حكايات بلون الورد 🌸

#4🌸

هو يعني إيه الوقوع في الحب ؟ وليه أصلًا بيسموه الوقوع في الحب ؟ أنا مبحبش أقع لإني بخاف أتعور، لاء لاء لاء أنا مش بخاف أنا قوية!.
طب .. طب ليه ميسمهوش مثلًا الدخول في الحب، البداية في الحب، النهوض في الحب، ليه وقوع ؟
ديمًا السؤال ده شاغل بالي جدًا لدرجة إني عاوزة أحب بس عشان أعرف هقع إزاي ؟

- صباح الخير يا أنسة ورد ..
- عم محمد صباح الخير يا راجل يا طيب ..
- عندك أي بوسطة عاوزاني أوديها الإدارة ؟
- هاا مش عارفة، لسه هشوف، أنت مشغول دلوقتي ؟
- لا أبدًا !..
- طيب أقعد نتكلم عاوزة أسألك في حاجة شغلاني ..
قعد وبص لي بأنتباه، عم محمد راجل سكرة في سن أبويا وقف جمبي كتير من ساعة ما بدأت الشغل في الشركة كانت كل الناس هنا بتحكي وتتحاكى عن قصة حبه لمراته الله يرحمها وفي أوقات كنا بنقضي البريك وإحنا قاعدين متجمعين حواليه وبنسمع منه حبيتها من كلامه عنها لدرجة إني كنت أتمنى أقابلها أكيد كانت جميلة أوي، إزاي ممكن شخص يحب شخص بالشكل ده ويكون وفي له حتى بعد موته، حسيت إني سكت كتير وهو قاعد مستنيني أبدأ فسألته بصوت حيران :
- هو ليه لازم نقع في الحب ليه مش أي حاجة تانية غير الوقوع ؟..
أعرف إن الوقوع بيعور صح ؟!
عينه لمعت وظهرت ابتسامة عذبة على ملامحة سند ظهره على الكرسي وهو بيجاوب وبيحرك إيده على شعره بحنين وراح بصلي وقالي :
- ليه بنقع في الحب ؟
لأنه ميبقاش حب لو خدنا بالنا ..
بصيت له بعدم فهم فوضح :
- لما بتقعي في الشارع بتقعي ليه ؟
- عشان مكنتش واخدة بالي !..
- بالظبط ده إللي أنا بقوله هتبقي عايشة يومك عادي ومش واخدة بالك من أي حاجة ومش مهتمة وفجأة هتقعي ..
- هقع .. طب هقع إزاي ؟
- وقتها هتعرفي قلبك هيقولك ..
- طيب مش هتعور ؟
- هتخفي، دي الوقعة الوحيدة إللي هتداويكي ..

سابني وراح شاف إللي وراه معقولة في وقعة ممكن تخفف ممكن تداوي مش عارفة بس إللي أعرفه إن الحب ده شيء خارق لأي قاعدة فـ ليه لاء ؟

***

- أقع في الحب ؟!! أنت بتصدق الكلام ده مفيش حاجة اسمها كده أصلًا، ممكن نسميها أقتناع بالحب، لكن وقوع في الحب مفيش .
- في يا أدم..
- يا ابني أنت الروايات لحست مخك ..
- غلبان وأهو إللي زيك ده لما بيقع بتبقى حالته حالة ..
- أقع .. طب يعني إيه أقع ؟
- تقع يعني تبقى لأول مرة كويس !
- أقع أبقى كويس مش فاهم !
- وقتها هتفهم ..
- أمتى ؟
- لما تقع .
- أمتى هقع ؟
- هتتغفل سلام .
صاحبي ده عاشق للقراية والروايات كلنا شايفينه أنه جاي من عالم وردي مش شبهنا كلامه نستمتع بيه آه، لكن نصدقه لاء مستحيل .. ال أقع في الحب ال ..
***

روحت البيت وأنا مشغولة أوي بكلامه لاقيت ماما بتحضني وبتقولي جالي عريس
- إيه مستحيل !!!
- ليه بس يا بنتي ده شاب محترم أوي ؟
- وماله يا ماما هو أنا قولت عنه حاجة وحشة بس لاء مش عاوزة يا ماما عشان خاطري ..
- هو أكل مش عاوزة عشان خاطري أم الولد خدت ميعاد مني اديني سبب مقنع أقولهم ميجوش بيه ؟..
أقولها إيه إني عاوزة أقع في الحب وإني مينفعش أقع وأنا واخدة بالي ومدام عارفة أنه جاي عشان يطلبني للجواز يبقى إزاي هقع !
- معنديش سبب مش مرتاحة .
- يبقى تشوفيه وبعدين نشوف مش هتتجوزيه بالعافية يعني ..
- يا ماما !!
- أنتهى .