أخر أيام الحب

الحلقه الخامسه عشر

رقيه لسه قاعده مكانها بتبص لشهاب: هو يوسف ليه اتغير كده..؟
شهاب كمان كان مصدوم شويه لأنه متوقعش أن دي طريقته اللي هيكلم بيها رقيه: رقيه يوسف مخلص جامعه من سبع سنين مش من سبع ايام..
رقيه عينيها لمعت: ولو... برضه متوقعتش ده.. علي الأقل كان هيتكلم عادي زي الصحاب حتي لو مفيش حب.. لكن هو كان عنيف وكأنه مش طايقني..
شهاب: ما اللي انتي عملتيه زمان مش شويه يا رقيه..
رقيه: ده كان زمان وماضي يا شهاب والحاضر بيختلف في كل حاجه.. وبعدين انا مكملتش مع جوزي وأتطلقت في اقل من سنه..
شهاب: بصي انتي معاكي حق في حاجه.. يوسف علي الأقل كان ممكن يعاملك زي الصحاب وبما أنه طريقته عنيفه فده معناه أنه احتمال يكون بيعاقبك علي اللي انتي عملتيه زمان وده معناه أن لسه في باب موارب في علاقتكم.. هيتفتح بس مش بسهوله.. هو أنتي لسه بتحبي يوسف؟
رقيه: يوسف مينفعش محبهوش..
شهاب: تمام ربنا يقرب البعيد.. وأتطمني من حاجه.. يوسف محبش ولا أرتبط بأي واحده من بعد ما سابك.. ده معناه أن لسه جواه حاجه ليكي.. وشطارتك انتي تطلعيها ده بقه..
بقلم/ إيمووو

الأيام مرت ويوسف فضل أكتر من 3 شهور مش بيعمل حاجه في شغله غير أنه شغال علي الموضوع ده.. مره ييأسوا ويرجعوا تاني وامل جديد ويفقدوه لحد ما الفلوس فعلا قدرت ترجع لصحابها وطلعوها من البنك ويوسف خد نسبه وخد عليهم 10 ملايين كمان مكافأه ليه من صحاب المال لأنه أكتر واحد بذل مجهود وتعب معاهم..
يوسف قال لمريم وهي مش فرحانه بأي حاجه غير بس أن يوسف فرحان وبيحقق اللي هو عايزه.. هي مش محتاجه من الدنيا اكتر من فرحته دي..
خلال التلات شهور اللي مروا ورقيه بتحاول بكل الطرق انها ترجع يوسف من تاني او تقربه منها وهو فاهم حركاتها دي ومش في دماغه نهائي وقالها طالما الموضوع خلص ياريت متكلمنيش تاني..

يوسف ساعد سيد صاحبه وأشتراله شقه وكتبها بأسمه وعربيه وحطله حساب في البنك عشان تكاليف جوازه لان البنت اللي بيحبها كانت هتضيع منه ويوسف مقدرش يقف يتفرج علي صاحبه لسبب واحد هو أنه ميقدرش تحت اي ظرف أنه يبعد عن مريم.. وسيد قاله أن ده وعد ودين عليه وطبعا يوسف سابه براحته يقول اللي يقوله ويعمل اللي يعمله لأنه عارف أخلاقه..
شهاب كان ليه نصيب 2 مليون من العمليه اللي تمت دي لكن ضيعهم في ثانيه في البورصه وعلي النسوان ورجع يعيط ليوسف وبعد محاولات كتير يوسف أشتراله هو كمان شقه وسلفه مبلغ قليل بحيث يقدر يقف علي رجليه..
محمود هريدي كان خلص ادوار الشركه كلها بنايه وبدأ بالشغل من جواها وكذلك اشتروا اراضي في مناطق سكنيه مشهوره بحيث أنهم يعملوا عليها عقارات للشركه..

