المنبه، مديت ايدي طفيتة وباوعت وراية، نايم

دفعت الغطة ورحت للحمام، باوعت لوجهي بالمراية احمر، مديت ايدي تلمست خدودي وگصتي، اشتعل نااار

رجعت للغرفة لگيتة گاعد ووجهة مبين عليه النوم

رجعت لفراشي، مابية اداوم اليوم

صابرين: اخذلي اجازة، ماريد اداوم
عماد: ليش
صابرين: حرارتي صاعدة
عماد: حرارتچ الصاعدة لو حرارتي

سكتت، مالي خلگ اناقشة، خاصة بعد الهبطة الهبطنياهة البارحة

عماد: شو گومي خل اشوفچ
صابرين: مابية اگوم

صار فترة طويلة من تمرضت هيچ

عماد: لا اله الا الله، شگد عنودية وراسچ يابس

صابرين: عماد تاخذلي اجازة لو اگوم اداوم واني بهاي الحالة؟ لتضل تحچي علية ومعاجبك العجب

سكت

هو بدل وطلع، اجتني رند للغرفة

رند: صبو صحيح مريضة؟

وخرت الفراش وباوعتلهة واگفة بالباب

صابرين: اي حرارتي صاعدة
رند: مابيچ غير العافية حبي، لعد نامي ارتاحي اني اخذلچ اجازة
صابرين: شكراً رنود
رند: يلة حروح اني اشوفچ من ارجع
صابرين: تمام

من راحت اجتني عمتي للغرفة، خطية جابتلي وصلة باردة وخلتهة على گصتي

صابرين: ليش تعبتي نفسچ عمة، مابية شي
ام عماد: ميخالف حبيبتي حرارتچ صاعدة، ليش شعجب هيچ
صابرين: مادري، حسيت برد قارص البارحة وهسه گعدت حرارتي كلش عالية
ام عماد: خل يجي عماد ويجيبلچ ويا فوار مال فيتامين سي
صابرين: اي

چان تعاملهة كلش حلو وياية، عماد مرجع الة وية المغرب حتة من جتي رند مدخل وياهة'طيبة_الربيعي'

هل ايام مبتعد عني واني اغلب وقتي يم رند اتحجج بالدراسة بس كل همي ماصير ويا بنفس الغرفة ووحدنة

من رند سوت العملية شغل البيت صار هواية علية بس مع ذلك حسيت براحة من اشتغل واساعد رند بالدراسة، احس انو عندي هدف من وجودي بهذا البيت، يلهيني عن عماد وملحتة

بالسبعة مالتي امي سئلتني اذا كلشي تمام، ومن گتلهة كلشي تمام محسيتهة صدگتني، هية يا يوم صدگتني

ام عواد: شو مامرتاحتلچ يصبو
صابرين: ليش عيني شكو
ام عواد: متأكدة الولد ماجاي يعاني من عنادچ؟
صابرين: ليش انتي هيچ ماخذة نظرة عني
ام عواد: بتي واعرفچ، المهم انشاءالله الله يتممهة علة خير ونشوف الطفل عن قريب
صابرين: عزة العزاني يا طفل هذا، شبيچ يمة صدگ تحچين
ام عواد: اووي دسكتي كلشي متعرفين، اذا يصير عندچ طفل هسه يكبر وياچ

سكتت، شحچي وياهة، ضلت توصيني رجلچ وبيتچ ونضافتچ ومو كلسع ادرسين خلي اولوياتچ رجلچ ومن تفرغين سوي التردي

هية لو تدري هههههههه، تشويني وتاكلني بلا ملح

مرن اسبوعين تقريباً وموضوع عواد ورند تأجل لان البنية عمليتهة بعدهة مطايبة ويراد وقت يلة يروح الورم الداير مداير عينهة

