بعد أربع ايام في لندن
ابو اصيل ينادي: يلا بتروح علينا الرحله
اصيل: بابا ترا جالسه احاول اقفل الشنط ماتكفي كيف اخذ اغراضي كلها؟
ابو اصيل وهو يناظرها: بتاخذين الاثاث معنا؟ خلاص اربع شنط واذا بقى شيء نرجع نجيبه بس خلينا نطلع الحين
قفلوا الشناط وطلعوا للمطار
قبل وصولهم بساعه للرياض
الجد: هاا ياعيال كل شيء جاهز البيت والغداء والمجلس ماناقص شيء؟
ابو معاذ: لا يبه كل شيء جاهز
في مجلس النساء
الجده عفراء: ام فيصل الله يعافيك قولي للعيال يبخرون المجلس اخاف ينسون
ام فيصل: لاتخافين انا مفهمتهم كل شيء انتي ارتاحي ولاتشيلين هم شيء
الجده عفراء بعبره وعيونها تلمع: ٢٣ سنه ماضميته ولا شفته لاتلوميني لو فرشت له الرياض ورد اليوم
ام فيصل تطبطب على كتفها وتبتسم: قرة عينك اليوم بيجيك وجايب لك حفيده بعد وش تبين اكثر
الجده عفراء بإشمئزاز: قطيعه ريحة نوره لو بكيفي ما اشوفها ولا تدخل بيتي
حصه: يمه ما يصلح هالكلام الأدميه توفت وانتو للحين تتكلمون فيها ، البنت يتيمة ام لو احنا اهلها ما احتويناها مين لها غيرنا؟ اذا مو عشاني عشان سيف! مانبي نخسره مرتين
الجده: والله انا مو كاسر ظهري الا سيف ولا اي انسان شايل دم نوره الود ودي مايدخل لي بيت
اعتلت اصوات الرجال وترحيبهم وصوت اطلاق النار معلنه وصول سيف ابو اصيل بعد ماراح ابو فيصل يستقبلهم من المطار
ابو اصيل دخل على ابوه الجد خليفه بعيون مليانه دموع وهو يتذكر كيف طلع من عندهم اخر مره وكيف تغير شكل ابوه من أخر لقاء لهم، حضن ابوه وهو يحاول يمنع دموعه من النزول لكنها خانته وإنهار في حضن ابوه
في هذي الأثناء كل الانظار توجهت لاصيل لما نزلت من السيارة بدون عبايه بفستان ناعم وشعرها الطويل مفتوح وكانت صدمه لعمامها قبل عيالهم كيف تطلع قدام العيال كذا؟ تجاهلت كل هذي النظرات وراحت ورا ابوها سلمت على جدها بعدين اعمامها واخذها عمها لمجلس النساء
في مجلس النساء
دخل أبو فيصل ووراه أصيل
أبو فيصل قرب لامه وباس راسها وسلم على اللي في المجلس ووراه أصيل مستغربة نظراتهم الغريبة لها
أبو فيصل: يمه هذي أصيل بنت أخوي سيف
الجده بإشمئزاز وتطنيش: وين سيف؟
أصيل بإستغراب وهي كانت ماده يدها للجده عشان تسلم: ترى مافيني جرب عشان ما تسلمون علي
الجده: دم نورة اللي يمشي بعروقك أنجس من الجرب والأمراض
أول ما فتحت اصيل فمها تبي ترد صادف دخول أبوها للمجلس وإرتفعت الأصوات والتراحيب والبكاء
في مجلس الرجال بعد ما طلع أبو اصيل منهم كانوا العيال جالسين جنب بعض ويتكلمون
بتال: هذي ما تستحي على وجهها جايتنا كذا؟ وعمكم هذا كيف راضي انها تمشي معاه بدون عباية
فيصل: البنت مولوده وعايشه برا كنت متوقع تجي بعباية راس؟ دلخ انت
بتال: واذا كانت مولوده وعايشه برا؟ الحين ماهي برا وتحمل اسمنا وعايشه بيننا يعني غصب عنها تحترمنا وتحترم عاداتنا وتقاليدنا وتسنع نفسها هي وابوها
عبدالعزيز وهو يضحك: بس والله ياهي حلوه الكلبه
فيصل بإستنكار: بنت عمك تراها حشم وغض بصرك
