#حياة_الستة_مليون
.
.
.
.
.
معتصم : خالد تزوج.
إسلام 'بإستغراب' : من خالد؟
معتصم : الرجباني .. تي صاحبنا خالد خيرك؟
إسلام: اي عرفته.. باهي مشاء الله عطاه ربي.
معتصم : و تزوج البنت اللي يبيها.
إسلام : إيّاه .. اول مرة نشوف قصة حب ناجحة .
معتصم 'ضحك' : تتذكر لما تعاركوا كيف دار العار عليها.
إسلام 'ضحك' : اي احنا نهدرزوا و نضحكوا وهو منكد.
معتصم : اي... ربي يحفظهم لبعض.
إسلام : امين .
معتصم : اسمع، نمشي ندير تليفوني في الشحن و نجيك.
إسلام : به.
معتصم 'وقف ودخل للحوش .. مشى للدار و حط تليفونه في الشحن' : خيره اهوا؟؟ 'قعد يفك في الخيط و يركب فيه من جديد' .. تي شن صارله.
أزم 'شافله' : خيرك؟
معتصم : الخيط معاش يبي يشحن.
أزم : الضي هرب يا دماغ.
معتصم 'تأفف' : رجعت حليمه لعادتها القديمه .. تي ماليّاش 5 دقائق كيف طلعت من الحوش امتى هرب.
أزم : في الـ5 دقائق اللي كنت فيهم برا.
معتصم : ابرد ما فيك انك تتسهوك بإسلوب رسمي.
أزم 'ضحك' : ع اساس ثقيل.
معتصم : تي كيف الحل توا .. واااك، ربي ياخذك يا وزير الكهرباء.
ازم 'رفع يديه' : آميـــن يارب.
مهاب : هو و وزير التعليم ياارب.
معتصم 'ضحك' : وزراء البلاد كلهم بالمرة يا ربي.
أزم 'ضحك' : و النبي هيا كان وصلت للسقف مزيكم حد .
مهاب : وزير التعليم الطلبه كلهم يدعوا عليه و ما ماتش.
معتصم : يقري في المعوذات شكله.
مهاب 'ضحك' : زعما.
معتصم 'فتح الروشن (النافذة)' ' : إسلام را الضي هارب.
إسلام : و انا نقول خيره الشارع مظلم.
معتصم : حسستني مركبين فلاشات.
إسلام : تي هيا تعالى كساد.
معتصم : به 'نقز من الروشن'
أزم : اللطف يا ربي.
معتصم 'ضحك' : سكر سكّر .
مهاب 'طلّع راسه' : الله هواء نظيف.
معتصم : هواء نظيف ؟؟ .. خيره هذا!
إسلام : نظيف شني يا ودي .. مزكوم انت؟
مهاب : لالا .
إسلام : امالا اول مرة تتنفس.
معتصم 'ضحك' : خش بروي ولا أطلع متقعدش هكي.
مهاب : توا نطلع؟
معتصم : عادي شن فيها؟
ازم : لا فيها.
معتصم 'شاف لأزم' : شن قلنا .؟
أزم ' سكت و شاف لمعتصم'
معتصم : هيا .
ازم : باهي اطلع.
مهاب : شن دخلك إنت؟!
ازم 'رفع حاجبه' : أياه
مهاب 'نقز من الروشن' .
ازم : اياه من بدايتها هكي.
مهاب 'ضحك' : إختصار المسافات.
ازم : بنسكر الروشن صقع .
معتصم : به.
ازم 'سكر الروشن و طلع للصالة'
معتصم 'قعمز جنب إسلام'
إسلام : مبكري جاني الفتنه قعد يقول في دوة عليك.
معتصم : شن قال المصيبة هذا؟
إسلام : قال ع اساس فكك منه و بيوع و راهو سكار و حشاش و الجو اهوا.
