امطري ياخيبة كبار الهقاوي .. وارعديّ

٥٨

بعد الظهر نزل بتال من غرفته للصالة باس راس امه وجلس اخذ فنجان قهوة
ام فيصل: وش عندك صاحي متأخر
بتال: سهرت مع العيال امس
نزلت مهره: صباااحو
بتال: بنصير العصر
جلست مهره: صور لي الحفلة اليوم بنزل سناب
اخذ بتال رشفه من القهوة: غريبه ماحجزتي
مهره: دخلت متأخر ومالقيت تكت
بتال: يوه احنا كلنا انتظار بالموقع وماقدر يحجز الا نواف وحجز لنا كلنا
مهره: ياخي تقهر المواقع تقههر
دخل ابو فيصل البيت: السلام عليكم
الجميع رد السلام
ابو فيصل: ليه جالسين هنا والكل بالمجلس؟ عماتكم من زمان مو جايين روحوا سلموا عليهم
بتال: مادرينا انهم هنا ، الحين نروح
ابو فيصل: يلا انا طالع اغسل وابدل ولاحقكم
مهره: انتظرني بجيب حجابي واجي
بتال: يلا
ام فيصل: بتال حبيبي انتبه تزل بكلمة او تفقد اعصابك قدام عمتك ترا خاطرها ثقييل من الي صار
بتال: شدعوه يمه لاتوصين حريص
جت مهره: يلا؟
قام بتال: يلا
راحوا للمجلس وكان الكل موجود باستثناء انتصار ونجد ومازن
سلموا مهره وبتال على عماتهم وجلسوا
مهره: اشتقتت لكم خير من متى مو جايين
حصه: والله هند كانت تعبانه شوي واروح لها كل يوم، انتو طمنوني عنكم
مهره: كلنا بخير الحمدلله
هند: مهره امي ترا البنات جالسين داخل اذا تبينهم
مهره: ليه وش عندهم؟
هند: والله ماأدري يقولون اذا حطيتوا الغداء بنجي
دخل سيف المجلس واصيل ماسكه يده: السلام عليكم
ردوا السلام كلهم ودخلوا مهره وأصيل بعد ماسلمت اصيل على عماتها
الجد: ابو فيصل وينه؟
بتال: قال يبدل ويجي تو راجع من المكتب
الجد: العمال وش كثر باقي لهم؟ الناس قربت زيارتهم والبيت ماخلص
بتال: باقي يصبغون المكان بس ، ماشفته؟
الجد: لاوالله مالي حيل اقوم له
بتال: كل الي تبيه صار لاتشيل هم

دخلوا اصيل ومهره عند البنات بالصالة وشهقت اصيل: زييينه وحشتينيي
قامت زينه حضنتها: وانتي بعد والله
حضنتها مهره بعد اصيل: اختفيتي كم يوم خير
زينه: اول شيء ضغط جامعه بعدين امي كل يوم تروح لخاله هند
اصيل: ياعمري عمه وجهها تعبان
ليان: ايه الله يقلعه الكلب
ابتسمت زينه وناظرت مهره: اييه عروستنا
ناظرتها مهره باستغراب
زينه: متى نبارك لك انتي ومعاذ
شهقت مهره: فضحتونا ياحيوانات!!
ضحكوا البنات بقوه
زينه: انتي ياحيوانه ليه ماقلتي لنا؟
تغيرت ملامح مهره ١٨٠ درجة من الأحراج: بناات والله استحي وش اقول لكم يعني
ليان: حتى معاذ الخسيس ماعلمني
مهره بدلع: ليان لاتسبينه
ليان: ولا يهمك انتي وياه خسيسين
ضحكت اصيل بقوه: حركات حبايب ماعندنا
لين: بنات نسهر ببيتنا نشوف الحفله؟
مهره: اييه متحمسه لها مره
اصيل: حاسدتهم لدرجة يمكن تتكنسل
ليان: السؤال هو ليه ماحجزنا بدري
اصيل: من الغباء
دخلت ام معاذ: بنات الغداء
لين: مين فيه؟
ام معاذ: الكل موجود يلا لاتتأخرون
طلعت ام معاذ وألتفتت لين للبنات: شكلي مرتب؟
قامت مهره وهي تتنهد: اييه بس يالين والله تعبتيني
ناظرتها اصيل بدون رد وطلعت مع مهره ولحقوهم البنات
سيف: اصيل بابا تعالي جنبي عشان اقشر لك ربيان
همست له مريم: وانا ليه ماتقشر لي ربيان؟
ابتسم سيف و رد بنفس الهمس: اصيده وأطبخه وأقشره ، بس آمريني
ابتسمت مريم وماردت
قام ابو معاذ من مكانه وحط قطعة سالمون بصحن هند: هند ذوقيها بتجوز لك
ليان بمزح تحارش ابوها: اييه ياعمه ذوقيها ذوقيها بالعافية
ضحك ابو معاذ ومد لصحن ليان قطعة ثانيه: وهذي ياحبيبتي بتعجبك بالعافية على قلبك
دخل معاذ بلبس الدوام سلم عليهم
ابو فيصل: غسل يلا والحق على الغداء
معاذ: بالعافية عليكم والله نعسان مره وبنام عشان ماأنام عليهم بالحفلة
بتال: ايه نام واصحى بدري ياويلك ماتقوم المغرب نبي نلحق نتقهوى
معاذ: طيب كلم نواف يجي نطلع من هنا اقرب
بتال: طيب
استغرب معاذ انه مالمَح مهره ودورها بعيونه بين البنات الى ان شافها بس الغريب ان هذي المره كل البنات يناظرونه ومهره منزله راسها من الاحراج ، ضحك وهو طالع وتأكد انهم انفضحوا رسمي وهذا الي كان مايبييه مره تهمه خصوصيتهم وقرر انه لازم يتصرف بالموضوع قريب ، طلع غرفته وناام
وبعد الغداء تقريبًا الكل صار في بيته الا العمّات والبنات