امطري ياخيبة كبار الهقاوي .. وارعديّ

32

راحوا بتال ومعاذ ونواف للوادي وكانوا يحاولون يهدّون بتال الي اغلب الوقت متجاهلهم مايرد عليهم حتى
فقد نواف الأمل معاه: طيب خلاص قوم معاي شقتي نام وراك دوام
ناظر بتال ساعته: لا باخذ اوتيل
نواف: عييب عليك شقتي موجوده وتاخذ اوتيل
بتال بعصبيه مكتومه: نواف اسكت عني انا اقرر وين اروح
نواف: بتال كل تبن والله ماتنام الا عندي
بعد ضغط كبير من نواف ومعاذ اخذ بتال مفاتيح شقة نواف و راح لها ونواف اخذ معاذ يوصله
نواف: السالفه غريبه مالها راس من رجول
معاذ: تهقى ابوي بيعصب لو سألته؟
نواف: ايه ابوك مايحبك تتدخل بشيء اسكت ونعرف مع الوقت
زفر معاذ بضيق: الله يستر من هالسالفه
نواف: انت حاول تهدي الوضع من ناحية الي يأثرون على ابوه لكن لاتكلمه مباشرة
معاذ: طيب لاتمشي بعطيك ملابس لبتال
نزل معاذ اتصل على مهره المنهاااره بكي
ردت عليه بصوت مبحوح: هلا معاذ
اوجعه قلبه عليها وكان وده يخفف عنها بس مابيده شيء: بسم الله عليك اهدي حبيبي كل شيء بيكون بخير
تنهدت مهره: وينه راح؟
معاذ: عند نواف، عطيني ملابس له بعطيها نواف ينتظر برا
توجهت مهره لغرفته وهي تكلم معاذ: ماأدري وش اجهز له
معاذ: اهم شيء ثوب وشماغ لدوامه بكره
مهره: يلا بجهزهم وادق عليك
فتحت شنطة سفر صغيره حطت فيها بلوفراته وملابس ثقيله حتى عطوراته واغراضه الشخصية جهزتها له بشكل سريع وحطتها عند الباب واتصلت على معاذ ياخذها
طلع معاذ لنواف اعطاه الشنطه: اذا رجعتوا من دوماتكم اتصل علي اجيكم
نواف وهو يحط الشنطه بالسيارة: ابشر، وحااول تعرف السالفه عشان نعرف نحلها
راح معاذ لغرفته ورجع اتصل على مهره يحاول يخفف عنها
دخل نواف الشقه بيده اكل ويده الثانيه الشنطه وشاف بتال جالس على الكنبه يهز رجله بسرعه وسرحاان
نزل الاكل على الطاولة والشنطه عند بتال: اهلك ارسلوا لك اغراض
هز بتال راسه ب"طيب"
راح نواف للمطبخ جاب لهم بيبسي وفتح بوكس البيتزا: يارب تاكل بدون وجع راس لان مالي خلق اترجاك
قام بتال اخذ الشنطه بيروح الغرفه: بالعافيه
سحبه نواف غصب: بتال وربي لو ماأكلت ماباكل وتراي من امس مب ماكل
بتال: نواف اكل هذا الاكل قدامك لاتشغلني
سحبه جلسه جنبه يوكله وهو يضحك: ادري ودك اصيل الي توكلك بس الشكوى لله مافي غيري
لف بتال وجهه عنه لكن ضغط عليه نواف واكل معاه شوي
ناظر جواله على رسالة اصيل: صاحي؟
مارد عليها ماوده يكلمها وهو كذا
ناظره نواف بهدوء: لاتسوي بنفسك كذا، على الاقل لااتحرم نفسك من انسانه تحبها
بتال: مابحرم نفسي منها وبكره باخذ قراري وانهي كل هالقرف
نواف باستغراب: وش بتسوي بكره؟
قام بتال: اذا سويته اقول لك
راح لغرفه فاضيه بشقة نواف فيها كنبه كبيره وشبه مجهزه لنوم احد عنده ، نزل اغراضه انسدح على الكنبه وسحب اللحاف يحاول ينام .. الى ان جا الصباح وهو كل مايغفي عشر دقايق يصحى ساعتين
وماكان الوحيد الي مو قادر ينام ، ابوه ماقدر ينام مهما ادّعى عدم الاهتمام وامه مانامت ولا قدرت ترتاح رغم ان معاذ طمنها انه عند نواف ومهره بكت الليل كله ومانامت الا الصباح حتى اصيل كانت خايفه عليه ولا نامت كويسه مهما ادّعت عدم حبها