مريم كانت خلصت الترم الأول في سنه تالته والنتيجه ظهرت وكالعاده كانت الأولي بتقدير امتياز ويوسف خدها لأرض المهندسين وكان مغمض لها عينيها وأول ما نزلت من العربيه شال الضماده من علي عينيها وهي أتفاجأت بالأرض الكبيره جدا اللي هي واقفه عليها ومستغربه ايه ده.. بصت ليوسف اللي حط دراعه علي كتفها بحب: ايه رأيك يا موزتي..؟
مريم: رأيي في ايه؟
يوسف: الأرض دي بتاعتي.. وهبني عليها برج هنا، طبعا هيكون في مهندسين هي اللي هتخطط وهتبني بس انا حابب يكون لينا هنا شقه خاصه بينا.. شقه طريقه تصميمها وبنايتها تبقي مختلفه عن نظام البرج كله..
مريم بصوت له بحيره: هو انا ليه مش فاهمه حاجه.. برج ايه وشقه ايه؟
يوسف ضحك وقعد معاها تحت شمسيه عشان الجو كان حر وجه الحارس اللي علي الأرض رحب بيه وجابلهم اتنين عصير تفاح ساقع ويوسف بص لمريم: عمري ما حبيت نظام الڤيلل ولا كان طموحي أن يبقي عندي ڤيلا.. بس كان نفسي دايما أختار شكل ونظام وكل حاجه في شقه كبيره مع اللي قلبي يختارها.. ودلوقت أقدر أعمل ده.. تعالي انا وانتي نرسم البيت اللي حابين يكون عندنا..
مريم كان قلبها طاير من الفرحه.. مش متخيله كل ده.. هي موافقه تعيش معاه في أي مكان هي أصلا حبت البيت الصغير اللي عايش فيه وجملته وحست أن بيتها هي واكتر مكان بترتاح فيه..يوسف شافها وضحك: عارف والله أسطوانه كل مره انك مش عاوزه حاجه والبيت الصغير ده عاجبك وإن مهما حصل هيفضل البيت ده أغلي مكان علي قلبك وكل حاجه.. وعلي فكره انا اشتريته عشانك بعد ما كنت مقرر اني هكتفي بيه أيجار عشان اشتري شقه تانيه وانتي اللي منعتيني.. وصدقيني هو برضه غالي عندي جدا ولا يمكن أتنازل عنه.. بس انا حابب نصمم بيتنا سوا حابب يكون في بيت محطوط فيه كل تفصيله احنا عايزينها مع بعض.. حاجه خاصه بيا انا وانتي وبس.. خاصه بحب مريم ويوسف..
مريم ضغطت علي ايديه بحب ويوسف باس ايديها وغمزلها: فاضل ٨ شهور وأربع أيام وهندوق العسل...!
مريم انكسفت: يوسف...!
يوسف: انتي فهمتي ايه؟ انا قصدي نقضي شهر العسل..
مريم ضحكت وهي كمان كانت منتظره الفتره دي تعدي بفارغ الصبر وكانت بتعدلها اكتر منه.. يوسف حبيبها كانت عايزاه جوزها.. بتحلم باللحظه اللي هتلبس فيها الفستان الأبيض ويزفوها عروسه علي بيته.. عروسه لعشقها وحبها الوحيد.. للشخص اللي كان طوق نجاه بالنسبه لها وعيشها أجمل مشاعر اللي مكنتش تتخيل انها ممكن في يوم تتبدل حياتها كده علي ايديه..
يوسف ومريم فضلوا أكتر من ساعه يضحكوا ويهزروا وهما بيتخيلوا شكل بيتهم من حيث البنايه والتصميم والأثاث والديكورات وكل حاجه ويوسف وعدها أنه هينفذ البيت ده..
وقالها برضه أن في مفاجأه كبيره جدا مستنياها أول ما تخلص جامعه وطبعا كان قصده علي الشركه اللي يدوب هتخلص وتبقي جاهزه بعد سنه..
مريم كانت هتموت وتعرف ايه هي بس هو رفض نهائي وهي توقعت انها العربيه اللي وعدها يجيبهالها..
بقلم/ ايمووو