الجمعة گاعدين اني ورند والولد بالأستقبال ونزل عماد من الغرفة

عماد: عدچن شي؟

رند باعتلي وجاوبت

رند: لا شعدنة، ليش

باوعتلة بتساؤول، ميباوعلي

عماد: نطلع نغير جو، بس مو هسه العصرية
رند: اي ليش لا، يحتاج نغير جو ونطلع من كئابة الدراسة، لو شتگولين صبو
صابرين: اي
عماد: رايح لشاهين من ارجع نطلع
رند: عود خابرني قبل لتجي حتة نحضر مو تجي تخبصنة
عماد: انشاءالله

باوعتلة من طلع، مجاهلني كلش

خلصنة شغل البيت وصار الغدة وهو ماكو، امة گالت دگي عليه شوفي وينة، خل يجي يتغدة'طيبة_الربيعي'

دگيت عليه

جاوب: ها
صابرين: امك تگول وينك تعال تغدة
عماد: وانتي ماترديني اجي اتغدة؟

سكتت

عماد: شوكت الله يهديچ، جاي سدي
صابرين: اوك

سديتة، اجة عالغدة ياكل بصمت، امة تباوعلي وتباوعلة

ورة الغدة شلنة المواعين وگلت لرند روحي گعدي اني اسوي الچاي

راحت واني سويتة ورحت للأستقبال، بعدني مطابة سمعت امة تگول

ام عماد: شلون ماكو شي، اليشوفكم ميگول عرسان
عماد: شكو يمة قابل، البنية تستحي واني تعبان من الشغل
ام عماد: حتة لو، لا تستقبلك لا انتة تگعد يمهة، ووقتهة كلة يم رند، زواجيش هذا مو چنت بس تتمنة تصير مرتك

ساكت، رند گالت

رند: يوم هذا شي يخصهم، ليش ندخل بيناتهم
ام عماد: ميجوز هل شي، صار اسبوعين اراقبهم كل واحد بجهة، سكتت گلت بعدهم عرسان ماماخذين علة بعض، هسه مرت فترة والوضع نفسة، شنو القصة

سحبت نفس وزفرتة، دخلت قدمت الچاي كلهم ساكتين، حبيت ابعد الشك عني وعنة

خليت الصينية عالميز ورحت گعدت بصفة

صابرين: حبيبي شوكت نروح

التفت علية مصدوم، فكيت عيوني ورجعت نصيت

عماد: فد ساعتين خل الجو يبرد شوية
صابرين: تمام

خطفت نظرة لعمتي، تشرب الچاي وعيونهة علينة

باوعت لرند تضحك، اني هم ضحكت

عماد: حبيبتي گومي جيبيلي الموبايل فوگ
صابرين: من عيني

صعدت دورت موبايلة ماكو، اجة وسد الباب

عماد: شنو عود هاي حبيبي، تردين تحركيني انتي
صابرين: ترة ادري عمتي بدت تشك، انتة ليش بس معبس گدامهم تحسسهم اكو شي'طيبة_الربيعي'
عماد: لعد شترديني اضحك واطير بالهوة؟؟ عريس وماتهنيت بعرسي من ورة عنادچ، بس خليچ هيچ لحد ما تتندمين
صابرين: مااتندم على شي اني
عماد: متاكدة؟
صابرين: متاكدة
عماد: خوش نشوف، الايام طويلة صابرين

عفتة ونزلت، العصر اخذنة اني ورند للمول، ضلينة نفتر انوب دخلنة كافتريا متروسة ناس، اول مرة ادخل هيچ مكان

طلبلنة عصير وكريب، معرفتة شنو بس رند علمتني عليه

كلش طيب، بهل طلعة نفهت عن نفسي ونسيت السادس ومرارتة، ضلينة نفتر بالكرادة لليل يلة رجعنة

من رجعنة وصعدت للغرفة ابدل شوية ودخل

صابرين: شكراً
باوعلي وهو ينزع فانيلتة: علة شنو
صابرين: لان طلعتني
عماد: وشسويت؟ قابل احبسچ بالبيت
صابرين: اي چنت متوقعة راح تعاقبني، بما انو انتة شخصية شريرة
ضحك: انتي مخبلة، مو صاحية
صابرين: بالضبط، المهم حبيت اشكرك
عماد: ادللي، وماكو جائزة علة هل طلعة الحلوة؟
صابرين: لا
عماد: منا منا
صابرين: لا گلت
عماد: حضنة
صابرين: رجعنة؟
عماد: اشاقيچ