مر الوقت ثقيل عليهم كلهم بدون استثناء
الصباح رد بتال على اصيل: كنت نايم ولما صحيت انشغلت بالمكتب تو قدرت ارد عليك
بعد وقت ردت اصيل: انا بالكلاس اخلص واكلمك
كمل بتال شغله واستقبل قضايا
واول ماخلصت اصيل محاضرتها اتصلت عليه
بتال: هلا حبيبي
اصيل: طمني عنك خفت عليك
ابتسم بتال بضيق: ماعليك بخير انا ومداوم
اصيل: مابسألك وش صاير بس ابيك تعرف اني موجوده في اي وقت بتتكلم فيه وبصدقك انت بس
بتال: الله لايحرمني منك
اصيل: وين نمت؟
بتال: عند نواف
اصيل: تردها لي تتركني خايفه عليك الليل كله وماتطمني؟
بتال ضحك: تدرين مايهون علي صح؟
ابتسمت: ادري
بتال: خلص دوامك؟
اصيل: لا باقي محاضره هذا انا رايحه لها
بتال: طيب قبل تدخلين، تتذكرين اخر شيء قلته لك بالمخيم؟
اصيل تحاول تتذكر: تكلمنا كثير وش اخر شيء
بتال: بخصوص اثبات حبك لي
اصيل باستغراب: ايه اتذكر
بتال: اليوم او بكره ابي اشوفه
سكتت شوي: كيف؟
بتال: بتفهميني بالوقت الصح
اصيل: لا قول لي خوفتني
بتال: لاتخافين حبيبي مافي شيء، يلا ادخلي محاضرتك وطمنيني اذا رجعتي البيت
قفل ورجع يكمل شغله وهو غرقااان بتفكيره ووجهه تعباان
خلال هالوقت اتصالات امه ومهره مااوقفت من خوفهم عليه طمنهم وقفل جواله
المغرب اتصل بتال على سيف
سيف: هلااا والله بتال
بتال: هلا عمي اخبارك
سيف: الحمدلله بخير انت وش مسوي طمني وين نمت وش صار معاك
بتال: انا بخير لاتشيل همي، ابي اشوفك
سيف: ابد ابشر
بتال: ودك بمكان محدد ولا اختار انا؟
سيف: اذا على الود والله ابيك تجيني لبيتي
بتال: لا ياعمي مالي خلق وجع راس
سيف: خلاص اجل اختار مكان وانا بلبس الحين واجيك
قفل بتال وأرسل لسيف لوكيشن الوادي زي العاده واخذ لهم قهوة وبالطريق كان يتردد صوت ابو نورة
ودي اشيلك وأسافر وأترك العالم واهاجر
حتى تعرف لاجل عينك قد ايه اقدر اخاطر
وصل وبعد دقايق وصل سيف وقف سيارته ونزل لبتال
سيف: هلا والله بالنفسيه
ضحك بتال واعطاه القهوة: افاا ياعمي
اخذ سيف القهوة وخزه: امس يوم اقول لك تنام عندي تمشي وتتركني ليش
زفر بتال بضيق: صدقني ماعاد لي مكان
ضرب سيف كتفه: لاوالله المكان مكانك وبيتي ابوابه مفتوحه لك متى مابغيت
ابتسم سيف: نمشي ولا نجلس؟
سيف: نمشي
كان الجو بارد بس مامنع انهم يمشون بالوادي يتقهوون ويحللون الي صاير
سيف: حتى انا حاولت افهم واقلبها براسي عجززت
بتال: وانا نفسي ماهي رديّه عشان اسرق ابوي وجدي وهذا الي مجنني شلوون يشكون فيني انا
سيف: والله خابرك يابتال وادري بس اعذره الانسان بوقت الغضب مايدري وش يسوي ولا وش يقول
بتال: ماصرت الومك يوم تركت اهلك وسافرت قسم بالله يوصلون الانسان حده
ضحك سيف: بس انا الوم نفسي
ناظره بتال باستغراب: ليه
ابتسم سيف بحسره وهو يناظر طريقه: احس ربي ماوفقني بحياتي وحرمني من سعادتي اول مابدت بسبب عدم رضاهم علي ومع كذا كابرت ولا اظهرت لهم اني ندمت
بتال: بس هذي حياتك وعدم رضاهم عنها ماله اساس مااشوف انك غلطان اصلًا