بتال وهو يقوم من بينهم: اذا هذا ولد عمها وقال كذا وش بيقولون عننا الناس؟ يلا هذا العم اللي تبونه وفرحانين فيه ما عرف يربي حتى
ولأول مره بعد ٢٤ سنه اجتمعت عائلة الجد خليفه
الجد خليفه: رجل خلوق جدًا وكريم مع الكل وصارم الى حدٍ ما وعنده حدود محد يتعداها لكن يحب عياله ووفر لهم حياة جدًا كريمه
بيت ابو فيصل
ابو فيصل "منصور": الولد الكبير للجد خليفه ماخذ من صفات ابوه كثير ومسؤول جدًا عن العائلة كاملة ابوه واخوانه وماسك معارض ومزارع ابوه
ام فيصل"شيخه": تزوجت صغيره وكبرت وسط العائله كأنها احد بناتهم حنونه مره عليهم وتحبهم ومره قريبه لعيالها
فيصل: ٣٠ سنه اكبر عيال منصور انسان هادي ومحترم ومايحب يزعل اهله ابدًا متزوج بنت عمته انتصار
مهره: ٢٨ اكبر بنات منصور والبنت المفضله عند الجد خليفه وسماها مهره من حبه للخيول وطلعت خيّاله
بتّال: ٢٦ ثاني اولاد منصور واكثر شخص يحتوي اهله ويحبهم لكن عصبي مره ومتهور وهذا اسوأ مافيه ومعروف عنه هوسه بالخيول
بيت ابو معاذ:
ابو معاذ "عامر": ثاني عيال الجد خليفه هادي وماله بالمشاكل ابدًا لكن صارم بتربيته لعياله
ام معاذ: "هيفاء" بنت عمهم، انسانه خلوقه ومحترمه ومشغوله في نفسها وبيتها وعيالها
معاذ: ٢٧ نفس هدوء ابوه وبعيد عن المشاكل ورغم اختلاف شخصيته عن بتّال قريبين لبعض
ليان: ٢٥ عكس عايلتها تمامًا مرحه وتحب الازعاج والطلعات فيها حياة مره
لين: ٢٢ فيها من تهور الين كثيييير لكن متردده وخوافه ماتتصرف لحالها ب اي شيء
بيت ابو اصيل
ابو اصيل "سيف" : اصغر عيال الجد خليفه وكان المدلل والي شايل اهله بعيونه لكن رفضو زواجه من انسانه يحبها تركهم وسافر برا تزوجها وتوفت بعد فتره قصيره للاسف واكتفى بذكرياته معها ولاتزوج بعدها وشايل اصيل بعيونه
اصيل: ٢٣ سنه البنت الوحيده لأبوها تحبه كثير وماتعرف عائلة بحياتها غيره علّمها كثييير على القوة لكن بقت البنت الدلوعه ماقدر يغيرها
هند ام عبدالعزيز: انسانه ما تحب المشاكل وكل حياتها تحاول تصلح بينهم وتحاول تهدي نفوسهم، متعلقه بأخوها ابو اصيل جدًا والوحيده اللي كانت تدعمه في قرار زواجه
إنتصار: ٢٨ طيبه وحنونه ومرحه، تحب اخوها عبدالعزيز ومتعلقه فيه مره
عبدالعزيز: ٢٥ عكس امه تمامًا، يتغذى على المشاكل ومو تارك بنت بالعايله في حالها
نجد: ٢١ نفس شخصية امها تمامًا وتوافق امها بكل شيء
حصه ام باسل : أصغر بنات الجد خليفه، عايشه حياتها بين بيتها وبيت اهلها وشايله مسؤوليات كثيره
باسل: 26 اكبر همومه وظيفته، منشغل في نفسه عن الناس
مازن: 23 هادي جدًا وانسان قنوع ويتقبل كل شيء
زينه: 18 أخر العنقود، مرحه وغيوره وتحب كل شيء يكون لها هي لحالها
YOU ARE READING
امطري ياخيبة كبار الهقاوي .. وارعديّ
Romanceمعاذ: انت متى بتيأس؟ خلاص يكفي عناد يكفي مشاكل العايله كلها تشيل همكم لا اجتمعتوا ابتسم بتال وقال: تدري خالد الفيصل وش يقول؟ أحب أعسف المهرة اللي تغلى وأحب أروض كل طرفٍ يموقي