بدل وطلع ضايج، مادري ليش مداتقبلة، مداگدر انسة السواه بية بطفولتي، ضليت افكر واتگلب، شعندي نايمة هسه والوقت بعدة متأخر

نزلت اشوفهم شكو ماكو، امة ورند گاعدين الولد كلمن بغرفتة

گعدت يم رند

رند: ها حبي
صابرين: ها
رند: تدرين عواد حاچي وية عماد
صابرين: اي وشگايلة؟
رند: يريد هسه يخطب، مستعجل
ابتسمت: طبعاً، هو اليشوف هذا الحسن كلة ميستعجل؟
رند: اي بس تعرفين خشمي ومنا الدراسة، ماعرف احس الوقت مو مناسب
صابرين: اي گولي لعماد يفهمة، قابل راح يرفض
رند: ممم

ماعرف احس نفسي خاينة، مرات افكر اگول لرند هو چان يحب بنت عمي بس ارجع لأول نقطة وهي انو ازل تزوجت بعد واذا گتلهة شنو راح يصير؟ مراح يصير غير انو راح اخليهة تاخذ غير نظرة عليه

اني مصدگت يزوج ويستقر، مستحيل اخرب عليهم خاصة بعد ما تأكدت رند عينهة عليه'طيبة_الربيعي'

بدة الدوام وانتبهت ازل هل اسبوع كلة ماهية

سئلت بيداء گالت ماعرف يمكن مريضة، ضل بالي يمهة ووصيت بيداء اطمني عليهة اذا تواصلت وياهة

بالرجعة من المدرسة اجة علينة عماد كالمعتاد، وحسيت نور تعاملهة كلش غريب وياية، لا اسلم لا تحچي وياية، صح اني ميهموني هيچ نماذج بس استغربت هل شي، يعني مصاير فد موقف بيناتنة حتة تتعامل بهل طريقة وياية

من رجعنة سئلت رند، لحيت عليهة لحد ما ضحكت وگالت

رند: ختولي شلچ بيهة
صابرين: ترة اني لا ثولة ولا غشيمة، مبين عندهة شي شخصي وياية، احچي رند ترة ازعل والله
رند: شحچي
صابرين: تعرفين شي؟ مبين من وجهچ تعرفين شي
رند: يعني شراح تستفادين اذا عرفتي

تفاجئت، يعني فعلاً احساسي بمحلة

صابرين: اريد اعرف
رند: مممم، هية چانت تحب عماد

فكيت عيوني على وسعهن

صابرين: اي؟
رند: اي، وضاجت لان ازوج
صابرين: وهو يدري؟
رند: يدري بس ميريدهة هو، خابصنة بيچ

چتفت ايدية

صابرين: يعني لحد الآن عينهة عليه
رند: عطبت عطبت
صابرين: لا معطبت، عادي بس اني شكو؟ ليش كارهتني قابل اخذتة منهة
رند: اي بنظرهة اخذتي منهة، هسه ياريت هو چان منطيهة وجه حتة تضوج

من عرفت بهل شي ماعرف ليش شبه ضجت، وردت اتأكد اذا بعدهة عينهة عليه

من وصلنة ثاني يوم بالرجعة اباوعلهة من المراية الجانبية، طول الطريق انتبهت عليهة تباوع بأتجاه عماد'طيبة_الربيعي'

باوعت عليه

باوعلي: ها
صابرين: هيچ

رجعت اباوع گدامي، خطفت نظرة للمراية صارت عيني بعيونهة خزرتهة، متستحي ادبسز

شلون الواحد يگدر يخلي عينة على انسان مرتبط او متزوج؟ احس هل شي كلش مقرف واليسوي هم انسان مقرف

وصلنة للبيت رند گالت

رند: صابرين مو تگولين اني گتلچ علة نور؟ والنبي عماد يموتني
صابرين: لا ماگول، وليش يموتچ عندة شي وياهة مثلاً؟
رند: لاااا ابد، بس هو ميقبل ينطي الموضوع اهمية
صابرين: تمام

