♥تزوجتها من أجل أمي♥(باللهجة الجزائرية)

حلقة28#

بعد مرور شهرين:
فاتتو شهرين على حمل أروى و تغيرو بزاف حاجات ولات حساسة بزاف و من أبسط الحاجات تتغشش فيساع .... علاقتها بسيف قاعدة و تتحسن زيد لوحم جاها عليه علابيها ولات متعلقة بيه أكثر ..... تعلقت أكثر بعائلتها الحنان الي كانت تحوس عليه عندها سنين دوكا وين حست بيه و هوما تاني تعلقو بيها ولاو يحبوها بزاف .......... بالنسبة لسيف فهاذو شهرين كثرت عليه الخدمة رجع لشخصيتو لقديمة شخص البارد ،الغامض مي ولا مهبول بأروى يستنى غير وقتاه يفض نهار باش يروح يشوف أروى بالنسبة ليه كيشوفها ترجع ليه الروح فقرر يصلح كلشي و يقربها ليه أكثر ...

..................
سيف و شهاب قاعدين في صالون يلعبو بالپلاي و أروى لفوق في شمبرتها و عيشة طيب في العشاء

عيشة: سيف و شهاب إيجاو تعشاو و أنا دوك نروح نعيط لأروى
سيف: لا خلي عليك دوك أنا نعيطلك

طلع سيف يعيطلها لقاها تقرأ في كتاب
سيف: فاش تعمل
أروى: ياخي ماكش ترى فيا شنعمل ( تهدر معاه و تخزر في الكتاب)
سيف: قصدي واش إسمو لكتاب
أروى: حاجة متخصكش ديجا واش تسحق
سيف: هيا نهبطو نتعشو
أروى: هيا
هبطو تعشاو و كملو ....من باعد لمو الطابلة و غسلو لماعن .... و طيبو التاي و حطو معاه المكسرات و البقلاوة وراحو لصالون يضحكو و يڨسرو من باعد كل واحد شد بيتو

...........
أروى: و دوكا واش نعملو
سيف: ههه نرقدو
اروى: وأنا مانيش نعسانة
سيف: حطي راسك على المخدة دوك ترقدي يا لالة و دوكا تصبحي بخير غدوة نوض بكري مانيش كيفك نصبح راقد ( وراح تسطح فوق البونك و حط لمخدة فوق راسه و رقد )
أروى: اففففف ( تبعاتو و راحت تسطحت فوق البونك ... وبقات تحرك يمين يسار فماش ميجيها نوم شي ولات رقدت على ضهرها و غمضت عينيها و بقات تتخيل في روحا مع سيف في البحر و بنتها و لا ولدها يعيطلها ماما هيا في أحلامها و تسمع صوت الرعد كانت دنيا شتاء و معإنها هيا تخاف من صوت رعد خافت عنقت سيف بكل قوتها شي زيد سمعاتو مرة أخرى زادت خافت أكثر ولات تبكي .....

سيف
كنت راقد في سابع نومة غير نحس في حاجة معنقتني حليت عيني لقيتها أروى إستغربت ماشي من عوايدها تعنقني تجاهلتها و رجعت رقدت ...... زادت عنقتني بأقصى قوتها و لات تبكي أنا هنا تفجعت قلت كشما صرالها نضت مفجوع

أنا: أروى شبيك عمري واش يوجع فيك
أروى:(تبكي): والو
أنا: إيمالا علاش تبكي
أروى: خفت
أنا: (عنقتها ): متخافيش عمري هاني معاك.. صحا قوليلي علاه خفتي
أروى: صوتو خوفني
أنا: صوت شكون
أروى: صوت الرعد
أنا: هههههه ياعمري على ضغيرونتي الخوافة و دوكا هيا أرقدي مدامك معايا معندك من واش تخافي فهمتي
أروى: إيه
هههههههههههه حيرتني طفلة خافت من صوت الرعد ههه يعني كيتجيب أروى البيبي باش ترصيلي نعاني في زوج ماشي وحدة عنقتها و خليتها مارقدت هيا باش رقدت

