#حياة_السته_مليون
#حنين_الشوق
.
.
.
.
هدير : معتصم أنا مـ..
مهاب : هدير أمك من امبكري تنادي عليك.
هدير 'شافت لمعتصم و وقفت' : بعدين نهدرزوا، سلام 'مشت'
مهاب 'قعمز مكان هدير و شاف لمعتصم' : متخافش تحبك هي.
معتصم 'شاف لمهاب و قام حاجبه' : شني؟
مهاب : فوته جو الإستعباط قصدي، واضخة هدير تحبك و انت تحبها، الغبي بس ميحسّش عليكم، تي شبه العيلة كلها تعرف انكم تبوا بعض من الأخير.
معتصم 'ربع يديه و رفع حواجبه' : كيف ترا؟
مهاب : تي انت تشوفها تفرح، تكلمها مزاجك يتغيّر طوول و على حسب ما عرفت حتى هي هكي، و كلنا عارفين الجو و مفيش حد قدر يسألك ولا يسإلها ... المهم خويا كان درتوا علاقة رد بالك يعرفوا ولاد خوالك، تعرف جوهم عاد انت 'مشى وخلا معتصم مبتسم و يفكر'
_________________________________________________
عند عماد...
هبه 'تنفست بقوة و غمضت عيونها': عماد أنا نحبك.
عماد 'قعد ساكت و يشوفلها بصدمة'
هبة 'فتحت عيونها ببطء و شافت عماد مصدوم، حطت يدها على كتفه و تكلمت' : و الله ما بإيدي الشيء هذا يا عماد، قلبي حبك و تعلق فيك هلبا أنـ.
عماد 'باعد يدها بقوة و وقف بعصبية' : شن تقولي إنتِ؟؟ .. خيره عقلك شن صايرله؟ هبه انتي أختي شن الكلام هذا؟
هبة 'وقفت قدامه' : عماد متكذبش على روحك، انا مش أختك، أنا بنت خالتك و تربيت معاك بس، ميربطناش دم باش تقول اختي.
عماد 'شافلها و شرارة الغضب في عيونه' : هبه أطلعي برا فكيني منك، بعد كل هالسنين جاية تقوليلي مش أختك؟ انا طول عمري نشوف فيك اختي، هدرزت معاك و تقربت منك على هذا الأساس و جاية توا تبي تغيري تفكيري! .. هبه أطلعي خيرلك و بري خودي حاجة تصحصحك.
هبه 'قربت خطوتين جهة عماد' : عماد حرام عليك و الله نحبك أنا، انا اللي نعرف عليك كل شيء و حبيتك رغم تصرفاتك معاي و..
عماد 'زفر' : اللي تعرفيه عليا ميجيش نقطة في بحر من حقيقتي، هبه انتي ما تعرفي عليا شيء الا رؤوس أقلام بس.
هبة : باهي يا عماد انا نحـ..
عماد "بعصبية" : معاش تقوليها 'علّا صوته' .. معاش تقولي نحبك خلااص، انتي اختي أفهمي و بري اقلبي وجهك خير ما تطيحي من عيني أكثر بــري.
هبه 'دمعت عيونها و هي تشوفله' : لو كان حبي ليك يخليني نطيح من عينك، عادي تعرف علاش، لان انا مش حنغيّر رأيي بكل.
عماد 'شد فكها بقوة و ضغط على سنونه' : خير أمك إنتِ؟ .. عليا اليمين يا هبة كان متسكريش فمك انا نكسرهولك، انا لا نحبك ولا عمري حـنحبك خوذيها قاعدة في حياتك هذه، مستحيل تكوني ليا ولو كنتي أخر بنت في الدنيا ... توا بنفتحلك الباب بتطيري من قدامي و معاش تفكري تجيني ولا تقربي عليا و الكلام اللي قلتيه حندير روحي مسمعتاش تعرفي علاش؟ .. باش منكرهكش و تولي وحدة رخيصة تمام؟ 'فتح الباب و طلقها' ... هي تفضلي.
