حياة السته مليون ((الواقع الليبي ))

البارت السابع

#حياة_السته_مليون
.
.
.
.
معتصم : مصراته الكبيدة ما تعلاش عليها بروي.
إسلام : بالشوية خيرك ولعت؟
معتصم : هذه أصلي معاش تدوي عليها، مش كان شوية ميليشيات طايشة من مصراته  تدخل في بعض المناوشات اللي اهنا معناها مصراته متنفعش.
إسلام : إهدى خلاص، مصراته و بنغازي يهبلو و مفيش زيهم.
معتصم 'ضحك' : الخوف باهي، معاش تربطو حاجات مليهمش علاقة ببعض.
إسلام : خلاص سكر الموضوع، ندوا على السياسة قلبي ينْغَم.
معتصم : أي.
إسلام : نمشوا لقهوة الإرڨيله، في مبارة .
معتصم : مني ضد مني؟
إسلام : الريال و البرشا.
معتصم : تمام هيا. 'ناضوا و مشوا للقهوة'

___________________________________________________

في الحوش ↓↓

' كلهم مقعمزين في الصالة يتفرجوا على التلفزيون .. إلا أديب يقرا في داره'

أزم : يما و الله خايف علي أديب  يصيرله ستك في راسه من القرايا.
الأم : خلوه في حاله شاد قرايته.
مهاب : شاد قرايته أوكي، لكن علاش ميجيش يقعمز معانا؟ ميهدرزش علينا هلبا.. 24 ساعة و هو يقرا.
الأم : يا وليداتي خوكم يحب القرايا، خلاص خلوه يقرا.
أزم : إيح، زي اللي يحرث في بحر.
هبه : خاطري نلعب بوبجي.
مهاب : تلعبي وجهك، هني روحك.
هبه : نكلم في أزم منكلمش فيك.
أزم : ألعبي شن بنديرلك .
مهاب : شن هيــا .. تبيها تلعب مع الأولاد !
أزم : و كان لعبت مع الأولاد؟ .. بياكلوها مثلاً .
مهاب : تي كيف؟؟
أزم : مهآب، نظف تفكيرك خيرلك.
مهاب 'شاف لهبه بنظره غريبة' : نقول في الحق انا.
هبه 'إستغربت منه، تجاهلت نظراته و قعدت تتفرج'
أزم : الساعة كم؟
مهاب : 7:30.
أزم : مهاب نوض جيبلي تليفوني.
مهاب : عندك رجلين نفس اللي عندي.
أزم : نوض خير ما نوريك الرجلين كيف يضربوا.
مهاب 'قلب عيونه و ناض'
أزم : أهو هنا على الطاولة، وين ماشي؟
مهاب 'تلفت' : نعــم؟ مصحك تي تمد يدك توصلّه.
أزم : انا منبيش نمد إيدي، هاته.
مهاب 'مدله التليفون' : الله غالب جيت أخر واحد في العيله النحس هذه.
الأم : خيرك موها خيرك وليدي؟
مهاب 'قعمز جنب أمه' : ولادك يما.
الأم : خيرهم وخيينك؟
مهاب : مدرهينلي كبدي، تقول معندهمش يدين و رجلين.
أزم 'إتصل بصاحبه' :  تعرف يا مهاب كان متسكرش فمك إنوضلك.
مهاب : لا حول الله وخلاص.
أزم : أيوا .. ها شن جوك؟ .... والله تمام، إسمع و النبي شوفلي المدير أمتاع الشركة اللي تخدم فيها كان يبي موظف جديد ... اي كان في مكان .... تمام منور، هي سلام 'سكر التليفون'
مهاب : هو انت وجهك وجه شركات.
هبه 'ضحكت'
أزم : شكلك إستاحشت عصاة المكنسة.
مهاب : لالا الصبح كنت نهدرز معاها.
أزم 'تلفتله' : شني يا بابا  لسانك طول را.
مهاب 'طلع لسانه'  : نفس الطول.
أزم 'وقف' : ترا إحلف.
مهاب 'وقف و باعد شويا' : والله.
أزم : به 'طلع يجري وراه'
مهاب 'دخل للحمام (حشاكم) و سكر الباب'
أزم 'قعد يطق على الباب' : افتح الباب خيرلك.
مهاب : لا .
أزم : قلت أفتح انا، الجيران يسمعوا فينا.
مهاب : خلي يسمعوا  ع اساس يستنوا فينا امتى نتعاركوا.
الأم : خلي خوك في حاله يا أزم.
أزم 'قعمز في مكانه' : يبي طريحة هذا باش يعرف كيف يدوي معانا ...يا غيبتك يا الجريده الخضراء.
هبه : خلاص فوته.
أزم : نستنى فيك ع اساس.
هبه : مصحك.
أزم : مبسلك.
هبه : مبردك.
أزم : مشناك.
هبه : مشنه وجهك.
مهاب 'من الحمام' : مشناكم انتوا الزوز.
أزم 'شاف لهبه' : إنديروا عليه إتفاق.
هبه : تمام .
أزم : تعالي نقولك.
هبه 'قعمزت جنب أزم و قعد يهمس في وذنها'
أزم : باهي؟
هبه : مياميا .
أزم : منورة، لما نوريه.
هبه : تعالى إناشبوا أديب.
أزم : اي اي هيا 'ناضوا و مشوا للدار'
هبه ' قعدت تصفق و تغني و أزم يدربك على الباب' : يا دنيــا.
أزم : يا دواره.
هبه : طبعك دوووم.
أزم : غـــداره.
هبه : وشلون شلون.
أزم : دنيتنا.
هبه : أعز الناس .
أزم : باعتنا.
هبه : يا عيني.
أزم : يا بكايا.
هبه : انسيه اللي هان غلايا.
أزم : حي هبه وراك وراك .
هبه "بإستغراب" : شنو .. 'عيطت فجأة'
أديب 'شدلها شعرها' : أني غدرت بيك مش الدنيا.
أزم 'ضحك' : دارلك إلتفاف.
هبه : أي أطلقني، أزم تعالى فكني.
أزم : لا يا ماما .