..........
غدوة من داك
ناض سيف صباح ملقاش أروى بحذاه هو في تخمامو و تخرج من الدوش
أروى: واش مازالك راقد
سيف: كسبا نايضة بكري ماو لباس
أروى: أولا ناس تصبح نقول صباح الخير ساح
سيف: كي تقوليها نتي نقولها
أروى: اممم.
سيف: ماكش باش تقوليلي علاه نايضة بكري
أروى: يا متقليش نسيت
سيف:و هيا كاينة حاجة من اصلو حتى ننساها
أروى: يا ولله نسيت
سيف: اروى متكفرنيش على صباح و قوليلي واش ناسي
أروى: اممم ليوم نعرفو Sexe du bébé
سيف: (ناض من بلاصتو بزربة): يا قول ولله
أروى: امم ولله
سيف: علاه مقلتليش
أروى: قلتلك

...........
هبطو فطرو و كملو وراحو ركبو فلوطو و طول طريق وهوما ساكتين
أروى: ياخي باش تبقى ساكت هكا
سيف: زعما شيطلع الصغير طفل و لا طفلة
أروى: طفلة
سيف: الي يجي منك كالعسل
أروى: امممم
.................
وصلو لطبيبة و قعدو يستناو في دالتهم حتا جاتهم الفرملية و قالتلهم تفضلو
دخلو للطبيبة و سيف دوب ماشافها تصدم عينيه ولاو حمورة و عرق ولا يصب معاه مام طبية كيشافاتو إستغربت مي حاولت تبين لاباس
الطبيبة: هههه سيف شجابك لهوني
أروى استغربت كيفاش تعرف سيف
أروى دارت لسيف و قاتلو : تعرفو بعضاكم
الطبيبة: هههه سيف هادي مرتك ياك
أروى: سيف شكون هاذي تعرفها
سيف ملقا ميقول: لا منعرفهاش
أروى: كي عدت متعرفهاش وعلاه لونك تخطف هكا
الطبيبة: لا عاد متقليش متذكرتنيش ياخي هاذي( تشير بصبعها لأروى) نساتك فيا اومبليس نساتك في العشرة الي بناتنا الي دامت تقريب 10 سنين ياك
أروى: سيف قتلك شكون هاذي
سيف: أروى هيا نروحو
اروى: مانيش متحركة من هوني لتقلي هاذي شكون
راح حكمها من يديها و خرجها معاه بسيف
الطبيبة: هههههههههه ( ضحكة خبث): ودوكا جيتني وحدك برجليك الا منقلبلك حياتك جحيم

...............
أروى: سيف وين رايحين وشكون هاذيك الطبيبة وعلاه كي شفتها وليت هكا ياخي شكوني........ قاطعها
سيف:(بالعياط): اسكتي اسكتي صااااااس مانيش نقصاتك نتي تاني افففففف هاذيك طبيبة مبقيتيش تروحيلها و دوكا نروحو لطبيبة أخرى
أروى خافت منو مبغاتش تزيد تهدر معاه أكثر بعد ماشفتو كيفاه هايج هيجان

............
الفارملية: تفضلو الطبيبة تستنا فيكم
دخلو و قعدو يهدرو معاها ( شوفو كان غلطت في حاجة اسمحولي ولله راني منفهم والو في الطب )
الطبيبة: ارواحي مدام معايا
راحت معاها أروى رقدتها فوق سرير و عرتلها على كرشها و دارتلها produits و شعلت الجهاز باش تعرف جنس الولد هيا شعلاتو ولونها تخطف الطبيبة ولا لونها أصفر كي كعبة الحامض

أروى: طفلة ولا طفل
سيف: أنطق شبيك ساكتة متفجعيناش وجهك ميبشرش بالخير
طبيبة: ........

Stooooop

1: لبنات يعني شكون الطبيبة الأولى الي راحولها؟
2: و واش شافت الطبيبة الثانية حتى تفاجئت هكاك
تفاعلو نكملها