امطري ياخيبة كبار الهقاوي .. وارعديّ

31

دخلوا الخيمة الكبيرة جلسوا يشربون شاي ويسولفون وكان الهواء باااارد

لما معاذ شاف مهره مسكت جوالها ارسل لها: وش فيك؟ ماقدرت اسألك قبل شوي
مهره: وش فيني؟
معاذ: وجهك للحين مرعوب مهره وماتحركتي من مكانك وش صار معاكم؟
مهره: لاتشيل هم حبيبي ماصار شيء
معاذ رفع عيونها وناظرها بشك ورجع يكتب لها: لاتكذبين علي انا شايف الخوف بعيونك، مو معقول بس الصراخ سوا فيك كذا
مهره بس كانت تبي يتقفل الموضوع: ارجوك معاذ خلاص كلكم تسألوني كم مره تبون احلف لكم ان ماصار شيء
عصب معاذ من طريقة كلامها: شدعوه اكلتيني تراي كنت بتطمن عليك بس! خلاص بكيفك
زعلت مهره من نفسها اعتذرت له وقفلت جوالها وسندت راسها على كتف اصيل
ناظرتها اصيل: وش فيك؟
مهره ابتسمت وهي عارفه ان اصيل بتفهمها: مصدعه مانمت كويس
ضحكت اصيل: لو سمحتي هذي اعذاري انا
مهره بابتسامه: اسمحي لي استخدمها لو تنفع
همست اصيل: استخدميها بس مب علي وش فيك
مهره: تتوقعين الشخص الي كان يركض هو البنت الي تصرخ؟ يمكن كانت تستنجد فينا
اصيل بعد لحظات تفكير: ماأحس .. الي شفته كانت هيأة رجل
مهره: مب قادره ارتاح
اصيل: تبين نطلع نشوف عشان ترتاحين؟
مهره ناظرتها: تحسين بنلاقي شيء
رفعت اصيل اكتافها: مادري، بس يمكن تتطمنين
مهره: اصيل تحسين احنا جريئات ولا خوافات؟ عشان اعرف احنا قد هالشيء او لا
اصيل ضحكت: تبين تغامرين بناء على احساسي؟ احنا خوافات ركضنا من صراخ وكنا بنموت رعب
بعد تفكير قالت مهره: بنروح عشان يرتاح ضميري بس
اصيل: بسوي الي تبينه
وقفت مهره وقالت بصوت مسموع: اصيل تعالي عندي بنام خايفه
اخذت اصيل جاكيتها وقامت معها للخيمه تركو اغراضهم فيها اخذو جوالاتهم بس وطلعو يتسحبون بهدوء، كانوا جريئات جدًا رغم انكارهم لهالشيء وأصيل تحديدًا ممكن تكون مستعده لأي مواجهه
مهره: احس اني خايفه
اصيل وهي تتمشى بكل برود: حتى انا
ناظرتها مهره بعدم تصديق
اصيل ناظرتها وهي تضحك: وش فيك والله صدق خايفه ترا بتال فصل علي قبل شوي
مهره بصدمه: بتاال؟
اصيل: ايه، تهاوشنا شوي
مهره: و ايش صار؟
اصيل رفعت اكتافها ب لامُبالاة: قلت له 
مهره شهقت بخوف: مريضه انتي؟؟
اصيل: وش اسووي كنت ابيه يسكت اشغلني
مهره بأنفعال: بوسيه اضربيه ازعلي طيحي سكتيه ب اي طريقة
اصيل: قال مابيسوي شيء
مهره ضحكت: صدقتيه؟ ماراح ينام الليل بيوقف يراقب المكان ادري
اصيل بهدوء: وش اسوي فيه مهره ماكان بيسكت الا لما يعرف انتي تعرفين عناد اخوك
تنهدت مهره: خلينا نرجع اجل لأنه هذي المره بيذبحنا لو شافنا طالعين الحين
