#حياة_السته_مليون
.
.
.
.
يوم السبت .. 9:30am
معتصم ' كالعادة ناض على صوت أمه اللي واقفه في نص الدار و معصبه'
إنتصار : نوض يا معتصم الله يهديك جيب الخبزة.
معتصم 'تأفف' : و رأس إميمتي خليني في حالي، نوضي الفرخ مهاب.
إنتصار : لا والله، خوك يا ناري تاعب و تبيني نخليه يطلع في هالصقع؟
معتصم 'شاف لأمه و رفع حاجبه' : و أنا شني ؟ عادي نطلع في الصقع؟
إنتصار : إنت راجل تتحمل أما هو مسكين قاعد صغير.
معتصم "بعصبية" : تي صغير شني بـشناباته اللطف.
مهاب 'كان يمثل انه راقد و مبتسم على كلام امه'
إنتصار : غر نوض سلم وليدي هي.
معتصم : وين ولادك الثلاته الكبار ولا مفيش غيري؟
إنتصار : أزم في المحل من امبكري، أديب عنده محاضره و عماد من أمس ما جى نوض شوفه.
معتصم 'وقف و خذى مفاتيح السيارة' : حلوه هاذي، الصغير ماشي يدور على الكبير لا حول الله و خلاص، أعطيني الفلوس.
إنتصار 'مدتله 5 دينار' : مش تعطل.
معتصم : أكيده نلقاها طابور و حاله.
إنتصار : الله غالب.
معتصم 'لبس الجاكيت و طلع'
مهاب 'أول ما سكر معتصم باب الحوش قعد يضحك'
إنتصار 'إبتسمت' : هي نوض صلي ما بين جى خوك.
مهاب 'ضحك' : تراويح امالا.
إنتصار 'ضحكت' : هي عاد نوض.
مهاب 'وقف' : حاضر يا نبع الحنان .
_______________________________________________
عند معتصم ..
كان ماشي في شارعهم و الحزن واضح على ملامح وجهه، كل شيء في الشارع يخليك تحس بضيق، مرت في باله أغنية راب لـ mc mego (زناقي الخاربه)... قعد يدندن فيها و يشوف و يتأمل في البيوت و الطريق، سكت لما شاف مجموعة شباب مقعمزين يدخنوا و واضح إنهم من الجماعة اللي تتعاطى، هز رأسه بأسف على الحال اللى وصلتله البلاد'
الشاب : خيرك خونا تبي سبسي؟
معتصم : لا لا مش ليا الجو هذا.
صاحبه : أصلا واضح عليك، تقول ولد حي دمشق.
معتصم : باللهِ.
الشاب : برا كمل طريقك خير ما نسيِّل دمك توا.
معتصم : إسمع يا فرخ إنت أنا محد يهددني، الخوف من ربي بس و الباقي دوه فارغهه.
'وقف واحد من الشباب و طلع موس' : تبيني نغرسه في قلبك هذا ؟ ولا في بطنك؟
معتصم : كان انت راجل و ولد راجل ديرها.
الولد 'رفع يدها و في لحظه كان حتنزل على معتصم'
عماد "بعصبيه" : أحمد.
الشاب 'تلفت لعماد' : خيرك عماد؟
عماد 'خذى الموس من يد الشاب' : خوي معتصم هذا.
الشاب 'ضحك' : مستحيل نصدق، خيره هكي هوا.
تكلم واحد من الشباب : صـح، يشبه معتصم.
الشاب: خيره هكي خوك محترم هلبا الزفت.
عماد : مخصكش فيه.
معتصم : عماد؟ ان شاء الله هما صحابك و بيقتلوني؟
الشاب : بالك مش عاجبينك يا دمشق؟
عماد 'قعد يضحك' : عجبني الإسم 'شاف لمعتصم' .. كمل طريقك و أنسى الموضوع.
معتصم 'عقد حواجبه و كمل طريق' : والله حق زناقي خاربه، اللي ما شافهمش يجي يعيش معانا 'فتح عيونه بصدمه لما شاف طابور الخبزه واصل لأخر الشارع، شاف للفلوس و ضحك': لا خبزه لا هم يحزنون، نمشي نروح خيرلي 'لف و رجع للحوش'
YOU ARE READING
حياة السته مليون ((الواقع الليبي ))
General Fictionرواية من كتابتي 'حنين الشوق' تحكي عن الواقع الليبي من جميع الواجهات ... قصص الحب، الدمار، الوجع، الخطف و كل ما يتعلق بحياة الليبين في السنوات الأخيرة❤ 2#- طرابلس #2 - Libyan 4#- ليبيه 5#- ليبين #حنين_الشوق ممنوع النشر بدون إذني✋
