أنا والمدام ونينا إجرام

الحلقة 24

يسمع شهاب الدق على باب الشقة وتمسك فيه نبيلة: شهاب. انا خايفة ..

تدخل إكرام :شهاب إلحق رجال المتوشحين عايزين يدخلوا بالكوة

شهاب : متوشحين!! إنت !! إنت ماتتكلميش خالص هم اللى متوحشين وإلا إنت اللى ست قادرة ,جبارة, عاملة لى عصيان وقلبتى الستات على رجالتهم وجاية تقولى لى إلحق؟ الحق إيه؟ إنت فاكرانى إيه هركوليز وإلا طرزان عاجبك المصيبة دى ؟

إكرام :نو مش عاجبانى بس لازم إعمل حاجة وإتصرف.

شهاب :دلوقتى إلحقنى ياشهاب وإتصرف يا شهاب وشهاب هايعمل لك إيه إن شاء الله؟ إتفضلى بقى روحى إنت وكلميهم قولى لهم خطبة عصماء دافعى عن الستات اللى لاماهم حواليكى علشان هقوق المرأة بتاعتك

إكرام :أنا كنت بأدافع عن هكوك مرءات ...

شهاب: هكوك مرءات ؟؟؟؟ ورينى بقى بطولتك ودافعى عنهم.

إكرام :سيلفو بليه ياشهاب

شهاب : سيلفوبليه إيه ؟ هى فيها سيلفوبلية إنت مش شايفة الرجالة برة شكلهم إيه؟ ده إحنا هاتنفرم النهاردة واللى طالع عليهم عايزين صاحب الشقة,, انا مالى إنتى اللى عملتى إنقلاب أنا أتعاقب ليه ... مرة تدافعى عن حقوق الطفل وانا اللى أنضرب والمرة دى عن حقوق المرأة وانا برضه اللى هانضرب؟ لأ أنضرب إيه؟ أنا اللى هاتقتل منك لله ياشهاب أشوف فيك يوم يابعيد

نبيلة :متدعيش على نفسك ياحبيبى

ينط من مكانه ويشد هدومه بزهق شهاب : مش بادعى على نفسى يانبيلة انا بادعى اللى الزفت اللى إسمه شهاب

إكرام :ماهو إنت إسمك شهاب

بعصبية شهاب :ياستى انا بأدعى على شهاب حفيد .......

تزغده نبيلة فى كتفه ويقول : إيه !!!! آه .... صحيح ,, خلاص بأدعى على نفسى أنا منى لله , حسبى الله ونعم الوكيل فى , أنا أستاهل ضرب الجزمة اللى وافقت على حاجة زى دى ومش جزمة واحدة ستين جزمة لأ محل جزم بحاله

يدخلوا الستات وهم خايفين وبيتكلموا فى وقت واحد وبيستنجدوا ويبص لهم شهاب بحيرة

شقة صفاء – الصالة

معتز واقف يبص من العين السحرية : ثفاء ياثفاء تعالى بسرعة

يبص تانى وينده :ياثفااااااء

تخرج من المطبخ : إيه يامعتز فيه إيه؟ ياثفاء ياثفاء كرهتنى فى إسمى إيه ؟ قولى يأأم أحمد , بلاش أم أحمد قولى ياأم قويق , أم جلمبو ,إن شاء الله أم 44 بس بلاش ثفاء دى بتعصبنى.

معتز :خلاث خلاث قربى

صفاء :عايز إيه ؟

معتز :تعالى بثى بثرعة