معتصم : تي مسميناشي فتنه ع الفاضي احنا ... انا نبي نفهم خيره الحي مسيب الشباب اللي يسكروا و اللي يقتلوا و اللي يديروا في الحرام و مركزين علينا ؟؟
إسلام : احنا ولاد أصول و ميحبوناش نكونوا نظاف لازم يطيحولنا سمعتنا في الارض.
معتصم : مش عارف شن اللي مصبرني عليهم المخلوقات اهيا انا.
إسلام : مني؟
معتصم : اللي في وجهي قطاطيس و من وراي ولاد إبليس .
إسلام : اسمع هما يبوا يستفزوك و يخلوك تغلط بأي طريقة .. شايفينك متقربش في الحرام يبوا يطيحوك فيه .. خليك بارد و فوتهم.
معتصم : لكن كثروا هلبا الشكالات هذه.
إسلام 'ضحك بإستهزاء' : ما هو كل شيء غلط كاثر .. بتوقف عليهم يعني.
مهاب : انا زي الأطرش في الزفه.
إسلام : كان تقعد معانا تو تعرف ع شن نحكوا.
مهاب : و الله السكاره كاثرين في الحي و امور مش تمام
إسلام : اسمع يا مهاب، اهنا مش زي الحوش .. احنا عايشين في غابه افهمها هذه.
معتصم : الولاد اللي شفتهم مبكري صحاب عماد و على فكرة اسلام كان مقعمز معاهم.
مهاب : كيف سكرانين و اسلام معاهم؟
معتصم : صح هما يسكروا لكن ميضروش صحابهم ... المهم خلي نقول قواعد الحي ... متحاولش تجي في طريق السكرانين بكــل، و من الساعة 9 معاش تطلع برا خيرلك.
مهاب 'بإستغراب' : علاش؟
إسلام : تي فوته الحي في الوقت هذا.
مهاب : حاله انتوا را.
معتصم : اصلا مش ليك جو الشارع، خليك مقعمز في الحوش خير.
مهاب : لا لا الحوش كساد.
معتصم : به ... طبعا احنا في مدينة مفيهاش حكم و مفيهاش حد ياخذلك حقك غير الله يعني يخطفوك يقتلوك يحرقوك مش حيهتم بيك حد، قداش من قصص صارت و محد عبر الناس المتضررة.
مهاب : باهي وين الحكومة؟
إسلام : مفيش حكومة .. كلها تجري ورا الكرسي، و لما ياخذوا مناصب يضربوا الشعب كالشوا و يهتموا بالفلوس.
مهاب : به سؤال .. توا الحروب اللي تصير .. من الطرف اللي كويس فيها.
معتصم : صدقني يا خوي .. مفيش طرف كويس كلهم يجروا ورا مصلحتهم الشخصية .. محد مهتم بالشعب ولا عاطي أهمية ليه أصلا.
مهاب : باهي انا توا شن ندير.
إسلام : هذه لازم تجربها .. انت تعرف ع الناس و احكم.
مهاب : به.
معتصم 'كيف كان بيدوي سمع واحد يتكلم'
: اهوا السكار اللي يحكوا عليه.
: هذا هوا!! ميبانش عليه.
'ضحك بإستهزاء' : ماهو قالولك يدير في روحه ولد حلال.
معتصم 'معاش تحمل الكلام، وقف و الشر في عيونه'
إسلام 'حط يده على كتف معتصم' : فوتهم يا را .. فكك منهم.
معتصم "بعصبية" : حول يدك.
إسلام 'رفع حاجبه بدهشه و نزّل يده'
معتصم 'وقف قدام الشاب اللي كان يدوي، شد رقبة سوريته و وقْفه' : ترا عاود كلامك.
: حول يديك انا ميمسنيش واحد حرايمي.
معتصم : اها 'شاف للأرض بعدين ضربه كف' : انا حرايمي؟؟
الولد 'حط يده على خده' : خيرك انت؟؟
معتصم : معليش اعذرني مزال مسكرتش ماه..'ضربه على بطنه'
الولد : يا ولد الـ###
معتصم 'فتح عيونه بصدمة' : شن هيــا؟
الولد : يا و لـ ـد الـ$##
معتصم 'قعمز فوق الولد و قعد يضرب فيه'
: خلاص بالله عليك خلاص.