ناظرتها اصيل بانتقااد: منجدك؟ ساحبتني بالبرد وبتواجهين المجهول قدامك اخرتها بترجعينا عشان بتال؟
مهره: انا بس بفهم وش الطريقه الي يعاملك فيها وتخليك ماتشوفينه شيء كذا! تراه مجنون اذا عصب بركااان ماتعرفينه
رجعت معها اصيل الي تنرفزت شووي من تراجعها وماتكلمت
وصلوا للمخيم وقبل يدخلون حدوده شافهم بتال كان واقف يكلم
قفل جواله وتوجه لهم بسرعه وهو معصصبب: وين كنتوا؟
اصيل ببرود: نتمشى
بتال ارتفع صوته: مايكفي الي صار؟؟
اصيل بنفس البرود: ارفع صوتك اكثر خليهم يطلعون يشهدون هوشه عاشره بيننا
مسك يدها بقوه وناظرها بعيون حمراااء من العصبية: تحسبيني استهبل معك؟ محد بعينك تمشين وترمين كلام الكل بالجدار
غرست اظافرها بيده: وانت تحسبني استهبل لما اقول لك ماأعديها لك في المره الثانيه؟ ايه محد بعيني
مهره بخوف: مب وقت هواشكم خلونا ندخل لايطلع احد
ناظرها بتال بحده: لاتتوقعين انك طالعه منها حقك بيجيك
دفته اصيل بأنزعاج: يووه طفشنا من تهديداتك خلاص كل وحده فينا عندها ابو لاتسوي نفسك مسؤول عن الكل بتال
سحبها من يدها وقال وهو رايح: مهره ادخلي
فلتت اصيل يدها: خير ان شاءالله
رجع مسكها وكمل طريقه بدون مايرد عليها ، ابعد عن المخيم شوي ووقفها قدامه: وبعدين معك انتي؟
مسحت اصيل على حواجبها متجاهلته: وبعدين معاي؟
بتال بصراخ: ايه وبعدين معك
اصيل بهدوء: تصرخ بوجهي بتخوفني يعني؟
بتال: لا انا داري انتي مايقدر عليك الا ربك
اصيل: اجل وش تبي؟
صرخ بتال بصعبيه: اصيييل لاتستفزينيي
صرخت بوجهه لأنها ماصاارت تتحمل اي ضغط من اي احد: انت الي لاتستفزني! حبني زي العالم والناس ولا فكني من حبك المريض الي كله تدخلات وغيره تقرف وتقييد
ضحك بتال بصدمه: انا مقيدك وغيرتي تقرف؟
اصيل بانفعال ودموعها بدت تنزل لأن بتال كان اخر مكان امن بالنسبة لها وساءت الأمور معاه: حجابك ملابسك لاتطلعين متاخر ارجعي البيت لاتطلعين بعيد خلاص بتال خلااص كل ماأبي اسوي شيء اتنفس فيه الاقيك تخنقني بعد لاتتوقع ان عندي قدره تحمل لأي شيء
بتال حن عليها لما شاف دموعها لأنه عارف انها بفتره سيئه بس برضو عزت عليه نفسه: اذا تفسرين اهتمامي وخوفي عليك بهذي التفسيرات الطفوليه التافهه ماعندي اي رد صراحه، خلاص روحي ادخلي
اعطاها ظهره وابعد اكثر طلع الباكيت من جيبه ووقف يدخن
حست بتأنيب ضمير لانها عارفه انفجارها بسبب ضغطها وهو من فتره تاركها براحتها رغم انه يجااهد نفسه عشان يتحمل
تقدمت له شوي: ناظرني بتكلم معاك
نفخ الدخان من فمه: ادخلي
تقدمت وسحبته من كتفه: مب على كيفك
ناظرها بعيون حمرااء: ماأبي اسمع صوتك
