حياة السته مليون ((الواقع الليبي ))

البارت التاسع و العشرون

#حياة_السته_مليون
#حنين_الشوق
.
.
.
.

عماد 'إبتسم' : مداير رجيم.
معتصم 'ضحك' : تي انت من الأول عود أسنان.
عماد : مدّيرش الجو عشيري ايوا انا و انت نفس المقاس.
أزم : انت اضعف يا عماد، تتذكر في الشورت الأسود.
معتصم 'ضحك'
عماد : هذاكا حاله خاصه ايواا.
عاصم : خيره به؟
معتصم : خذاه من جهة الأطفال.
عماد 'إبتسم بمجاملة' : رشاقة.
ازم : و كيف مداير رجيم.
عماد : مزاجي قالي دير رجيم.
معتصم : بالأمارة واكل خبزتين صحاح في الفطور.
عماد : اي رجيم عكسي يا حبي متفهمش فيه.
عاصم 'همس في وذن عماد' : تعالى نبيك شويه.
عماد : تمام .. شوية يا ولاد و نجي.
°تمام°
عماد 'تلفت و مشى مع عاصم بعيد عن الولاد' : ها شن في؟
عاصم "بعصبية" : امتى ناوي تعالج؟
عماد 'حط يديه في جيوبه ببرود' : و من قالك اني ناوي نعالج؟
عاصم : امالا شني؟ تبي تموت هكي بالسرطان؟
عماد : مفيش حد يموت ناقص عمر.
معتصم "بعصبية" : شن في؟؟
عماد 'شاف لمعتصم و هو معصب' : شن جابك هنا؟
معتصم : باهي اللي جيت... فهموني شن في.
عاصم : عماد عنده سرطان في الدم، و ميبيش يعالج.. تفاهم معاه و رأس امك.
معتصم 'انصدم و وقف قدام عماد، حط يديه على كتافه و قرب منه' : عماد، صح اللي يقول في عاصم؟؟
عماد 'شاف لمعتصم' : اي صح، و نسبة العلاج 40٪'طبعا هذا قبل اسبوع.
معتصم 'قعد يهز في عماد و يكشخ' : و متبيش تعاين؟؟ و مقلتليش علااش؟ ... توا بتمشي معاي للمستشفى فاهم؟؟
    👑حنين_الشوق👑
عماد : منيش ماشي، نموت بشعري و حواجبي خير من نموت و معنديش اي شعرة و نموت و انا وحيد خير من معاي كمشة منافقين.
معتصم 'ضرب عماد كف' : شن تخرط يا بلوة انت، و رحمة بوي الي في قبرة لما تمشي للمستشفى و الكف هذا تفكره كل عمرك باش تعرف اني مش منافق و انا خوك اللي نحمي في ظهرك و نساعد فيك و تهمني مصلحتك و الأخوة مفيهاش كذب و نفاق.
عماد : تمد ايدك عليا؟؟ .. هذه اخرة الدنيا و الله.
معتصم 'رفع صبعه السبابه بتهديد' : و رحمة الغالي امالا، كان ممشيتش معاي للمستشفى نطيح فيك ضرب قدام الناس كلها و نوريك النفاق كيف شكله.
عماد 'ضحك و فتح السيارة' : اركب هي و انت خايف عليا اكثر من روحي 'ركب في الكرسي الخلفي'
عاصم 'إبتسم، شاف لمعتصم و طبطب على كتفه' : هي.
معتصم 'هز رأسه، ركب السيارة و ولّعها'
عاصم 'ركب السيارة و قعد يشوف لعماد من المرايا' : متخافش يا عمده  بتتعالج و مش حنقولوا لأي حد على الموضوع، إعتبره سر بينّا.
عماد 'غمض عيونه و زفر'
معتصم 'عدّل جلسته و بدأ يسوق، استمر الهدوء في الطريق لين رن تليفون عماد'
عماد : الو.
ازم : وين مشيتوا انتوا؟
عماد : طالعين شوية، علاش؟
ازم : تي اسامة يدور فيكم، بايخة اللقطة را.
عماد 'قلب عيونه بملل' : قوله مشوار ضروري،
ازم : و شن هو المشوار!
عماد : اسمع نروحوا نهدرزوا فكني منك توا.
ازم : وين نهدرزوا راهو اليوم مروحين حنا.
عماد : هكي طول؟
ازم : اي ماهو خوك هذاكا عنده امتحان.
عماد : باهي به، روحوا انتوا شن دخلي بيكم.
ازم : شن مش مروّح؟
عماد : ازم و حياة امك معاش تستعبط، انا يدوروا فيا و تبيني نرجع؟ تحسابني مهبول ولا شني، انا قاعد هنا لين ينسوني.
