حكايات بلون الورد 🌸

#21🌸

- وهو إيه الحب من أول نظرة ده يا خال ؟
- بالك يا والا الحب من أول نظرة ده عامل زي الخضة حاجة أكده مكنتش عامل لها حساب ولا ترتيب تقوم إيه مرة واحدة أكده تلاقيك اتشنكلت في نظرة في ضحكة في شخص واحد بس ومستحيل مستحيل تتكرر مرتين.
- يا سلام يا خال ده أكيد حاجة حلوة جوي.
- جوي جوي يا ولد خيتي.
- وعلى أكده يا خال أنت أتجوزت مرات خالي أم ورد عن حب!
بص للسما وابتسم مسك كوباية الشاي وخد منها بوقين عدل طاقيته وراح بص في نن عيني وقالي
- من أول نظرة يا والد خيتي.
- أنا نفسي أشوفها أوي يا خال هي ليه مبتجيش عندنا البلد أهنه واصل نفسي أعرفها وأعرف ورد.
- هما واخدين على المدينة بالك أنا عرضت عليها تيجي بس لاقتها مش متحمسة وأنا عمري ما أقدر أفرض عليها حاجة واصل.
- ليه متقدرش؟
- مقدرش أشوفها متغصبة أبدًا حكمن أنا وعدتها من أول مرة واقفت على شاب لسه بيقاوح الدنيا زي محلتوش غير قلبه إللي دايب فيها إني عمري ما هغصبها على حاجة واصل.
- إزاي من أول نظرة يا خال؟
- بكرة تعرف إزاي يا ولد خيتي.
- وميتي بكرة يجي بجى.
الموبايل رن وعيونه لمعت بسعادة لما شاف أن مراته هي إللي بتتصل كلمته وبعدين بصلي وقالي
- أبسط يا والا مرات خالك عزماك عندنا.
- بجد بجد يا خال يااااااه دني موعاش عليها.
- جهز نفسك ومن بكرة الصبح نركب القطر.
مكنتش عارف أنام من الفرحة أخيرًا هشوف الست إللي خلت راجل زي خالي يسيب كل إللي وراه وإللي قدامه ويجري ورا ضحكتها ويطلب الرضا كنت شغوف أوي إني أشوفها وأكلمها وأتعرف على ورد .. اسمها حلو جوي وأكيد هي كمان حلوة جوي، طلعت الجلابية بتاعة العيد وهندمت شعري ولابست عليه الطاقية وشلت الشنطة إللي أمي محضرة فيها الزيارة وعلى المحطة عدل وصلنا وكنا العصرية بعد أما صلينا خدني ودخلنا على الشقة، أنا حاسس إني مش غريب حاسس إنهم شبهنا العفش والحيطان والريحة، خرجت ست زينة بحجاب طويل ووش بشوش وخالي عرفي عليها
- دي بقى مرات خالك يا أدم، وده أدم يا حبيبتي إللي ياما حكيت لك عنه.
ابتسمت للهجة خالي إللي اتغيرت قعدنا نتكلم يجي نص ساعة البيت هدوء باين إن مفيش غيرهم أهنه، استأذنت تخش تعملنا قهوة وخالي دخل معاها خدت راحتي على الكرسي من تعب السفر وكان ضهري للباب وفجاة سمعت تكة الباب بتتفتح ضيرت وشي بتلقائية وببساطة، وقعت .. وقعت في الحب.
كانت بنت جميلة ملامحها جميلة أنا شايفها أكده مع إنها عادية جدًا وبسيطة ابتسمت لي بود وقالتلي بعفوية
- أنت ادم مش كده؟
اتبرجلت
- وأنتي .. أنتي ست ورد!
ضحكت
- منور الدنيا يا أدم أُمال فين بابا وماما.
بصيت حواليا
- هما .. هما فين صحيح!
خالي جه وصوت  ضحكته سبقاه
- مالك يا أدم، شكلك مخضوض!
- أني أني لا أني كويس أهوه فين الشاي بصحيح؟
- القهوة تقصد؟
هندمت الطاقية
- آه صُح القهوة صُح.
ضحكوا، اتغدينا وورد عملت دور شاي ودخلنا نشربه في الفراندة إحنا الأربعة فراندة شرحة تكفي من الحبايب ألف على جدارها فل وياسمين وعلى ارضيتها ورد
- وأنت بقى يا أدم لسه مرتبطتش؟
سألتني مرات خالي أكده.
- أني لا يعني آه أقصد إني كنت مستني حاجة أكده.
- حاجة إيه؟