بقيت احوص هل يومين اريد اعرف اذا اكو شي بينهم، الشك اكلني

بليل من كلمن راح لغرفتة صعدت وراه

گعدت عالچرباية وبيدي الكتاب، اراقبة منتظرتة يجي يگعد

دگ موبايلة، شاهين، من خلص حچي طلع برة طول نص ساعة تقريبا ورجع

صابرين: وين چنت

باوعلي حسيتة تفاجئ

عماد: اجة شاهين، ليش
صابرين: شيريد شاهين اكو شي؟
عماد: لا، شنو تحقيق
صابرين: لا بس عبالي اكو شي واجة هسه
عماد: اني وشاهين دوم نلتقي وبكل وقت
صابرين: ممم

اجة تمدد وتغطة، اجتي الوطنية واشتغل السبلت

صابرين: اسئلك سؤال
عماد: سئلي
صابرين: هم چان عندك علاقات قبلي

باوعلي گام يضحك

عماد: شجاب هل سؤال علة بالچ هسه
صابرين: هيچ، فضول
عماد: ليش سامعة شي

سديت الكتاب وباوعتلة رافعة تك حاجب

صابرين: ليش انتة خايف لا اكون سامعة شي؟

ازل... الصدمة الآني بيهة متنحچي ومتتسولف، واني اباوع بهل فديوات المقرفة حسيت الحرارة صعدت براسي

نسوان يرگصن واللبس فاضح والاغاني، وهاي من غير الفديوات الي بيهن منذر يذب فلوس عليهن'طيبة_الربيعي'

نزعت عباتي مال صلاة لفيت السجادة ورحت للغرفة، نايم ومستحيل يگعد هسه

انتظرت الصبح يطلع بفارغ الصبر، ميتة قهر، ساعة ابچي ساعة اريد اگعدة واصيح وادگ والطم

للظهر يلة بدة يصحصح واني خالة كرسي وگاعدة گدام الچرباية

فتح عيونة شافني تفاجئ

منذر: شبيچ ازل هية هاي گعدة گاعدتهة

بدة يفرك بعيونة،

منذر: شبيچ
ازل: انتة واحد خاين واكبر چذاب شفتة بحياتي
منذر: شنو؟؟

گمت من الكرسي ودفعتة

ازل: هذا شنو الشفتة بموبايلك؟؟؟ منو ذني التذب فلوووس عليهنننن

اني گلت هيچ وهو دفع الغطة وگام من الچرباية

منذر: وانتي شكو تفتشين بموبايلي؟؟؟
ازل: لك معقولة اني ممكفية وممالية عينك؟؟؟

سحب الموبايل من ايدي

منذر: اشفتي
ازل: اشفت؟؟ هو هذا الهمك؟؟ اشفت؟؟؟
منذر: اشفتي داگلچ
ازل: شفت الي مچنت اتوقع اشوفة وياك، نسوان وشرب معقولة انتة طلعت هيچ منذر؟؟؟

بقيت احچي وابچي، وهو ساكت ويباوعلي'طيبة_الربيعي'

اعصابي انهارت بالزايد من گال

منذر: الشفتي عادي وشي طبيعي، اني رجال ويا رجال ماعندة هيچ سوالف؟
ازل: انتة من كل عقلك؟ يا رجال يخاف الله ويحب مرتة يسوي هيچ، غير الفاشل والماعندة ذرة ضمير

صفگني راشدي حسيت راسي افتر فر

منذر: احچي عدل لتتجاوزين، مو زعطوط گدامچ!

