The Rope (Own Creation)

Part - 23 (Unicode)

ဧကန်တွင် သန့်၏ Laptop Screen ပေါ်၌ နှစ်ယောက်တွဲ Couple ပုံက နေရာယူထားဆဲပင်။

......................................................

ဆယ်တန်းစာစစ်နောက်ဆုံးနေ့ ဖြစ်သဖြင့် ကျွန်မတို့ စာစစ်တစ်သိုက် ပုသိမ်Ocean သို့ အတူသွားဖြစ်ကြလေ၏။

Ocean အတွင်း လှည့်ပတ်ရင်း ဘေးမှ စီနီယာအစ်မမှ လက်ကုတ်လာလေ၏။

အစ်မ - " ဟဲ့ သန္တာ ဟိုမှာကြည့်စမ်း... "

အစ်မ မေးငေါ့ပြသည့်ဘက်သို့ ကြည့်လိုက်လေရာ အပြာရောင်ပါတိတ်ဝမ်းဆက် ကို ဝတ်ထားသော အမျိုးသမီးတစ်ဦး...

ကျွန်မကို ကျောပေးထားသော်လည်း ရင်းနီးနေသော ထိုအငွေ့အသက်ကို ကျွန်မ မှတ်မိပါသည်။

အစ်မ - " အဲ့ဒါ သန့်ကြယ်စင် မဟုတ်လား... ဓာတ်ပုံသွားရိုက်ကြရအောင်လေ... "

အစ်မက ပြောပြောဆိုဆိုဖြင့် ကျွန်မလက်ကို ဆွဲခေါ်လေသည်။

ကျွန်မ မသိလိုက်မီမှာပင် အစ်မ၏လက်ကို တွန်းဖယ်လိုက်မိလေသည်။

ကျွန်မ - " အစ်မဖာသာသွားရိုက်ပါ... ကျွန်မ မလိုက်ချင်ဘူး... "

အစ်မ - " ဘာလို့လဲ သန္တာရဲ့... သန္တာ သူ့ကို ကြိုက်တယ်မဟုတ်လား... သန္တာ့ဆီမှာ သူ့ရဲ့လက်မှတ်ပါတဲ့ စာအုပ်တွေတောင် ရှိတဲ့ဟာကို... "

ကျွန်မ - " အဲ့လိုဆိုပေမယ့် အခုလိုကြီး သွားမရိုက်ချင်ဘူး... "

အစ်မ - " ဒါဆိုလည်း နေပါစေတော့... "

အစ်မကို ချော့မော့၍ ထိုအနားမှ ဆွဲခေါ်လာလိုက်လေ၏။

ပြောမရဘူးလေ... ကျွန်မကို မြင်ပြီး သန့်အတွက် စိတ်အနှောင့်အယှက် ဖြစ်သွားလျှင် ဘယ့်နှယ့်လုပ်ရမလဲ...

ထိုသို့ အတွေးဝင်နေစဉ်ပင် ဘေးနားက ဖြတ်သွားသော ကောင်မလေးနှစ်ယောက်ထံမှ တီးတိုးသံကြားလိုက်ရလေ၏။

"ဟိုမှာ သန့်ကြယ်စင် မလား... ချောလိုက်တာ... ဓာတ်ပုံသွားရိုက်ကြရအောင်... " တဲ့လေ။