امتلت عيونها دموع وناظرته بكمية تساااؤلات لخصتها ب: كان لسانك ليّن علي متى قدرت تحده؟
بتال بهدوء: صدقيني لو اني املك صبر ايوب بطلع عنه طول ماأنا معك، اصيل تتوقعين بعمري كله توددت لأحد؟ صبرت على تصرفات احد؟ والله بعمري مارضيت بذله ولا سعيت ورا رضا ايًا كان ليه تتوقعين انك بترمين فيني يمين ويسار وببقى اسعى وراك؟
اصيل: مارميت فيك يمين ويسار ولا انتظرتك تسعى لي بس أعرف اني أحبك .. كثير عليك تتحمل هذا الحب؟
بتال: وريني هذا الحب انا راضي فيه وبتحمله بس وينه؟ ماأشوف الا انسانه تجابهني بكل شيء تعامليني كأني عدو يفرض سيطرته عليك مو حبيبك
اصيل: جاريتك كم مره وارضيتك وحاولت اوريك اني احاول عشانك قدّر هذي المحاولات على الاقل
بتال رجع لعصبيته: لاتقولين انك حاولتي عشاني! اصيل انتي خليتيني اتهبد بشوارع الرياض واصرخ زي المجنون لأنك قررتي تعاقبيني بشيء انا ماسويته! خليتيتي اشوفك بمكان كله عيال وعطرك واصل اخر الشارع وماأتكلم عشان ماأضايقك
صرخ بوجهها: اشوفك كل صباح فاتحه شعرك مو لابسه عبايه كأنك طالعه من قدام جدار متجاهله النار الي بصدري وبرضو ساكت عشان ماأزعلك اذا بنتكلم عن التنازلات حطي كل هذا بعين الاعتبار
نزلت دموعها ولفت وجهها عنه: قد تكلمنا بهذا الموضوع وقلت لك حبيتني وانا كذا خلاص ارضى فيني كذا
وقف يدخن بهدوء وسط صمت للحظات: وانا هذي طريقة حبي .. معقده متخلفه مليانه تعقيد تقرفك وماتناسب بيئتك الي جيتي منها ، وهذا حبيبك الرجعي الي قلتي بكامل ارادتك انك تحبينه انا مافرضت نفسي ولا بفرضها عليك لو فعلًا تحبيني هذي فرصتك لأظهار حبك! حبيني بشكل لائق واحترميني واحترمي طريقة حبي لأن خلااااص وصلت حدي ياأصيل ماعاد اقدر اقدم لك مثقال ذره وأنتِ كذا
بعد ماقيّدها واظهر لها ككلل عيوبها معاه ماكانت قادره تجادله بحرف واحد: تمام
بتال: مابنتظر منك جواب الحين، روحي ادخلي
اصيل: ماأحتاج افكر بجواب، أحبك وماعندي اي استعداد أخسرك
بتال ابتسم: وانا أحبك بس وريني هالحب ماأبي بس اسمع فيه
باست خده ورجعت للمخيم بدون رد تركته غرقااان بأفكاره فيها
دخلت الخيمه وشافت مهره بالفراش مانامت تنتظرها
اصيل بهمس: ليه صاحيه؟
مهره: تأخرتي خفت عليك
اصيل ضحكت: ماعليك مابيصيرلي شيء ارتاحي
مهره: عصب عليك؟
انسدحت وتلحفت: ايه، تهاوشنا
مهره: ليه وش صار؟
ناظرت اصيل البنات نايمين وقربت تهمس لها بمختصر الي صار
مهره بأستغراب: كل هذي الهوشه انتهت بكذا بس؟
اصيل: لان محد فينا وده تكبر
مهره: اصيل تراه مره يحبك صدق لاتخسرينه
خزتها اصيل وابتسمت: هو الي بيخسرني لو صار شيء
ضحكت مهره وتلحفت: ياكرهي لنرجسيتكم سبحان من جمعكم
