حكايات بلون الورد 🌸

#36🌸

أنت مش وحش متصدقهمش ..
أحيانا تيجي كلمة للإنسان تكون سبب في تغير مسار حياته العمر كله للأحسن زي ما في كلام كتير كان سبب في إني أصدق فعلًا إني كلي صفات وحشة وحشة جدًا بإختصار شخص محدش يتحمله..
"أنت سلبي، أنت تقيل أوي في نفسك كده ليه، أنت محدش يطيقك، تعرف أنت أصلًا جيت غلطة كده، ياااااه أنت لسه بتهته ده من زمان وأنت كده، أهو اللخمة وشه أصفر أهو، ده ملوش في حاجة خالص، أنت تخنت أوي على فكرة مش فالح غير في الأكل أصلًا، أنت غبي مش قولتلك ميت مرة تتصرف إزاي؟، ده مش معقول يكون من عيلتكم دي العيلة كلها ناجحة أنت إزاي فاشل كده؟، أمسح إللي نقط على بقك ده هتتعلم امتى تأكل كويس؟، ولسه مش لاقي شغل هتفضل عاطل كده يعني كتير؟، أنت عايز تقول رأيك كمان لا دي وسعت منك أوي، متشغلش بالك أنت بس وريح كده شوية، ههههه بصي بيعمل إزاي.."

- أنت قاعد ساكت كده ليه قوم أعمل حاجة بدل ما أنت ممنكش فايدة كده؟
- أعمل إيه يا بابا؟
- أعمل أي حاجة..
- ما أنا كل أما أعمل حاجة تتضايقوا وتطلعوا فيها عيوب.
- عشان أنت مش نافع يا آدم قوم من قدامي السعادي. 
دخلت الأوضة جبت ورقة جديدة كتبت فيها الكلام إللي لسه بابا قايله ولزقتها جمب الباقين الحيطة مليانه كلام يهد جبل مش مجرد إنسان محدش راضي يديله فرصة يحاول، بكتب كل كلمة وأنا متأكد إن محدش بيخش عندي الأوضة أصلا وكأنها الجزء  السيء في البيت كله..

- صباح الخير.
- روح هات الفطار من أمك.
- ماما خلصتي أخذ الفطار؟
شاورتلي عليه من غير ما تبص ناحيتي خدته وطلعت قعدت على الكرسي ولما جت بدأنا ناكل وطبعًا الحمد لله إني بسمع ومستحيل أشارك بأي رد :
- عارف مين جاي لنا إنهاردة؟ 
- مين يا حاجة؟
- ورد بنت أخويا.
- ورد دي إللي مشرفانا في كل حتة نجحت وعملت اسم للعيلة مش زينا إحنا إللي اتوكسنا.
حسيت اللقمة وقفت في زوري مش عارف أبلعها مسكت كوباية الماية شربت وبعدين قمت دخلت الأوضة مسكت ورقة كتبت فيها نفس الكلام : ورد دي إللي مشرفانا في كل حتة نجحت وعملت اسم للعيلة مش زينا إحنا إللي اتوكسنا. (بابا)
حطيتها في أخر جزء في الحيطة الحيطان اتملت خلاص مبقاش في مكان لأي كلمة مؤذية تانية أنا لازم أمشي من هنا أنا مش لازم أشوفها أنا مش لازم أي حد يعرفني أنا ولا حاجة، فتحت الأجندة وكتبت في ورقة منها وسبتها على المكتب ومشيت، أنا مش عارف رايح فين أنا ديمًا مستخبي من الدنيا كلها بس إنهاردة اكتشفت إن الدنيا إللي في عيلتي أصعب بكتير من الدنيا
إللي بره ..
مشيت مشيت كتير أوي لحد ما رجلي هي إللي وقفت مش روحي وقفت لإنها خلاص تعبت بصيت في الساعة كانت ١ بليل ركبت ورجعت لحد البيت فتحت الباب دخلت أوضتي بس لحد هنا والدنيا كلها اتبدلت بصيت في الاوضة ملقتش ولا ورقة على الحيطة، الحيطة مدهونه لون جديد مبهج غير إللي كنت عامله كان رمادي داكن كل حاجة في الأوضة مكانها متغير ما عدا حاجة واحدة بس .. الورقة، الورقة اللي كنت كتبتها قبل أما أمشي :
- أنا تعبت، مش قادر أثبت إني صح خلاص أنتو معاكوا حق أنا وحش أنا فاشل أنا مستهالش أي حاجة.
حسيت بأن الظهر مكتوب عليه قلبت الورقة :