سيف: هالكلام ماأقدر اقوله ل اي احد بس لازم تفهمني، من وفاة نورة كنت اراجع كل تصرفاتي مليون مره واحس اني ضايع ولا عارف وش اسوي وكملت حياتي عايش على ذكرياتها واصيل الي تجمعنا بس، لك ان تتخيل كمية العلاقات المتاحه لي وقتها لكني مااقدرت وهذيك الايام الي قضيتها وحيد كانت كافيه تخليني اراجع ماضيي كله واوصل لأفكار واستنتاجات كثيير اهمها اني ماتوفقت لأنهم مو راضيين عني
بتال: تحبها لهذي الدرجة؟
سيف: ماعمري حسيت اني حي إلا معاها ومن راحت احس اني متشتت ضايع ماعاد اقدر الملم نفسي من جديد
بتال: ومريم
سيف تنهد: كل يوم مع مريم هو تأنيب ضمير ، عليها لأنها ماتستاهل زواجها من شخص مجبور عليها وعلى نورة الي مافبالي الا اني اخونها
بتال: بس من حقك تعيش حياتك بعد وفاتها مو منطقي انك بتوقفها وتقعد خلاص
تنهد سيف وقال بضحكه: هي وقفت اصلًا انا ماوقفتها
كملوا كلامهم سوا لمدة ساعه
وهم راجعين لسياراتهم قال بتال: عمي قبل تمشي بكلمك ف موضوع
سيف: امر حبيبي تبي شيء؟
بتال: مايامر عليك عدو، ماراح اراوغ واعطيك مقدمات انا طالبك يد اصيل
ناظره سيف مصدوووم ان بتال تحديدًا على كثر هواشهم يبيها
بتال: واعرف ان الوقت غير مناسب ولا طريقتي لائقه ، بس انت شايف الوضع كيف وعشان اكون صريح معاك انا مالي حياة بالرياض كلها واخذت قراري أن تم الموضوع ودي اتممه بأسرع وقت ونسافر برا
كان موقف سيف صعب جدًا وملياان حيره يرضي بتال ولا يرضي اهله ولا اصيل الي مايدري وش قرارها: شوف بتال ماراح اكذب عليك واعطيك اعذار معتاده، والله انك رجل واتمناك لبنتي بس ماأخذت درس من كلامي قبل شوي عن حياتي لما ماأرضيت اهلي؟
بتال: عمي ارضيهم ب ايش؟ انا ماسويت شيء
سيف: والله يابتال اعذرني تعرف ان اصيل عندي بالدنيا ولا أقدر افرط فيها واعرضها للتشتت والمصير الي عشته انا برا ، وماصدقت تجي اللحظه الي يرضون علي اهلي فيها وبرجع لنقطة الصفر لو زوجتك اصيل بهذي الحالة
سكت بتال بصدمه للرفض الي ماتوقعه ابدًا كانت اصيل اااخخرر وجهه له بهذي الحياة واخر امل يصلح الخراب الي صاير بصدره بس انحرم منها الحين
سيف: والله ان العيب ماهو فيك ابدًا بس كل الظروف تمنعني اني ارمي اصيل وسطها واربطها بهذي المشاكل
ضحك بتال بخيبه: اي ظروف ياعمي؟ اني سرقت ابوي؟ الا بنظرك العيب فيني ومصدق الموضوع معهم عشان كذا ماتبي اتزوجها وانا ككلل الظروف الي ماتبي تربط اصيل فيها
قبل يتكلم سيف قاطعه بتال: حقك وابسط حقوقك لاتبرر لي هذي بنتك وانت حر
ركب سيارته بدون مايعطي سيف فرصه يرد عليه وزي العاده انطلق بسرعه جنووونيه
ناظر سيف سيارته الي اختفت بثواني وتنهد: الله يستر عليك ويهديك
اما بتال الي راح لسيف بلهفه ودي اشيلك وأسافر وأترك العالم واهاجر رجع بثقل الي يادوب شايل ثيابه رجع بثقل كلمات الاغنية الي يسمعها وانتفض كل جزء بجسمه عند
ماهو معقول ولا مقبول اعيش الفكره ذي ياعم
بعد بنتك انا احلف لك علي تحرم بنات ادم
ولو دنيااي حكاية ناي بغنيها بجرح وهم
وهذا القلب ياعمي صعب حلف بعشقها وأقسم
بقولك شيء مادامي حي اموت وغيرها يحرم