بين جلدٍ للبوح وتأنيب على المبيح، المصاب بضميره لا يستريح.
- أنا بدور على حد يفهمني طبعًا مقصدش إن مفيش حد بيفهمني بصي أنا أقصد إن في خانة فاضية فقلبي عايزة تتسد قطعة بازل يعني مفقودة مش معني كده إني معنديش حاجات كتير حلوة و..
- تقصدي إنك مش مكتفية؟
- لا مقصدش أقصد إني في حاجة مش موجودة بس مش معنى كده إني مش مكتفية لا يعني أقصد أقصد .. أنتي فهماني؟
- مش أوي أنا اتأخرت بقى ولازم أمشي..
سابتني ومشت بعد ما بان على تعبيرات وشها الزهق.
أنا ورد آه عارفة إنكوا عارفيني بس متعرفوش حكايتي أنا بحاول أشرحها للي حواليا بس محدش فاهمني أو أو يمكن أنا بقيت صعبة ..
- ماما أنا إنهاردة قابلت ندى حكيت لها حاجة عن شعوري بس حاسة إنها مفهمتنيش بصي أنا كنت أقصد إن مفيش حاجة ناقصة بس في حاجة مش موجودة.
- هاه بتقولي إيه يا ورد؟
- بقول إني .. بصي يا ماما أنا هروح أقول لندى إني قلتلك إني حاسة إنها مش فهماني؟
- أنا كمان مش فاهمه؟
___
- ندى أنا كنت واقفة مع ماما في المطبخ وبعدين قولت لها إني كلمتك بس أنتي مفهمتنيش.
- أنا آسفة بس شرحك صعب يمكن!..
- لا مش بقولك عشان كده بس، لكن مش بقدر أجيب سيرة حد من غير ما أعرفه بقالي فترة كده..
- هو أنتي جيبتي سيرتي في حاجة وحشة؟
- لا والله عمري ما عملت كده؟
- تمام ورد أنا مش زعلانة هشوف بابا عاوز إيه مع السلامة.
- ماما هو أنا عملت حاجة غلط أنا بخاف أجيب سيرة حد وهو مش موجود.
- سيرة إيه يا ورد؟
- إيه؟ أنا هروح أصلي..
- يا رب هو الضمير ممكن يأذي صحبه يعني ليه يا رب كل تحرك بتحركه كل كلمة بنطقها بجلد نفسي عليها حتى لو كلمة عادية وده بيكون في الأغلب بخاف توجع إللي قدامي وحتى الأفكار يا رب إللي بتيجي في مخي لو فكرة خير ومقدرتش أنفذها بجلد نفسي ولو فكرة وحشة وبرضو منفذتهاش بجلد نفسي أكتر إنها جت في مخي يا رب هو ده أحسن أني أكون كده؟ أنا مكنتش كده أنا من ساعة ما عرفتك بقيت بخاف وضميري صحي أوي أوي يا رب أنا بتحسس من نظرة مقصدهاش فتجرح إللي قدامي فتشوفني مذنبة يا رب أنا عندي كلام كتير نفسي أقوله نفسي شخص يفهمني دي أكتر حاجة بتمناها يا رب نفسي في شخص يفهمني يلقط الكلام كله من أول ما أبدأ فيه ويفصصه ويقولي أنتي عندك حق في كذا بس في النقطة دي متوفقتيش وأنا معاكي مش هسيبك ميزهقش زي ندى مخفش ادوشه بفكري زي ماما شخص يا رب أنا كل مشاكلي تتحل بشخص.
صحابي بالتدريج اختفوا كنت فاكرة ندى مكملة معايا بس حسيتها ملت أنا مش هنكر إني مش مفهومة مش هنكر إني كل حاجة بحب أوضحها أكتر من مرة وأطمن إني إللي قدامي فهم مش هنكر إني بخاف أنام بليل وأنا حاسة إني وجعت قلب حد أنا رقت مشاعري خليتي مكشوفة قصادهم كلهم ومبقش صاحبة موقف مؤثر أوي بحن بسرعة وبخاف بخاف أموت أروح لربنا أقوله إيه؟
هو في حد ممكن يتحملني وأنا كده يا رب ممكن حد في الدنيا دي يفهمني وهو مين وفين وهيجي أمتى؟ هتبعتهولي إجابة أنا عايزاه إجابة يا رب.
صوتي عليِّ شوية مكنتش حاسة بنفسي ونسيت إن الشقة إللي جمبنا جالها سكان جداد روحت سكتت ونمت بهدوء لا يتناسب إطلاقًا مع كل اللغبطة إللي أنا حاسة بيها وبدأت استغفر لحد ما روحت في النوم.
