" يابوتس هو شارطن يقعد معتس خمس دقايق بس ..خمس دقايق
يبي يقولتس شين عيا يفصح عنه "
ظليت متمسكه بمخباته بقوة .. خمس دقايق كيف بتمر على وحدة ملكتها بغرفة مستشفى
بدال ماتكون في بيتها .. كيف بتمر على هالسعادة إلي لفظت أنفاسها الأخيره أول ماوقعت
وكان من المفروض تظل تنبت على شفاة أهلي وهم حولي .. كيف بتمر والصمت يخنقني بدال مايكون ضحكات أهلي تتردد على مسامعي .. يباركون لي .. تبكي أمي من فرحتها..إيه هي قالت لي يانوير بيوم ملكتس مدري تسيف أبتقبل أنتس بتروحين ..؟
وصار عليها تودعني بالبتسا على مصيبتي .. على هالمهانه إلي رضيت فيها مجبوره ..
تركتني أروح ولا شدت على يدي وقالت لا تاخذونها !!! هالحين ماحولي إلا عماني إلي المفروض يحامون ضد هالعطيه .. يرفضونها .. عمي عواد .. هالعم إلي خذلني للمره
الثانيه .. تسان المفروض ما أبني على كلامه شي في صدري .. ولا على حتسي أمي عن فرحتي .. ولا أتأمل في هالعايله إنها تشوفني شي ما ينعطى تسذا بليا مقدمات وبليا تجهيزات وبليا
خواتها وأهلها حولها .. صار يضحك ويلف صوبه هو .. هو إلي ماأعرف من يكون ..؟
تسيف بظل معه في غرفة وحده .. تسيف يخلوني ويروحون عني .. لا يكونون بعد مخططين
إنهم خلاص يتركوني بالمستشفى ويروحون ..؟ إيه يقدرون .. صرت أطالع جدي يتحرك
معطيني ظهره وهو يأشر بيده صوب هالأنسان إلي ماعدت أتذكر أسمه .. فجأه صرت عاجزة
أتذكر أسمه بالضبط .. وكأن أسمه ماعاش إلا في ذاكرة قصيرة المدى وتلاشت مثل ماتلاشى
الحلم فيني .. رفع يده جدي والضحكة الغريبه عالقه في شفاته .. نطق
" يابوك تراها غاليه "
أي غلا ..؟ لفيت صوب عمي عبدالعزيز لقيته سبقهم أول شخص يظهر من الغرفه .. كأنه مهمه أنجزها وأرتاح من همها .. يتبعه جلوي .. بعده عمي منصور وآخر شي جدي ..
من أنا بالنسبه لهم عشان يتركوني تسذا .. حاولت أتحرك .. أنطق بحرف واحد .. عجزت ..
أحس وضعي هالحين أقرب للجنون .. عقلي أحس فجأه يوقف عند نقطه كبير مايظهر
فيها إلا علامات الأستفهام لأجوبة مستحيله .. تتسارع دقات قلبي من سمعت صوت الباب
أتسكر .. وأيديني بدت تنتفض بقوة مع ركبي .. أرجع بخطواتي لورا لين مالصقت في الزاويه
وسريره بالضبط قبالي .. رطوبة غريبه تحتوي كامل ظهري .. وحراره قمت أحس من قوتها
مركزها خشمي وأذاني .. ما أدري وش جاني .. تعمدت أعطيه كتفي وأنا أغمض عيوني ..
يارب مايتركوني ويروحون .. يارب تكفى لا أنكسر أكثر .. يارب .. الصمت تسان هو هو ..
ماأبي أفتح عيوني ولا أشوف ولا أسمع شي .. أبي أطلع من الغرفه .. أتكور على نفسي
وأضم أيديني لصدري .. ماعدت أحس بشي .. بأي لحظة بطيح على الأرض .. كل شي تسان
ينهار فيني .. جسمي أحس يهتز من كثر ما ركبي تنتفض .. أكيد أتركوني وراحوا .. بيخلوني معه .. وش أنا مسويه لهم عشان تسذا يبيعوني ..؟ فجأه صرت أحس فيه يتحرك .. من فوق
السرير .. يتبعه صوت عصى تضرب الأرض بقوة .. ولا زلت مغمضه عيوني .. أبلع ريقي
بصعوبه .. أحاول بس أخذ نفس .. أختنق أنا وعيوني كل مالها وأحسها تجف أكثر .. ثواني
حتى أسمع شي ينسحب بقوة ومع كل سحبه ضربة عصا على الأرض .. يختفي الصوت
حتى أنحني أكثر بظهري وراسي لقدام .. أرص يدي بقوة على بطني ..
