يتفتح باب حجرة شهاب وتخرج إكرام وهى تتمطى
إكرام : أوووه نمت مرتاحة قوى نبيلة..... نبيلة إنتى فين ؟
تقترب وتبص حواليها :هم سابوا لى بيت وإلا إيه ؟
تقترب وتشوف الورقة : نبيلة خرجت ترى بيان أروح بقى أعمل نسكافيه وأستناها.
إكرام تدخل المطبخ وهى بتغنى وتملا الكاتل وتشغله وتجهز الكوب وتحط فيه النسكافيه تخرج من المطبخ وتفتح التليفزيون ويعرض فيلم إسماعيل يسن وتشير الساعة ل 9 ونص: أوه الفيلم اللى بأحبه
تقعد تتفرج وتضحك
بعد ساعة ,إكرام أمام التلفزيون تتابع الفيلم ويجف الماء فى الكاتل وتبدأ تطلع دخان
شهاب يدخل العمارة ومعه الأولاد
زحمة قدام شقة شهاب ورجال مطافى خارجين وعساكر
واقفة شهاب طالع السلم ومعاه الأولاد ويبصوا بفزع
شهاب : إيه؟ فيه إيه ؟
العسكرى : إبعد ياأستاذ
شهاب : أبعد إيه دى شقتى فيه إيه ؟
يقف شهاب عند الباب ويقول العسكرى : صاحب الشقة أهو يافندم
يقترب الظابط : إنت صاحب الشقة ؟
شهاب : أيوه إيه اللى حصل
الظابط :حريقة بسيطة
شهاب :يانهار إسود حريقة فى الشقة ؟
الظابط : متقلقش تم السيطرة عليها والحمد لله الخسائر مش كتير والهانم إصابتها مش كبيرة مجرد حرق فى إيدها وتم علاجه
شهاب :هانم مين ؟ مراتى !! نبيلة
تخرج نبيلة من الشقة بسرعة وتحضن شهاب :أنا هنا شهاب
يبعدها عنه ويبص عليها بتفحص : إنت كويسة فيكى حاجة
نبيلة :متخافش أنا محصليش حاجة مكنتش هنا ساعة الحريقة
شهاب :أمال الظابط بيقول لى الهانم مصابة إيه ؟ خضتنى ياأخى
الظابط :جدتك ياأستاذ شهاب
شهاب :جدتى مين ؟ أنا جدتى ماتت من زمان
تمسكه نبيلة من إيده علشان تفكره :جدتك ياشهاب نينا إكرام
شهاب :يانهار إسود نينا إكرام !! جرى لها حاجة ؟؟؟ هى كويسة
نبيلة : أيوه حاجة بسيطة متخافش بس فيه حاجة مهمة لازم أقول لك عليها قبل ماتدخل
شهاب :حاجة إيه ؟ خلينى أطمن على الولية دى امانة
إكرام قاعدة وشها مهبب وإيدها مربوطة وبتبكى وحولها بعض الجيران والأرض والفرش كله مبلول ميه ويدخل شهاب بسرعة ووراه نبيلة والأولاد ويقرب منها بلهفة
YOU ARE READING
أنا والمدام ونينا إجرام
Humorهذا العمل ليس رواية ولكنه مسلسل كوميدى خفيف عن العلاقات الأسرية وعقوق الأبناء شهاب يقبل أن يأهخذ عمة مديره لبيته على أنه هو إبن اخيها ويرعاها ثم يتعلق بها ويقرر أن تعيش معه
