ပြိုင်ဘက်ကင်းဆေးနတ်ဘုရား(Part-2)

VOUS LISEZ

Fantasy

(ပြိုင်ဘက်ကင်းဆေးနတ်ဘုရား) ချင်ယန်ကျိဟာ သစ္စာဖောက်တစ်ယောက် လက်ချက်ကြောင့် သေဆုံးခဲ့ရတယ်။အရာအားလုံးပြီးဆုံးသွားပြီလို့ ထင်ရပေမဲ့ တကယ်တမ်းမှာတော့ မပြီးဆုံးခဲ့ပါဘူး။ သူဟာ ယီယွမ် လို့ခေါ်တဲ့ သူဋ္ဌေးသား တစ်ယောက်ရဲ့ ခန္ဓာကိုယ်မှာ ပြန်လည်နိုးထအသက်ဝင်လာခဲ့ရ...

#action #alchemy #myanmar #reincarnation #translation

Chapter 274

Depuis le début

par @PhyoeThuWin

အကယ်၍ စင်းချန်ကသာ တတိယအဆင့်ကို ကျော်ဖြတ်နိုင်ခဲ့ခြင်း မရှိခဲ့လျှင် သူက ကျန်းကျင့်ကဲ့သို့ တံခါးပိတ်လေ့ကျင့်ခန်း ဝင်ရောက်တော့မည် ဖြစ်၏။

စင်းချန်က သူနှင့်အတွေး တူညီနေသောသူများ အများအပြား ရှိနေခဲ့သည်ဟု ယုံကြည်ပေသည်။ သူတို့ထဲတွင် ထျန်းယွီကိုယ်တိုင်လည်း ပါဝင်ပေ၏။

ယီယွမ်က ထင်ရှားကျော်ကြားသူ
တစ်ယောက် ဖြစ်လာရမှုကို သူ၏စိတ်ထဲတွင် ဂုဏ်ယူဝံ့ကြွားမှု တစ်စက်ကလေးမှ ဖြစ်ပေါ်လာခြင်း မရှိပေ။ အဘယ်ကြောင့်ဆိုသော် ဤအရာက သူ့အတွက် စကားထဲထည့်ပြောနေရမည့် ကိစ္စတစ်ခုမဟုတ်ပေ။

သူ၏ပါရမီဖြင့်ဆိုပါက အဆင့်နိမ့်နယ်မြေ၏ သေးငယ်သော အဖွဲ့လေးတွင် လူအများ၏ အာရုံစိုက်မှုကို မရရှိခဲ့လျှင်ပင် ထိုအရာက ကြီးမားသော ကျရှုံးမှုတစ်ခု ဖြစ်ပေသည်။

စတုတ္ထအဆင့်ပြိုင်ပွဲတွင် ယီယွမ်၏ ပြိုင်ဖက်ကလည်း ဓားပညာကျင့်ကြံသူ တပည့်လေးတစ်ယောက် ဖြစ်ပေ၏။ ထိုတပည့်၏ ခွန်အားက ကျန်းကျင့်ထက် ခွန်အား အများကြီးနိမ့်ကျပေသည်။ ရလဒ်က ပြောနေစရာပင် မလိုအပ်ပေ။

စတုတ္ထအဆင့်ပြိုင်ပွဲမှ စတင်၍ ထိပ်ဆုံးလက်ရွေးစင် လေးယောက် ပေါ်ထွက်လာသည့်အချိန်အထိ ပြိုင်ပွဲအဆင့်တိုင်းတွင် ကျရှုံးသွားကြသော တပည့်များ ကိုယ်စီကိုယ်ငှ ရှိနေခဲ့ပေ၏။

တိုက်ပွဲအဆင့်လေးခု ပြီးဆုံးသွားပြီးနောက် နေ့တစ်နေ့
ကုန်ဆုံးသွားခဲ့ပေသည်။

ဒုတိယနေ့တိုက်ပွဲက အလွန်အရေးအကြီးသည့် တိုက်ပွဲဖြစ်၏။ အင်အားနိမ့်ကျသော တပည့်အားလုံးက ပုံမှန်အားဖြင့် ပထမဆုံးရက်တွင် ထွက်ခွာသွားခဲ့ရပြီ ဖြစ်သည်။ ကျန်နေရစ်သောသူများ အားလုံးက တပည့်များတွင် လက်ရွေးစင်များ ဖြစ်ကြ၏။

ဒုတိယနေ့တွင် တိုက်ခိုက်ကြသော တိုက်ပွဲများမှာ အားလုံးနီးပါးက သန်မာသူနှင့် သန်မာသူတို့ ရင်ဆိုင်တွေ့ဆုံရခြင်း ဖြစ်သည်။ ထိုသို့သော ယှဉ်ပြိုင်ပွဲတစ်ခုက ပုံမှန်အားဖြင့် စောင့်ကြည့်ရသည်နှင့် ရာခိုင်နှုန်းပြည့် ထိုက်တန်လှပေ၏။