دجى الليل الجزء الثالث - شهابٌ قاتم كاملة

تنويه ولمحة عن الأحداث القادمة

ازيكم عاملين إيه.. يارب تكونوا كلكم كويسين وبخير.. معلش أنا كاتبة رغاية بس بحب ارغي معاكم فاستحملوني شوية 😥😥

أنا أولا عايزة أنوه كده عن حاجة لأني مبحبش أسرح بعقول القراء او محترمش تفكيرهم

الرواية هتاخد منحنى غريب شوية.. ناس هتشوفه مط وناس هتشوفوا تطويل بس أنا مش هاينفع أنقل الرواية اللي بتتكلم ومركزة على مريض نفسي نقلة سريعة من واحد شكاك (عنده شوية بارانويا) وسيكوباتي لواحد كيوت ولذيذ وبيضحك وبيحب وبيستجيب للتغير والعلاج!

لازم علاقة فيروز وشهاب تبدأ تاخد منحنى تاني، يحصل تأسيس وترسيخ للعلاقة من أول وجديد وكأنهم بيتعرفوا على بعض من أول وجديد..

شهاب هيحبها اه وهي هتحبه.. (حرق على فكرة بس اشطة انا مشهورة إني بحرق رواياتي 😂😂)

بس ازاي هيجي حب واحد شكاك وشايف الستات كائن استغلالي معندوش قدرة على الحب في ثواني ولا في اربع فصول؟! كده حرفيا يبقى اسمه سلق بيض واستهزاء بعقل اللي بيقرا وعدم احترام لذكاء القارئ والكلام مش هيبقى مقنع! 

وازاي واحدة بحبها لجوزها اللي مات ومعرفتها للجرايم اللي شهاب عملها وشخصيته الوقحة بالنسبالها وهي من الشخصيات الملتزمة ومعرفتها بأنه مريض والكذب عنده حاجة كده لا تتجزأ من شخصيته هتحبه وتقبله.. لو قلبت الرواية في كام فصل وجبت الحب الرومانسي اللي ما بينهم مش هيبقى مقنع.. 

مش فيه ثقة يا مليجي.. فين الثقة؟ 😂😂😂

تقريبا .. تقريبا يعني.. ظهرت أغلب الشخصيات وفيه شخصيتين أو تلاتة لسه مظهروش بشكل واضح! 

هنبدأ بقى في العلاقات والأحداث وتطورها..

الرواية دي طويلة غير باقي رواياتي ومش عايزة استعجل فيها لأن لو حصل مش هيبقى الكلام مقنع خالص لمريض زي شهاب! 

طيب دلوقتي فيه نوعين من القراء.. قارئ بيملى فراغه وشده العلاقة بين شهاب وفيروز وحابب الرومانسية وعايز يدور على علاقة مختلفة يقراها وخلاص

ونوع تاني حابب الشخصيات عموما وبيفصفص الأجزاء وردود الأفعال وعقله بيشتغل في حتة تانية بعيد عن التسلية وخلاص! وبيهتم بالجانب النفسي وطرق العلاج والكلام التقيل ده..

أنا محترمة عقل الاتنين وتفكيرهم وتفضيلاتهم بس أحب أوجه رسالتين للنوعين

القارئ الأولاني : علشان تصدق الرومانسية والحب وتتقبل العلاقة لازم تتبني على منطق برضو ومواقف قوية فمعلش استحمل معايا العشر فصول أو الخمستاشر فصل الجايين..

القارئ التاني: بذمتك ودينك، شهاب وفيروز بشخصياتهم هيحسوا بالحب ويعترفوا بيه كده في ثواني؟! لازم فصفصة للعلاقة وعواميد مسلحة علشان يوم ما حد يقول للتاني بحبك تبقى مقتنع!! عارفة إن النوع ده هيصدق بسهولة كلامي ويقتنع بيه..