أديب : انا عندي ليك حل 'تلفت للطاولة، شد أرزن شيت عنده و ضربه على رأسها'
هبه 'عيطت، قعمزت على الأرض و شدت رأسها'
أزم "بصدمة" : أديب خير بلاك؟؟ .. مهبول إنت!
أديب 'شد الشيت من جديد و حذفه على أزم' : مش عارف.
أزم 'نزّل راسه بسرعة' : مجتش فيا 'ضحك'
أديب : برا يا بالو.
أزم : ع أساس أنت القزم.
أديب : طولي مليح مش زيك، بالو.
أزم : زي الحق، الطول مليح و التصرفات يجيبها ربي .
هبه 'وققت و طلعت من غير ولا كلمة'
أزم : خيرها هذه؟
أديب : أكيدة زعلانه.
أزم : أي حق، هي مقعمزة تنوَّح و احنا نهدرزوا.
أديب 'ضحك' : يا عليك حالة و خلاص.
أزم : تعالى نمشولها.
أديب : هيا. 'طلعو للصالة و ملقوهاش'
أزم : يما وين هبه؟
الأم : كيف طلعت، روحت.
أديب : مسرع العفو.
أزم : تعالى نلحقوها بسرعة 'طلعوا'
أديب : وينها؟
أزم : مش عارف.
أديب : إستنى إستنى.. متقولش هذيكا هي.
أزم : وينها؟
أديب : أوينا في أخر الشارع.
أزم : و الله هيا.
أديب : فراري البنت.
أزم 'ضحك' : أركب للسيارة عندي فكرة.
أديب : هيا 'ركبوا في السيارة و قعدوا يلحقوا فيها بالشوية'
أزم 'قرب السيارة من جهتها و فتح المرش' : أعطينا رقمك يا حلو.
هبه 'قعدت ساكته و تمشي بسرعة'
أديب : بالشوية علينا يا فراري.
أزم : الحلو من وين .؟
هبه 'تحشمت و كل مرة تزيد في سرعتها'
أديب : ديريها على 120 السرعة.
أزم : غر شوفي للطريق خير ما إديري حادث.
هبه 'أول ما كمل أزم كلامة، عترت و طاحت'
أديب 'قعد يضحك'
أزم 'ضحك' : اوووبا  حادث قوي.. نعدمت الفراري.
هبه 'حطت يديها على وجها من الحشمه و قعدت تبكي'
أزم و أديب 'نزلولها'
أديب : إسكتي هبه خلاص.
هبه 'مسحت دموعها و شافتلهم' : يا كــلاب مصح وجهكم، شن التفاهة هذه.
أزم : خلاص أسفين نوضي أركبي في السيارة.
هبه 'وقفت' : لا منبيش، نكرهكم.
أديب : حتى احنا نكرهوك أركبي هي.
أزم 'ضحك' : تي هيا راهو واقفين في الشارع.
شاب : اموت على الحلوة هذه.
أزم 'تلفتله' : نعم خونا؟؟ .. برا خير ما نكسرلك رجليك توا.
أديب ' همس لي أزم' : رجلين مني اللي بتكسرهم، متشوفش في جسمه كيف عضلات؟
أزم : رسمي.. هبه أركبي السيارة بسرعة.
هبه 'ركبت السيارة'
أزم : حتى انت أديب.
أديب : لالا منخليكش بروحك.
أزم : عندي فكرة يا بارد .. بسرعة.
أديب 'ركب في السيارة'
الشاب : تكسرلي رجليا؟
ازم : أي نكسرهملك.
الشاب : تعالى كان قدها.
أزم : انا منتعبش رجليا على خاطر شكل زيك، انت اللي تعالى.
الشاب 'رفع حاجبه و جى لأزم يجري'
أزم 'في لحظة ركب للسيارة و إنطلق'
اديب 'فتح المرش و مد رأسه' : إجري ورانا كان فالح .
الشاب : تي لما نوريكم .
أديب : شن بتورينا نجوم الليل؟ .. ا قصدي نجوم الظهر.
الشاب 'تعب و قعمز'
أديب 'دخل راسها و سكر المرش'
أزم : هبه زعلانه؟
هبه : ألهى في طريقك خيرلك.
أزم : يا مامي خفت.
أديب 'ضحك' : شني مني الحادث هبه .. إن شاء الله السوّاق بخير؟
أزم 'ضحك'
هبه : بخير تريّح.
أديب : معناها جت في الحديد بس.
أزم : نرفعوها للرابش.
أديب 'ضحك'
هبه : مبردكم.
أزم : تروحي ولا تروحي معانا؟
هبه 'ضحكت' : لا بنروح، مجبتش حوايج باش نقعد.
أديب : ع أساس جديدة، ماهو تاخذي في قفطان امي .
أزم 'ضحك' : ولا سروال مهاب و تيشرت معتصم .
هبه : مبردكم.. عادي نلبس من خوتي في مشكلة؟
أزم : باهي و احنا شن قلنالك.
أديب : اصلا شكلها تبي تقعد أرجع للحوش أرجع.
أزم : هو هذا.
أديب : اي هبه كيف حال هديل و هداية و هدير؟
هبه : الحمدلله.
أزم : هداية معاش ريتها .. وين مختفية؟
هبه : إسكت و النبي، ع أساس التانيات تشوف فيهم.
أديب : في السنون.
أزم 'شاف لأديب' : متغير انت اليوم ... مجاوبتش في الإمتحان؟
أديب : جاوبته كلــه.
هبه : هذا علاش.
أديب : و الزيادة إمتحان غدوا ساهل.
أزم : هو في حاجة في الطب ساهلة؟
أديب : اللي يقرا بقلب يلقى كل شيء ساهل.
هبه : إن شاء الله غير تحصل وين تخدم مش زي هلبا ناس.
أزم 'شافلها من المرايآ' : خيرك تحذفي في الدوة؟
هبه : أنا؟؟ .. لالا أمتى صار.
أزم : ألهي في روحك وخيتي باهي.
أديب "بهمس" : جاته ع الجرح.
أزم : نعم؟
أديب : شني؟
أزم : قلت حاجة انت؟
أديب : لا لا.
أزم : به.
___________________________________________________

