حياة السته مليون ((الواقع الليبي ))

البارت الرابع

#حياة_السته_مليون
.
.
.
.
.
معتصم : جبت كرت نت .
عماد : منور 'خذى القهوة من معتصم'
معتصم : شن جديدك بروّي؟
عماد : مفيش جديد بكل، نفس الحال.
معتصم : مدرتش كبيدة هكي ؟ .
عماد 'ضحك' : لا لا.
معتصم 'غمزله' : غر قول قول.
عماد 'إبتسم ع الجنب' : مستحيل نحب أنا، و أصلا مفيش حاجة إسمها حب كله وهم و شهوات و إتنين ينافقوا في بعض.
معتصم : في شيء إسمه حب  لكن إنت مش مستعد ليه و إنت بأفعالك مسوّد صورة الحب في قلبك.
عماد 'ضحك بإستهزاء' : انا عارف البنات و شايف أفعالهم و حركاتهم هذا علاش أنا منبيش نحب و مش مقتنع بالحب ومنيش متزوج لإن مش متخيل حياتي مع وحدة من بنات توا، أصلا ميشرفنيش ان يكون ولدي من بنت تكلم في ولاد غيري.
معتصم 'ضحك' : غير عقليتك خوي، صوابع يدك مش زي بعضهم.
عماد : مش زي بعضهم في الطول بس أما هما في النهاية أصابع، أنا لما بنشوف البنت  بنشوف أصلها مش طولها.
معتصم 'ضحك' : الله عليك.. في بنات محترمات و يصونوا نفسهم.
عماد : وينهم؟؟ ما ريت فيهم وحدة .
معتصم : سامحني فيها خوي، الطيور على أشكالها تقع  شوف أفعالك و شوف روحك ورا مني تجري، الصايعه و أختها   كان إنت ناوي البنت المحترمه  حتلقا هلــبا بنات رافعين رؤوس أهلهم و هلبا يتمنوهم.
عماد 'ضحك بإستهزاء' : و النبي فجّر الموضوع معنديش نيه نتناقش على بنات ينضحك عليهم بكلمتين .
معتصم : به به مينفعش معاك النقاش، رأس يابس.
عماد 'ضحك'
معتصم : مع من كنت تهدرز إمبكري؟
عماد 'ضحك' : البنت اللي بنتلاقى معاها.
معتصم : أها، إسمع جرب تفوت البنات و الجو هذا.
عماد 'تأفف' : جايين نغيروا جونا ولا تبي تخليني نغوّل؟
معتصم : نغيروا جونا أكيدة.
عماد : أمالا دير النت هي.
معتصم 'ضحك' : إشتركت و تو نديرلك نقطة إتصال.
عماد 'ضحك' : المهم منصرفوش حق كرت ثاني.
معتصم 'ضحك' : إمالا شني، سمعته مهاب إمبكري.
عماد : خيره؟
معتصم : يبي أيفون x max .. يحسابني مقعمز على بنك روما.
عماد : ماهو إنت مقعمز على بنك روما أصلا.
معتصم : بنك جدك، كان مش من الخير اللي درته لما كنت نخدم راهو مفلّس و منحلمش نشري حاجات جديدة.
عماد : عيب يا قدر و انا وين إختفيت! .. غير قول شن تبي بس.
معتصم : منور.
عماد : بوجودك .. تعالى شوف البنت هذه.
معتصم : ركَّح  فكني منهم.
عماد 'ضحك'
معتصم 'ركب السماعات و فتح أغاني'
عماد : خيره صوتهم كله ع الشارع.
معتصم 'قعد يشوف لـ تليفونه و مش مركز مع عماد'
عماد : إيّح عاد 'قعد يدخن و مرة مرة يكلم في البنات'
___________________________________________________

