قبل العصر صحت مهره من النوم تمغطت وجلست تسترجع الي صار امس .. ابتسمت وأرسلت للبنات: وش رايكم سهره بالسطح اليوم؟
قامت اخذت شاور دافي وجلست قدام المرايا تجفف شعرها فجأه انفتح الباب
التفتت مهره وشافت بتال يناظرها بأستغراب
بتال: وش فيك اطق عليك الباب ماتردين!
ضحكت مهره: ماأسمعك من الاستشوار انت وش فيك؟
دخل جلس عندها على السرير: غريبه صاحيه متأخر
قامت مهره لكورنر القهوة بغرفتها تسوي لهم قهوة: احس من ارهاق امس رجعت ماأشووف من التعب وباقي جسمي يوجعني شوي
ضحك بتال: زيرو لياقه
مهره: تصدق عاد افكر ادخل نادي
بتال: قرار موفق بدل جلستك بالبيت ، بعدين ليه ماتكملين دراستك؟
اعطته قهوته وجلست قدامه تتقهوى: ابي اكمل بس انتظر يبدأ السمستمر الجديد
بتال: حلو الله يوفقك
مهره: وأنت؟ مابتكمل شغلك؟
زفر بتال وهو يتقهوى: ماأتوقع
مهره: وليه ماتتوقع مو منطقي بتكمل حياتك كذا بدون شغل
بتال: ادري بس مره طابت نفسي من المكتب وكرهته ، يمكن اتوظف بمكان
مهره: حرام بتال وشهادتك؟
بتال: ايه عادي اتوظف بشهادتي
مهره: مابضغط عليك بس تأكد ان فرصتك كبيره بكل مكان شهادتك قويه ومعدلك عالي وعندك خبره
ابتسم بتال وسند ظهره على سرير مهره: ليه بتكملين دراستك؟
استغربت مهره سؤاله: وليه ماأكملها
بتال: يعني مافي شيء مشغل بالك وتبين تتناسينه؟
لازالت مهره مستغربه اسألته: وش بتوصل له
نزل بتال القهوة على الطاولة وتكتف: موضوع حمد ماأثر عليك؟
ضحكت مهره: يووه بتال متأخر مره السالفه ماتت
بتال بنفس الجديه: ماماتت بالنسبة لي فكرة ان هذا الواطي تجرأ يجي بيتنا يطلب يدك ولما طلع مد يده على معاذ ماااتعدي بسهولة عندي
مهره: والله انا بالنسبة لي ماأثر فيني ابدًا انقهرت وخفت على بابا واعمامي والعيال بس لأن الهمج كانو كثير ، اذا فيه شيء واحد ضايقني هو انهم تضررو بسببي
مسك بتال يدها وشد عليها: وبالنسبة للبقيه ماأحد ازعجك بكلامه؟ قولي لي
ابتسمت مهره من حنيته معها: والله لا ، وش مناسبة هالكلام
بتال: مريتي بالموضوع وانا مب موجود اكيد بيشغلني وأفكر فيه ، والله ياأن قلبي محرووق والود اني افرشه بالأرض بس عمي سيف رافض ويقول ان اجرائات القضيه ماشيه لصالحنا
مهره: بتال والله مافرق معاي ابدًا والموضوع مايخطر ببالي اصلًا بالعكس الحمدلله اني عرفته قبل يكبر شيء بيننا
بتال: طيب لو ازعجك اي شيء كلمييني لاتترددين طيب؟
قربت مهره باست راسه: من عيوني
قام بتال: بطلع النادي اجيب لك شيء وانا راجع؟
مهره: بليز اذا عندك وقت تجيب لي حلا بيجون البنات يسهرون عندي
بتال: طيب ابشري
طلع بتال بعد ماجلس جلسته المعتاده مع مهره وارتاح لما تطمن عليها
وكذلك مهره طلعت تبلغ العاملات يجهزون السطح قبل تغرب الشمس ونزلت لامها وابوها بالصاله يتقهوون باست راسهم وجلست
ابو فيصل: كيف طلعتكم امس؟
مهره: فاااتك يابابا تجنن مره انبسطنا صدق عمه هند ماقصرت
ابتسم ابو فيصل من فرحتها: سولفي لي وش سويتو
بدت مهره تسولف معاه الى ان شارفت الشمس على الغروب وطلعوا الرجال لمجلس الجد وأجتمعوا مع هند وحصه
ابو معاذ: هند صارحيني وش سر طلعتك الي الكل راضي عنها؟
حصه: ايييه ماعمرهم اتفقوا على شيء نعاني بالسفر ونعاني على طلعة المزرعة بس سبحان الله هذي الطلعه الكل راضي عنها
ضحكت هند: عشان تعرفون ان مافيه عمه او خاله افضل مني لعيالكم ، والله مااتركت شيء بخاطرهم الى ان خربوها ولعبوني معهم
ضحك سيف: بذمتك هند انتي الخوافه لعبتي؟؟
هند بضحك: امانه مافضحتني اصيل عندك؟ والله لعبووني
تنهد سيف لأنه مايتكلم مع اصيل ولا شاركته اي شيء صار بطلعتهم ، بنظره ان اصيل تبي تحرجه وتصغر موقفه قدام اهله لما تتصرف بطريقتها هذي وتذكر تناقضاته امام الجميع لذلك قرر يقسى عليها بعقابه هذي المره ومايرحمها
आप पढ़ रहे हैं
امطري ياخيبة كبار الهقاوي .. وارعديّ
रोमांसمعاذ: انت متى بتيأس؟ خلاص يكفي عناد يكفي مشاكل العايله كلها تشيل همكم لا اجتمعتوا ابتسم بتال وقال: تدري خالد الفيصل وش يقول؟ أحب أعسف المهرة اللي تغلى وأحب أروض كل طرفٍ يموقي