عند عماد و جماعته ↓↓

'كانوا مقعمزين يهدرزوا و يشربوا و كل مرة واحد يطلّع رقم بنت و يتصلو بيها  و أكثرهم عماد و فراس'

جمال: هيا عماد نبو رقم.
عماد : باهي أصبرلي شويا.' فتح تليفونه كان بيتصل برقم لكن جاته مكالمة  ، وقف و طلع في البلكونه': أيوا؟
البنت : خيرك سكرت إمبكري؟
عماد : خشي في الموضوع طول.
البنت : خيرك هكي تدوي؟ .. متقولش سكران!
عماد : شـ شن رايك انتي؟
البنت : عماد يا روحي كم مرة قتلك باعد من على الشرب و الحبوب.
عماد : تؤ.. منقدرش، قوليلي شن تبي لإن .. عندي صحاب يـ يراجوا.
البنت : إتصلت بيك نبي نقولك حاجة.
عماد : تفضلي قولي.
البنت: نحبك عماد.
عماد 'ضحك بإستهزاء' : باه كتر خيرك.. شن المطلوب.
البنت 'تنهدت' : ربي يهديك، عارفاتك سكران و مش واعي، لما تصح كلمني.
عماد : بآي 'سكر التليفون و مشى لصحابه'
فراس : في من كنت تكلم.؟
عماد : وحدة.
سفيان : خيانه الشيت.
عماد : لا زيها زي غيرها.
عاصم : #####
___________________________________________________

تفاعلــوا على الرواية ❤ حتى نكمل☺

#حنين_الشوق