باوعت عليه مصدومة

ازل: تمد ايدك علية؟ مابقة لحظة وياك بعد
منذر: وطبچ مرض، حيوانة

حسيت الدنيا سودت بعيوني، ابچي والم بغراضي
واصيح مابقة وياك خل تفيدك هاي الحياة المليانة قذارة

وهو يفتر بالغرفة يمي

انداريت عليه

ازل: لك ياريت لو مقصرة وياك بشي حتة تروح تنام بحضن غيري، وشنو ذني الزبايل تذب عليهن فلووووس، شنو قييييمتههننننن

منذر: كافي ازل، كسري الشر وگعدي

طلعت صايتي وشالي

منذر: نزعي شجاي تسوين
ازل: وديني لبيت جدو، وديني هسه توديني
منذر: ماوديچ، ازل كافي
ازل: كااافي شنووو كاااافي، تخوووون بية وتريدني ااااسكت
منذر: كافي اهدئي، ماخنتچ قديمات ذني
ازل: لا مو قديمات، لا لچذب علية كافي چذب

جيت البس الشال جرة من ايدي وشمرة بالگاع حيل

صاح: كااااافي، احبچ وماخنتچ من يوم الزوجنة واني ابتعدت عن هل سوالف، ليش تكفريني ب******

گعدت عالچرباية غطيت وجهي وصوتي على بالبچي

گعد يم رجلي يتوسل واني اگلة ماريدك بعد وديني

منذر: والله احبچ شتردين اسوي، ابوس رجلچ؟ والله قديمات ماعندي هيچ سوالف بطلتهن لخاطرچ
ازل: چذاب ماصدگ
منذر: بيش احلفلچ، وعيونچ بس انتي بحياتي، والشرب ماگدر ابطلة هسه ماگدر، ماعندي لا نسوان ولا ابد بس الشرب مگدرت ابطلة

اصريت انو يوديني، وهو مستمر يبرأ نفسة، من شفت دموعة نزلن وهو يگول

منذر: ازل بس انتي مصدر الراحة بهاي الحياة، اذا تعوفيني اموت ماگدر بدونچ اني ازل، انتي ابوية وانتي امي وكلشي املكة بهاي الدنيا
ازل: وشلون اصدگك بعد الشافتة عيوني
منذر: هاچ الموبايل مسحيهن، والله كلة هذا بالماضي حرام تخلين الماضي يدخل بيناتنة، ازل اني احبچ وانتي تحبيني لا اتخلة عنچ ولا تتخلين عني خاصة بعد شي تافه مثل هذا

بقيت صافنة عليه، اني ابچي وهو يبچي'طيبة_الربيعي'

منذر: واذا تردين اوديچ، بس متروحين زعلانة علية
ازل: وخر

دفعتة وگمت، مسحت دموعي

ازل: جيب الموبايل
منذر: هاچ

انطانيا، مسحت الفديوات وشمرتة عالچرباية

ازل: هل مرة سماح، ومو علمود شي بس لان احبك واگول المسامح كريم، مرة ثانية صدگ اروح وبعد متشوف شعرة من راسي
منذر: هاي هية، حقچ علية

شبگني دفعتة

ازل: وعوفني اني من اهدأ احچي وياك عود

عفتة وطلعت رحت للمطبخ، شوية واجة وراية

منذر: ليش مگعدتيني اوديچ للدوام
ازل: ماريد اداوم، ورجاءاً ابتعد عني ترة واااصلة لهنااا

واشرت على خشمي

منذر: ماشي راح ابتعد، بس اهدئي

انطيتة ظهري وبديت ارتب بالمواعين، شوية وحسيتة راح

ضليت اسبوع بالبيت مداومت احاول اطلع من الصدمة الآني بيهة، امي درت ممداومة وخابرتني تحچي علية

ازل: يوم تعبانة مالي واهس اداوم
ام ازل: واحنة مو اتفقنة متخلين الزواج يأثر علة دراستچ؟؟
ازل: اي بس هل اسبوع وراهة ارجع
ام ازل: صوتچ معاجبني، خل يجيبچ منذر خل اشوفچ
ازل: مابية حيل هسه اني اجي بعدين
ام ازل: سدي خل اخابرة افتهم منة، شمسويلچ
ازل: معليه هو اني تعبانة دوام وبيت وضغط، رجاءاً لتضغطين علية ماما مناقصني
ام ازل: شبيچ يا بتي غير افتهم

