شقة شهاب
شهاب ونبيلة عند الباب مع صفاء ومعتز وإبنهم
نبيلة :متشكرة قوى ياصفاء
صفاء :بتشكرينى على إيه
نبيلة :تعبكم معانا النهاردة وعلى الغداء
صفاء :إحنا جيران وبعدين جوزى هو اللى اكل نصه
يضحكوا وتقول نبيلة :مش عارفة من غيرك كنت عملت إيه
صفاء :كنتو أكلتم عيش وجبنة وتونة
يضحكوا وقول صفاء: متكبريش الموضوع والله ده كان يوم مسلى جدا وضحكنا كتير
أميرة : أيوه ياطنط أحنا إتبسطنا قوى
معتز :فعلا قضينا وقت لطيف جدا
صفاء : آه والله ده انا ضحكت النهارده ضحك مضحكتوش من زمان عايزين نبقى نعمل كده تانى
شهاب :خلاص المرة الجاية نغرق شقتك
صفاء :إيه رأيكم كل أسبوع نبقى نعمل مياه بارتى ونبلبط
على : ونلبس مايوهات بقى ونلعب
نبيلة :وماله ياحبيبى
إكرام :بس مش تلعبوا من غيرى
نبيلة :طبعا يانينا هى هاتحلى غير بيكى
شهاب :آه والمرة دى إن شاء الله نغرق المنطقة كلها انا مش عارف أقولكم إيه ؟ أنا كأنى وقعت بين
ناس مجانين ! إنتوا بتقولوا إيه ؟ مفيش أى إحساس بالمسؤلية عندكم
صفاء :هو إحنا قلنا إيه بس ؟
يرفع صباعه فى وش صفاء
شهاب :تهزروا وكأن مفيش حاجة حصلت
تزق صفاء إيده ناحية نبيلة : لأ حدد إتجاهاتك مراتك أهى
شهاب :مانت زى مراتى وهى زيك تفكيركم سطحى
صفاء : لأ حاسب على كلامك ماتقول حاجة يامعتز بدل مانت واقف زى تمثال رمسيس كده هو أنا كنت طابخة لك سد الحنك إتكلم ياراجل
يتنحنح معتز بقوة ويتخضوا منه
صفاء: أسد ياخواتى أسد أنا متجوزة أسد
معتز :تثبحوا على خير
تضحك نبيلة وتبص صفاء لمعتز وتقول :ده اللى ربنا قدرك عليه ؟ كسفتنى يامعتز إمشى قدامى تصبحوا على خير
YOU ARE READING
أنا والمدام ونينا إجرام
Humorهذا العمل ليس رواية ولكنه مسلسل كوميدى خفيف عن العلاقات الأسرية وعقوق الأبناء شهاب يقبل أن يأهخذ عمة مديره لبيته على أنه هو إبن اخيها ويرعاها ثم يتعلق بها ويقرر أن تعيش معه