ازم : اي صح، و معتصم؟
عماد : مش عارف 'باعد التليفون من وذنه' .. معتصم بترجع لطرابلس اليوم؟
معتصم : لا، بنقعد هنا فترة بعدين نروح.
عماد : به 'رد التليفون على وذنه' .. حتى معتصم قاعد.
أزم : نظموا اموركم، هي سلام.
عماد : تشاو 'سكر التليفون'
معتصم : وصلنا.
عاصم : مش منك عاد، تجري لين السيارة بتنقلب.
معتصم 'ضحك و غمز لـعاصم' : صقع عليك.
عماد : هي انزلوا ولا غيرتوا رأيكم؟
°لا°
عماد 'ضحك' : به فهمت 'نزلوا من السييارة و خشوا للمستشفى، أول ما وصلوا لجهة الممر تلاقوا مع الدكتور'
الدكتور 'شاف لعماد' : أهلا.
عماد 'إبتسم' : اهلين دكتور كيف حالك؟
الدكتور : الحمدلله و انت؟
عماد : بخير.
معتصم : بالله يا دكتور نبوك في مكتبك شويه.
الدكتور : اها، تمام تفضلوا معاي 'بدأ الدكتور يمشي و هما وراه مستعجلين، الا عماد اللي كان يتمختر و يشوف للممرضات و الدكتورات لين وصلوا للمكتب و قعمزوا'
      👑حنين_الشوق👑
عماد : من الآخر يا دكتور، انا جاي نعالج.
الدكتور : اها، ننصحك إنك تسافر برا ليبيا افضل.
معتصم : نبوا وقت باش إنظموا أمورنا.
الدكتور : يا ودّي السفر على حسابي انا، و العلاج نديروا شهر بـشهر.
عاصم 'رفع حواجبه' : خير ان شاء الله.
الدكتور 'ضحك' : نحب نساعد الناس، شوفوا امتا يناسبكم و كلموني.
معتصم 'إبتسم' : ربي يكثّر من أمثالك.
الدكتور: شكرا، و انا حنسافر معاكم و في دكتورة تخصصها أورام حنشوفها ممكن تسافر معانا.
عماد : علاش حتى الدكتوره!
الدكتور : نتابعوا حالتك بالخطوة، و هي مشاء الله في خدمتها، ليها شهر تخدم هنا سمعتها زي الذهب.
معتصم : به كويس.
عاصم : باهي نبوا نعرفوا نسبة العلاج.
الدكتور : مش لما جيت يا عماد قتلك 40٪؟
معتصم : باهي نبوا نتأكدوا إنها منقصتش.
الدكتور : تنقص من عدم الإهتمام و قلة الأكل و العصبية الزايدة و العامل النفسي اهم شيء.
معتصم 'شاف لعماد بعدين تلفت لعاصم و قعدوا الثلاثه يشوفوا لبعض'
الدكتور : خيركم؟
عاصم : كل اللي قلت عليه عماد يدير فيه حاليا.
الدكتور : اوباا هكي مشكلة، تفضل معاي نديرلك تحاليل.
عماد 'وقف' : به.
الدكتور : شويه و نجوكم احنا 'طلعوا'
عاصم : حسيته الدكتور غرباوي.
معتصم 'فتح عيونه و رفع حواجبه' : لا ياا راجل كيف عرفت بالله عليك، حفيد نيوتن مشاء الله.
عاصم : تي والله بالرسمي ندوي معاك.
معتصم 'شاف لعاصم بجديّه' : و رحمة امك أسكت.
عاصم : به، امي حيّة على فكرة.
معتصم : الرحمة تجوز على الحي و الميت.
عاصم : خلاص تو نبدا لما نحلف نقول  و رحمة معتصم.
معتصم 'ضحك' : مصح وجهك.
عاصم 'إبتسم و رفع حواجبه' : ع الحي و الميت خيرك؟
معتصم 'ضحك' : جوك مولي مليح، مش زي لما كنت تسكر إدره الكبد.
عاصم 'بصوت السكران' : ها يا عشيري يا ولد أمي، ماشية الأمور.
معتصم : إمالا المشية 'وقف و قعد يقلد في مشية عاصم و هو سكران': يا عمــداا وين البنت اللي قلت عليـ..
الدكتور 'فتح الباب و قعد يشوف لمعتصم'
معتصم 'قعد يدير في تمارين رياضيه' : تعرف يا دكتور ظهري يوجع فيا.
الدكتور 'خش و قعمز في مكانه'
عماد 'سكر الباب و قعد واقف يشوف لمعتصم و مستغرب'
الدكتور : خيرك لا بأس؟