إسلام 'شد يدين معتصم' : خلاص يا صقر خلاص.
معتصم : خليني نكمل خليني ... يوصل في بوي معقولة!؟
إسلام : تي شن تكمل خليه قريب يموت تحت يدك.
معتصم : إستنى 'شاف للولد' من قال الكلام عليا؟
: زكريا زكريا.
معتصم : متأكد؟
: و الله الله.
معتصم : به 'وقف' توا إقلب وجهك و نسمعك تدوي عليا نقتلك.
: باهي الكلام كذب؟
معتصم "بعصبية" : اكيدة كذب عندك شك مثلا؟
: لا لا بكل 'وقف بيمشي'
معتصم : تفتح فمك في حرف نقتلك، كل الكلام يوصلني را.
: حاضر حاضر 'مشى'
معتصم : و ربي ما نتسمى معتصم كان سيبتك في حالك يا زكريا .
إسلام : خلاص جى الوقت اللي نربوه فيه.
معتصم : اي 'شاف لإسلام و إبتسم ع جنب'
إسلام 'دار نفس النظرة و الضحكة'
مهاب : حي ع الجو .
معتصم 'شافله و ضحك' : نفس التفكير يا بردر.
مهاب : قووي.
إسلام : صقع عليك.
مهاب : خاطري نمشي للزنتان، يقولوا حلوة.
إسلام : نكرههم.
معتصم : علاش تكرههم؟ الا الزنتان ايوا.
إسلام : هكي مزاج.
معتصم :خيرك إنت. مرة مصراته و مرة الزنتان بالك مش عاجبينك؟
إسلام : و انت شن واجعك؟؟
معتصم : نعرف ناس من الزنتان مشاء الله عليهم.. و بعدين ديما مصراته و الزنتان مع بعض فوتهم .
إسلام : تو بالله مدايرلي فيها جو الوطنيه.
معتصم : اي انا عندي وطنية و غيرة على بلادي، كان مجموعة متطرفة من اي مدينة ادير في الفتنه و غيرها معناها المدينة متنفعش؟؟ شن التفكير المعقد هذا.
إسلام : باهي به غلطنا و منك السماح.
معتصم : حالة.
مهاب : شكلي عطيتكم بالعين.
معتصم : لا بالعين لا بالفم هني روحك.
مهاب : به.
معتصم : خيره الجو إنقلب فجأة.
مهاب : نو ولا؟
معتصم : هلبا.
إسلام : انا معاش عرفت نصيف ولا نشتّي ولا شن ندير في روحي.
معتصم : انا و عماد نفتحوا في المكيف و اديب و ازم فاتحين دفاية، متفهم شيء.
مهاب : و في النهاية انا اللي نمرض من جرتهم.
إسلام : ضحك ديما واكلها على راسك.
معتصم 'صفر' : يا علـي.
علي 'تلفت' : اها؟
معتصم : تعالى .
على 'وقف قدام معتصم': شن في يا برو؟
معتصم : نبيك في موضوع، لكن يقعد بيني و بينك.
علي : معقولة تقول هكي.
معتصم : اي معقولة معنديش ثقة في حد.
علي : به قول هي.
معتصم : تطلع منك الدوة 'حط يده على رقبة علي' هذه نطربقها.
علي : والله ماني مقايل لحد.
معتصم : ####
~~~~~~~~~~~~~~~~~~~~~~~|||
#حنين_الشوق
BINABASA MO ANG
حياة السته مليون ((الواقع الليبي ))
General Fictionرواية من كتابتي 'حنين الشوق' تحكي عن الواقع الليبي من جميع الواجهات ... قصص الحب، الدمار، الوجع، الخطف و كل ما يتعلق بحياة الليبين في السنوات الأخيرة❤ 2#- طرابلس #2 - Libyan 4#- ليبيه 5#- ليبين #حنين_الشوق ممنوع النشر بدون إذني✋
