وإن كان بعدك شيء متقدر خدني معاك.. 🎵
- بتعيطي ليه دلوقت؟
- يا أدم خدني معاك يا أدم.
- يا وردتي مينفعش أنا رايح سفرية تبع الشغل.
- مش أنا بقيت مراتك على الورق دلوقت؟
- اها.
- خلاص خدني بقى.
- مش هينفع طب إزاي هعاكس البنات وأنتِ معايا.
خبطته في كتفه
- أنت بتقول إيه طب منتش مسافر بقى وريني هتتحرك من هنا إزاي؟
قعدت قدام الباب وسديت الطريق وهو كان فصلان ضحك بيضحك على إيه ده مستفز بجد.
- يا ورد الأتوبيس هيفوتني.
- مش هينفع لاء.
- يا حبيبتي ده شهر مش كتير وهجيبلك حاجة حلوة وانا جاي.
- سلسة فضة فيها دلاية مكتوب جواها بحبك بـ ١٠٠ لغة؟
- من عنيا حاضر عديني بقى.
- لاء معندناش رجالة تسافر وتسيب حريمها لاء.
- يا روحي هو أنا بعمل كل ده ليه مش عشان نتجمع في بيت واحد.
- أمتى بقى يا أدم؟
- أهو منا هسافر عشان كده هطلعلي بقرشين حلوين ونقدم ميعاد الجواز؟
- بجد بجد.
- أيوة يا روحي.
- يعني مش رايح تكلم بنات؟
- يا بنتي عيوني مبتصنفش غيرك بنات أصلًا.
- ولا البنت الملزقة إياها؟
- ولا البنت الملزقة إياها.
- أُمال مين إللي كان بيقول هيعاكس بنات ده؟
- مين ده إيه الرجالة الخاينة دي؟
- يعني بتحبني؟
- قد غيرتك عليا بالظبط.
- يبقى بتحبني.
- طب إيه هتسبيني أعدي؟
- أنت رايح فين؟
- يا نهاري هسافر عشان الشغل.
- وفي هناك بقى بنات على كده؟
رمي الشنطة من إيده وقعد جمبي على الارض واستربع
- خلاص أنا هقعد منيش مسافر.
- بجد.
- أيوه عشان تطمني.
- بس يا أدم ده شغلك!
- لا مش مهم أنتِ أهم.
- بس عشان نتجوز بسرعة!
- يا ستي في العجلة الندامه إللي أتجوزا خدوا إيه يعني؟
ضيقت بين حواجبي
- أنت بتقول إيه؟
- إيه لا وألا حاجة قومي اعمللنا حاجة ناكلها؟
- قوم أنت على شغلك معندناش رجالة تسيب شغلها وتقعد جمب حريمها لاء.
- يعني أقوم أسافر؟
- آه قوم.
- متأكدة؟
- أنا عمري عمري ما أعطلك عن مستقبلك أبدًا.
وقف بنشاط وشال الشنطة
- طيب يا حبيبتي الحمد لله عديني كده بقى عشان الحق الجروب نسافر سوا.
- والجروب ده فيه بنات على كده؟
- يووووه.
سبته يمشي أصلًا هو حر إيه يعني لما اقعد شهر مشفهوش وإيه يعني إني اكلمه أقل عشان هو هيكون مشغول وإيه يعني لما يكون معاه بنات .. بنات دنتا يومك مش فايت يا أدم.
اتصلت بيه
- أنت فين دلوقت؟
- لسه طالع من باب العمارة حالّا!
- وفي بقى عند باب العمارة ده بنات؟
- أنتِ مخك فين يا بنتي أنا تحت عمارتكم ملحقتش أتحرك.
- طب تبقى تكلم بنات يا ادم.
- والله يا قلبي أطمني أنا برضو تعرفي عني كده.
- متثبتنيش.
- ده أنا ريقي نشف لحد ما وافقتي عليا تفتكري أفرط فيكي كده؟
- لا يا أدم أنت حد كويس.
- ده أنا من ساعة ما شوفتك وأنا صايم عن كل تاء مربوطة.
- خلاص يا أدم متزعلش.
***
- مش عارفة إيه الغيرة دي أنا عارفة إنه بيحبني أنا بس، طب ليه عايزة اخبيه من كل العالم جوه عيوني ومحدش يشوفه غيري، عمري ما شوفت الغيرة قلة ثقة أو خنقة يعني فيها إيه لما أختار شخص واحد بس واتمناه يكون ليا لوحدي ميضحكش لحد غيري ولا يبص لحد غيري ولا يهزر ولا يفتح حوار ولا يرد ولا أي حاجة مع حد غيري هو إيه الخنقة في كده ؟
- ده كتر خيره أدم أصلًا.
- يا ندى والله ده حب يعني عارفة لولا إنك أقرب صاحبة ليا أنا مكنتش حكيتلك على الكلام ده لإني بغير حتى من إن سيرته تيجي على بال حد غيري.
- وليه هو بالذات؟
- مش عارفة معنديش سبب مقنع يعني غير إني حاسة إني بنتمي له، تكملته وبقية روحه، هو الشخص الوحيد إللي حسيت من أول ما شوفته إني لاقيت الجزء الضايع مني من زمان.
- بس لازم متبقيش كده عشان ميتخنقش.
- إيه إللي يخنق في كده أنا لو هو خباني من العالم كله أنا هوافق أنا أصلًا من ساعة ما شوفته وأنا مش شايفه راجل غيره.
- لازم تتحكمي في نفسك شوية يا ورد.
- ماشي.