هبة 'نزلت دمعة حرقت خدها من الوجع، حطت يدها على أثار أصابعه و طلعت من الدار'
👑حنين_الشوق👑
عماد 'قربع الباب و قعمز على السريرى، مرر يديه على رأسه أكثر من مرّة و هو مضّايق منها' : تي و الله شكلها تهلوس البنت، ما نجحتش مع صاحبي جتني أنا 'ضحك بإستهزاء و تمدد على السرير، قعد يشوف للسقف لين الباب طق، وقف و مشى فتحه'
مهاب : خيرك غاطس هنا؟ الولاد من امبكري يدوروا عليك.
عماد : استنى شويه 'لبس تيشرت أسود، طلع مع مهاب و مشوا للشباب'
رمزي : تي وين كنت؟
عماد : في الدار 'لف بعيونه عالشباب و ملقاش أزم' .. نلف شويه و نجيكم 'قعد يلف في الجنان لين شاف أزم مقعمز بروحه و حاط رأسه بين يديه ... وقف وراه و بدى يغنّي' .. صعب نتفكره يا قلب إمحي الذكره، لا ما قتلك أكره لكن بابك بتسكره
أزم 'تلفت و شاف لعماد'
عماد 'قعمز قدام أزم' : سكر بابك يا قلب دير حسابك، البنت اللي حبيتها إختارت غيابك، شن هما أسبابها اللي خلوها تنسى أحبابها، ما درت حسابها ما كنت هكي نحسابها قلتي مهما يصير ما ننساك و قلبي حي عطيتك حب كبير و انتي ما اعطيتيني شيء، صفيت معاك النيه حبيتك حب بقدره، مشيتي و خلّيتي الراجل خبط على صدره، لي خلّيتيه تفكري شن كنتي تقوليله كيف كنتي تحبيه كيف كل شيء عندك تحكيله، هانت عليك ايامنا و اللي بيك جمعني، نسيتي شن كان كلامنا هذا اللي واجعني، صدقت معاها كذابه كنت مصدقها، يا قلب انساها ريح روحك و فارقها.
أزم 'قعد مطبس رأسه و منسجم مع صوت عماد و الأغنية'
عماد 'مسح دموعه اللي تجمعت في طرف عينه و خذى نفس' : الأغنية هذه عندي معاها ماضي شنيع، عندي معاها أيام و ليالي نكد، عندي معاها ذكريات أول طاسه في حياتي .. شاركتك بيها لاني عارف الجرح اللي في قلبك شن حالته، الدنيا إدّور و يا داير يا لاقي أنساها و خلاص توا 'وقف و مد يده لأزم'
أزم 'شاف ليد عماد، شدها و وقف' : هيا.
عماد 'ضرب ظهر أزم بخفه' : وفر دموعك لليوم اللي بيزفوها فيه 'إبتسم و مشوا مع بعضهم و قعمزوا مع الشباب'
عاصم : و هذا اللي صار.
'ضحكوا كلهم و أزم و عماد مش فاهمين شيء'
عماد : على شن تضحكوا؟
عاصم 'إبتسم و شاف لـعماد' : نحكيلهم على الراجل اللي ضحكنا عليه في موضوع السيارة.
عماد 'ضحك' : تفكرته، أقوى موقف صار في حياتي.
معتصم : عن جد الجو اللي فيكم.
إسماعيل 'حط يده على كتف عاصم' : صاحبك هضا جوه سمح بكل.
عماد : أكيد لإنه صاحبي 'إبتسم بثقة'
صائب : أزم كنك؟
أزم 'غمض عيونه و زفر' : شيء.
عماد 'ضرب أزم بمرفقه و همس' : خلي الأسبوع يمشي على خير.
ازم : به.
معتصم : اي حق شن صار في خدمتك؟
أزم : تعيّنت غادي، لكن خذيت إذن على خاطر العرس.
اديب : من أولها مشاء الله.
أزم 'ابتسم' : اي.
إسماعيل : هي نعدّوا للمربوعة على شان الغذاء.
°به°
_________________________________________________
आप पढ़ रहे हैं
حياة السته مليون ((الواقع الليبي ))
सामान्य साहित्यرواية من كتابتي 'حنين الشوق' تحكي عن الواقع الليبي من جميع الواجهات ... قصص الحب، الدمار، الوجع، الخطف و كل ما يتعلق بحياة الليبين في السنوات الأخيرة❤ 2#- طرابلس #2 - Libyan 4#- ليبيه 5#- ليبين #حنين_الشوق ممنوع النشر بدون إذني✋