ناموا البنات بتعب ماصحوا الا نهاية الصباح على اصوات الباقي
الجد بصوت عالي: ياابو معاذ مو كذا يسوون الكبده
ابو معاذ ضحك: اتركني ثانيه وحده اشتغل يايبه ماعطيتني فرصه
ضرب الجد كفوفه ببعض بخيبه: ياحيف ماأنتو قادرين على الفطور صدق حياة الخدم والطباخين ماسوت فيكم خير
ضحكت حصه: شدعوه يبه كأننا مانستاهل خيرك
الجد: لا يابنيتي بس الواحد لازم يكون عارف بديهيات زي كذا لو احتاجها فجأه
الجده: مايحتاجونها ياخليفه حياتهم غير حياتنا واحتياجاتهم تفرق عننا
سيف بمزح: لاتسوون فيها مدركين حياة البر والشقاء تراكم طالعين من قصور وقتها
الجده: تعقب ماصدقت
الجد: ياليتني طالع من قصر كان ماجاهدت بحياتي عشان اعيشك بالرفاهيه الي انت فيها الحين
باس راسه سيف: صادق والله عيشتني بأفضل حال ماتقصر
هند: سيف تتذكر لما كنا صغار ايام نخيم اسابيع بالمخيم القديم؟
سيف ضحك: اتوقع ابوي كان يندم على اللحظه الي يطلعنا من البيت فيها
ابو فيصل: ماألومه فيكم انتو الاثنين بالذات
طلع بتال من الخيمه رايح يغسل بوجهه النوم: خلاص ننام ونصحى على ماضيكم كأن محد عنده ماضي غيركم ماتتركون احد ينام
هند: اييه تقولها لأنك ماعشت وقتها والله ان..
بتال قاطعها: ان ايامكم وطلعاتكم احلى من ايامنا وحياتكم كانت ابسط وافضل ادري ادري عمه خلاص
ضحك سيف: وش مسويين فيهم من سواليف الماضي؟
بتال: كل جلسه ياعمي يسبون بوقتنا وجيلنا وماعندهم سالفه الا حياتكم لما كنتوا بعمرنا
سيف: ماعليك وانا عمك عيشها زي ماتبي وواكب جيلك لاتسمع لأحد
جلس بتال عند ابو معاذ يطبخ عنه: قول لهم هالكلام انقذنا
ابو فيصل ضحك: انت وراك قايم بشرك علينا
طلع معاذ من الخيمه: لأن سواليفكم حاضره حتى بأحلامنا الى ان صحيتونا
ام معاذ: هذا تالي السهر
طلعوا مازن وفيصل من الخيمه
حصه ناظرت مازن وبكل عفويه سألته: وين باسل ماصحى؟
ناظروها كلهم بصدمه ومحد قدر ينطق حرف
مازن لازال تحت صدمة سؤالها: يمه وش فيك؟
استوعبت حصه بعد ماأنتبهت لنظراتهم وللصمت الي صار ونزلت دموعها بدون ماتتكلم
قام سيف حضنها يهديها هو ومازن، وبتال ترك الي بيده وطلع برا يدخن بعيون مليانه دموع وصورة حادث باسل في باله ، الاغلب ماقدر يقاوم دموعه وصار الجو كئييب جدًا
وبعد محاولات من سيف وهند وخروج البنات من خيمتهم قدروا يغيرون الجو شوي
سيف: اصيل للحين عندك خبره بالرماية؟
اصيل: ماأدري من زمان ماتدربت ولا استخدمت سلاح
سيف وقف: قومي نجرب
هند: لا حبيبي مب على كيفك انت وبنتك تجربون نبي اعمارنا
اصيل: حرام عليك عمه والله اعرف
سيف: اعقبي بس لاتشككين بقدرات بنتي
ابو فيصل: عاد نشوف ونحكم عشان مانشكك فيها