معتصم 'حط يده على ظهره و قعد يميل يمين و يسار و في داخله يسإل انا شن ندير' : و الله مش عارف نضت امبارح الصبح لقيت ظهري يوجع.
عاصم 'ضحك'
'تحول نظرهم من على معتصم لـعاصم'
عماد : شن في؟
عاصم 'خذى نفس و سكت' : لا شيء.
الكتور "بجديّه" : تفضل معتصم قعمز، و حتى انت يا عماد، خلي نكملوا موضوعنا و تروحوا، و انت ادهن ظهرك بزيت الزيتون و ارقد باش متنوضش غدوا الليل و ظهرك يوجع فيك.
معتصم 'سكت و رجع لمكانه و عماد كذلك'
الدكتور 'يشوف للتحاليل' : توا لما درنا التحاليل لقينا ان نسبة العلاج قلّة بشكل ملحوظ.
معتصم : كم به؟
الدكتور : نسبة العلاج توا بدأت 20٪ فقط و لازم نستعجلوا.
عاصم : شنــي؟ 20٪؟ تي كيف هكي يصير في اسبوع بس!!
الدكتور : عماد متأثر بحالته النفسية هلبا و غيرها ان هو مش مهتم بنفسه و مش مراعي ظرفه.
     👑حنين_الشوق👑
عماد : انا نشوف للدنيا بعيون الواقع، مش حـنوهم نفسي بالشفاء و انا عزرائيل جايني في الطريق.
الدكتور 'رفع حواجبه' : خلي عندك امل و ثقة بالله، ربي في لحظة يغيّر كل شيء.
عماد 'ضحك بإستهزاء' : الكلام هوا يمشي معاكم انتم لكن انا لا، تفكر ربي باش يتفكرك، انا ما درت شيء في حياتي نتفكر بيه اللي خلقني.
الدكتور : بغض النظر على اللي تدوي عليه، الله أقرب من الوريد لكن انت مش حاس، قال تعالى ﴿﴿ و ان سألك عبادي عنّي قل اني قريب أجيب دعوة الداعي إذا دعاني﴾﴾.
°صدق الله العظيم°
عاصم : شن اسمك يا دكتور؟
الدكتور : رضوان.
معتصم : اعطينا اسمك ثلاثي.
رضوان 'إبتسم، حط الأوراق على الطاولة و استند على ظهر الكرسي' : مش لازم كامل، اعرفوا اني رضوان بس.
عماد 'رفع حاجبه' : علاش؟
رضوان : حـيجي يوم و تعرف.
معتصم 'وقف' : هي امالا السلام عليكم.
رضوان : و عليكم السلام.
عماد 'سلم على الدكتور و طلعوا، ركبوا في السيارة و توجّهوا لحوش خالتهم'
معتصم : حاس في شيء غريب.
عماد 'تلفت لمعتصم' : في شني؟
معتصم : في الدكتور.
عاصم 'مد رأسه بينهم من الخلف و شاف لمعتصم' : بالعكس حسيته كويس.
عماد : حتى انا ارتحتله.
معتصم : مش عارف، انا قلبي يقولي ان في حاجة مش طبيعية.
عماد : اي زيك انت لما إدّير في رياضة في المكتب.
عاصم 'قعد يضحك و هو يتفكر في الموقف اللي صار'
معتصم 'ضحك' : معاش تفكرني بالله.
عماد : و النبي شن صار؟
معتصم : تي كنت نقلد في عاصم كيف يمشي و هو سكران و نبرة صوته فجأة تلفتت لقيت الدكتور يشوفلي، خشيت في بعضي الزفت بديت نهرول و إنقّز، بعدين فجأة قلت ظهري يوجع فيا.
عاصم 'يضحك' : امالا  لما قلتله نضت امبارح الصبح.
عماد 'ضحك و شاف لعاصم' : تي فوته لما حط يديه على ظهره و بدأ يلوي في خصره و يطبس، انا بروحي صدقته قلت شكله راقد على السراميك.
معتصم 'ضحك' : صقع عليك 'وقف السيارة و شافلهم' .. إنزلوا هي 'نزل و قعد واقف يستنى فيهم'
عماد 'نزل و مشى للجنان'
عاصم 'سكر الباب و شاف لمعتصم' : مش لازم نخلوا عماد ياخذ حبوب ولا يسكر.
معتصم : اي، لكن صعب هكي.
عاصم : نقدروا نديروها و هو يقدر يسيب بسهولة كان بإرادته.
معتصم : الله أعلم.
عاصم : هي را انا حاس روحي بنرقد.
معتصم : اي حتى انا 'خشوا للحوش و كل واحد تمدد و رقد'
________________________________________________