- حاجة خالي قالي عليها وبسببها همل العالم كله لجل شخص.
ابتسمت
- تقصد الحب من أول نظرة؟
بصيت على ورد خطف وحسيت برجفة رميت نظري لمرات خالي تاني
- ألا إيه الحب من أول نظرة ده يا مرات خال؟
بصت على خالي بحنين لذكرى سعيدة
- الحب من أول نظرة أنك متكنش عامل حسابك يا أدم تكون ماشي وعايش بتصارع الظروف والحياة وبتقاوح وفجاة توقفك نظرة تِجبرك أنك تغير خططك كلها عشانها.
ورد أتكلمت
- احكيله يوم ما قابلتوا بعض يا ماما.
- لا أبوكي بيحكي اللحظة دي أحلى مني.
بصيتله فباس إيدها وحكى بشغف عالي أوي
- كنت جاي هنا أدور على شغل أنت عارف البلد عندنا الشغل فيها مش قد كده نزلت من القطر شايل الشنطة على دماغي وديل الجلابية فسناني وهاتك يا جري عشان الحق البلدية إللي بيوزعوا الشغل وإللي زميلي دلني عليهم، بجري بكل قوتي مفيش حاجة فبالي غير إني ألحق استرزق فجاة خبطت في بنت .. بنت جميلة ملامحها هادية وتشبه البحر أي نعم مفيش كتب وقعت من إيدها شبه الأفلام، لكن لما عنينا اتلاقت عشان أعتذر لها حسيت أني لاقيت روحي ابتسمتلها وقولتلها بدون تفكير "أنا اسف يا هانم تتجوزيني .."
عيني لمحت ورد في اللحظة دي كانت مبتسمة جوي وعنيها مركزة على حركاته وهو بيتكلم بسعادة اعتدلت
- وبعدين يا خال؟
- هي تكمل بقى..
- وبعدين يا أدم حسيت قلبي دق بحب لأول مرة حسيت إني فاهمة الدنيا كويس وعارفة أنا عاوزة منها إيه؟
رديت على أعتذاره وقلت "ولا يهمك حصل خير .. وموافقة. "
- على بلاطة أكده يا مرات خاااال!
- على بلاطة كده يا أدم.
بصيت في الساعة كان الوقت أتأخر بصيت على ورد كانت بتبصلي فنفس اللحظة فاتبرجلت ونزلت عيني على الأرض ابتسمت وقومت من مكاني واستاذنت أروح كنت لازم أقعد مع حالي أفهم هو أنا حبتها بجد؟ ممكن يعني أسيب العالم كله لجل ضي عنيها؟
وصلت بيتنا وفضلت أسبوع فيه مبخرجش مبردش على حد وهيمان ومش عارف أني صابني إيه؟!
- يأما أني قررت قرار أكده.
- قرار إيه يا قلب أمك.
- قررت يعني إني هنزل أشتغل في مصر بيقولوا فيها رزق كَتير أنتي عارفة البلد أهنه الشغل فيها مش قد أكده.
- وهتقدر على الوحدة يا أدم أنت يا ولدي عمرك ما فرقتنا؟
- مني هشوف خالي وهروح وأجي عليكي.
- ربنا ينورلك طريقك يا ولدي.
جهزت شنطتي وديلي فسناني وعلى القطر عدل مقولتش لخالي وألا لأي حد غير أمي وبس، مكنش ينفع أكمل فالبلد أبدًا أنا روحي مش فيها ومش هقدر أعيش واتنفس وأكمل بعد ما لاقيك إللي لاقيته هناك ورغم إني مش هشوفها كل يوم لكن هكون بالقرب، وهتونس بيها، القطر أتعطل في الطريق والوقت قرب يفوتني شلت الشنطة على دماغي وديل الجلابية في سناني وهاتك يا جري عشان ألحق البلديه إللي بيوزعوا الشغل بجري بكل قوتي مفيش حاجة فبالي غير إني ألحق أسترزق فجاة خبطت في بنت .. بنت جميلة ملامحها هادية وتشبه الورد أي نعم مفيش كتب وقعت من إيدها شبه الافلام، لكن لما عنينا اتلاقت عشان أعتذر لها حسيت إني لاقيت روحي من تاني ابتسمتلها وقولتلها "أنا اسف يا هانم تتجوزيني .."
- ولا يهمك حصل خير .. وموافقة.
- على بلاطة أكده يا ورد؟
- على بلاطة أكده يا أدم.

« ثمة أحلام وردية قُدِّر لها أن تُعاش »
#حكايات_بلون_الورد (٢١) 🌸
#آية_علي