#حياة_السته_مليون
#حنين_الشوق
.
.
.
.
.
: فراس يا ودّي
عماد : اها، شن الأمور.
فراس : ماشيه، عندي ليك بشارة.
عماد : شن في؟
فراس : الراجل الفلوس اللي يقرب لّ مؤيد جى للحي، و معاه ولاده الزوز و بنت طررف.
عماد "بحماس" : ايااه.
فراس : والله.
عماد : دبروا كيف نخطفوا البنت.
فراس : البنت صعب نطلعوها، الولاد يلعبوا قدام عيوني توا.
عماد : باهي إخطفهم في شت ترجى؟
فراس : باهي يا معلم تم.
عماد : اهم حاجة معاك الولاد و وجهك مغطّي.
فراس : شيء اكيد .
عماد : ميه ميه، تو شويا و نجيكم غادي انا.
فراس : به، تشاو 'سكر الخط'
معتصم : بتخطفوا؟
عماد : اي، راجل الفلوس تجري بين يديه.
معتصم : اللطف يا ربي.
عماد 'ضحك' : هذا بزنس يا وخيي .. خطرهاا، زعما بنعدوا لنغازي بكرا؟
معتصم : شن خطرها؟
عماد 'تأفف' : زعما بنمشوا لبنغازي غدوا؟
معتصم : اكييده، نمشوا و ناخذوا معانا هبه و هدير، ع اساس سبله.
عماد : به ريّحتني.
معتصم : تي عرس بنت خالتي و منحضرااش حشومه عاد.
عماد : هذا عليش سألتك .
معتصم 'شاف لعماد' : ادوي طرابلسي بلا جو، اهو غدوا بنمشوا بنغازي ادوي شرقاوي لين تفد.
عماد 'ضحك' : نحب نستفزك.
معتصم 'ضحك بمجاملة'
عماد 'رفع حاجبه' : معاش تقدّر انت را.
معتصم : كان معاش نقدّر راهو مش معاك توا.
عماد 'إبتسم' : رسمي.
معتصم : اهو الضي بيهرب 'أول ما كمّل معتصم جملته الضي هرب'
عماد 'فتح عيونه بصدمه' : شنو؟؟
معتصم 'ضحك' : الحاسه السادسه يا بي.
عماد : لنقني نريدهاا.
معتصم 'حذف عليه مخده' : بارد و ركيك انت.
عماد 'ضحك' : عيب مزال مش مخدتنا باش تحذفها.
معتصم 'ضحك' : و الله العظيم انت تافه.
عماد : تي معاش تحلف يا عشيري.
معتصم : و رب العزه هي.
عماد : حاله انت، 'تأفف' .. خير بلاه هذا عطّل!
معتصم : بالشويه ع الراجل.
عماد : به 'وقف، مشى للمطبخ و فتح باب الثلاجه' .. فااضيه!! .. كيف هكي؟
معتصم : لا عاد هكي هلبا، حتى من الثلاجه تبيه يخليها باللي فيها؟
عماد : تي كان يبي يروح سليم.
معتصم : حرام راهو.
عماد : تي احنى غاطسيين في الحرام من لما بدت الثورة الغبره.
معتصم : من أحنى؟
عماد : الليبين من يعني.
معتصم : مش كلنا.
عماد 'ضحك بإستهزاء' : منكذبوش على بعضنا باهي.
معتصم : تو اللي يسمع يقول عايش معاهم كلهم.
عماد : فكني منبيش نقول دوه مش لازم منها.
معتصم : به به.
عماد : احسن حاجة الدكان قريب هلبا.
معتصم : هات فلوس خليني نمشي نشري الحاجات الناقصة، و انت استنى لين يجي الراجل.
عماد 'طلع فلوس من جيبه و اعطاهم لمعتصم' : خوذ.
معتصم 'خذى الفلوس و مشى للدكان، قعد يتمشى و يشوف للشجر و يتأمل في منظر العمارات' : تقول مش نفس الحي، محلاها الجهة.. 'وصل الدكان و شرى الحاجات الناقصه و زاد عليهم و روح، اول ما فتح الباب سمع صوت عماد'
عماد "بعصبية" : تي خيرك انت النم ؟؟ .. قلت الفلوس توصل غدوا معناها توصل غدوا كلمه ثانيه نقصلك لسانك 'سكر التليفون'
معتصم 'حط الأكياس ع الطاولة و شاف لعماد' : شن في؟
عماد : موضوع صغير.
معتصم 'هز رأسه و قعمز' : تعرف الوضع اللي في ليبيا شن يسموه.
عماد 'شاف لمعتصم' : شنو؟
معتصم : حرب نفسيه.. اول حاجة يديروها يمنعونا من حقوقنا البسيطه، بعدين يزرعوا الحقد بيننا، بعدها يكرهوكم في بعض و بعدها يديروا حرب رسميه ... تي تعرف من يتحكم فينا؟
عماد : مني يا دكتور؟
معتصم : الدول الخارجيه يا فالح، هما اللي يزرعوا بينا في الفتنه، هما اللي يعطوا في الفلوس للروس الكبيرة .
عماد : رسمي و الله ... يبونا نسيبوا البلاد بأي طريقة، و الله فدينا الله، و الله حاله، لا ضي و لا ميا ولا سيوله ولا بنزينه ... فدد الزفت.
معتصم 'تنهد بوجع' : ياااربي انت اللي عالم بـ حالنا، يااارب فرج علينا ياارب.
عماد : آمين.
معتصم : جى الراجل؟
عماد : جى اي.
معتصم : به كويس.
عماد 'خذى دخانه، التليفون و مفاتيح السيارة' : انا بنمشي توا، تبي شيء؟
معتصم : رد بالك، مرات يغدروا بيك.
عماد 'إبتسم ع جنب' : مش قروبي اللي يديرها.
معتصم "بشك" : ان شاء الله.
عماد 'طلع'
معتصم : تعلم كل شيء من الدنيا الا أهم حاجة ... الثقه متنعطاش لحد الكل يغدر امتى ما تجيه فرصه .. 'فتح التلفزيون و قعمز يتفرج' ... و الله غريبه، الراجل مخلي كل شيء و بايع الحوش، اكيد في قصه.
_________________________________________________
DU LIEST GERADE
حياة السته مليون ((الواقع الليبي ))
Aktuelle Literaturرواية من كتابتي 'حنين الشوق' تحكي عن الواقع الليبي من جميع الواجهات ... قصص الحب، الدمار، الوجع، الخطف و كل ما يتعلق بحياة الليبين في السنوات الأخيرة❤ 2#- طرابلس #2 - Libyan 4#- ليبيه 5#- ليبين #حنين_الشوق ممنوع النشر بدون إذني✋
