أنا والمدام ونينا إجرام

الحلقة السادسة 6

شقة شهاب

نبيلة تخرج من الحجرة وهى مستعدة للذهاب للعمل وشهاب خلفها

نبيلة : توصلنى الشغل الأول ماشى

شهاب : ماشى ياللا

نبيلة : على – أميرة

يخرج الولاد من الحجرة وتقول نبيلة : إسمعو ياحبايبى هاتقعدو عند طنط صفاء زى كل سبت مش عايزة شقاوة واللى عنده مذاكرة يذاكر لحد مانرجع مفهوم

أميرة : حاضر ياماما

يرن جرس الباب ويجرى على يفتح وتدخل صفاء

على : صباح الخير ياطنط

توطى صفاء وشها فى الأرض ومتردش وتسأل نبيلة : مالك ياصفاء على الصبح ؟ حاطة وشك فى الأرض ليه

صفاء : ماهو انا فعلا وشى منك فى الأرض يانبيلة

نبيلة : حصل إيه ؟

شهاب : إحنا لسه هانحكى ونحكى مش عايز أتأخر

نبيلة : إستنى بس ياشهاب لما أشوف فيه إيه ؟

...... صفاء : أصلى

..... نبيلة : ها

...... صفاء : أنا يعنى

فيه إيه؟ نبيلة : قولى ياصفاء

صفاء : مش راضية تطلع منى

شهاب : الله اما طولك ياروح ياستى إنطقى وخلصينا أنا هاتأخر على الشغل

صفاء : لأ شوف أما أقولك , إنت هاتلزق تأخيرك فى وإلا إيه إنت عمرك مانزلت الشغل فى ميعادك وكل يوم تنزل متأخر وبأشوفك وإنت نازل السلم

وكأن وراك عفاريت لكن إنت بتتأخر بسبب الأحلام اللى طول الليل بتحلمها وبتضرب مديرك وعامل خناقات

تشاور لها نبيلة تسكت وتكمل صفاء : بتشاورى لى ليه يانبيلة مش إنت اللى حاكية لى

يبص شهاب لنبيلة بغضب وتدارى وشها بخجل ويقول شهاب بغضب : بتفضحينى يانبيلة حسابنا بعدين

نبيلة : كنت بأفضفض معاها بس ياحبيبى والا يعنى انفجر

شهاب : لأ إزاى؟ أتفضح أسهل , تفضفضى تقومى تحكى لها على أسرارنا عموما مش موضوعنا دلوقتى

تشاور نبيلة لصفاء إنها هاتخنقها وتقول: سورى يابلبل مكنتش اعرف إنه سر .

شهاب :نتغاضى عن الموضوع ده دلوقتى , إستلمى الولاد ياصفاء وخدى بالك منهم