ضلت تلح علية، اخر شي گتلهة امر عليكم عود من يجي من الشغل اخلي يجيبني، من گتلهة هيچ يلة فكت ياخة مني

من اجة گتلة اريد اروح لاهلي'طيبة_الربيعي'

منذر: ها ازل مو گلتي هاي هية
ازل: اريد اروح ارتاح كم يوم وارجع

تقدم حضني وباسني

منذر: بعدچ زعلانة مني ادري، وعيونچ متتكرر
ازل: وتوعدني اتبطل شرب هم؟؟
منذر: ماگدر هسه ازل افتهميني، اني متعود شوية شوية يلة اگدر اغير من نفسي، ماگدر كلشي جرة وحدة
ازل: منذر حرام هذا الشرب حرام، يوديك لقعر جهنم، ميجوز
منذر: ماشي حبيبتي اتركة، احاول اتركة

جريت حسرة، بليل مرينة علة اهلي وسويت الوضع طبيعي، گتلهم چنت مريضة ونفسيتي تعبانة من الدراسة، كلهم اقتنعو الة امي بقت تفتر وراية تريد تعرف شكو

منذر بقة وياية، بتنة ابيت جدو لكن هو بصفحة واني بصفحة، ميتة على اخواني يوم عن يوم اشتياقي الهم يزيد، وخاصة خولة صايرة تفتهم وتلاعبني

يومين بتنة عندهم والأحد بليل رجعنة للبيت

رجع الوضع طبيعي بيني وبينة، ونسيت الصار، المدرسات بدو يشكون مني حاولت احسن درجاتي بس ماكو فايدة، هواي فاتني امور وزين منهم مفصلوني لان يحبوني يعرفوني فقيرة وشاطرة

من شرحتلهم انو دامر بظروف عذروني لكن بشرط بعد متنعاد والا انفصل

حاولت اركز على دراستي بس حياتي وية منذر اختلفت وصار صعب اسيطر على كل الجوانب

منذر وسهراتة بليل وهو يشرب وية صاحبة تعبتني، شگد حاولت ردت مفاد، تركتة براحتة لان الحچي ميجيب نتيجة، لكن بديت اهجرة واحسسة انو الديسوي غلط

ومن ارفض قربة مني يضوج لو يضل يگلي انتي كرهتيني واني محد يريدني بهاي الدنيا، انقهر عليه ومن حُبي الة اتغاضى عن افعالة السيئة

بيوم گاعدين العصرية اني اشرب چاي وهو يكرز حب

دنسولف على ايام زمان وسئلتة

ازل: شعجب مكملت دراسة
منذر: ماگدرت، وضعي مچان يسمح وامي تمرضت مالگيت منفذ غير الشغل'طيبة_الربيعي'
ازل: ممم زين وشعلمك عالشرب، ليش اخذت هذا الطريق منذر
منذر: ازل ظروف، الانسان من يمر بوقت عصيب وميلگة اليطلعة من البير الهو بي يلجأ لهيچ دروب حتة ينسة، يرتااااح من الواقع العايشة ولو لساعات
ازل: بس چنت تگدر تشتغل وتكون نفسك بدون ما تلجأ لهيچ سوالف

باوع علية ضحك ودنگ يكرز

ازل: والله شبيك
منذر: لو محتويني جدچ مثل ما احتوى عواد وربا وكبرة وخلاه يدرس ويوصل، چان هسه اني بمكانة

استغربت كلامة

ازل: ليش حبيبي، شعايزك انتة وتقارن نفسك بعواد، رغم كلشي تعبت علة نفسك وگدرت تبني حياة من الصفر
منذر: لا ازل، جدچ وعمامچ محتووني، وابوية هم كلب ابن سطعش كلب دمر حياتي وحياة امي

شفت عيونة دمعن، حسيتة احتصر من ذكر اسم ابو

گمت حضنتة وطبعت بوسة على خدة

ازل: اني اصيرلك كلشي، بس تبطل من الشرب، الحرام يغرگك وانتة متحس

يتبع...
كلش اتونس من اقرة تحليلاتكم
چثرو بعد بيتي😁