فى اليوم التالى - مكتب إلهام
إلهام قاعدة على مكتبها ويدخل شهاب بيه وعينه وارمة وزرقاء وبيعرج ووراه عم صالح شايل الشنطة وتقف وهى بتدارى ضحكتها
إلهام : صباح الخير يافندم ألف سلامة عليك
يبص لها بقرف ويدخل مكتبه ويخرج صالح من الأوضة ويقفل الباب ويضحكوا وتسأل إلهام : هو إيه اللى جرى له ؟ بيعرج ليه؟
عم صالح : إمبارح وقع فى أوضة المهندسين حتة وقعة
إلهام : ياراجل إن شالله دايما
عم صالح : والله المهندس عماد قالى ده إنت طلعت دعوتك مجابة ياآنسة إلهام تدعى عليه وفى نفس اليوم يقع مرتين وعينه تورم
إلهام : بس مفيش حاجة إتكسرت فيه لسه سليم أنا عايزة إصابات أكتر من كده
عم صالح : دعوة كمان منك تجيبه الأرض
إلهام ربنا يقدرنى على فعل الخير روح هات له قهوته بقى
عم صالح : وهاعمل لك واحد على حسابى بركاتك ياأنسة إستمرى فى الدعاء ربنا يقويكى
يخرج عم صالح وتضحك إلهام وتقعد تشتغل ويدخل موظف بسرعة ويقول: آنسة إلهام صحيح اللى عم صالح بيقوله ده دعوتك مجابة على هولاكو
إلهام : دى جت صدفة والله
الموظف : إزاى ده بيقول إنك دعيتى عليه ووقع وإتخبط كام مرة ... بأقولك إيه ماتدعى كده إن هولاكو
يعمل عمليه الزايدة ويقعد 15 ولا 20 يوم فى المستشفى
إلهام : الله يسامحك يا عم صالح فضحتنى
تدخل موظفة تانية وتقول : إلهام ياحبيبتى مش أنا صاحبتك إدعى إن هولاكو يلغى لى الخصم الله يخليكى
تبص لهم إلهام بغضب وتزعق : عم صااااااالح
شقة شهاب – الصالة - نبيلة تفتح الباب وتدخل صفاء
صفاء : صباح الخير يابلبل
نبيلة : صباح النور
صفاء : أنا شفتك من شباك المطبخ وإستغربت إنتى مرحتيش الشغل ليه؟ تعبانة؟
نبيلة : إترفدت
صفاء : يانهار إسود إترفدتى ليه؟
نبيلة : مانت عارفة كل يوم تأخير وبأغيب كتير المديرة زعقت لى قمت إنفجرت فيها ومشتنى
صفاء :طيب يعنى همك أكبر من همى قال وانا اللى جاية أفضفض مفيش داعى بقى معلش ياحبيبتى ربنا يعوض عليكى وتلاقى شغلانة أحسن
YOU ARE READING
أنا والمدام ونينا إجرام
Humorهذا العمل ليس رواية ولكنه مسلسل كوميدى خفيف عن العلاقات الأسرية وعقوق الأبناء شهاب يقبل أن يأهخذ عمة مديره لبيته على أنه هو إبن اخيها ويرعاها ثم يتعلق بها ويقرر أن تعيش معه