في الحوش ↓↓

هبه : موها تمشي للدكان.
مهاب 'شافلها بربع عينه' : مش فاضي.
هبه : هالأعمال اللي عندك ... شن إدير مثلا.
مهاب 'سكر تليفونه و شافلها' : نستنفذ في طاقه، مقعمز نتنفس المهم مش فاضي.
هبه : مبردك.
مهاب : به شكرا على المعلومه.
هبه 'فتحت التلفزيون و قعدت تتفرج'
مهاب : باهي كم نحصّل؟
هبه 'شافتله' : نعم؟
مهاب : كان مشيت كم تعطيني؟
هبه : دينار.
مهاب : نعم نعم ؟ .. مصح وجهك، شن بنشري بيه انا ؟
هبه : 2 د
مهاب : زدتي هلبا والله .
هبه : برا أرقد منبيش الدكان خلاص.
مهاب : أحسن، بنطلع للشارع انا.
هبه : قول لأزم شن دخلي انا.
مهاب : يمشي يملّح 'فتح الباب و طلع، قعد يتمشّى شويه  و يتفرج على الناس  و يبتسم لين مـرْ جنب 4 شباب'
الشاب : خيره مبتسم تقول مهبول.
الشاب الثاني : أصلاً من يكون هذا ؟  شن جابه للحي.
الشاب : تعالى إنت تعالى.
مهاب 'شافله' : انا ؟
الشاب : إيه إنت إمالا مني.
مهاب 'وقف قدام الشباب بـبرود' : خير.
سفيان : خيره هكي يدوي هواا!
فراس : خيرك دريه ؟
مهاب : إنتوا اللي ناديتوني شن في.
سفيان ' رمّش عيونه' : إنوض نذبحه را شن الشبحات أهما.
مهاب : تي خيركم إنتوا ؟ .. تنادوني بعدين إديروا الجو، إختصروا.
سفيان 'وقف' : لما تدوي معاي خليك محترم أيواا، خير ما #### ايواا.
مهاب 'عقد حواجبه بإستغراب' : تي شن تخرط إنت.
سفيان 'تلفت للأولاد و تأفف' : تي غر خيره هذا و الله نقتله را.
الشاب : غر فوته شكله جديد، تو يجي عماد يجيبلنا أصله كله.
مهاب : من عماد؟
فراس : هذا الرأس الكبير شن خصك إنت!
مهاب : شن لقبه قصدي.
الشاب الثاني : شن بتخطبه مثلا؟؟
'قعدوا يضحكوا و مهاب يشوفلهم بإستغراب'
سفيان : برا أرجع لحوشكم  خير ما نقتلك، وجهك أخّي مش عاجبني.
مهاب "بهمس" : ساد منظرك كان يشوفك عيل يهرب.
سفيان : شن هياا؟
مهاب : منيش راجع  بنكمل طريقي.
فراس 'وقف' : شوف دريه، أرجع لحوشكم خيرلك متخلينيش نطربقه فيك.
مهاب : شن هو ؟
فراس 'طلع سلاحه ' : هذا.
مهاب 'فتح عيونه بصدمه، لف و رجع للحوش... أول ما فتح الباب إستقبلاته هبه'
هبه : خيره وجهك أصفر شن صايرلك؟
مهاب 'سكر الباب و قعمز' : معاش طالعها أنا بكل، تقول عايشين في غابه.
هبه "بإشتغراب" : شن تقول؟
مهاب : جيبيلي طاسه ميّا .
هبه : به .'مشت للمطبخ'
مهاب : شن النماذج هذه، لا و عماد الرأس الكبير، يا نهار أحرف البلاد ضاعت.
هبه 'مدتله الطاسه' : شن صايرلك ؟
مهاب : فوتي الموضوع 'قعد ساكت لحظات' .. قصدك إنتي تمشي و تجي  من حوشكم لحوشنا  و تمتّي المسافه هذه كلها في شارعنا؟.. معاش تطلعي من حوشكم.
هبه "بإستغراب" : خيرك انت؟
مهاب : شن الأشكال هذه تخطمي و تمُرّي قدامهم  كل يوم، في الجديد لما تبي تجينا كلمي عماد و لا واحد منهم ياخذك من الحوش .
هبه : برا أرقد، ناقصك نوم 'قعمزت تتفرج على التلفزيون'
مهاب 'حط الطاسه على الطاولة و شافلها' : ندوي معاك أنا، كلامي  رسمي را مش بصارة.
هبه 'شافتله بربع عين' : شكلك طلعت للشارع صدقت روحك بابا.
مهاب : تو نكلم أزم انا، علاش نتاعب في روحي معاك.
هبه 'ضحكت بإستهزاء' : كلمه، كان سمعلك أصلا.
مهاب : به 'علّى صوته' .. أزم يا أزم.
أزم 'مد رأسه من باب الدار' : خير بلاك؟
مهاب : تعالى نبيك في موضوع.
أزم 'رفع حاجبه' : لا والله؟
مهاب : والله موضوع ضروري را.
أزم : الملزوم يتعب.
مهاب : تـ '_قطع كلامه صوت الأذآ_'
أزم : صدق الحق، شن تبي؟
مهاب : غر برا صلي، و انا نمشي نصلي بعدين نحكيلك.
أزم : خيرك إنت؟  تتسهوك ولا شني ؟
مهاب : لالا  لكن الصلاة أولى ولا؟
أزم : أكيد .
___________________________________________________