الساعة 3:00 ليلاً..
عماد 'يتقلّب يمين و يسار في سريره و مش قادر يرقد، قرر إنه يطلع للجنان يدخن و يضيّع وقت، لبس تيشرته و طلع، لف في الحوش و تأكد إن الكل غارق في سبات، ضحك لما شافهم راقدين بشكل عشوائي، في نفس اللحظة مرّة سلسلة من الذكريات مع صحابه و كيف كانوا يسهروا لين ياخذهم النوم بدون علم منهم، تنهد و كمل طريقة للجنان، تمدد على العشب و قعد يتفرج على النجوم و القمر اللي غطا الدنيا كلها بنوره، تدحرجت دمعة دافئة من عينه للأرض و كان سببها الندم، الندم على كل لحظة مشت و هو بعيد عن الله، نادم على كل دقيقة مرّت و هو سكران و يتمايل يمين و يسار، يقتل و يضرب اللي يجي في طريقة، نادم على حرقة قلبه و حبه للبنت الخطأ، أصعب شيء إنك تندم على أفعال درتها في وقت و انت جاهل الثمن اللي حتدفعه بسببها ... شد حيله و وقف و رفع رأسه للسماء' : يا رب ريّحني من الوجع اللي أنا فيه، يا رب ريحني من النار اللي في قلبي و من الصداع و من الألم اللي في جسمي كله، يا رب إستلم أمانتك و خوذني من هذه الدنيا كلها مع إني عارف ان نهايتي حتكون جهنم لكن نبي نموت مش طايق حياتي هذه، يا ربي انا غلطت هلبا و مدرتش شيء يشفعلي في آخرتي و لما انخنقت و جيت على الهاوية تفكرتك، يا رب خوذني و ريحهم مني و من مشاكلي و من العار اللي مدايرهولهم يااارب 'طاح على ركابه و حط يديه على وجهه و عيونه غارقة في الدموع لين سمع صوت شخص وراه'
:#####
___________________________________________________

#حنين_الشوق

" آسفة على التأخير و الغياب المبالغ فيه💔 "
" حنسكر الواتباد لأسبوعين ممكن، و لما نرجع حتكون حياة السته مليون كاملة و نتم نشرها كلها❤✌ ... لكن حاليا نبي راحة باش نجمّع الأفكار من جديد و نكتب بارتات طوال صح✊... شكرا لكل شخص سأل عليا و لكل شخص علق بكلام حلو و دعمني ❤ و رسائلكم القصيرة ليها آثر كبيـــر في داخلي❤"

$شكـــــرا لأحلى متابعين❤$