مسك سيف يد اصيل واخذ سلاح الرمايه: انا اعرف قدراتها حتى لو انقطعت عن التدريب
الجده بنظرات ملياانه انتقاد: عاد الله اكبر بنت وش بتستفيد منه
مسكت اصيل السلاح من يد ابوها وطلعت من حدود المخيم وهي تجهزه متجاهله ازعاج جدتها
معاذ: عمي صدق تعرف؟ اذا تعرف عندي سلاح رمايه اولومبي يرمي لمسافات بعيده
سيف: ارتداده قوي؟
معاذ: ايه
سيف: لا ماأبيها تغامر بسلاح يمكن ماتتحكم فيه وبمكان مفتوح بس جيبه احنا نرمي فيه
بتال: بتصيدون؟
سيف: تعرف تصيد؟
بتال: اعرف لكن مو فنان صيد عاد
سيف: يلا تعال نجرب
الجد: انتبهوا زين السلاح ماينلعب فيه
سيف: ابشر
جا معاذ من السيارة بسلاحه اعطاه سيف
اخذه سيف يتفحصه: رهيب والله اتوقع انك بطل رمايه بما انه تستخدمه
معاذ: لاوالله بس اذا اشتهيت اتدرب استخدمه
طلع سيف والعيال ورا اصيل الي كانت مجهزه السلاح وبدت تجهز اهداف
سيف: لا هذي مب مقنعه انتي تجهزين اهدافك
اصيل: المقنع انك تجهزها لي لكني من اول انتظرك
وقف سيف وراها يراقب وقفتها وثباتها بمسكة السلاح عشان يتطمن يتركه بيدها
رمَت على اول اهدف وارتد جسمها بقوه مع السلاح ولا صابته
سيف: يبي لك تدريب من جديد
اصيل: يبي لي سلاح اخف
وقف سيف وراها مسك السلاح معها ثبته وقال: يلا انا اساعدك
قبل تصيب الهدف سبقها بتال بالسلاح الي معاه وقال بأبتسامة غرور لسيف: ايه قلت لنا مانشكك بقدرات بنتك؟
وقفت اصيل ووجهت السلاح لوجهه وقالت بمزح وغرور: شكل اهدافي بتتغير
ضحك سيف وسحب السلاح من يدها: اتفقنا مانوجه السلاح لأحد حتى بالمزح
اصيل: يلا نحاول مره ثانيه طيب
رجع سيف يساعدها وقال قبل ترمي: بتال ياويلك تتلقف بهدف واحد وركز على الصيد
مشى بتال بعيد شوي: اصيد لكم حمام الغداء؟
صابت اصيل الهدف وصرخت: ييسس
باسها سيف وضحك: يلا اذا قدرت غدانا واقف عليك
اصيل: بابا تعرف تصيد؟ علمني
سيف: لاوالله يا بابا ماصدت من زماان
طلعوا هند والبنات من المخيم يراقبون معاذ وبتال يحاولون يصيدون واصيل سيف يساعدها بالرماية وفيصل ومازن يناظرونهم ويضحكون عليهم
مهره: الله بتال ابي ارمي
بتال: طيب بس يخلص عمي سيف من السلاح الي معاه مو بهذا
اصيل: خذي مهره تبينه؟
مهره: لاعادي حبيبي اذا خلصتي
اصيل: خلاص والله خذيه
اخذته منها مهره وجا بتال يعلمها كيف توقف وتثبت يدينها لما ترمي ووقف وراها ماسكه معها
رمت مهره بعيييد عن الهدف
بتال: قصرتي تسلم رجلك
مهره ضحكت: خير اول مره اكيد بتكون كذا، خلاص يروع برجعه لأصيل
صاد معاذ اول مره وصرخ: تعللم يابتال
راح له بتال يضحك: يخرب بيتك كيف صدتها
معاذ اعطاه السلاح بضحكه: صدفه