عند معتصم & عماد ↓↓

عماد "بعصبية" : تي هيا يا راجل بنعطلوا عليها هكي.
معتصم "ببرود" : خليني نكمل قهوتي قبل.
عماد 'تأفف' : تي إشربها دفعه وحده و انت تشفط تقول مكنسه.
معتصم 'إبتسم' : نبي نستمخ.
عماد 'مشّى يده على شعره بعصبية' : الـزفت، تي هيا العصر أذّن أكيد وصلت.
معتصم 'تأفف' : تي اللي يسمع يقول أنجيلينا جولي ولا ريانا، هي أكيد وحده مزيته زي باقي الفرخات .
عماد : هذه وحده طرف .. و هيا عطلنا.
معتصم : باهي يا همي به 'خذى طاسة القهوة'.. هي.
عماد 'طلع و ركب في السيارة'
معتصم "بتفكير" : مش عارف كيف بيطلع منظرها، أكيد تلبس في الضيق و القصير و نص شعرها برا  و أكيــدة مدايرة قوس قزح في وجهها  و تتمستك في دوتها 'ضحك بإستهزاء' .. أكيدة  ماهو هذا اللي يطيح الصايع و السكير 'ركب في السيارة'
عماد 'ولع السيارة و طلع بسرعه' : خيرك تبتسم بروحك و تدوي بروحك؟
معتصم : مزاج.
عماد : الله.
معتصم: و الله،  مواليد كم هي ؟
عماد : 2002
معتصم 'ضحك' : فرخه النهار الأسود.
عماد : لا يا حبي .. جيل الألفين كلـه طرووف.
معتصم : حتى التسعينات حلوين  شن ناقصهم؟
عماد :  تي هذا الجيل واعــر  و يعرفوا كل شيء .
معتصم : لكن بالنسبه ليا التسعينات خير، الوقت اللي تربينا فيه أحنا خير من الوقت هذا.
عماد : خخ برا انت و التربية، شن بندير بأخلاقها انا .. أعطيني شكلها و جسمها و بس.
معتصم 'رفع حواجبه بصدمه' : نعم؟ .. تي الأخلاق قبل بعدين منظرها   شن نبي فيها كان حلوة و صايعه ؟
عماد 'ضحك' : هذاكا وين تحلا هيا.
معتصم 'شافله ع الجنب' : صايع، انا عندي أحلى ما في البنت أخلاقها و حشمتها.
عماد : لا لا .
معتصم : أيح عاد.
عماد 'وقف السيارة' : وصلنا.
معتصم : به وينها؟
عماد : شكلها مزال ما وصلتش.
معتصم : والله؟ ... هذا و انت تنق فوق رأسي و هيا و عطلنا و مدايرلي العار حتى من قهوتي مكملتهاش و خليتها و في الأخير مزال ماجتش .
عماد : قهوة شني اللي خليتها؟ امالا هذه المنصوبه شني؟
معتصم : حي و الله رسمي قهوتي 'خذى الطاسه و قعد يشرب'
عماد : أهيا جت.
معتصم : برا لموعدك و انا نستناك اهنا.
عماد : إنزل معاي تعرف عليها.
معتصم : شن بندير بيها 'شافلها'  لا يا راجل  معرفه زي هذه مش لازم منها.
عماد : معندكش ذوق انت 'نزل'
معتصم 'قعد يشوف للبنت بإشمئزاز' : كان مش متحجبه خيرلها، مدايرتلي قصه تقول اول وحده عندها شعر، المشكله الوشاح شيفون و شعرها من برا طالع... سوريتها أقصر من  يوم الخميس مع صحابي، سروالها ضيق للنهارات  و قايماته تقول كانت تسيق في جنان حوشهم ... صابه سطلع زواق في وجهها و مدايره فوقه ألوان شمع امتاع زمان اللي يذوبوا بسرعه 'قعد يضحك على كلامه' ... تي زعما شن يقول هذا  باش هي تضحك كل ثانية... 'فتح المرش ( روشن السيارة) و قعد يسمع'
_________________________________________________
عند عماد ↓↓

البنت 'ضحكت'
عماد : حي عليا من ضحكتك حي.
البنت 'إبتسمت' : خلاص عآد ساد غزل.
عماد 'ضحك' : تحشمتي ولا كيف؟
البنت 'ضحكت'
عماد : شن الضحكة الحلوة اللي تسحر القلب هذه.
البنت "بدلع" : خلاص يا حبي.
عماد : إنتي معاش تضحكي انا معاش نتغزل.
البنت : خلاص معاش بنضحك باهي.
عماد : به.
البنت : ####؟
~~~~~~•~~~~~~•~~~~~~•~~~~~~•~~~~~~•~~~~~~•~~~~
تفــــاعلوا❤🙊

#حنين_الشوق